| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. நந்த³கலிச்ச²விஸுத்தங்
10. Nandakalicchavisuttaṃ
1026. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² நந்த³கோ லிச்ச²விமஹாமத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² நந்த³கங் லிச்ச²விமஹாமத்தங் ப⁴க³வா ஏதத³வோச –
1026. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho nandako licchavimahāmatto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho nandakaṃ licchavimahāmattaṃ bhagavā etadavoca –
‘‘சதூஹி கோ², நந்த³க, த⁴ம்மேஹி ஸமன்னாக³தோ அரியஸாவகோ ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. கதமேஹி சதூஹி? இத⁴, நந்த³க, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. இமேஹி கோ², நந்த³க, சதூஹி த⁴ம்மேஹி ஸமன்னாக³தோ அரியஸாவகோ ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ.
‘‘Catūhi kho, nandaka, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo. Katamehi catūhi? Idha, nandaka, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Imehi kho, nandaka, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘இமேஹி ச பன, நந்த³க, சதூஹி த⁴ம்மேஹி ஸமன்னாக³தோ அரியஸாவகோ ஆயுனா ஸங்யுத்தோ ஹோதி தி³ப்³பே³னபி மானுஸேனபி; வண்ணேன ஸங்யுத்தோ ஹோதி தி³ப்³பே³னபி மானுஸேனபி; ஸுகே²ன ஸங்யுத்தோ ஹோதி தி³ப்³பே³னபி மானுஸேனபி; யஸேன ஸங்யுத்தோ ஹோதி தி³ப்³பே³னபி மானுஸேனபி; ஆதி⁴பதெய்யேன ஸங்யுத்தோ ஹோதி தி³ப்³பே³னபி மானுஸேனபி. தங் கோ² பனாஹங், நந்த³க , நாஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா ஸுத்வா வதா³மி. அபி ச யதே³வ மயா ஸாமங் ஞாதங் ஸாமங் தி³ட்ட²ங் ஸாமங் விதி³தங், ததே³வாஹங் வதா³மீ’’தி.
‘‘Imehi ca pana, nandaka, catūhi dhammehi samannāgato ariyasāvako āyunā saṃyutto hoti dibbenapi mānusenapi; vaṇṇena saṃyutto hoti dibbenapi mānusenapi; sukhena saṃyutto hoti dibbenapi mānusenapi; yasena saṃyutto hoti dibbenapi mānusenapi; ādhipateyyena saṃyutto hoti dibbenapi mānusenapi. Taṃ kho panāhaṃ, nandaka , nāññassa samaṇassa vā brāhmaṇassa vā sutvā vadāmi. Api ca yadeva mayā sāmaṃ ñātaṃ sāmaṃ diṭṭhaṃ sāmaṃ viditaṃ, tadevāhaṃ vadāmī’’ti.
ஏவங் வுத்தே அஞ்ஞதரோ புரிஸோ நந்த³கங் லிச்ச²விமஹாமத்தங் ஏதத³வோச – ‘‘நஹானகாலோ, ப⁴ந்தே’’தி. ‘‘அலங் தா³னி, ப⁴ணே, ஏதேன பா³ஹிரேன நஹானேன. அலமித³ங் அஜ்ஜ²த்தங் நஹானங் ப⁴விஸ்ஸதி, யதி³த³ங் – ப⁴க³வதி பஸாதோ³’’தி. த³ஸமங்.
Evaṃ vutte aññataro puriso nandakaṃ licchavimahāmattaṃ etadavoca – ‘‘nahānakālo, bhante’’ti. ‘‘Alaṃ dāni, bhaṇe, etena bāhirena nahānena. Alamidaṃ ajjhattaṃ nahānaṃ bhavissati, yadidaṃ – bhagavati pasādo’’ti. Dasamaṃ.
ஸரணானிவக்³கோ³ ததியோ.
Saraṇānivaggo tatiyo.
தஸ்ஸுத்³தா³னங் –
Tassuddānaṃ –
மஹானாமேன த்³வே வுத்தா, கோ³தா⁴ ச ஸரணா து³வே;
Mahānāmena dve vuttā, godhā ca saraṇā duve;
து³வே அனாத²பிண்டி³கா, து³வே வேரப⁴யேன ச;
Duve anāthapiṇḍikā, duve verabhayena ca;
லிச்ச²வீ த³ஸமோ வுத்தோ, வக்³கோ³ தேன பவுச்சதீதி.
Licchavī dasamo vutto, vaggo tena pavuccatīti.
