| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. নানাতিত্থিযসাৰকসুত্তৰণ্ণনা
10. Nānātitthiyasāvakasuttavaṇṇanā
১১১. নানাতিত্থিযসাৰকাতি পুথুতিত্থিযানং সাৰকা। ছিন্দিতেতি হত্থচ্ছেদাদিৰসেন ছেদে। মারিতেতি মারণে। ন পাপং সমনুপস্সতীতি কিঞ্চি পাপং অত্থীতি ন পস্সতি, পরেসঞ্চ তথা পৰেদেতি। ৰিস্সাসন্তি ৰিস্সত্থভাৰং। ‘‘কতকম্মানম্পি ৰিপাকো নত্থী’’তি ৰদন্তো কতপাপানং অকতপুঞ্ঞানঞ্চ ৰিস্সত্থতং নিরাসঙ্কতং জনেতি।
111.Nānātitthiyasāvakāti puthutitthiyānaṃ sāvakā. Chinditeti hatthacchedādivasena chede. Māriteti māraṇe. Na pāpaṃ samanupassatīti kiñci pāpaṃ atthīti na passati, paresañca tathā pavedeti. Vissāsanti vissatthabhāvaṃ. ‘‘Katakammānampi vipāko natthī’’ti vadanto katapāpānaṃ akatapuññānañca vissatthataṃ nirāsaṅkataṃ janeti.
তপোজিগুচ্ছাযাতি তপসা অচেলৰতাদিনা পাপতো জিগুচ্ছনেন, ‘‘পাপং ৰিরাজযামা’’তি অচেলৰতাদিসমাদানেনাতি অত্থো। তস্মিঞ্হি সমাদানে ঠিতেন সংৰরেন সংৰুতচিত্তো সমন্নাগতো পিহিতো চ নাম হোতীতি ‘‘সুসংৰুতত্তো’’তিআদি ৰুত্তং। চত্তারো যামা ভাগা চতুযামা, চতুযামা এৰ চাতুযামা। ভাগত্থো হি ইধ যাম-সদ্দো যথা ‘‘রত্তিযং পঠমো যামো’’তি। সো পনেত্থ ভাগো সংৰরলক্খণোতি আহ ‘‘চাতুযামেন সুসংৰুতো’’তি, চতুকোট্ঠাসেন সংৰরেন সুট্ঠু সংৰুতোতি অত্থো। পটিক্খিত্তসব্বসীতোদকোতি পটিক্খিত্তসব্বসীতুদকপরিভোগো। সব্বেন পাপৰারণেন যুত্তোতি সব্বপ্পকারেন সংৰরলক্খণেন পাপৰারণেন সমন্নাগতো। ধুতপাপোতি সব্বেন নিজ্জরলক্খণেন পাপৰারণেনপি ধুতপাপো। ফুট্ঠোতি অট্ঠন্নম্পি কম্মানং খেপনেন ৰিক্খেপপ্পত্তিযা কম্মক্খযলক্খণেন সব্বেন পাপৰারণেন ফুট্ঠো, তং ফুসিত্ৰা ঠিতো। ন নিগুহন্তোতি ন নিগুহনহেতু দিট্ঠসুতে তথেৰ কথেন্তো।
Tapojigucchāyāti tapasā acelavatādinā pāpato jigucchanena, ‘‘pāpaṃ virājayāmā’’ti acelavatādisamādānenāti attho. Tasmiñhi samādāne ṭhitena saṃvarena saṃvutacitto samannāgato pihito ca nāma hotīti ‘‘susaṃvutatto’’tiādi vuttaṃ. Cattāro yāmā bhāgā catuyāmā, catuyāmā eva cātuyāmā. Bhāgattho hi idha yāma-saddo yathā ‘‘rattiyaṃ paṭhamo yāmo’’ti. So panettha bhāgo saṃvaralakkhaṇoti āha ‘‘cātuyāmena susaṃvuto’’ti, catukoṭṭhāsena saṃvarena suṭṭhu saṃvutoti attho. Paṭikkhittasabbasītodakoti paṭikkhittasabbasītudakaparibhogo. Sabbena pāpavāraṇena yuttoti sabbappakārena saṃvaralakkhaṇena pāpavāraṇena samannāgato. Dhutapāpoti sabbena nijjaralakkhaṇena pāpavāraṇenapi dhutapāpo. Phuṭṭhoti aṭṭhannampi kammānaṃ khepanena vikkhepappattiyā kammakkhayalakkhaṇena sabbena pāpavāraṇena phuṭṭho, taṃ phusitvā ṭhito. Na niguhantoti na niguhanahetu diṭṭhasute tatheva kathento.
নানাতিত্থিযানংযেৰ উপট্ঠাকোতি পরৰাদীনং সব্বেসংযেৰ তিত্থিযানং উপট্ঠাকো, তেসু সাধারণৰসেন অভিপ্পসন্নো। কোটিপ্পত্তাতি মোক্খাধিগমেন সমণধম্মে পত্তব্বমরিযাদপ্পত্তা।
Nānātitthiyānaṃyevaupaṭṭhākoti paravādīnaṃ sabbesaṃyeva titthiyānaṃ upaṭṭhāko, tesu sādhāraṇavasena abhippasanno. Koṭippattāti mokkhādhigamena samaṇadhamme pattabbamariyādappattā.
সহচরিতমত্তেনাতি সীহনাদেন সহ ৰস্সকরণমত্তেন। সীহেন সীহনাদং নদন্তেন সহেৰ সিঙ্গালেন অত্তনো সিঙ্গালরৰকরণমত্তেন। কোত্থুকোতি খুদ্দককোত্থু। আসঙ্কিতসমাচারোতি অত্তনা চ পরেহি চ আসঙ্কিতব্বসমাচারো। সপ্পুরিসানন্তি বুদ্ধাদীনং।
Sahacaritamattenāti sīhanādena saha vassakaraṇamattena. Sīhena sīhanādaṃ nadantena saheva siṅgālena attano siṅgālaravakaraṇamattena. Kotthukoti khuddakakotthu. Āsaṅkitasamācāroti attanā ca parehi ca āsaṅkitabbasamācāro. Sappurisānanti buddhādīnaṃ.
তস্সাতি ৰেগব্ভরিস্স দেৰপুত্তস্স। সরীরে অনুআৰিসীতি সরীরে অনুপৰিসিত্ৰা ৰিয আৰিসি। অধিমুচ্চীতি যথা গহিতস্স ৰসেন চিত্তং ন ৰত্ততি, অত্তনো এৰ ৰসে ৰত্ততি, এৰং অধিট্ঠহি। আযুত্তাতি দস্সনেন সংযুত্তা । পৰিৰেকিযন্তি কপ্পকৰত্থভুঞ্জনসেনাসনেহি পৰিৰিত্তভাৰং। তেনাহ ‘‘তে কিরা’’তিআদি। রূপে নিৰিট্ঠাতি চক্খুরূপধম্মে অভিনিৰিট্ঠা। তেনাহ ‘‘তণ্হাদিট্ঠীহি পতিট্ঠিতা’’তি। দেৰলোকপত্থনকামাতি দেৰলোকস্সেৰ অভিপত্থনকামা। মরণধম্মতায মাতিযা। তেনাহ ‘‘মাতিযাতি মচ্চা’’তি। পরলোকত্থাযাতি পরসম্পত্তিভাৰায লোকস্স অত্থায।
Tassāti vegabbharissa devaputtassa. Sarīre anuāvisīti sarīre anupavisitvā viya āvisi. Adhimuccīti yathā gahitassa vasena cittaṃ na vattati, attano eva vase vattati, evaṃ adhiṭṭhahi. Āyuttāti dassanena saṃyuttā . Pavivekiyanti kappakavatthabhuñjanasenāsanehi pavivittabhāvaṃ. Tenāha ‘‘te kirā’’tiādi. Rūpe niviṭṭhāti cakkhurūpadhamme abhiniviṭṭhā. Tenāha ‘‘taṇhādiṭṭhīhi patiṭṭhitā’’ti. Devalokapatthanakāmāti devalokasseva abhipatthanakāmā. Maraṇadhammatāya mātiyā. Tenāha ‘‘mātiyāti maccā’’ti. Paralokatthāyāti parasampattibhāvāya lokassa atthāya.
পভাসৰণ্ণাতি পভায সমানৰণ্ণা। কেসং পভাযাতি আহ ‘‘চন্দোভাসা’’তিআদি। সজ্ঝারাগপভাসৰণ্ণা ইন্দধনুপভাসৰণ্ণাতি পচ্চেকং যোজনা। আমো আমগন্ধো এতস্স অত্থীতি আমিসং। ৰধাযাতি ৰিদ্ধংসিতুং। রূপাতি রূপাযতনাদিরূপিধম্মা।
Pabhāsavaṇṇāti pabhāya samānavaṇṇā. Kesaṃ pabhāyāti āha ‘‘candobhāsā’’tiādi. Sajjhārāgapabhāsavaṇṇā indadhanupabhāsavaṇṇāti paccekaṃ yojanā. Āmo āmagandho etassa atthīti āmisaṃ. Vadhāyāti viddhaṃsituṃ. Rūpāti rūpāyatanādirūpidhammā.
রাজগহসমীপপ্পৰত্তীনং রাজগহিযানং। ‘‘সেতো’’তি কেলাসকূটো অধিপ্পেতোতি আহ ‘‘সেতোতি কেলাসো’’তি। কেনচি ন ঘট্টেতীতি অঘং, অন্তলিক্খন্তি আহ ‘‘অঘগামীনন্তি আকাসগামীন’’ন্তি। উদকং ধীযতি এত্থাতি উদধি, মহোদধি। ৰিপুলোতি ৰেপুল্লপব্বতো। হিমৰন্তপব্বতানন্তি হিমৰন্তপব্বতভাগানং। বুদ্ধো সেট্ঠো সীলসমাধিপঞ্ঞাৰিমুত্তিৰিমুত্তিঞাণদস্সনাদীহি সব্বগুণেহি।
Rājagahasamīpappavattīnaṃ rājagahiyānaṃ. ‘‘Seto’’ti kelāsakūṭo adhippetoti āha ‘‘setoti kelāso’’ti. Kenaci na ghaṭṭetīti aghaṃ, antalikkhanti āha ‘‘aghagāmīnanti ākāsagāmīna’’nti. Udakaṃ dhīyati etthāti udadhi, mahodadhi. Vipuloti vepullapabbato. Himavantapabbatānanti himavantapabbatabhāgānaṃ. Buddho seṭṭho sīlasamādhipaññāvimuttivimuttiñāṇadassanādīhi sabbaguṇehi.
নানাতিত্থিযসাৰকসুত্তৰণ্ণনা নিট্ঠিতা।
Nānātitthiyasāvakasuttavaṇṇanā niṭṭhitā.
ততিযৰগ্গৰণ্ণনা নিট্ঠিতা।
Tatiyavaggavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
দেৰপুত্তসংযুত্তৰণ্ণনায লীনত্থপ্পকাসনা সমত্তা।
Devaputtasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. নানাতিত্থিযসাৰকসুত্তং • 10. Nānātitthiyasāvakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. নানাতিত্থিযসাৰকসুত্তৰণ্ণনা • 10. Nānātitthiyasāvakasuttavaṇṇanā
