| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༣. ཉཱཎཝཏྠུསུཏྟཝཎྞནཱ
3. Ñāṇavatthusuttavaṇṇanā
༣༣. ཏཏིཡེ ཏཾ སུཎཱཐཱཏི ཏཾ ཉཱཎཝཏྠུདེསནཾ སུཎཱཐ། ཉཱཎཝཏྠཱུནཱིཏི ཙེཏྠ ཉཱཎམེཝ ཉཱཎཝཏྠཱུཏི ཝེདིཏབྦཾ། ཛརཱམརཎེ ཉཱཎནྟིཨཱདཱིསུ ཙཏཱུསུ པཋམཾ སཝནམཡཉཱཎཾ སམྨསནཉཱཎཾ པཊིཝེདྷཉཱཎཾ པཙྩཝེཀྑཎཉཱཎནྟི ཙཏུབྦིདྷཾ ཝཊྚཏི, ཏཐཱ དུཏིཡཾ། ཏཏིཡཾ པན ཋཔེཏྭཱ སམྨསནཉཱཎཾ ཏིཝིདྷམེཝ ཧོཏི, ཏཐཱ ཙཏུཏྠཾ། ལོཀུཏྟརདྷམྨེསུ ཧི སམྨསནཾ ནཱམ ནཏྠི། ཛཱཏིཡཱ ཉཱཎནྟིཨཱདཱིསུཔི ཨེསེཝ ནཡོ། ཨིམིནཱ དྷམྨེནཱཏི ཨིམིནཱ ཙཏུསཙྩདྷམྨེན ཝཱ མགྒཉཱཎདྷམྨེན ཝཱ།
33. Tatiye taṃ suṇāthāti taṃ ñāṇavatthudesanaṃ suṇātha. Ñāṇavatthūnīti cettha ñāṇameva ñāṇavatthūti veditabbaṃ. Jarāmaraṇe ñāṇantiādīsu catūsu paṭhamaṃ savanamayañāṇaṃ sammasanañāṇaṃ paṭivedhañāṇaṃ paccavekkhaṇañāṇanti catubbidhaṃ vaṭṭati, tathā dutiyaṃ. Tatiyaṃ pana ṭhapetvā sammasanañāṇaṃ tividhameva hoti, tathā catutthaṃ. Lokuttaradhammesu hi sammasanaṃ nāma natthi. Jātiyā ñāṇantiādīsupi eseva nayo. Iminā dhammenāti iminā catusaccadhammena vā maggañāṇadhammena vā.
དིཊྛེནཱཏིཨཱདཱིསུ དིཊྛེནཱཏི ཉཱཎཙཀྑུནཱ དིཊྛེན། ཝིདིཏེནཱཏི པཉྙཱཡ ཝིདིཏེན། ཨཀཱལིཀེནཱཏི ཀིཉྩི ཀཱལཾ ཨནཏིཀྐམིཏྭཱ པཊིཝེདྷཱནནྟརཾཡེཝ ཕལདཱཡཀེན། པཏྟེནཱཏི ཨདྷིགཏེན། པརིཡོགཱལ༹ྷེནཱཏི པརིཡོགཱཧིཏེན པཉྙཱཡ ཨནུཔཝིཊྛེན། ཨཏཱིཏཱནཱགཏེ ནཡཾ ནེཏཱིཏི ‘‘ཡེ ཁོ ཀེཙཱི’’ཏིཨཱདིནཱ ནཡེན ཨཏཱིཏེ ཙ ཨནཱགཏེ ཙ ནཡཾ ནེཏི། ཨེཏྠ ཙ ན ཙཏུསཙྩདྷམྨེན ཝཱ མགྒཉཱཎདྷམྨེན ཝཱ སཀྐཱ ཨཏཱིཏཱནཱགཏེ ནཡཾ ནེཏུཾ, ཙཏུསཙྩེ པན མགྒཉཱཎེན པཊིཝིདྡྷེ པརཏོ པཙྩཝེཀྑཎཉཱཎཾ ནཱམ ཧོཏི། ཏེན ནཡཾ ནེཏཱིཏི ཝེདིཏབྦཱ། ཨབྦྷཉྙཾསཱུཏི ཨབྷིཨཉྙཾསུ ཛཱནིཾསུ། སེཡྻཐཱཔཱཧཾ, ཨེཏརཧཱིཏི ཡཐཱ ཨཧཾ ཨེཏརཧི ཙཏུསཙྩཝསེན ཛཱནཱམི། ཨནྭཡེ ཉཱཎནྟི ཨནུཨཡེ ཉཱཎཾ, དྷམྨཉཱཎསྶ ཨནུགམནེ ཉཱཎཾ, པཙྩཝེཀྑཎཉཱཎསྶེཏཾ ནཱམཾ། དྷམྨེ ཉཱཎནྟི མགྒཉཱཎཾ། ཨིམསྨིཾ སུཏྟེ ཁཱིཎཱསཝསྶ སེཀྑབྷཱུམི ཀཐིཏཱ ཧོཏི། ཏཏིཡཾ།
Diṭṭhenātiādīsu diṭṭhenāti ñāṇacakkhunā diṭṭhena. Viditenāti paññāya viditena. Akālikenāti kiñci kālaṃ anatikkamitvā paṭivedhānantaraṃyeva phaladāyakena. Pattenāti adhigatena. Pariyogāḷhenāti pariyogāhitena paññāya anupaviṭṭhena. Atītānāgate nayaṃ netīti ‘‘ye kho kecī’’tiādinā nayena atīte ca anāgate ca nayaṃ neti. Ettha ca na catusaccadhammena vā maggañāṇadhammena vā sakkā atītānāgate nayaṃ netuṃ, catusacce pana maggañāṇena paṭividdhe parato paccavekkhaṇañāṇaṃ nāma hoti. Tena nayaṃ netīti veditabbā. Abbhaññaṃsūti abhiaññaṃsu jāniṃsu. Seyyathāpāhaṃ, etarahīti yathā ahaṃ etarahi catusaccavasena jānāmi. Anvaye ñāṇanti anuaye ñāṇaṃ, dhammañāṇassa anugamane ñāṇaṃ, paccavekkhaṇañāṇassetaṃ nāmaṃ. Dhamme ñāṇanti maggañāṇaṃ. Imasmiṃ sutte khīṇāsavassa sekkhabhūmi kathitā hoti. Tatiyaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. ཉཱཎཝཏྠུསུཏྟཾ • 3. Ñāṇavatthusuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. ཉཱཎཝཏྠུསུཏྟཝཎྞནཱ • 3. Ñāṇavatthusuttavaṇṇanā
