| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. নন্দকলিচ্ছৰিসুত্তং
10. Nandakalicchavisuttaṃ
১০২৬. একং সমযং ভগৰা ৰেসালিযং ৰিহরতি মহাৰনে কূটাগারসালাযং। অথ খো নন্দকো লিচ্ছৰিমহামত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো নন্দকং লিচ্ছৰিমহামত্তং ভগৰা এতদৰোচ –
1026. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho nandako licchavimahāmatto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho nandakaṃ licchavimahāmattaṃ bhagavā etadavoca –
‘‘চতূহি খো, নন্দক, ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো। কতমেহি চতূহি? ইধ, নন্দক, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। ইমেহি খো, নন্দক, চতূহি ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো।
‘‘Catūhi kho, nandaka, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo. Katamehi catūhi? Idha, nandaka, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Imehi kho, nandaka, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘ইমেহি চ পন, নন্দক, চতূহি ধম্মেহি সমন্নাগতো অরিযসাৰকো আযুনা সংযুত্তো হোতি দিব্বেনপি মানুসেনপি; ৰণ্ণেন সংযুত্তো হোতি দিব্বেনপি মানুসেনপি; সুখেন সংযুত্তো হোতি দিব্বেনপি মানুসেনপি; যসেন সংযুত্তো হোতি দিব্বেনপি মানুসেনপি; আধিপতেয্যেন সংযুত্তো হোতি দিব্বেনপি মানুসেনপি। তং খো পনাহং, নন্দক , নাঞ্ঞস্স সমণস্স ৰা ব্রাহ্মণস্স ৰা সুত্ৰা ৰদামি। অপি চ যদেৰ মযা সামং ঞাতং সামং দিট্ঠং সামং ৰিদিতং, তদেৰাহং ৰদামী’’তি।
‘‘Imehi ca pana, nandaka, catūhi dhammehi samannāgato ariyasāvako āyunā saṃyutto hoti dibbenapi mānusenapi; vaṇṇena saṃyutto hoti dibbenapi mānusenapi; sukhena saṃyutto hoti dibbenapi mānusenapi; yasena saṃyutto hoti dibbenapi mānusenapi; ādhipateyyena saṃyutto hoti dibbenapi mānusenapi. Taṃ kho panāhaṃ, nandaka , nāññassa samaṇassa vā brāhmaṇassa vā sutvā vadāmi. Api ca yadeva mayā sāmaṃ ñātaṃ sāmaṃ diṭṭhaṃ sāmaṃ viditaṃ, tadevāhaṃ vadāmī’’ti.
এৰং ৰুত্তে অঞ্ঞতরো পুরিসো নন্দকং লিচ্ছৰিমহামত্তং এতদৰোচ – ‘‘নহানকালো, ভন্তে’’তি। ‘‘অলং দানি, ভণে, এতেন বাহিরেন নহানেন। অলমিদং অজ্ঝত্তং নহানং ভৰিস্সতি, যদিদং – ভগৰতি পসাদো’’তি। দসমং।
Evaṃ vutte aññataro puriso nandakaṃ licchavimahāmattaṃ etadavoca – ‘‘nahānakālo, bhante’’ti. ‘‘Alaṃ dāni, bhaṇe, etena bāhirena nahānena. Alamidaṃ ajjhattaṃ nahānaṃ bhavissati, yadidaṃ – bhagavati pasādo’’ti. Dasamaṃ.
সরণানিৰগ্গো ততিযো।
Saraṇānivaggo tatiyo.
তস্সুদ্দানং –
Tassuddānaṃ –
মহানামেন দ্ৰে ৰুত্তা, গোধা চ সরণা দুৰে।
Mahānāmena dve vuttā, godhā ca saraṇā duve;
দুৰে অনাথপিণ্ডিকা, দুৰে ৰেরভযেন চ।
Duve anāthapiṇḍikā, duve verabhayena ca;
লিচ্ছৰী দসমো ৰুত্তো, ৰগ্গো তেন পৰুচ্চতীতি॥
Licchavī dasamo vutto, vaggo tena pavuccatīti.
