| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੧੦. ਨਾਨਾਤਿਤ੍ਥਿਯਸਾવਕਸੁਤ੍ਤવਣ੍ਣਨਾ
10. Nānātitthiyasāvakasuttavaṇṇanā
੧੧੧. ਨਾਨਾਤਿਤ੍ਥਿਯਸਾવਕਾਤਿ ਪੁਥੁਤਿਤ੍ਥਿਯਾਨਂ ਸਾવਕਾ। ਛਿਨ੍ਦਿਤੇਤਿ ਹਤ੍ਥਚ੍ਛੇਦਾਦਿવਸੇਨ ਛੇਦੇ। ਮਾਰਿਤੇਤਿ ਮਾਰਣੇ। ਨ ਪਾਪਂ ਸਮਨੁਪਸ੍ਸਤੀਤਿ ਕਿਞ੍ਚਿ ਪਾਪਂ ਅਤ੍ਥੀਤਿ ਨ ਪਸ੍ਸਤਿ, ਪਰੇਸਞ੍ਚ ਤਥਾ ਪવੇਦੇਤਿ। વਿਸ੍ਸਾਸਨ੍ਤਿ વਿਸ੍ਸਤ੍ਥਭਾવਂ। ‘‘ਕਤਕਮ੍ਮਾਨਮ੍ਪਿ વਿਪਾਕੋ ਨਤ੍ਥੀ’’ਤਿ વਦਨ੍ਤੋ ਕਤਪਾਪਾਨਂ ਅਕਤਪੁਞ੍ਞਾਨਞ੍ਚ વਿਸ੍ਸਤ੍ਥਤਂ ਨਿਰਾਸਙ੍ਕਤਂ ਜਨੇਤਿ।
111.Nānātitthiyasāvakāti puthutitthiyānaṃ sāvakā. Chinditeti hatthacchedādivasena chede. Māriteti māraṇe. Na pāpaṃ samanupassatīti kiñci pāpaṃ atthīti na passati, paresañca tathā pavedeti. Vissāsanti vissatthabhāvaṃ. ‘‘Katakammānampi vipāko natthī’’ti vadanto katapāpānaṃ akatapuññānañca vissatthataṃ nirāsaṅkataṃ janeti.
ਤਪੋਜਿਗੁਚ੍ਛਾਯਾਤਿ ਤਪਸਾ ਅਚੇਲવਤਾਦਿਨਾ ਪਾਪਤੋ ਜਿਗੁਚ੍ਛਨੇਨ, ‘‘ਪਾਪਂ વਿਰਾਜਯਾਮਾ’’ਤਿ ਅਚੇਲવਤਾਦਿਸਮਾਦਾਨੇਨਾਤਿ ਅਤ੍ਥੋ। ਤਸ੍ਮਿਞ੍ਹਿ ਸਮਾਦਾਨੇ ਠਿਤੇਨ ਸਂવਰੇਨ ਸਂવੁਤਚਿਤ੍ਤੋ ਸਮਨ੍ਨਾਗਤੋ ਪਿਹਿਤੋ ਚ ਨਾਮ ਹੋਤੀਤਿ ‘‘ਸੁਸਂવੁਤਤ੍ਤੋ’’ਤਿਆਦਿ વੁਤ੍ਤਂ। ਚਤ੍ਤਾਰੋ ਯਾਮਾ ਭਾਗਾ ਚਤੁਯਾਮਾ, ਚਤੁਯਾਮਾ ਏવ ਚਾਤੁਯਾਮਾ। ਭਾਗਤ੍ਥੋ ਹਿ ਇਧ ਯਾਮ-ਸਦ੍ਦੋ ਯਥਾ ‘‘ਰਤ੍ਤਿਯਂ ਪਠਮੋ ਯਾਮੋ’’ਤਿ। ਸੋ ਪਨੇਤ੍ਥ ਭਾਗੋ ਸਂવਰਲਕ੍ਖਣੋਤਿ ਆਹ ‘‘ਚਾਤੁਯਾਮੇਨ ਸੁਸਂવੁਤੋ’’ਤਿ, ਚਤੁਕੋਟ੍ਠਾਸੇਨ ਸਂવਰੇਨ ਸੁਟ੍ਠੁ ਸਂવੁਤੋਤਿ ਅਤ੍ਥੋ। ਪਟਿਕ੍ਖਿਤ੍ਤਸਬ੍ਬਸੀਤੋਦਕੋਤਿ ਪਟਿਕ੍ਖਿਤ੍ਤਸਬ੍ਬਸੀਤੁਦਕਪਰਿਭੋਗੋ। ਸਬ੍ਬੇਨ ਪਾਪવਾਰਣੇਨ ਯੁਤ੍ਤੋਤਿ ਸਬ੍ਬਪ੍ਪਕਾਰੇਨ ਸਂવਰਲਕ੍ਖਣੇਨ ਪਾਪવਾਰਣੇਨ ਸਮਨ੍ਨਾਗਤੋ। ਧੁਤਪਾਪੋਤਿ ਸਬ੍ਬੇਨ ਨਿਜ੍ਜਰਲਕ੍ਖਣੇਨ ਪਾਪવਾਰਣੇਨਪਿ ਧੁਤਪਾਪੋ। ਫੁਟ੍ਠੋਤਿ ਅਟ੍ਠਨ੍ਨਮ੍ਪਿ ਕਮ੍ਮਾਨਂ ਖੇਪਨੇਨ વਿਕ੍ਖੇਪਪ੍ਪਤ੍ਤਿਯਾ ਕਮ੍ਮਕ੍ਖਯਲਕ੍ਖਣੇਨ ਸਬ੍ਬੇਨ ਪਾਪવਾਰਣੇਨ ਫੁਟ੍ਠੋ, ਤਂ ਫੁਸਿਤ੍વਾ ਠਿਤੋ। ਨ ਨਿਗੁਹਨ੍ਤੋਤਿ ਨ ਨਿਗੁਹਨਹੇਤੁ ਦਿਟ੍ਠਸੁਤੇ ਤਥੇવ ਕਥੇਨ੍ਤੋ।
Tapojigucchāyāti tapasā acelavatādinā pāpato jigucchanena, ‘‘pāpaṃ virājayāmā’’ti acelavatādisamādānenāti attho. Tasmiñhi samādāne ṭhitena saṃvarena saṃvutacitto samannāgato pihito ca nāma hotīti ‘‘susaṃvutatto’’tiādi vuttaṃ. Cattāro yāmā bhāgā catuyāmā, catuyāmā eva cātuyāmā. Bhāgattho hi idha yāma-saddo yathā ‘‘rattiyaṃ paṭhamo yāmo’’ti. So panettha bhāgo saṃvaralakkhaṇoti āha ‘‘cātuyāmena susaṃvuto’’ti, catukoṭṭhāsena saṃvarena suṭṭhu saṃvutoti attho. Paṭikkhittasabbasītodakoti paṭikkhittasabbasītudakaparibhogo. Sabbena pāpavāraṇena yuttoti sabbappakārena saṃvaralakkhaṇena pāpavāraṇena samannāgato. Dhutapāpoti sabbena nijjaralakkhaṇena pāpavāraṇenapi dhutapāpo. Phuṭṭhoti aṭṭhannampi kammānaṃ khepanena vikkhepappattiyā kammakkhayalakkhaṇena sabbena pāpavāraṇena phuṭṭho, taṃ phusitvā ṭhito. Na niguhantoti na niguhanahetu diṭṭhasute tatheva kathento.
ਨਾਨਾਤਿਤ੍ਥਿਯਾਨਂਯੇવ ਉਪਟ੍ਠਾਕੋਤਿ ਪਰવਾਦੀਨਂ ਸਬ੍ਬੇਸਂਯੇવ ਤਿਤ੍ਥਿਯਾਨਂ ਉਪਟ੍ਠਾਕੋ, ਤੇਸੁ ਸਾਧਾਰਣવਸੇਨ ਅਭਿਪ੍ਪਸਨ੍ਨੋ। ਕੋਟਿਪ੍ਪਤ੍ਤਾਤਿ ਮੋਕ੍ਖਾਧਿਗਮੇਨ ਸਮਣਧਮ੍ਮੇ ਪਤ੍ਤਬ੍ਬਮਰਿਯਾਦਪ੍ਪਤ੍ਤਾ।
Nānātitthiyānaṃyevaupaṭṭhākoti paravādīnaṃ sabbesaṃyeva titthiyānaṃ upaṭṭhāko, tesu sādhāraṇavasena abhippasanno. Koṭippattāti mokkhādhigamena samaṇadhamme pattabbamariyādappattā.
ਸਹਚਰਿਤਮਤ੍ਤੇਨਾਤਿ ਸੀਹਨਾਦੇਨ ਸਹ વਸ੍ਸਕਰਣਮਤ੍ਤੇਨ। ਸੀਹੇਨ ਸੀਹਨਾਦਂ ਨਦਨ੍ਤੇਨ ਸਹੇવ ਸਿਙ੍ਗਾਲੇਨ ਅਤ੍ਤਨੋ ਸਿਙ੍ਗਾਲਰવਕਰਣਮਤ੍ਤੇਨ। ਕੋਤ੍ਥੁਕੋਤਿ ਖੁਦ੍ਦਕਕੋਤ੍ਥੁ। ਆਸਙ੍ਕਿਤਸਮਾਚਾਰੋਤਿ ਅਤ੍ਤਨਾ ਚ ਪਰੇਹਿ ਚ ਆਸਙ੍ਕਿਤਬ੍ਬਸਮਾਚਾਰੋ। ਸਪ੍ਪੁਰਿਸਾਨਨ੍ਤਿ ਬੁਦ੍ਧਾਦੀਨਂ।
Sahacaritamattenāti sīhanādena saha vassakaraṇamattena. Sīhena sīhanādaṃ nadantena saheva siṅgālena attano siṅgālaravakaraṇamattena. Kotthukoti khuddakakotthu. Āsaṅkitasamācāroti attanā ca parehi ca āsaṅkitabbasamācāro. Sappurisānanti buddhādīnaṃ.
ਤਸ੍ਸਾਤਿ વੇਗਬ੍ਭਰਿਸ੍ਸ ਦੇવਪੁਤ੍ਤਸ੍ਸ। ਸਰੀਰੇ ਅਨੁਆવਿਸੀਤਿ ਸਰੀਰੇ ਅਨੁਪવਿਸਿਤ੍વਾ વਿਯ ਆવਿਸਿ। ਅਧਿਮੁਚ੍ਚੀਤਿ ਯਥਾ ਗਹਿਤਸ੍ਸ વਸੇਨ ਚਿਤ੍ਤਂ ਨ વਤ੍ਤਤਿ, ਅਤ੍ਤਨੋ ਏવ વਸੇ વਤ੍ਤਤਿ, ਏવਂ ਅਧਿਟ੍ਠਹਿ। ਆਯੁਤ੍ਤਾਤਿ ਦਸ੍ਸਨੇਨ ਸਂਯੁਤ੍ਤਾ । ਪવਿવੇਕਿਯਨ੍ਤਿ ਕਪ੍ਪਕવਤ੍ਥਭੁਞ੍ਜਨਸੇਨਾਸਨੇਹਿ ਪવਿવਿਤ੍ਤਭਾવਂ। ਤੇਨਾਹ ‘‘ਤੇ ਕਿਰਾ’’ਤਿਆਦਿ। ਰੂਪੇ ਨਿવਿਟ੍ਠਾਤਿ ਚਕ੍ਖੁਰੂਪਧਮ੍ਮੇ ਅਭਿਨਿવਿਟ੍ਠਾ। ਤੇਨਾਹ ‘‘ਤਣ੍ਹਾਦਿਟ੍ਠੀਹਿ ਪਤਿਟ੍ਠਿਤਾ’’ਤਿ। ਦੇવਲੋਕਪਤ੍ਥਨਕਾਮਾਤਿ ਦੇવਲੋਕਸ੍ਸੇવ ਅਭਿਪਤ੍ਥਨਕਾਮਾ। ਮਰਣਧਮ੍ਮਤਾਯ ਮਾਤਿਯਾ। ਤੇਨਾਹ ‘‘ਮਾਤਿਯਾਤਿ ਮਚ੍ਚਾ’’ਤਿ। ਪਰਲੋਕਤ੍ਥਾਯਾਤਿ ਪਰਸਮ੍ਪਤ੍ਤਿਭਾવਾਯ ਲੋਕਸ੍ਸ ਅਤ੍ਥਾਯ।
Tassāti vegabbharissa devaputtassa. Sarīre anuāvisīti sarīre anupavisitvā viya āvisi. Adhimuccīti yathā gahitassa vasena cittaṃ na vattati, attano eva vase vattati, evaṃ adhiṭṭhahi. Āyuttāti dassanena saṃyuttā . Pavivekiyanti kappakavatthabhuñjanasenāsanehi pavivittabhāvaṃ. Tenāha ‘‘te kirā’’tiādi. Rūpe niviṭṭhāti cakkhurūpadhamme abhiniviṭṭhā. Tenāha ‘‘taṇhādiṭṭhīhi patiṭṭhitā’’ti. Devalokapatthanakāmāti devalokasseva abhipatthanakāmā. Maraṇadhammatāya mātiyā. Tenāha ‘‘mātiyāti maccā’’ti. Paralokatthāyāti parasampattibhāvāya lokassa atthāya.
ਪਭਾਸવਣ੍ਣਾਤਿ ਪਭਾਯ ਸਮਾਨવਣ੍ਣਾ। ਕੇਸਂ ਪਭਾਯਾਤਿ ਆਹ ‘‘ਚਨ੍ਦੋਭਾਸਾ’’ਤਿਆਦਿ। ਸਜ੍ਝਾਰਾਗਪਭਾਸવਣ੍ਣਾ ਇਨ੍ਦਧਨੁਪਭਾਸવਣ੍ਣਾਤਿ ਪਚ੍ਚੇਕਂ ਯੋਜਨਾ। ਆਮੋ ਆਮਗਨ੍ਧੋ ਏਤਸ੍ਸ ਅਤ੍ਥੀਤਿ ਆਮਿਸਂ। વਧਾਯਾਤਿ વਿਦ੍ਧਂਸਿਤੁਂ। ਰੂਪਾਤਿ ਰੂਪਾਯਤਨਾਦਿਰੂਪਿਧਮ੍ਮਾ।
Pabhāsavaṇṇāti pabhāya samānavaṇṇā. Kesaṃ pabhāyāti āha ‘‘candobhāsā’’tiādi. Sajjhārāgapabhāsavaṇṇā indadhanupabhāsavaṇṇāti paccekaṃ yojanā. Āmo āmagandho etassa atthīti āmisaṃ. Vadhāyāti viddhaṃsituṃ. Rūpāti rūpāyatanādirūpidhammā.
ਰਾਜਗਹਸਮੀਪਪ੍ਪવਤ੍ਤੀਨਂ ਰਾਜਗਹਿਯਾਨਂ। ‘‘ਸੇਤੋ’’ਤਿ ਕੇਲਾਸਕੂਟੋ ਅਧਿਪ੍ਪੇਤੋਤਿ ਆਹ ‘‘ਸੇਤੋਤਿ ਕੇਲਾਸੋ’’ਤਿ। ਕੇਨਚਿ ਨ ਘਟ੍ਟੇਤੀਤਿ ਅਘਂ, ਅਨ੍ਤਲਿਕ੍ਖਨ੍ਤਿ ਆਹ ‘‘ਅਘਗਾਮੀਨਨ੍ਤਿ ਆਕਾਸਗਾਮੀਨ’’ਨ੍ਤਿ। ਉਦਕਂ ਧੀਯਤਿ ਏਤ੍ਥਾਤਿ ਉਦਧਿ, ਮਹੋਦਧਿ। વਿਪੁਲੋਤਿ વੇਪੁਲ੍ਲਪਬ੍ਬਤੋ। ਹਿਮવਨ੍ਤਪਬ੍ਬਤਾਨਨ੍ਤਿ ਹਿਮવਨ੍ਤਪਬ੍ਬਤਭਾਗਾਨਂ। ਬੁਦ੍ਧੋ ਸੇਟ੍ਠੋ ਸੀਲਸਮਾਧਿਪਞ੍ਞਾવਿਮੁਤ੍ਤਿવਿਮੁਤ੍ਤਿਞਾਣਦਸ੍ਸਨਾਦੀਹਿ ਸਬ੍ਬਗੁਣੇਹਿ।
Rājagahasamīpappavattīnaṃ rājagahiyānaṃ. ‘‘Seto’’ti kelāsakūṭo adhippetoti āha ‘‘setoti kelāso’’ti. Kenaci na ghaṭṭetīti aghaṃ, antalikkhanti āha ‘‘aghagāmīnanti ākāsagāmīna’’nti. Udakaṃ dhīyati etthāti udadhi, mahodadhi. Vipuloti vepullapabbato. Himavantapabbatānanti himavantapabbatabhāgānaṃ. Buddho seṭṭho sīlasamādhipaññāvimuttivimuttiñāṇadassanādīhi sabbaguṇehi.
ਨਾਨਾਤਿਤ੍ਥਿਯਸਾવਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Nānātitthiyasāvakasuttavaṇṇanā niṭṭhitā.
ਤਤਿਯવਗ੍ਗવਣ੍ਣਨਾ ਨਿਟ੍ਠਿਤਾ।
Tatiyavaggavaṇṇanā niṭṭhitā.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
Sāratthappakāsiniyā saṃyuttanikāya-aṭṭhakathāya
ਦੇવਪੁਤ੍ਤਸਂਯੁਤ੍ਤવਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ।
Devaputtasaṃyuttavaṇṇanāya līnatthappakāsanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਨਾਨਾਤਿਤ੍ਥਿਯਸਾવਕਸੁਤ੍ਤਂ • 10. Nānātitthiyasāvakasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧੦. ਨਾਨਾਤਿਤ੍ਥਿਯਸਾવਕਸੁਤ੍ਤવਣ੍ਣਨਾ • 10. Nānātitthiyasāvakasuttavaṇṇanā
