| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ • Saṃyuttanikāya |
੧੦. ਨਨ੍ਦਕਲਿਚ੍ਛવਿਸੁਤ੍ਤਂ
10. Nandakalicchavisuttaṃ
੧੦੨੬. ਏਕਂ ਸਮਯਂ ਭਗવਾ વੇਸਾਲਿਯਂ વਿਹਰਤਿ ਮਹਾવਨੇ ਕੂਟਾਗਾਰਸਾਲਾਯਂ। ਅਥ ਖੋ ਨਨ੍ਦਕੋ ਲਿਚ੍ਛવਿਮਹਾਮਤ੍ਤੋ ਯੇਨ ਭਗવਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨਂ ਖੋ ਨਨ੍ਦਕਂ ਲਿਚ੍ਛવਿਮਹਾਮਤ੍ਤਂ ਭਗવਾ ਏਤਦવੋਚ –
1026. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho nandako licchavimahāmatto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho nandakaṃ licchavimahāmattaṃ bhagavā etadavoca –
‘‘ਚਤੂਹਿ ਖੋ, ਨਨ੍ਦਕ, ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾવਕੋ ਸੋਤਾਪਨ੍ਨੋ ਹੋਤਿ ਅવਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ। ਕਤਮੇਹਿ ਚਤੂਹਿ? ਇਧ, ਨਨ੍ਦਕ, ਅਰਿਯਸਾવਕੋ ਬੁਦ੍ਧੇ ਅવੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ – ਇਤਿਪਿ ਸੋ ਭਗવਾ…ਪੇ॰… ਸਤ੍ਥਾ ਦੇવਮਨੁਸ੍ਸਾਨਂ ਬੁਦ੍ਧੋ ਭਗવਾਤਿ। ਧਮ੍ਮੇ…ਪੇ॰… ਸਙ੍ਘੇ…ਪੇ॰… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਹੋਤਿ ਅਖਣ੍ਡੇਹਿ…ਪੇ॰… ਸਮਾਧਿਸਂવਤ੍ਤਨਿਕੇਹਿ। ਇਮੇਹਿ ਖੋ, ਨਨ੍ਦਕ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾવਕੋ ਸੋਤਾਪਨ੍ਨੋ ਹੋਤਿ ਅવਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ।
‘‘Catūhi kho, nandaka, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo. Katamehi catūhi? Idha, nandaka, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Imehi kho, nandaka, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘ਇਮੇਹਿ ਚ ਪਨ, ਨਨ੍ਦਕ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾવਕੋ ਆਯੁਨਾ ਸਂਯੁਤ੍ਤੋ ਹੋਤਿ ਦਿਬ੍ਬੇਨਪਿ ਮਾਨੁਸੇਨਪਿ; વਣ੍ਣੇਨ ਸਂਯੁਤ੍ਤੋ ਹੋਤਿ ਦਿਬ੍ਬੇਨਪਿ ਮਾਨੁਸੇਨਪਿ; ਸੁਖੇਨ ਸਂਯੁਤ੍ਤੋ ਹੋਤਿ ਦਿਬ੍ਬੇਨਪਿ ਮਾਨੁਸੇਨਪਿ; ਯਸੇਨ ਸਂਯੁਤ੍ਤੋ ਹੋਤਿ ਦਿਬ੍ਬੇਨਪਿ ਮਾਨੁਸੇਨਪਿ; ਆਧਿਪਤੇਯ੍ਯੇਨ ਸਂਯੁਤ੍ਤੋ ਹੋਤਿ ਦਿਬ੍ਬੇਨਪਿ ਮਾਨੁਸੇਨਪਿ। ਤਂ ਖੋ ਪਨਾਹਂ, ਨਨ੍ਦਕ , ਨਾਞ੍ਞਸ੍ਸ ਸਮਣਸ੍ਸ વਾ ਬ੍ਰਾਹ੍ਮਣਸ੍ਸ વਾ ਸੁਤ੍વਾ વਦਾਮਿ। ਅਪਿ ਚ ਯਦੇવ ਮਯਾ ਸਾਮਂ ਞਾਤਂ ਸਾਮਂ ਦਿਟ੍ਠਂ ਸਾਮਂ વਿਦਿਤਂ, ਤਦੇવਾਹਂ વਦਾਮੀ’’ਤਿ।
‘‘Imehi ca pana, nandaka, catūhi dhammehi samannāgato ariyasāvako āyunā saṃyutto hoti dibbenapi mānusenapi; vaṇṇena saṃyutto hoti dibbenapi mānusenapi; sukhena saṃyutto hoti dibbenapi mānusenapi; yasena saṃyutto hoti dibbenapi mānusenapi; ādhipateyyena saṃyutto hoti dibbenapi mānusenapi. Taṃ kho panāhaṃ, nandaka , nāññassa samaṇassa vā brāhmaṇassa vā sutvā vadāmi. Api ca yadeva mayā sāmaṃ ñātaṃ sāmaṃ diṭṭhaṃ sāmaṃ viditaṃ, tadevāhaṃ vadāmī’’ti.
ਏવਂ વੁਤ੍ਤੇ ਅਞ੍ਞਤਰੋ ਪੁਰਿਸੋ ਨਨ੍ਦਕਂ ਲਿਚ੍ਛવਿਮਹਾਮਤ੍ਤਂ ਏਤਦવੋਚ – ‘‘ਨਹਾਨਕਾਲੋ, ਭਨ੍ਤੇ’’ਤਿ। ‘‘ਅਲਂ ਦਾਨਿ, ਭਣੇ, ਏਤੇਨ ਬਾਹਿਰੇਨ ਨਹਾਨੇਨ। ਅਲਮਿਦਂ ਅਜ੍ਝਤ੍ਤਂ ਨਹਾਨਂ ਭવਿਸ੍ਸਤਿ, ਯਦਿਦਂ – ਭਗવਤਿ ਪਸਾਦੋ’’ਤਿ। ਦਸਮਂ।
Evaṃ vutte aññataro puriso nandakaṃ licchavimahāmattaṃ etadavoca – ‘‘nahānakālo, bhante’’ti. ‘‘Alaṃ dāni, bhaṇe, etena bāhirena nahānena. Alamidaṃ ajjhattaṃ nahānaṃ bhavissati, yadidaṃ – bhagavati pasādo’’ti. Dasamaṃ.
ਸਰਣਾਨਿવਗ੍ਗੋ ਤਤਿਯੋ।
Saraṇānivaggo tatiyo.
ਤਸ੍ਸੁਦ੍ਦਾਨਂ –
Tassuddānaṃ –
ਮਹਾਨਾਮੇਨ ਦ੍વੇ વੁਤ੍ਤਾ, ਗੋਧਾ ਚ ਸਰਣਾ ਦੁવੇ।
Mahānāmena dve vuttā, godhā ca saraṇā duve;
ਦੁવੇ ਅਨਾਥਪਿਣ੍ਡਿਕਾ, ਦੁવੇ વੇਰਭਯੇਨ ਚ।
Duve anāthapiṇḍikā, duve verabhayena ca;
ਲਿਚ੍ਛવੀ ਦਸਮੋ વੁਤ੍ਤੋ, વਗ੍ਗੋ ਤੇਨ ਪવੁਚ੍ਚਤੀਤਿ॥
Licchavī dasamo vutto, vaggo tena pavuccatīti.
