| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஞாணவத்து²ஸுத்தவண்ணனா
3. Ñāṇavatthusuttavaṇṇanā
33. ததியே தங் ஸுணாதா²தி தங் ஞாணவத்து²தே³ஸனங் ஸுணாத². ஞாணவத்தூ²னீதி செத்த² ஞாணமேவ ஞாணவத்தூ²தி வேதி³தப்³ப³ங். ஜராமரணே ஞாணந்திஆதீ³ஸு சதூஸு பட²மங் ஸவனமயஞாணங் ஸம்மஸனஞாணங் படிவேத⁴ஞாணங் பச்சவெக்க²ணஞாணந்தி சதுப்³பி³த⁴ங் வட்டதி, ததா² து³தியங். ததியங் பன ட²பெத்வா ஸம்மஸனஞாணங் திவித⁴மேவ ஹோதி, ததா² சதுத்த²ங். லோகுத்தரத⁴ம்மேஸு ஹி ஸம்மஸனங் நாம நத்தி². ஜாதியா ஞாணந்திஆதீ³ஸுபி ஏஸேவ நயோ. இமினா த⁴ம்மேனாதி இமினா சதுஸச்சத⁴ம்மேன வா மக்³க³ஞாணத⁴ம்மேன வா.
33. Tatiye taṃ suṇāthāti taṃ ñāṇavatthudesanaṃ suṇātha. Ñāṇavatthūnīti cettha ñāṇameva ñāṇavatthūti veditabbaṃ. Jarāmaraṇe ñāṇantiādīsu catūsu paṭhamaṃ savanamayañāṇaṃ sammasanañāṇaṃ paṭivedhañāṇaṃ paccavekkhaṇañāṇanti catubbidhaṃ vaṭṭati, tathā dutiyaṃ. Tatiyaṃ pana ṭhapetvā sammasanañāṇaṃ tividhameva hoti, tathā catutthaṃ. Lokuttaradhammesu hi sammasanaṃ nāma natthi. Jātiyā ñāṇantiādīsupi eseva nayo. Iminā dhammenāti iminā catusaccadhammena vā maggañāṇadhammena vā.
தி³ட்டே²னாதிஆதீ³ஸு தி³ட்டே²னாதி ஞாணசக்கு²னா தி³ட்டே²ன. விதி³தேனாதி பஞ்ஞாய விதி³தேன. அகாலிகேனாதி கிஞ்சி காலங் அனதிக்கமித்வா படிவேதா⁴னந்தரங்யேவ ப²லதா³யகேன. பத்தேனாதி அதி⁴க³தேன. பரியோகா³ள்ஹேனாதி பரியோகா³ஹிதேன பஞ்ஞாய அனுபவிட்டே²ன. அதீதானாக³தே நயங் நேதீதி ‘‘யே கோ² கேசீ’’திஆதி³னா நயேன அதீதே ச அனாக³தே ச நயங் நேதி. எத்த² ச ந சதுஸச்சத⁴ம்மேன வா மக்³க³ஞாணத⁴ம்மேன வா ஸக்கா அதீதானாக³தே நயங் நேதுங், சதுஸச்சே பன மக்³க³ஞாணேன படிவித்³தே⁴ பரதோ பச்சவெக்க²ணஞாணங் நாம ஹோதி. தேன நயங் நேதீதி வேதி³தப்³பா³. அப்³ப⁴ஞ்ஞங்ஸூதி அபி⁴அஞ்ஞங்ஸு ஜானிங்ஸு. ஸெய்யதா²பாஹங், ஏதரஹீதி யதா² அஹங் ஏதரஹி சதுஸச்சவஸேன ஜானாமி. அன்வயே ஞாணந்தி அனுஅயே ஞாணங், த⁴ம்மஞாணஸ்ஸ அனுக³மனே ஞாணங், பச்சவெக்க²ணஞாணஸ்ஸேதங் நாமங். த⁴ம்மே ஞாணந்தி மக்³க³ஞாணங். இமஸ்மிங் ஸுத்தே கீ²ணாஸவஸ்ஸ ஸெக்க²பூ⁴மி கதி²தா ஹோதி. ததியங்.
Diṭṭhenātiādīsu diṭṭhenāti ñāṇacakkhunā diṭṭhena. Viditenāti paññāya viditena. Akālikenāti kiñci kālaṃ anatikkamitvā paṭivedhānantaraṃyeva phaladāyakena. Pattenāti adhigatena. Pariyogāḷhenāti pariyogāhitena paññāya anupaviṭṭhena. Atītānāgate nayaṃ netīti ‘‘ye kho kecī’’tiādinā nayena atīte ca anāgate ca nayaṃ neti. Ettha ca na catusaccadhammena vā maggañāṇadhammena vā sakkā atītānāgate nayaṃ netuṃ, catusacce pana maggañāṇena paṭividdhe parato paccavekkhaṇañāṇaṃ nāma hoti. Tena nayaṃ netīti veditabbā. Abbhaññaṃsūti abhiaññaṃsu jāniṃsu. Seyyathāpāhaṃ, etarahīti yathā ahaṃ etarahi catusaccavasena jānāmi. Anvaye ñāṇanti anuaye ñāṇaṃ, dhammañāṇassa anugamane ñāṇaṃ, paccavekkhaṇañāṇassetaṃ nāmaṃ. Dhamme ñāṇanti maggañāṇaṃ. Imasmiṃ sutte khīṇāsavassa sekkhabhūmi kathitā hoti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஞாணவத்து²ஸுத்தங் • 3. Ñāṇavatthusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஞாணவத்து²ஸுத்தவண்ணனா • 3. Ñāṇavatthusuttavaṇṇanā
