| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ನಾನಾತಿತ್ಥಿಯಸಾವಕಸುತ್ತವಣ್ಣನಾ
10. Nānātitthiyasāvakasuttavaṇṇanā
೧೧೧. ನಾನಾತಿತ್ಥಿಯಸಾವಕಾತಿ ಪುಥುತಿತ್ಥಿಯಾನಂ ಸಾವಕಾ। ಛಿನ್ದಿತೇತಿ ಹತ್ಥಚ್ಛೇದಾದಿವಸೇನ ಛೇದೇ। ಮಾರಿತೇತಿ ಮಾರಣೇ। ನ ಪಾಪಂ ಸಮನುಪಸ್ಸತೀತಿ ಕಿಞ್ಚಿ ಪಾಪಂ ಅತ್ಥೀತಿ ನ ಪಸ್ಸತಿ, ಪರೇಸಞ್ಚ ತಥಾ ಪವೇದೇತಿ। ವಿಸ್ಸಾಸನ್ತಿ ವಿಸ್ಸತ್ಥಭಾವಂ। ‘‘ಕತಕಮ್ಮಾನಮ್ಪಿ ವಿಪಾಕೋ ನತ್ಥೀ’’ತಿ ವದನ್ತೋ ಕತಪಾಪಾನಂ ಅಕತಪುಞ್ಞಾನಞ್ಚ ವಿಸ್ಸತ್ಥತಂ ನಿರಾಸಙ್ಕತಂ ಜನೇತಿ।
111.Nānātitthiyasāvakāti puthutitthiyānaṃ sāvakā. Chinditeti hatthacchedādivasena chede. Māriteti māraṇe. Na pāpaṃ samanupassatīti kiñci pāpaṃ atthīti na passati, paresañca tathā pavedeti. Vissāsanti vissatthabhāvaṃ. ‘‘Katakammānampi vipāko natthī’’ti vadanto katapāpānaṃ akatapuññānañca vissatthataṃ nirāsaṅkataṃ janeti.
ತಪೋಜಿಗುಚ್ಛಾಯಾತಿ ತಪಸಾ ಅಚೇಲವತಾದಿನಾ ಪಾಪತೋ ಜಿಗುಚ್ಛನೇನ, ‘‘ಪಾಪಂ ವಿರಾಜಯಾಮಾ’’ತಿ ಅಚೇಲವತಾದಿಸಮಾದಾನೇನಾತಿ ಅತ್ಥೋ। ತಸ್ಮಿಞ್ಹಿ ಸಮಾದಾನೇ ಠಿತೇನ ಸಂವರೇನ ಸಂವುತಚಿತ್ತೋ ಸಮನ್ನಾಗತೋ ಪಿಹಿತೋ ಚ ನಾಮ ಹೋತೀತಿ ‘‘ಸುಸಂವುತತ್ತೋ’’ತಿಆದಿ ವುತ್ತಂ। ಚತ್ತಾರೋ ಯಾಮಾ ಭಾಗಾ ಚತುಯಾಮಾ, ಚತುಯಾಮಾ ಏವ ಚಾತುಯಾಮಾ। ಭಾಗತ್ಥೋ ಹಿ ಇಧ ಯಾಮ-ಸದ್ದೋ ಯಥಾ ‘‘ರತ್ತಿಯಂ ಪಠಮೋ ಯಾಮೋ’’ತಿ। ಸೋ ಪನೇತ್ಥ ಭಾಗೋ ಸಂವರಲಕ್ಖಣೋತಿ ಆಹ ‘‘ಚಾತುಯಾಮೇನ ಸುಸಂವುತೋ’’ತಿ, ಚತುಕೋಟ್ಠಾಸೇನ ಸಂವರೇನ ಸುಟ್ಠು ಸಂವುತೋತಿ ಅತ್ಥೋ। ಪಟಿಕ್ಖಿತ್ತಸಬ್ಬಸೀತೋದಕೋತಿ ಪಟಿಕ್ಖಿತ್ತಸಬ್ಬಸೀತುದಕಪರಿಭೋಗೋ। ಸಬ್ಬೇನ ಪಾಪವಾರಣೇನ ಯುತ್ತೋತಿ ಸಬ್ಬಪ್ಪಕಾರೇನ ಸಂವರಲಕ್ಖಣೇನ ಪಾಪವಾರಣೇನ ಸಮನ್ನಾಗತೋ। ಧುತಪಾಪೋತಿ ಸಬ್ಬೇನ ನಿಜ್ಜರಲಕ್ಖಣೇನ ಪಾಪವಾರಣೇನಪಿ ಧುತಪಾಪೋ। ಫುಟ್ಠೋತಿ ಅಟ್ಠನ್ನಮ್ಪಿ ಕಮ್ಮಾನಂ ಖೇಪನೇನ ವಿಕ್ಖೇಪಪ್ಪತ್ತಿಯಾ ಕಮ್ಮಕ್ಖಯಲಕ್ಖಣೇನ ಸಬ್ಬೇನ ಪಾಪವಾರಣೇನ ಫುಟ್ಠೋ, ತಂ ಫುಸಿತ್ವಾ ಠಿತೋ। ನ ನಿಗುಹನ್ತೋತಿ ನ ನಿಗುಹನಹೇತು ದಿಟ್ಠಸುತೇ ತಥೇವ ಕಥೇನ್ತೋ।
Tapojigucchāyāti tapasā acelavatādinā pāpato jigucchanena, ‘‘pāpaṃ virājayāmā’’ti acelavatādisamādānenāti attho. Tasmiñhi samādāne ṭhitena saṃvarena saṃvutacitto samannāgato pihito ca nāma hotīti ‘‘susaṃvutatto’’tiādi vuttaṃ. Cattāro yāmā bhāgā catuyāmā, catuyāmā eva cātuyāmā. Bhāgattho hi idha yāma-saddo yathā ‘‘rattiyaṃ paṭhamo yāmo’’ti. So panettha bhāgo saṃvaralakkhaṇoti āha ‘‘cātuyāmena susaṃvuto’’ti, catukoṭṭhāsena saṃvarena suṭṭhu saṃvutoti attho. Paṭikkhittasabbasītodakoti paṭikkhittasabbasītudakaparibhogo. Sabbena pāpavāraṇena yuttoti sabbappakārena saṃvaralakkhaṇena pāpavāraṇena samannāgato. Dhutapāpoti sabbena nijjaralakkhaṇena pāpavāraṇenapi dhutapāpo. Phuṭṭhoti aṭṭhannampi kammānaṃ khepanena vikkhepappattiyā kammakkhayalakkhaṇena sabbena pāpavāraṇena phuṭṭho, taṃ phusitvā ṭhito. Na niguhantoti na niguhanahetu diṭṭhasute tatheva kathento.
ನಾನಾತಿತ್ಥಿಯಾನಂಯೇವ ಉಪಟ್ಠಾಕೋತಿ ಪರವಾದೀನಂ ಸಬ್ಬೇಸಂಯೇವ ತಿತ್ಥಿಯಾನಂ ಉಪಟ್ಠಾಕೋ, ತೇಸು ಸಾಧಾರಣವಸೇನ ಅಭಿಪ್ಪಸನ್ನೋ। ಕೋಟಿಪ್ಪತ್ತಾತಿ ಮೋಕ್ಖಾಧಿಗಮೇನ ಸಮಣಧಮ್ಮೇ ಪತ್ತಬ್ಬಮರಿಯಾದಪ್ಪತ್ತಾ।
Nānātitthiyānaṃyevaupaṭṭhākoti paravādīnaṃ sabbesaṃyeva titthiyānaṃ upaṭṭhāko, tesu sādhāraṇavasena abhippasanno. Koṭippattāti mokkhādhigamena samaṇadhamme pattabbamariyādappattā.
ಸಹಚರಿತಮತ್ತೇನಾತಿ ಸೀಹನಾದೇನ ಸಹ ವಸ್ಸಕರಣಮತ್ತೇನ। ಸೀಹೇನ ಸೀಹನಾದಂ ನದನ್ತೇನ ಸಹೇವ ಸಿಙ್ಗಾಲೇನ ಅತ್ತನೋ ಸಿಙ್ಗಾಲರವಕರಣಮತ್ತೇನ। ಕೋತ್ಥುಕೋತಿ ಖುದ್ದಕಕೋತ್ಥು। ಆಸಙ್ಕಿತಸಮಾಚಾರೋತಿ ಅತ್ತನಾ ಚ ಪರೇಹಿ ಚ ಆಸಙ್ಕಿತಬ್ಬಸಮಾಚಾರೋ। ಸಪ್ಪುರಿಸಾನನ್ತಿ ಬುದ್ಧಾದೀನಂ।
Sahacaritamattenāti sīhanādena saha vassakaraṇamattena. Sīhena sīhanādaṃ nadantena saheva siṅgālena attano siṅgālaravakaraṇamattena. Kotthukoti khuddakakotthu. Āsaṅkitasamācāroti attanā ca parehi ca āsaṅkitabbasamācāro. Sappurisānanti buddhādīnaṃ.
ತಸ್ಸಾತಿ ವೇಗಬ್ಭರಿಸ್ಸ ದೇವಪುತ್ತಸ್ಸ। ಸರೀರೇ ಅನುಆವಿಸೀತಿ ಸರೀರೇ ಅನುಪವಿಸಿತ್ವಾ ವಿಯ ಆವಿಸಿ। ಅಧಿಮುಚ್ಚೀತಿ ಯಥಾ ಗಹಿತಸ್ಸ ವಸೇನ ಚಿತ್ತಂ ನ ವತ್ತತಿ, ಅತ್ತನೋ ಏವ ವಸೇ ವತ್ತತಿ, ಏವಂ ಅಧಿಟ್ಠಹಿ। ಆಯುತ್ತಾತಿ ದಸ್ಸನೇನ ಸಂಯುತ್ತಾ । ಪವಿವೇಕಿಯನ್ತಿ ಕಪ್ಪಕವತ್ಥಭುಞ್ಜನಸೇನಾಸನೇಹಿ ಪವಿವಿತ್ತಭಾವಂ। ತೇನಾಹ ‘‘ತೇ ಕಿರಾ’’ತಿಆದಿ। ರೂಪೇ ನಿವಿಟ್ಠಾತಿ ಚಕ್ಖುರೂಪಧಮ್ಮೇ ಅಭಿನಿವಿಟ್ಠಾ। ತೇನಾಹ ‘‘ತಣ್ಹಾದಿಟ್ಠೀಹಿ ಪತಿಟ್ಠಿತಾ’’ತಿ। ದೇವಲೋಕಪತ್ಥನಕಾಮಾತಿ ದೇವಲೋಕಸ್ಸೇವ ಅಭಿಪತ್ಥನಕಾಮಾ। ಮರಣಧಮ್ಮತಾಯ ಮಾತಿಯಾ। ತೇನಾಹ ‘‘ಮಾತಿಯಾತಿ ಮಚ್ಚಾ’’ತಿ। ಪರಲೋಕತ್ಥಾಯಾತಿ ಪರಸಮ್ಪತ್ತಿಭಾವಾಯ ಲೋಕಸ್ಸ ಅತ್ಥಾಯ।
Tassāti vegabbharissa devaputtassa. Sarīre anuāvisīti sarīre anupavisitvā viya āvisi. Adhimuccīti yathā gahitassa vasena cittaṃ na vattati, attano eva vase vattati, evaṃ adhiṭṭhahi. Āyuttāti dassanena saṃyuttā . Pavivekiyanti kappakavatthabhuñjanasenāsanehi pavivittabhāvaṃ. Tenāha ‘‘te kirā’’tiādi. Rūpe niviṭṭhāti cakkhurūpadhamme abhiniviṭṭhā. Tenāha ‘‘taṇhādiṭṭhīhi patiṭṭhitā’’ti. Devalokapatthanakāmāti devalokasseva abhipatthanakāmā. Maraṇadhammatāya mātiyā. Tenāha ‘‘mātiyāti maccā’’ti. Paralokatthāyāti parasampattibhāvāya lokassa atthāya.
ಪಭಾಸವಣ್ಣಾತಿ ಪಭಾಯ ಸಮಾನವಣ್ಣಾ। ಕೇಸಂ ಪಭಾಯಾತಿ ಆಹ ‘‘ಚನ್ದೋಭಾಸಾ’’ತಿಆದಿ। ಸಜ್ಝಾರಾಗಪಭಾಸವಣ್ಣಾ ಇನ್ದಧನುಪಭಾಸವಣ್ಣಾತಿ ಪಚ್ಚೇಕಂ ಯೋಜನಾ। ಆಮೋ ಆಮಗನ್ಧೋ ಏತಸ್ಸ ಅತ್ಥೀತಿ ಆಮಿಸಂ। ವಧಾಯಾತಿ ವಿದ್ಧಂಸಿತುಂ। ರೂಪಾತಿ ರೂಪಾಯತನಾದಿರೂಪಿಧಮ್ಮಾ।
Pabhāsavaṇṇāti pabhāya samānavaṇṇā. Kesaṃ pabhāyāti āha ‘‘candobhāsā’’tiādi. Sajjhārāgapabhāsavaṇṇā indadhanupabhāsavaṇṇāti paccekaṃ yojanā. Āmo āmagandho etassa atthīti āmisaṃ. Vadhāyāti viddhaṃsituṃ. Rūpāti rūpāyatanādirūpidhammā.
ರಾಜಗಹಸಮೀಪಪ್ಪವತ್ತೀನಂ ರಾಜಗಹಿಯಾನಂ। ‘‘ಸೇತೋ’’ತಿ ಕೇಲಾಸಕೂಟೋ ಅಧಿಪ್ಪೇತೋತಿ ಆಹ ‘‘ಸೇತೋತಿ ಕೇಲಾಸೋ’’ತಿ। ಕೇನಚಿ ನ ಘಟ್ಟೇತೀತಿ ಅಘಂ, ಅನ್ತಲಿಕ್ಖನ್ತಿ ಆಹ ‘‘ಅಘಗಾಮೀನನ್ತಿ ಆಕಾಸಗಾಮೀನ’’ನ್ತಿ। ಉದಕಂ ಧೀಯತಿ ಏತ್ಥಾತಿ ಉದಧಿ, ಮಹೋದಧಿ। ವಿಪುಲೋತಿ ವೇಪುಲ್ಲಪಬ್ಬತೋ। ಹಿಮವನ್ತಪಬ್ಬತಾನನ್ತಿ ಹಿಮವನ್ತಪಬ್ಬತಭಾಗಾನಂ। ಬುದ್ಧೋ ಸೇಟ್ಠೋ ಸೀಲಸಮಾಧಿಪಞ್ಞಾವಿಮುತ್ತಿವಿಮುತ್ತಿಞಾಣದಸ್ಸನಾದೀಹಿ ಸಬ್ಬಗುಣೇಹಿ।
Rājagahasamīpappavattīnaṃ rājagahiyānaṃ. ‘‘Seto’’ti kelāsakūṭo adhippetoti āha ‘‘setoti kelāso’’ti. Kenaci na ghaṭṭetīti aghaṃ, antalikkhanti āha ‘‘aghagāmīnanti ākāsagāmīna’’nti. Udakaṃ dhīyati etthāti udadhi, mahodadhi. Vipuloti vepullapabbato. Himavantapabbatānanti himavantapabbatabhāgānaṃ. Buddho seṭṭho sīlasamādhipaññāvimuttivimuttiñāṇadassanādīhi sabbaguṇehi.
ನಾನಾತಿತ್ಥಿಯಸಾವಕಸುತ್ತವಣ್ಣನಾ ನಿಟ್ಠಿತಾ।
Nānātitthiyasāvakasuttavaṇṇanā niṭṭhitā.
ತತಿಯವಗ್ಗವಣ್ಣನಾ ನಿಟ್ಠಿತಾ।
Tatiyavaggavaṇṇanā niṭṭhitā.
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
Sāratthappakāsiniyā saṃyuttanikāya-aṭṭhakathāya
ದೇವಪುತ್ತಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Devaputtasaṃyuttavaṇṇanāya līnatthappakāsanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ನಾನಾತಿತ್ಥಿಯಸಾವಕಸುತ್ತಂ • 10. Nānātitthiyasāvakasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ನಾನಾತಿತ್ಥಿಯಸಾವಕಸುತ್ತವಣ್ಣನಾ • 10. Nānātitthiyasāvakasuttavaṇṇanā
