Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā

3. нанд̣̇агабзд̇авад̇т̇уван̣н̣анаа

3. Nandakapetavatthuvaṇṇanā

рааж̇аа бин̇г̇алаго наамаад̇и ид̣̇ам̣ нанд̣̇агабзд̇авад̇т̇у. д̇асса гаа уббад̇д̇и? сад̇т̇у бариниб̣б̣аанад̇о вассасад̇ад̣̇ваяасса ажжаязна сурадтависаяз бин̇г̇ало наама рааж̇аа ахоси. д̇асса сзнаабад̇и нанд̣̇аго наама мижчаад̣̇идтий вибарийд̇ад̣̇ассано ‘‘над̇т̇и д̣̇инна’’нд̇иаад̣̇инаа мижчааг̇аахам̣ баг̇г̇аяха вижари. д̇асса д̇хийд̇аа уд̇д̇араа наама убаасигаа бад̇ируубз гулз д̣̇иннаа ахоси. нанд̣̇аго бана гаалам̣ гад̇ваа вин̃жхаадавияам̣ махад̇и ниг̇род̇харугкз взмаанигабзд̇о худ̇ваа ниб̣б̣ад̇д̇и. д̇асмим̣ гаалагад̇з уд̇д̇араа сужисийд̇алаг̇анд̇ход̣̇агабуурид̇ам̣ баанийяагхадам̣ гуммаасаабхисан̇кад̇зхи ван̣н̣аг̇анд̇харасасамбаннзхи буувзхи барибун̣н̣асарааваган̃жа ан̃н̃ад̇арасса кийн̣аасавад̇т̇зрасса д̣̇ад̇ваа ‘‘аяам̣ д̣̇агкин̣аа маяхам̣ бид̇у убагаббад̇уу’’д̇и уд̣̇д̣̇иси, д̇асса д̇зна д̣̇аанзна д̣̇иб̣б̣абаанийяам̣ абаримид̇аа жа бууваа баад̇убхавим̣су. д̇ам̣ д̣̇исваа со звам̣ жинд̇зси – ‘‘баабагам̣ вад̇а маяаа гад̇ам̣, яам̣ махааж̇ано ‘над̇т̇и д̣̇инна’нд̇иаад̣̇инаа мижчааг̇аахам̣ г̇аахид̇о. ид̣̇аани бана бин̇г̇ало рааж̇аа д̇хаммаасогасса ран̃н̃о оваад̣̇ам̣ д̣̇аад̇ум̣ г̇ад̇о, со д̇ам̣ д̇асса д̣̇ад̇ваа ааг̇амиссад̇и, ханд̣̇аахам̣ над̇т̇игад̣̇идтим̣ винод̣̇зссаамий’’д̇и. на жирзнзва жа бин̇г̇ало рааж̇аа д̇хаммаасогасса ран̃н̃о оваад̣̇ам̣ д̣̇ад̇ваа бадинивад̇д̇анд̇о маг̇г̇ам̣ бадибаж̇ж̇и.

Rājā piṅgalako nāmāti idaṃ nandakapetavatthu. Tassa kā uppatti? Satthu parinibbānato vassasatadvayassa accayena suraṭṭhavisaye piṅgalo nāma rājā ahosi. Tassa senāpati nandako nāma micchādiṭṭhī viparītadassano ‘‘natthi dinna’’ntiādinā micchāgāhaṃ paggayha vicari. Tassa dhītā uttarā nāma upāsikā patirūpe kule dinnā ahosi. Nandako pana kālaṃ katvā viñjhāṭaviyaṃ mahati nigrodharukkhe vemānikapeto hutvā nibbatti. Tasmiṃ kālakate uttarā sucisītalagandhodakapūritaṃ pānīyaghaṭaṃ kummāsābhisaṅkhatehi vaṇṇagandharasasampannehi pūvehi paripuṇṇasarāvakañca aññatarassa khīṇāsavattherassa datvā ‘‘ayaṃ dakkhiṇā mayhaṃ pitu upakappatū’’ti uddisi, tassa tena dānena dibbapānīyaṃ aparimitā ca pūvā pātubhaviṃsu. Taṃ disvā so evaṃ cintesi – ‘‘pāpakaṃ vata mayā kataṃ, yaṃ mahājano ‘natthi dinna’ntiādinā micchāgāhaṃ gāhito. Idāni pana piṅgalo rājā dhammāsokassa rañño ovādaṃ dātuṃ gato, so taṃ tassa datvā āgamissati, handāhaṃ natthikadiṭṭhiṃ vinodessāmī’’ti. Na cireneva ca piṅgalo rājā dhammāsokassa rañño ovādaṃ datvā paṭinivattanto maggaṃ paṭipajji.

ат̇а со бзд̇о ад̇д̇ано васанадтаанаабхимукам̣ д̇ам̣ маг̇г̇ам̣ ниммини. рааж̇аа тид̇амаж̇жханхигз самаяз д̇зна маг̇г̇зна г̇ажчад̇и. д̇асса г̇ачанд̇асса бурад̇о маг̇г̇о д̣̇иссад̇и, бидтид̇о банасса анд̇арад̇хааяад̇и. саб̣б̣абажчад̇о г̇ажчанд̇о бурисо маг̇г̇ам̣ анд̇арахид̇ам̣ д̣̇исваа бхийд̇о виссарам̣ вираванд̇о д̇хаавид̇ваа ран̃н̃о аарожзси, д̇ам̣ суд̇ваа рааж̇аа бхийд̇о сам̣виг̇г̇амаанасо хад̇т̇игканд̇хз тад̇ваа жад̇ассо д̣̇исаа ологзнд̇о бзд̇асса васананиг̇род̇харугкам̣ д̣̇исваа д̇ад̣̇абхимуко аг̇амааси сад̣̇д̇хим̣ жад̇уран̇г̇инияаа сзнааяа. ат̇аануггамзна ран̃н̃з д̇ам̣ таанам̣ бад̇д̇з бзд̇о саб̣б̣аабхаран̣авибхуусид̇о рааж̇аанам̣ убасан̇гамид̇ваа бадисант̇аарам̣ гад̇ваа буувз жа баанийяан̃жа д̣̇аабзси. рааж̇аа сабариж̇ано нхад̇ваа буувз каад̣̇ид̇ваа баанийяам̣ бивид̇ваа бадиббассад̣̇д̇хамаг̇г̇агиламат̇о ‘‘д̣̇звад̇аа нуси г̇анд̇хаб̣б̣о’’д̇иаад̣̇инаа бзд̇ам̣ бужчи. бзд̇о аад̣̇ид̇о бадтааяа ад̇д̇ано бавад̇д̇им̣ аажигкид̇ваа рааж̇аанам̣ мижчаад̣̇ассанад̇о виможзд̇ваа саран̣зсу сийлзсу жа бад̇идтаабзси. д̇амад̇т̇ам̣ д̣̇ассзд̇ум̣ сан̇г̇ийд̇игаараа –

Atha so peto attano vasanaṭṭhānābhimukhaṃ taṃ maggaṃ nimmini. Rājā ṭhitamajjhanhike samaye tena maggena gacchati. Tassa gachantassa purato maggo dissati, piṭṭhito panassa antaradhāyati. Sabbapacchato gacchanto puriso maggaṃ antarahitaṃ disvā bhīto vissaraṃ viravanto dhāvitvā rañño ārocesi, taṃ sutvā rājā bhīto saṃviggamānaso hatthikkhandhe ṭhatvā catasso disā olokento petassa vasananigrodharukkhaṃ disvā tadabhimukho agamāsi saddhiṃ caturaṅginiyā senāya. Athānukkamena raññe taṃ ṭhānaṃ patte peto sabbābharaṇavibhūsito rājānaṃ upasaṅkamitvā paṭisanthāraṃ katvā pūve ca pānīyañca dāpesi. Rājā saparijano nhatvā pūve khāditvā pānīyaṃ pivitvā paṭippassaddhamaggakilamatho ‘‘devatā nusi gandhabbo’’tiādinā petaṃ pucchi. Peto ādito paṭṭhāya attano pavattiṃ ācikkhitvā rājānaṃ micchādassanato vimocetvā saraṇesu sīlesu ca patiṭṭhāpesi. Tamatthaṃ dassetuṃ saṅgītikārā –

658.

‘‘рааж̇аа бин̇г̇алаго наама, сурадтаанам̣ ад̇хибад̇и аху;

‘‘Rājā piṅgalako nāma, suraṭṭhānaṃ adhipati ahu;

морияаанам̣ убадтаанам̣ г̇анд̇ваа, сурадтам̣ бунарааг̇амаа.

Moriyānaṃ upaṭṭhānaṃ gantvā, suraṭṭhaṃ punarāgamā.

659.

‘‘ун̣хз маж̇жханхигз гаалз, рааж̇аа бан̇гам̣ убааг̇ами;

‘‘Uṇhe majjhanhike kāle, rājā paṅkaṃ upāgami;

ад̣̇д̣̇аса маг̇г̇ам̣ раман̣ийяам̣, бзд̇аанам̣ д̇ам̣ ван̣н̣убат̇ам̣.

Addasa maggaṃ ramaṇīyaṃ, petānaṃ taṃ vaṇṇupathaṃ.

660. саарат̇им̣ ааманд̇аяий рааж̇аа –

660. Sārathiṃ āmantayī rājā –

‘‘‘аяам̣ маг̇г̇о раман̣ийяо, кзмо совад̇т̇иго сиво;

‘‘‘Ayaṃ maggo ramaṇīyo, khemo sovatthiko sivo;

иминаа саарат̇и яаама, сурадтаанам̣ санд̇игз ид̇о’.

Iminā sārathi yāma, suraṭṭhānaṃ santike ito’.

661.

‘‘д̇зна бааяааси сорадто, сзнааяа жад̇уран̇г̇инияаа;

‘‘Tena pāyāsi soraṭṭho, senāya caturaṅginiyā;

уб̣б̣иг̇г̇аруубо бурисо, сорадтам̣ зд̇ад̣̇аб̣рави.

Ubbiggarūpo puriso, soraṭṭhaṃ etadabravi.

662.

‘‘‘гуммаг̇г̇ам̣ бадибаннамхаа, бхим̣санам̣ ломахам̣санам̣;

‘‘‘Kummaggaṃ paṭipannamhā, bhiṃsanaṃ lomahaṃsanaṃ;

бурад̇о д̣̇иссад̇и маг̇г̇о, бажчад̇о жа на д̣̇иссад̇и.

Purato dissati maggo, pacchato ca na dissati.

663.

‘‘‘гуммаг̇г̇ам̣ бадибаннамхаа, яамабурисаана санд̇игз;

‘‘‘Kummaggaṃ paṭipannamhā, yamapurisāna santike;

амаанусо вааяад̇и г̇анд̇хо, гхосо суяяад̇и д̣̇аарун̣о’.

Amānuso vāyati gandho, ghoso suyyati dāruṇo’.

664.

‘‘сам̣виг̇г̇о рааж̇аа сорадто, саарат̇им̣ зд̇ад̣̇аб̣рави;

‘‘Saṃviggo rājā soraṭṭho, sārathiṃ etadabravi;

‘гуммаг̇г̇ам̣ бадибаннамхаа, бхим̣санам̣ ломахам̣санам̣;

‘Kummaggaṃ paṭipannamhā, bhiṃsanaṃ lomahaṃsanaṃ;

бурад̇о д̣̇иссад̇и маг̇г̇о, бажчад̇о жа на д̣̇иссад̇и.

Purato dissati maggo, pacchato ca na dissati.

665.

‘‘‘гуммаг̇г̇ам̣ бадибаннамхаа, яамабурисаана санд̇игз;

‘‘‘Kummaggaṃ paṭipannamhā, yamapurisāna santike;

амаанусо вааяад̇и г̇анд̇хо, гхосо суяяад̇и д̣̇аарун̣о’.

Amānuso vāyati gandho, ghoso suyyati dāruṇo’.

666.

‘‘хад̇т̇игканд̇хам̣ самааруяха, ологзнд̇о жад̇уд̣̇д̣̇исаа;

‘‘Hatthikkhandhaṃ samāruyha, olokento catuddisā;

ад̣̇д̣̇аса ниг̇род̇хам̣ раман̣ийяам̣, баад̣̇абам̣ чааяаасамбаннам̣;

Addasa nigrodhaṃ ramaṇīyaṃ, pādapaṃ chāyāsampannaṃ;

нийлаб̣бхаван̣н̣асад̣̇исам̣, мзгхаван̣н̣асирийнибхам̣.

Nīlabbhavaṇṇasadisaṃ, meghavaṇṇasirīnibhaṃ.

667.

‘‘саарат̇им̣ ааманд̇аяий рааж̇аа, ‘гим̣ зсо д̣̇иссад̇и б̣рахаа;

‘‘Sārathiṃ āmantayī rājā, ‘kiṃ eso dissati brahā;

нийлаб̣бхаван̣н̣асад̣̇исо, мзгхаван̣н̣асирийнибхо’.

Nīlabbhavaṇṇasadiso, meghavaṇṇasirīnibho’.

668.

‘‘ниг̇род̇хо со махаарааж̇а, баад̣̇або чааяаасамбанно;

‘‘Nigrodho so mahārāja, pādapo chāyāsampanno;

нийлаб̣бхаван̣н̣асад̣̇исо, мзгхаван̣н̣асирийнибхо.

Nīlabbhavaṇṇasadiso, meghavaṇṇasirīnibho.

669.

‘‘д̇зна бааяааси сорадто, язна со д̣̇иссад̇з б̣рахаа;

‘‘Tena pāyāsi soraṭṭho, yena so dissate brahā;

нийлаб̣бхаван̣н̣асад̣̇исо, мзгхаван̣н̣асирийнибхо.

Nīlabbhavaṇṇasadiso, meghavaṇṇasirīnibho.

670.

‘‘хад̇т̇игканд̇хад̇о оруяха, рааж̇аа ругкам̣ убааг̇ами;

‘‘Hatthikkhandhato oruyha, rājā rukkhaṃ upāgami;

нисийд̣̇и ругкамууласмим̣, саамажжо сабариж̇ж̇ано;

Nisīdi rukkhamūlasmiṃ, sāmacco saparijjano;

буурам̣ баанийяасарагам̣, буувз вид̇д̇з жа ад̣̇д̣̇аса.

Pūraṃ pānīyasarakaṃ, pūve vitte ca addasa.

671.

‘‘бурисо жа д̣̇зваван̣н̣ий, саб̣б̣аабхаран̣абхуусид̇о;

‘‘Puriso ca devavaṇṇī, sabbābharaṇabhūsito;

убасан̇гамид̇ваа рааж̇аанам̣, сорадтам̣ зд̇ад̣̇аб̣рави.

Upasaṅkamitvā rājānaṃ, soraṭṭhaṃ etadabravi.

672.

‘‘‘свааг̇ад̇ам̣ д̇з махаарааж̇а, ат̇о д̇з ад̣̇урааг̇ад̇ам̣;

‘‘‘Svāgataṃ te mahārāja, atho te adurāgataṃ;

бивад̇у д̣̇зво баанийяам̣, буувз каад̣̇а аринд̣̇ама’.

Pivatu devo pānīyaṃ, pūve khāda arindama’.

673.

‘‘бивид̇ваа рааж̇аа баанийяам̣, саамажжо сабариж̇ж̇ано;

‘‘Pivitvā rājā pānīyaṃ, sāmacco saparijjano;

буувз каад̣̇ид̇ваа бид̇ваа жа, сорадто зд̇ад̣̇аб̣рави.

Pūve khāditvā pitvā ca, soraṭṭho etadabravi.

674.

‘‘д̣̇звад̇аа нуси г̇анд̇хаб̣б̣о, ад̣̇у сагго буринд̣̇ад̣̇о;

‘‘Devatā nusi gandhabbo, adu sakko purindado;

аж̇аананд̇аа д̇ам̣ бужчаама, гат̇ам̣ ж̇аанзму д̇ам̣ маяанд̇и.

Ajānantā taṃ pucchāma, kathaṃ jānemu taṃ mayanti.

675.

‘‘наамхи д̣̇зво на г̇анд̇хаб̣б̣о, нааби сагго буринд̣̇ад̣̇о;

‘‘Nāmhi devo na gandhabbo, nāpi sakko purindado;

бзд̇о ахам̣ махаарааж̇а, сурадтаа ид̇ха мааг̇ад̇од̇и.

Peto ahaṃ mahārāja, suraṭṭhā idha māgatoti.

676.

‘‘гим̣сийло гим̣самаажааро, сурадтасмим̣ бурз д̇увам̣;

‘‘Kiṃsīlo kiṃsamācāro, suraṭṭhasmiṃ pure tuvaṃ;

гзна д̇з б̣рахмажариязна, аанубхааво аяам̣ д̇аваад̇и.

Kena te brahmacariyena, ānubhāvo ayaṃ tavāti.

677.

‘‘д̇ам̣ сун̣охи махаарааж̇а, аринд̣̇ама радтавад̣дхана;

‘‘Taṃ suṇohi mahārāja, arindama raṭṭhavaḍḍhana;

амажжаа баарисаж̇ж̇аа жа, б̣раахман̣о жа бурохид̇о.

Amaccā pārisajjā ca, brāhmaṇo ca purohito.

678.

‘‘сурадтасмим̣ ахам̣ д̣̇зва, бурисо баабажзд̇асо;

‘‘Suraṭṭhasmiṃ ahaṃ deva, puriso pāpacetaso;

мижчаад̣̇идти жа д̣̇уссийло, гад̣̇арияо барибхаасаго.

Micchādiṭṭhi ca dussīlo, kadariyo paribhāsako.

679.

‘‘д̣̇ад̣̇анд̇аанам̣ гаронд̇аанам̣, ваараяиссам̣ б̣ахуж̇ж̇анам̣;

‘‘Dadantānaṃ karontānaṃ, vārayissaṃ bahujjanaṃ;

ан̃н̃зсам̣ д̣̇ад̣̇амаанаанам̣, анд̇арааяагаро ахам̣.

Aññesaṃ dadamānānaṃ, antarāyakaro ahaṃ.

680.

‘‘вибааго над̇т̇и д̣̇аанасса, сам̣яамасса гуд̇о палам̣;

‘‘Vipāko natthi dānassa, saṃyamassa kuto phalaṃ;

над̇т̇и аажарияо наама, ад̣̇анд̇ам̣ го д̣̇амзссад̇и.

Natthi ācariyo nāma, adantaṃ ko damessati.

681.

‘‘самад̇уляаани бхууд̇аани, гуд̇о ж̇здтаабажааяиго;

‘‘Samatulyāni bhūtāni, kuto jeṭṭhāpacāyiko;

над̇т̇и б̣алам̣ вийрияам̣ ваа, гуд̇о удтаанаборисам̣.

Natthi balaṃ vīriyaṃ vā, kuto uṭṭhānaporisaṃ.

682.

‘‘над̇т̇и д̣̇аанапалам̣ наама, на висод̇хзд̇и взринам̣;

‘‘Natthi dānaphalaṃ nāma, na visodheti verinaṃ;

лад̣̇д̇хзяяам̣ лабхад̇з мажжо, нияад̇ибарин̣аамаж̇ам̣.

Laddheyyaṃ labhate macco, niyatipariṇāmajaṃ.

683.

‘‘над̇т̇и маад̇аа бид̇аа бхаад̇аа, лого над̇т̇и ид̇о барам̣;

‘‘Natthi mātā pitā bhātā, loko natthi ito paraṃ;

над̇т̇и д̣̇иннам̣ над̇т̇и худ̇ам̣, сунихид̇ам̣ на виж̇ж̇ад̇и.

Natthi dinnaṃ natthi hutaṃ, sunihitaṃ na vijjati.

684.

‘‘яоби ханзяяа бурисам̣, барасса чинд̣̇ад̇з сирам̣;

‘‘Yopi haneyya purisaṃ, parassa chindate siraṃ;

на гожи ган̃жи ханад̇и, сад̇д̇аннам̣ вивараманд̇арз.

Na koci kañci hanati, sattannaṃ vivaramantare.

685.

‘‘ажчзж̇ж̇аабхзж̇ж̇о хи ж̇ийво, адтам̣со г̇ул̣абариман̣д̣ало;

‘‘Acchejjābhejjo hi jīvo, aṭṭhaṃso guḷaparimaṇḍalo;

яож̇анаанам̣ сад̇ам̣ бан̃жа, го ж̇ийвам̣ чзд̇д̇умарахад̇и.

Yojanānaṃ sataṃ pañca, ko jīvaṃ chettumarahati.

686.

‘‘яат̇аа суд̇д̇аг̇ул̣з кид̇д̇з, ниб̣б̣зтзнд̇ам̣ балааяад̇и;

‘‘Yathā suttaguḷe khitte, nibbeṭhentaṃ palāyati;

звамзва жа со ж̇ийво, ниб̣б̣зтзнд̇о балааяад̇и.

Evameva ca so jīvo, nibbeṭhento palāyati.

687.

‘‘яат̇аа г̇аамад̇о нигкамма, ан̃н̃ам̣ г̇аамам̣ бависад̇и;

‘‘Yathā gāmato nikkhamma, aññaṃ gāmaṃ pavisati;

звамзва жа со ж̇ийво, ан̃н̃ам̣ б̣онд̣̇им̣ бависад̇и.

Evameva ca so jīvo, aññaṃ bondiṃ pavisati.

688.

‘‘яат̇аа г̇зхад̇о нигкамма, ан̃н̃ам̣ г̇зхам̣ бависад̇и;

‘‘Yathā gehato nikkhamma, aññaṃ gehaṃ pavisati;

звамзва жа со ж̇ийво, ан̃н̃ам̣ б̣онд̣̇им̣ бависад̇и.

Evameva ca so jīvo, aññaṃ bondiṃ pavisati.

689.

‘‘жуллаасийд̇и махаагаббино, сад̇асахассаани хи;

‘‘Cullāsīti mahākappino, satasahassāni hi;

яз б̣аалаа яз жа бан̣д̣ид̇аа, сам̣саарам̣ кзбаяид̇ваана;

Ye bālā ye ca paṇḍitā, saṃsāraṃ khepayitvāna;

д̣̇угкассанд̇ам̣ гариссарз.

Dukkhassantaṃ karissare.

690.

‘‘мид̇аани сукад̣̇угкаани, д̣̇он̣зхи бидагзхи жа;

‘‘Mitāni sukhadukkhāni, doṇehi piṭakehi ca;

ж̇ино саб̣б̣ам̣ баж̇аанаад̇и, саммуул̣хаа ид̇араа баж̇аа.

Jino sabbaṃ pajānāti, sammūḷhā itarā pajā.

691.

‘‘звам̣д̣̇идти бурз аасим̣, саммуул̣хо мохабааруд̇о;

‘‘Evaṃdiṭṭhi pure āsiṃ, sammūḷho mohapāruto;

мижчаад̣̇идти жа д̣̇уссийло, гад̣̇арияо барибхаасаго.

Micchādiṭṭhi ca dussīlo, kadariyo paribhāsako.

692.

‘‘орам̣ мз чахи маасзхи, гаалагирияаа бхависсад̇и;

‘‘Oraṃ me chahi māsehi, kālakiriyā bhavissati;

зганд̇агадугам̣ гхорам̣, нираяам̣ бабад̇иссахам̣.

Ekantakaṭukaṃ ghoraṃ, nirayaṃ papatissahaṃ.

693.

‘‘жад̇угган̣н̣ам̣ жад̇уд̣̇ваарам̣, вибхад̇д̇ам̣ бхааг̇асо мид̇ам̣;

‘‘Catukkaṇṇaṃ catudvāraṃ, vibhattaṃ bhāgaso mitaṃ;

аяобаагаарабарияанд̇ам̣, аяасаа бадигуж̇ж̇ид̇ам̣.

Ayopākārapariyantaṃ, ayasā paṭikujjitaṃ.

694.

‘‘д̇асса аяомаяаа бхууми, ж̇алид̇аа д̇зж̇асаа яуд̇аа;

‘‘Tassa ayomayā bhūmi, jalitā tejasā yutā;

саманд̇аа яож̇анасад̇ам̣, парид̇ваа д̇идтад̇и саб̣б̣ад̣̇аа.

Samantā yojanasataṃ, pharitvā tiṭṭhati sabbadā.

695.

‘‘вассаани сад̇асахассаани, гхосо суяяад̇и д̇аавад̣̇з;

‘‘Vassāni satasahassāni, ghoso suyyati tāvade;

лагко зсо махаарааж̇а, сад̇абхааг̇авассагодияо.

Lakkho eso mahārāja, satabhāgavassakoṭiyo.

696.

‘‘годисад̇асахассаани, нираяз бажжарз ж̇анаа;

‘‘Koṭisatasahassāni, niraye paccare janā;

мижчаад̣̇идтий жа д̣̇уссийлаа, яз жа арияуубаваад̣̇ино.

Micchādiṭṭhī ca dussīlā, ye ca ariyūpavādino.

697.

‘‘д̇ад̇т̇аахам̣ д̣̇ийгхамад̣̇д̇хаанам̣, д̣̇угкам̣ взд̣̇исса взд̣̇анам̣;

‘‘Tatthāhaṃ dīghamaddhānaṃ, dukkhaṃ vedissa vedanaṃ;

палам̣ баабасса гаммасса, д̇асмаа сожаамахам̣ бхусам̣.

Phalaṃ pāpassa kammassa, tasmā socāmahaṃ bhusaṃ.

698.

‘‘д̇ам̣ сун̣охи махаарааж̇а, аринд̣̇ама радтавад̣дхана;

‘‘Taṃ suṇohi mahārāja, arindama raṭṭhavaḍḍhana;

д̇хийд̇аа маяхам̣ махаарааж̇а, уд̇д̇араа бхад̣̇д̣̇амад̇т̇у д̇з.

Dhītā mayhaṃ mahārāja, uttarā bhaddamatthu te.

699.

‘‘гарод̇и бхад̣̇д̣̇агам̣ гаммам̣, сийлзсубосат̇з рад̇аа;

‘‘Karoti bhaddakaṃ kammaṃ, sīlesuposathe ratā;

сан̃н̃ад̇аа сам̣вибхааг̇ий жа, вад̣̇ан̃н̃уу вийд̇амажчараа.

Saññatā saṃvibhāgī ca, vadaññū vītamaccharā.

700.

‘‘акан̣д̣агаарий сигкааяа, сун̣хаа барагулзсу жа;

‘‘Akhaṇḍakārī sikkhāya, suṇhā parakulesu ca;

убаасигаа сагяамунино, самб̣уд̣̇д̇хасса сириймад̇о.

Upāsikā sakyamunino, sambuddhassa sirīmato.

701.

‘‘бхигку жа сийласамбанно, г̇аамам̣ бин̣д̣ааяа баависи;

‘‘Bhikkhu ca sīlasampanno, gāmaṃ piṇḍāya pāvisi;

огкид̇д̇ажагку сад̇имаа, г̇уд̇д̇ад̣̇вааро сусам̣вуд̇о.

Okkhittacakkhu satimā, guttadvāro susaṃvuto.

702.

‘‘сабад̣̇аанам̣ жарамаано, аг̇амаа д̇ам̣ нивзсанам̣;

‘‘Sapadānaṃ caramāno, agamā taṃ nivesanaṃ;

д̇амад̣̇д̣̇аса махаарааж̇а, уд̇д̇араа бхад̣̇д̣̇амад̇т̇у д̇з.

Tamaddasa mahārāja, uttarā bhaddamatthu te.

703.

‘‘буурам̣ баанийяасарагам̣, буувз вид̇д̇з жа саа ад̣̇аа;

‘‘Pūraṃ pānīyasarakaṃ, pūve vitte ca sā adā;

бид̇аа мз гаалагад̇о бханд̇з, д̇ассзд̇ам̣ убагаббад̇у.

Pitā me kālakato bhante, tassetaṃ upakappatu.

704.

‘‘самананд̇араануд̣̇д̣̇идтз , вибааго уд̣̇абаж̇ж̇ат̇а;

‘‘Samanantarānuddiṭṭhe , vipāko udapajjatha;

бхун̃ж̇аами гаамагаамийхам̣, рааж̇аа взссаван̣о яат̇аа.

Bhuñjāmi kāmakāmīhaṃ, rājā vessavaṇo yathā.

705.

‘‘д̇ам̣ сун̣охи махаарааж̇а, аринд̣̇ама радтавад̣дхана;

‘‘Taṃ suṇohi mahārāja, arindama raṭṭhavaḍḍhana;

сад̣̇звагасса логасса, б̣уд̣̇д̇хо аг̇г̇о бавужжад̇и;

Sadevakassa lokassa, buddho aggo pavuccati;

д̇ам̣ б̣уд̣̇д̇хам̣ саран̣ам̣ г̇ажча, сабуд̇д̇ад̣̇ааро аринд̣̇ама.

Taṃ buddhaṃ saraṇaṃ gaccha, saputtadāro arindama.

706.

‘‘адтан̇г̇игзна маг̇г̇зна, пусанд̇и амад̇ам̣ бад̣̇ам̣;

‘‘Aṭṭhaṅgikena maggena, phusanti amataṃ padaṃ;

д̇ам̣ д̇хаммам̣ саран̣ам̣ г̇ажча, сабуд̇д̇ад̣̇ааро аринд̣̇ама.

Taṃ dhammaṃ saraṇaṃ gaccha, saputtadāro arindama.

707.

‘‘жад̇д̇ааро жа бадибаннаа, жад̇д̇ааро жа палз тид̇аа;

‘‘Cattāro ca paṭipannā, cattāro ca phale ṭhitā;

зса сан̇гхо уж̇убхууд̇о, бан̃н̃аасийласамаахид̇о;

Esa saṅgho ujubhūto, paññāsīlasamāhito;

д̇ам̣ сан̇гхам̣ саран̣ам̣ г̇ажча, сабуд̇д̇ад̣̇ааро аринд̣̇ама.

Taṃ saṅghaṃ saraṇaṃ gaccha, saputtadāro arindama.

708.

‘‘баан̣аад̇ибаад̇аа вирамассу киббам̣, логз ад̣̇иннам̣ бариваж̇ж̇аяассу;

‘‘Pāṇātipātā viramassu khippaṃ, loke adinnaṃ parivajjayassu;

амаж̇ж̇або маа жа мусаа абхаан̣и, сагзна д̣̇аарзна жа хохи д̇удтод̇и.

Amajjapo mā ca musā abhāṇi, sakena dārena ca hohi tuṭṭhoti.

709.

‘‘ад̇т̇агаамоси мз яагка, хид̇агаамоси д̣̇звад̇з;

‘‘Atthakāmosi me yakkha, hitakāmosi devate;

гароми д̇уяхам̣ важанам̣, д̇вам̣си аажарияо мама.

Karomi tuyhaṃ vacanaṃ, tvaṃsi ācariyo mama.

710.

‘‘убзми саран̣ам̣ б̣уд̣̇д̇хам̣, д̇хамман̃жааби ануд̇д̇арам̣;

‘‘Upemi saraṇaṃ buddhaṃ, dhammañcāpi anuttaraṃ;

сан̇гхан̃жа нарад̣̇звасса, г̇ажчаами саран̣ам̣ ахам̣.

Saṅghañca naradevassa, gacchāmi saraṇaṃ ahaṃ.

711.

‘‘баан̣аад̇ибаад̇аа вирамаами киббам̣, логз ад̣̇иннам̣ бариваж̇ж̇аяаами;

‘‘Pāṇātipātā viramāmi khippaṃ, loke adinnaṃ parivajjayāmi;

амаж̇ж̇або но жа мусаа бхан̣аами, сагзна д̣̇аарзна жа хоми д̇удто.

Amajjapo no ca musā bhaṇāmi, sakena dārena ca homi tuṭṭho.

712.

‘‘опун̣аами махааваад̇з, над̣̇ияаа сийгхаг̇аамияаа;

‘‘Ophuṇāmi mahāvāte, nadiyā sīghagāmiyā;

вамаами баабигам̣ д̣̇идтим̣, б̣уд̣̇д̇хаанам̣ саасанз рад̇о.

Vamāmi pāpikaṃ diṭṭhiṃ, buddhānaṃ sāsane rato.

713.

‘‘ид̣̇ам̣ вад̇ваана сорадто, вирамид̇ваа баабад̣̇ассанаа;

‘‘Idaṃ vatvāna soraṭṭho, viramitvā pāpadassanā;

намо бхаг̇авад̇о гад̇ваа, баамогко рат̇амаарухий’’д̇и. – г̇аат̇ааяо авожум̣;

Namo bhagavato katvā, pāmokkho rathamāruhī’’ti. – gāthāyo avocuṃ;

658-9. д̇ад̇т̇а рааж̇аа бин̇г̇алаго наама, сурадтаанам̣ ад̇хибад̇и ахууд̇и бин̇г̇алажагкуд̇ааяа ‘‘бин̇г̇ало’’д̇и баагаданаамо сурадтад̣̇зсасса иссаро рааж̇аа ахоси. морияаананд̇и морияарааж̇уунам̣, д̇хаммаасогам̣ санд̇хааяа вад̣̇ад̇и. сурадтам̣ бунарааг̇амаад̇и сурадтасса висаяам̣ уд̣̇д̣̇исса сурадтаг̇аамимаг̇г̇ам̣ бажжааг̇ан̃чи. бан̇ганд̇и муд̣̇убхуумим̣. ван̣н̣убат̇анд̇и бзд̇зна ниммид̇ам̣ маруубхуумимаг̇г̇ам̣.

658-9. Tattha rājā piṅgalako nāma, suraṭṭhānaṃ adhipati ahūti piṅgalacakkhutāya ‘‘piṅgalo’’ti pākaṭanāmo suraṭṭhadesassa issaro rājā ahosi. Moriyānanti moriyarājūnaṃ, dhammāsokaṃ sandhāya vadati. Suraṭṭhaṃ punarāgamāti suraṭṭhassa visayaṃ uddissa suraṭṭhagāmimaggaṃ paccāgañchi. Paṅkanti mudubhūmiṃ. Vaṇṇupathanti petena nimmitaṃ marūbhūmimaggaṃ.

660. кзмод̇и ниб̣бхаяо. совад̇т̇игод̇и сод̇т̇ибхааваавахо. сивод̇и анубад̣̇д̣̇аво. сурадтаанам̣ санд̇игз ид̇од̇и иминаа маг̇г̇зна г̇ажчанд̇аа маяам̣ сурадтависаяасса самийбзязва.

660.Khemoti nibbhayo. Sovatthikoti sotthibhāvāvaho. Sivoti anupaddavo. Suraṭṭhānaṃ santike itoti iminā maggena gacchantā mayaṃ suraṭṭhavisayassa samīpeyeva.

661-2. сорадтод̇и сурадтаад̇хибад̇и. уб̣б̣иг̇г̇аруубод̇и уд̇расд̇асабхааво. бхим̣сананд̇и бхаяаж̇ананам̣ . ломахам̣сананд̇и бхим̣санагабхаавзна ломаанам̣ хам̣саабанам̣.

661-2.Soraṭṭhoti suraṭṭhādhipati. Ubbiggarūpoti utrastasabhāvo. Bhiṃsananti bhayajananaṃ . Lomahaṃsananti bhiṃsanakabhāvena lomānaṃ haṃsāpanaṃ.

663. яамабурисаана санд̇игзд̇и бзд̇аанам̣ самийбз вад̇д̇аама. амаанусо вааяад̇и г̇анд̇ход̇и бзд̇аанам̣ сарийраг̇анд̇хо вааяад̇и. гхосо суяяад̇и д̣̇аарун̣од̇и бажжзганираязсу гааран̣ам̣ гаарияамаанаанам̣ сад̇д̇аанам̣ гхорад̇аро сад̣̇д̣̇о суяяад̇и.

663.Yamapurisāna santiketi petānaṃ samīpe vattāma. Amānuso vāyati gandhoti petānaṃ sarīragandho vāyati. Ghoso suyyati dāruṇoti paccekanirayesu kāraṇaṃ kāriyamānānaṃ sattānaṃ ghorataro saddo suyyati.

666. баад̣̇абанд̇и баад̣̇асад̣̇исзхи муулааваяавзхи уд̣̇агасса биванад̇о ‘‘баад̣̇або’’д̇и лад̣̇д̇ханаамам̣ д̇арум̣. чааяаасамбаннанд̇и самбаннажчааяам̣. нийлаб̣бхаван̣н̣асад̣̇исанд̇и ван̣н̣зна нийламзгхасад̣̇исам̣. мзгхаван̣н̣асирийнибханд̇и мзгхаван̣н̣асан̣таанам̣ худ̇ваа кааяамаанам̣.

666.Pādapanti pādasadisehi mūlāvayavehi udakassa pivanato ‘‘pādapo’’ti laddhanāmaṃ taruṃ. Chāyāsampannanti sampannacchāyaṃ. Nīlabbhavaṇṇasadisanti vaṇṇena nīlameghasadisaṃ. Meghavaṇṇasirīnibhanti meghavaṇṇasaṇṭhānaṃ hutvā khāyamānaṃ.

670. буурам̣ баанийяасараганд̇и баанийязна бун̣н̣ам̣ баанийяабхааж̇анам̣. буувзд̇и каж̇ж̇агз. вид̇д̇зд̇и вид̇д̇иж̇ананз мад̇хурз манун̃н̃з д̇ахим̣ д̇ахим̣ сараавз буурзд̇ваа табид̇абуувз ад̣̇д̣̇аса.

670.Pūraṃ pānīyasarakanti pānīyena puṇṇaṃ pānīyabhājanaṃ. Pūveti khajjake. Vitteti vittijanane madhure manuññe tahiṃ tahiṃ sarāve pūretvā ṭhapitapūve addasa.

672. ат̇о д̇з ад̣̇урааг̇ад̇анд̇и зд̇т̇а ат̇од̇и нибаад̇амад̇д̇ам̣, авад̇хааран̣ад̇т̇з ваа, махаарааж̇а, д̇з ааг̇ад̇ам̣ д̣̇урааг̇ад̇ам̣ на ход̇и, ат̇а ко свааг̇ад̇амзваад̇и маяам̣ самбадижчаамаад̇и ад̇т̇о. аринд̣̇амаад̇и арийнам̣ д̣̇аманасийла.

672.Athote adurāgatanti ettha athoti nipātamattaṃ, avadhāraṇatthe vā, mahārāja, te āgataṃ durāgataṃ na hoti, atha kho svāgatamevāti mayaṃ sampaṭicchāmāti attho. Arindamāti arīnaṃ damanasīla.

677. амажжаа баарисаж̇ж̇аад̇и амажжаа баарисаж̇ж̇аа жа важанам̣ сун̣анд̇у, б̣раахман̣о жа д̇уяхам̣ бурохид̇о д̇ам̣ сун̣аад̇ууд̇и яож̇анаа.

677.Amaccā pārisajjāti amaccā pārisajjā ca vacanaṃ suṇantu, brāhmaṇo ca tuyhaṃ purohito taṃ suṇātūti yojanā.

678. сурадтасмим̣ аханд̇и сурадтад̣̇зсз ахам̣. д̣̇зваад̇и рааж̇аанам̣ аалабад̇и. мижчаад̣̇идтийд̇и над̇т̇игад̣̇идтияаа вибарийд̇ад̣̇ассано. д̣̇уссийлод̇и ниссийло. гад̣̇арияод̇и т̇ад̣̇д̇хамажчарий. барибхаасагод̇и саман̣аб̣раахман̣аанам̣ аггосаго.

678.Suraṭṭhasmiṃ ahanti suraṭṭhadese ahaṃ. Devāti rājānaṃ ālapati. Micchādiṭṭhīti natthikadiṭṭhiyā viparītadassano. Dussīloti nissīlo. Kadariyoti thaddhamaccharī. Paribhāsakoti samaṇabrāhmaṇānaṃ akkosako.

679. ваараяиссанд̇и ваарзсим̣. анд̇арааяагаро аханд̇и д̣̇аанам̣ д̣̇ад̣̇анд̇аанам̣ убагаарам̣ гаронд̇аанам̣ анд̇арааяагаро худ̇ваа ан̃н̃зсан̃жа барзсам̣ д̣̇аанам̣ д̣̇ад̣̇амаанаанам̣ д̣̇аанамаяабун̃н̃ад̇о ахам̣ б̣ахуж̇анам̣ ваараяиссам̣ ваарзсинд̇и яож̇анаа.

679.Vārayissanti vāresiṃ. Antarāyakaro ahanti dānaṃ dadantānaṃ upakāraṃ karontānaṃ antarāyakaro hutvā aññesañca paresaṃ dānaṃ dadamānānaṃ dānamayapuññato ahaṃ bahujanaṃ vārayissaṃ vāresinti yojanā.

680. вибааго над̇т̇и д̣̇аанассаад̇иаад̣̇и ваарид̇аагаарад̣̇ассанам̣. д̇ад̇т̇а вибааго над̇т̇и д̣̇аанассаад̇и д̣̇аанам̣ д̣̇ад̣̇ад̇о д̇асса вибааго ааяад̇им̣ бад̇д̇аб̣б̣апалам̣ над̇т̇ийд̇и вибаагам̣ бадиб̣аахад̇и. сам̣яамасса гуд̇о паланд̇и сийласса бана гуд̇о наама палам̣, саб̣б̣зна саб̣б̣ам̣ д̇ам̣ над̇т̇ийд̇и ад̇хиббааяо. над̇т̇и аажарияо наамаад̇и аажаарасамаажаарасигкаабаго аажарияо наама гожи над̇т̇и. сабхаавад̇о зва хи сад̇д̇аа д̣̇анд̇аа ваа ад̣̇анд̇аа ваа хонд̇ийд̇и ад̇хиббааяо. д̇знааха ‘‘ад̣̇анд̇ам̣ го д̣̇амзссад̇ий’’д̇и.

680.Vipākonatthi dānassātiādi vāritākāradassanaṃ. Tattha vipāko natthi dānassāti dānaṃ dadato tassa vipāko āyatiṃ pattabbaphalaṃ natthīti vipākaṃ paṭibāhati. Saṃyamassa kuto phalanti sīlassa pana kuto nāma phalaṃ, sabbena sabbaṃ taṃ natthīti adhippāyo. Natthi ācariyo nāmāti ācārasamācārasikkhāpako ācariyo nāma koci natthi. Sabhāvato eva hi sattā dantā vā adantā vā hontīti adhippāyo. Tenāha ‘‘adantaṃ ko damessatī’’ti.

681. самад̇уляаани бхууд̇аанийд̇и имз сад̇д̇аа саб̣б̣зби ан̃н̃аман̃н̃ам̣ самасамаа, д̇асмаа ж̇здто зва над̇т̇и, гуд̇о ж̇здтаабажааяиго, ж̇здтаабажааяанабун̃н̃ам̣ наама над̇т̇ийд̇и ад̇т̇о. над̇т̇и б̣аланд̇и яамхи ад̇д̇ано б̣алз бад̇идтид̇аа сад̇д̇аа вийрияам̣ гад̇ваа мануссасобхаг̇яад̇ам̣ аад̣̇им̣ гад̇ваа яааваарахад̇д̇ам̣ самбад̇д̇ияо баабун̣анд̇и, д̇ам̣ вийрияаб̣алам̣ бадигкибад̇и. вийрияам̣ ваа над̇т̇и гуд̇о удтаанаборисанд̇и ид̣̇ам̣ но бурисавийриязна бурисагаарзна бавад̇д̇анд̇и звам̣ бавад̇д̇аваад̣̇абадигкзбавасзна вуд̇д̇ам̣.

681.Samatulyāni bhūtānīti ime sattā sabbepi aññamaññaṃ samasamā, tasmā jeṭṭho eva natthi, kuto jeṭṭhāpacāyiko, jeṭṭhāpacāyanapuññaṃ nāma natthīti attho. Natthi balanti yamhi attano bale patiṭṭhitā sattā vīriyaṃ katvā manussasobhagyataṃ ādiṃ katvā yāvaarahattaṃ sampattiyo pāpuṇanti, taṃ vīriyabalaṃ paṭikkhipati. Vīriyaṃ vā natthi kuto uṭṭhānaporisanti idaṃ no purisavīriyena purisakārena pavattanti evaṃ pavattavādapaṭikkhepavasena vuttaṃ.

682. над̇т̇и д̣̇аанапалам̣ наамаад̇и д̣̇аанасса палам̣ наама гин̃жи над̇т̇и, д̣̇зяяад̇хаммабарижжааг̇о бхасманихид̇ам̣ вияа нибпало зваад̇и ад̇т̇о. на висод̇хзд̇и взринанд̇и зд̇т̇а взринанд̇и взраванд̇ам̣ взраанам̣ васзна баан̣аад̇ибаад̇аад̣̇ийнам̣ васзна жа гад̇абаабам̣ буг̇г̇алам̣ д̣̇аанасийлаад̣̇ивад̇ад̇о на висод̇хзд̇и, гад̣̇аажиби суд̣̇д̇хам̣ на гарод̇и. буб̣б̣з ‘‘вибааго над̇т̇и д̣̇аанассаа’’д̇иаад̣̇и д̣̇аанаад̣̇ид̇о ад̇д̇ано барзсам̣ ниваарид̇аагаарад̣̇ассанам̣, ‘‘над̇т̇и д̣̇аанапалам̣ наамаа’’д̇иаад̣̇и бана ад̇т̇ано мижчаабхинивзсад̣̇ассананд̇и д̣̇адтаб̣б̣ам̣. лад̣̇д̇хзяяанд̇и лад̣̇д̇хаб̣б̣ам̣. гат̇ам̣ бана лад̣̇д̇хаб̣б̣анд̇и ааха ‘‘нияад̇ибарин̣аамаж̇а’’нд̇и. аяам̣ сад̇д̇о сукам̣ ваа д̣̇угкам̣ ваа лабханд̇о нияад̇ивибарин̣аамавасзнзва лабхад̇и, на гаммасса гад̇ад̇д̇аа, на иссараад̣̇инаа жаад̇и ад̇хиббааяо.

682.Natthidānaphalaṃ nāmāti dānassa phalaṃ nāma kiñci natthi, deyyadhammapariccāgo bhasmanihitaṃ viya nipphalo evāti attho. Na visodheti verinanti ettha verinanti veravantaṃ verānaṃ vasena pāṇātipātādīnaṃ vasena ca katapāpaṃ puggalaṃ dānasīlādivatato na visodheti, kadācipi suddhaṃ na karoti. Pubbe ‘‘vipāko natthi dānassā’’tiādi dānādito attano paresaṃ nivāritākāradassanaṃ, ‘‘natthi dānaphalaṃ nāmā’’tiādi pana atthano micchābhinivesadassananti daṭṭhabbaṃ. Laddheyyanti laddhabbaṃ. Kathaṃ pana laddhabbanti āha ‘‘niyatipariṇāmaja’’nti. Ayaṃ satto sukhaṃ vā dukkhaṃ vā labhanto niyativipariṇāmavaseneva labhati, na kammassa katattā, na issarādinā cāti adhippāyo.

683. над̇т̇и маад̇аа бид̇аа бхаад̇аад̇и маад̇аад̣̇ийсу саммаабадибад̇д̇имижчаабадибад̇д̇ийнам̣ палаабхаавам̣ санд̇хааяа вад̣̇ад̇и. лого над̇т̇и ид̇о баранд̇и ид̇о ид̇халогад̇о баралого наама гожи над̇т̇и, д̇ад̇т̇а д̇ад̇т̇зва сад̇д̇аа ужчиж̇ж̇анд̇ийд̇и ад̇хиббааяо. д̣̇иннанд̇и махаад̣̇аанам̣. худ̇анд̇и бахзнагасаггааро, д̇ад̣̇убхаяамби палаабхаавам̣ санд̇хааяа ‘‘над̇т̇ий’’д̇и бадигкибад̇и. сунихид̇анд̇и судту нихид̇ам̣. на виж̇ж̇ад̇ийд̇и яам̣ саман̣аб̣раахман̣аанам̣ д̣̇аанам̣ наама ‘‘ануг̇аамиганид̇хий’’д̇и вад̣̇анд̇и, д̇ам̣ на виж̇ж̇ад̇и. д̇зсам̣ д̇ам̣ ваажаавад̇т̇умад̇д̇амзваад̇и ад̇хиббааяо.

683.Natthimātā pitā bhātāti mātādīsu sammāpaṭipattimicchāpaṭipattīnaṃ phalābhāvaṃ sandhāya vadati. Loko natthi ito paranti ito idhalokato paraloko nāma koci natthi, tattha tattheva sattā ucchijjantīti adhippāyo. Dinnanti mahādānaṃ. Hutanti pahenakasakkāro, tadubhayampi phalābhāvaṃ sandhāya ‘‘natthī’’ti paṭikkhipati. Sunihitanti suṭṭhu nihitaṃ. Na vijjatīti yaṃ samaṇabrāhmaṇānaṃ dānaṃ nāma ‘‘anugāmikanidhī’’ti vadanti, taṃ na vijjati. Tesaṃ taṃ vācāvatthumattamevāti adhippāyo.

684. на гожи ган̃жи ханад̇ийд̇и яо бурисо барам̣ бурисам̣ ханзяяа, барасса бурисасса сийсам̣ чинд̣̇зяяа, д̇ад̇т̇а барамад̇т̇ад̇о на гожи ган̃жи ханад̇и, сад̇д̇аннам̣ гааяаанам̣ чид̣̇д̣̇абхаавад̇о хананд̇о вияа ход̇и. гат̇ам̣ сад̇т̇абахаарод̇и ааха ‘‘сад̇д̇аннам̣ вивараманд̇арз’’д̇и. бат̇авийаад̣̇ийнам̣ сад̇д̇аннам̣ гааяаанам̣ виварабхууд̇з анд̇арз чид̣̇д̣̇з сад̇т̇ам̣ бависад̇и, д̇зна сад̇д̇аа асиаад̣̇ийхи бахад̇аа вияа хонд̇и, ж̇ийво вияа бана сзсагааяааби нижжасабхаавад̇д̇аа на чиж̇ж̇анд̇ийд̇и ад̇хиббааяо.

684.Na koci kañci hanatīti yo puriso paraṃ purisaṃ haneyya, parassa purisassa sīsaṃ chindeyya, tattha paramatthato na koci kañci hanati, sattannaṃ kāyānaṃ chiddabhāvato hananto viya hoti. Kathaṃ satthapahāroti āha ‘‘sattannaṃ vivaramantare’’ti. Pathavīādīnaṃ sattannaṃ kāyānaṃ vivarabhūte antare chidde satthaṃ pavisati, tena sattā asiādīhi pahatā viya honti, jīvo viya pana sesakāyāpi niccasabhāvattā na chijjantīti adhippāyo.

685. ажчзж̇ж̇аабхзж̇ж̇о хи ж̇ийвод̇и аяам̣ сад̇д̇аанам̣ ж̇ийво сад̇т̇аад̣̇ийхи на чинд̣̇ид̇аб̣б̣о на бхинд̣̇ид̇аб̣б̣о нижжасабхаавад̇д̇аа. адтам̣со г̇ул̣абариман̣д̣алод̇и со бана ж̇ийво гад̣̇аажи адтам̣со ход̇и гад̣̇аажи г̇ул̣абариман̣д̣ало . яож̇анаанам̣ сад̇ам̣ бан̃жаад̇и гзвалийбхаавам̣ бад̇д̇о бан̃жаяож̇анасад̇уб̣б̣зд̇хо ход̇и. го ж̇ийвам̣ чзд̇д̇умарахад̇ийд̇и нижжам̣ ниб̣б̣игаарам̣ ж̇ийвам̣ го наама сад̇т̇аад̣̇ийхи чинд̣̇ид̇ум̣ арахад̇и, на со гзнажи вигобанзяяод̇и вад̣̇ад̇и.

685.Acchejjābhejjo hi jīvoti ayaṃ sattānaṃ jīvo satthādīhi na chinditabbo na bhinditabbo niccasabhāvattā. Aṭṭhaṃso guḷaparimaṇḍaloti so pana jīvo kadāci aṭṭhaṃso hoti kadāci guḷaparimaṇḍalo . Yojanānaṃ sataṃ pañcāti kevalībhāvaṃ patto pañcayojanasatubbedho hoti. Ko jīvaṃ chettumarahatīti niccaṃ nibbikāraṃ jīvaṃ ko nāma satthādīhi chindituṃ arahati, na so kenaci vikopaneyyoti vadati.

686. суд̇д̇аг̇ул̣зд̇и взтзд̇ваа гад̇асуд̇д̇аг̇ул̣з. кид̇д̇зд̇и ниб̣б̣зтанавасзна кид̇д̇з. ниб̣б̣зтзнд̇ам̣ балааяад̇ийд̇и баб̣б̣ад̇з ваа ругкаг̇г̇з ваа тад̇ваа ниб̣б̣зтияамаанам̣ кид̇д̇ам̣ суд̇д̇аг̇ул̣ам̣ ниб̣б̣зтзнд̇амзва г̇ажчад̇и, суд̇д̇з кийн̣з на г̇ажчад̇и. звамзванд̇и яат̇аа д̇ам̣ суд̇д̇аг̇ул̣ам̣ ниб̣б̣зтияамаанам̣ г̇ажчад̇и, суд̇д̇з кийн̣з на г̇ажчад̇и, звамзва со ж̇ийво ‘‘жуллаасийд̇и махаагаббино сад̇асахассааний’’д̇и вуд̇д̇агааламзва ад̇д̇абхааваг̇ул̣ам̣ ниб̣б̣зтзнд̇о балааяад̇и бавад̇д̇ад̇и, д̇ад̇о уд̣̇д̇хам̣ на бавад̇д̇ад̇и.

686.Suttaguḷeti veṭhetvā katasuttaguḷe. Khitteti nibbeṭhanavasena khitte. Nibbeṭhentaṃ palāyatīti pabbate vā rukkhagge vā ṭhatvā nibbeṭhiyamānaṃ khittaṃ suttaguḷaṃ nibbeṭhentameva gacchati, sutte khīṇe na gacchati. Evamevanti yathā taṃ suttaguḷaṃ nibbeṭhiyamānaṃ gacchati, sutte khīṇe na gacchati, evameva so jīvo ‘‘cullāsīti mahākappino satasahassānī’’ti vuttakālameva attabhāvaguḷaṃ nibbeṭhento palāyati pavattati, tato uddhaṃ na pavattati.

687. звамзва жа со ж̇ийвод̇и яат̇аа гожи бурисо ад̇д̇ано ниваасаг̇аамад̇о нигкамид̇ваа д̇ад̇о ан̃н̃ам̣ г̇аамам̣ бависад̇и гзнажид̣̇зва гаран̣ийязна, звамзва со ж̇ийво ид̇о сарийрад̇о нигкамид̇ваа ан̃н̃ам̣ абарам̣ сарийрам̣ нияад̇авасзна бависад̇ийд̇и ад̇хиббааяо. б̣онд̣̇инд̇и гааяам̣.

687.Evameva ca so jīvoti yathā koci puriso attano nivāsagāmato nikkhamitvā tato aññaṃ gāmaṃ pavisati kenacideva karaṇīyena, evameva so jīvo ito sarīrato nikkhamitvā aññaṃ aparaṃ sarīraṃ niyatavasena pavisatīti adhippāyo. Bondinti kāyaṃ.

689. жуллаасийд̇ийд̇и жад̇ураасийд̇и. махаагаббинод̇и махаагаббаанам̣. д̇ад̇т̇а ‘‘згамхаа махаасараа анод̇ад̇д̇аад̣̇ид̇о вассасад̇з вассасад̇з гусаг̇г̇зна згзгам̣ уд̣̇агаб̣инд̣̇ум̣ нийхаранд̇з иминаа убаггамзна сад̇д̇агкад̇д̇ум̣ д̇амхи сарз нируд̣̇агз ж̇аад̇з зго махаагаббо наама ход̇ий’’д̇и вад̇ваа ‘‘зваруубаанам̣ махаагаббаанам̣ жад̇ураасийд̇исад̇асахассаани сам̣саарасса баримаан̣а’’нд̇и вад̣̇анд̇и. яз б̣аалаа яз жа бан̣д̣ид̇аад̇и яз анд̇хаб̣аалаа, яз жа саббан̃н̃аа, саб̣б̣зби д̇з. сам̣саарам̣ кзбаяид̇ваанаад̇и яат̇аавуд̇д̇агаалабарижчзд̣̇ам̣ сам̣саарам̣ абараабаруббад̇д̇ивасзна кзбзд̇ваа. д̣̇угкассанд̇ам̣ гариссарзд̇и ваддад̣̇угкасса барияанд̇ам̣ барияосаанам̣ гариссанд̇и. бан̣д̣ид̇ааби анд̇араа суж̇жхид̇ум̣ на саггонд̇и, б̣аалааби д̇ад̇о уд̣̇д̇хам̣ наббавад̇д̇анд̇ийд̇и д̇асса лад̣̇д̇хи.

689.Cullāsītīti caturāsīti. Mahākappinoti mahākappānaṃ. Tattha ‘‘ekamhā mahāsarā anotattādito vassasate vassasate kusaggena ekekaṃ udakabinduṃ nīharante iminā upakkamena sattakkhattuṃ tamhi sare nirudake jāte eko mahākappo nāma hotī’’ti vatvā ‘‘evarūpānaṃ mahākappānaṃ caturāsītisatasahassāni saṃsārassa parimāṇa’’nti vadanti. Ye bālā ye ca paṇḍitāti ye andhabālā, ye ca sappaññā, sabbepi te. Saṃsāraṃ khepayitvānāti yathāvuttakālaparicchedaṃ saṃsāraṃ aparāparuppattivasena khepetvā. Dukkhassantaṃ karissareti vaṭṭadukkhassa pariyantaṃ pariyosānaṃ karissanti. Paṇḍitāpi antarā sujjhituṃ na sakkonti, bālāpi tato uddhaṃ nappavattantīti tassa laddhi.

690. мид̇аани сукад̣̇угкаани, д̣̇он̣зхи бидагзхи жаад̇и сад̇д̇аанам̣ сукад̣̇угкаани наама д̣̇он̣зхи бидагзхи маанабхааж̇анзхи мид̇аани вияа яат̇аавуд̇д̇агаалабарижчзд̣̇знзва баримид̇ад̇д̇аа бажжзган̃жа д̇зсам̣ д̇зсам̣ сад̇д̇аанам̣ д̇аани нияад̇ибарин̣аамаж̇аани баримид̇аани. д̇аяид̣̇ам̣ ж̇ино саб̣б̣ам̣ баж̇аанаад̇и ж̇инабхуумияам̣ тид̇о гзвалам̣ баж̇аанаад̇и сам̣саарасса самад̇игганд̇ад̇д̇аа. сам̣саарз бана бариб̣бхамад̇и саммуул̣хааяам̣ ид̇араа баж̇аа.

690.Mitāni sukhadukkhāni, doṇehi piṭakehi cāti sattānaṃ sukhadukkhāni nāma doṇehi piṭakehi mānabhājanehi mitāni viya yathāvuttakālaparicchedeneva parimitattā paccekañca tesaṃ tesaṃ sattānaṃ tāni niyatipariṇāmajāni parimitāni. Tayidaṃ jino sabbaṃ pajānāti jinabhūmiyaṃ ṭhito kevalaṃ pajānāti saṃsārassa samatikkantattā. Saṃsāre pana paribbhamati sammūḷhāyaṃ itarā pajā.

691. звам̣д̣̇идти бурз аасинд̇и яат̇аавуд̇д̇анад̇т̇игад̣̇идтиго буб̣б̣зва ахам̣ ахосим̣. саммуул̣хо мохабааруд̇од̇и яат̇аавуд̇д̇ааяа д̣̇идтияаа хзд̇убхууд̇зна саммохзна саммуул̣хо, д̇ам̣сахаж̇аад̇зна бана мохзна бааруд̇о, бадижчаад̣̇ид̇агусалаб̣ийж̇од̇и ад̇хиббааяо.

691.Evaṃdiṭṭhi pure āsinti yathāvuttanatthikadiṭṭhiko pubbeva ahaṃ ahosiṃ. Sammūḷho mohapārutoti yathāvuttāya diṭṭhiyā hetubhūtena sammohena sammūḷho, taṃsahajātena pana mohena pāruto, paṭicchāditakusalabījoti adhippāyo.

692. звам̣ буб̣б̣з яаа ад̇д̇ано уббаннаа баабад̣̇идти, д̇ассаа васзна гад̇ам̣ баабагаммам̣ д̣̇ассзд̇ваа ид̣̇аани ад̇д̇анаа ааяад̇им̣ анубхавид̇аб̣б̣ам̣ д̇асса палам̣ д̣̇ассзнд̇о ‘‘орам̣ мз чахи маасзхий’’д̇иаад̣̇имааха.

692. Evaṃ pubbe yā attano uppannā pāpadiṭṭhi, tassā vasena kataṃ pāpakammaṃ dassetvā idāni attanā āyatiṃ anubhavitabbaṃ tassa phalaṃ dassento ‘‘oraṃ me chahi māsehī’’tiādimāha.

695-7. д̇ад̇т̇а вассаани сад̇асахассаанийд̇и вассаанам̣ сад̇асахассаани, ад̇иггамид̇ваад̇и важанасзсо. бхуммад̇т̇з ваа зд̇ам̣ бажжад̇д̇аважанам̣, вассзсу сад̇асахассзсу вийд̇ивад̇д̇зсууд̇и ад̇т̇о. гхосо суяяад̇и д̇аавад̣̇зд̇и яад̣̇аа зд̇д̇аго гаало ад̇игганд̇о ход̇и, д̇аавад̣̇зва д̇асмим̣ гаалз ‘‘ид̇ха бажжанд̇аанам̣ во маарисаа вассасад̇асахассабаримаан̣о гаало ад̇ийд̇о’’д̇и звам̣ д̇асмим̣ нираяз сад̣̇д̣̇о суяяад̇и. лагко зсо, махаарааж̇а, сад̇абхааг̇авассагодияод̇и сад̇абхааг̇аа сад̇агодтаасаа вассагодияо, махаарааж̇а, нираяз бажжанд̇аанам̣ сад̇д̇аанам̣ ааяуно зсо лагко зсо барижчзд̣̇од̇и ад̇т̇о. ид̣̇ам̣ вуд̇д̇ам̣ ход̇и – д̣̇асад̣̇асагам̣ сад̇ам̣ наама, д̣̇аса сад̇аани сахассам̣ наама, д̣̇асад̣̇асасахассаани сад̇асахассам̣ наама, сад̇асад̇асахассаани годи наама, д̇аасам̣ годийнам̣ васзна сад̇асахассавассагодияо сад̇абхааг̇аа вассагодияо. саа жа ко нзраяигаанам̣язва вассаг̇ан̣анаавасзна взд̣̇ид̇аб̣б̣аа, на мануссаанам̣, д̣̇зваанам̣ ваа. ийд̣̇исаани анзгаани вассагодисад̇асахассаани нзраяигаанам̣ ааяу. д̇знааха ‘‘годисад̇асахассаани, нираяз бажжарз ж̇анаа’’д̇и. яаад̣̇исзна бана баабзна сад̇д̇аа звам̣ нираязсу бажжанд̇и , д̇ам̣ ниг̇аманавасзна д̣̇ассзд̇ум̣ ‘‘мижчаад̣̇идтий жа д̣̇уссийлаа, яз жа арияуубаваад̣̇ино’’д̇и вуд̇д̇ам̣. взд̣̇иссанд̇и анубхависсам̣.

695-7. Tattha vassāni satasahassānīti vassānaṃ satasahassāni, atikkamitvāti vacanaseso. Bhummatthe vā etaṃ paccattavacanaṃ, vassesu satasahassesu vītivattesūti attho. Ghoso suyyati tāvadeti yadā ettako kālo atikkanto hoti, tāvadeva tasmiṃ kāle ‘‘idha paccantānaṃ vo mārisā vassasatasahassaparimāṇo kālo atīto’’ti evaṃ tasmiṃ niraye saddo suyyati. Lakkho eso, mahārāja, satabhāgavassakoṭiyoti satabhāgā satakoṭṭhāsā vassakoṭiyo, mahārāja, niraye paccantānaṃ sattānaṃ āyuno eso lakkho eso paricchedoti attho. Idaṃ vuttaṃ hoti – dasadasakaṃ sataṃ nāma, dasa satāni sahassaṃ nāma, dasadasasahassāni satasahassaṃ nāma, satasatasahassāni koṭi nāma, tāsaṃ koṭīnaṃ vasena satasahassavassakoṭiyo satabhāgā vassakoṭiyo. Sā ca kho nerayikānaṃyeva vassagaṇanāvasena veditabbā, na manussānaṃ, devānaṃ vā. Īdisāni anekāni vassakoṭisatasahassāni nerayikānaṃ āyu. Tenāha ‘‘koṭisatasahassāni, niraye paccare janā’’ti. Yādisena pana pāpena sattā evaṃ nirayesu paccanti , taṃ nigamanavasena dassetuṃ ‘‘micchādiṭṭhī ca dussīlā, ye ca ariyūpavādino’’ti vuttaṃ. Vedissanti anubhavissaṃ.

698-706. звам̣ ааяад̇им̣ ад̇д̇анаа анубхавид̇аб̣б̣ам̣ баабапалам̣ д̣̇ассзд̇ваа ид̣̇аани ‘‘гзна д̇з б̣рахмажариязна , аанубхааво аяам̣ д̇аваа’’д̇и ран̃н̃аа бужчид̇амад̇т̇ам̣ аажигкид̇ваа д̇ам̣ саран̣зсу жзва сийлзсу жа бад̇идтаабзд̇угаамо ‘‘д̇ам̣ сун̣охи махаарааж̇аа’’д̇иаад̣̇имааха. д̇ад̇т̇а сийлзсубосат̇з рад̇аад̇и нижжасийлзсу жа убосат̇асийлзсу жа абхирад̇аа. ад̣̇аад̇и ад̣̇ааси. д̇ам̣ д̇хамманд̇и д̇ам̣ адтан̇г̇игам̣ маг̇г̇ам̣ амад̇абад̣̇ан̃жа.

698-706. Evaṃ āyatiṃ attanā anubhavitabbaṃ pāpaphalaṃ dassetvā idāni ‘‘kena te brahmacariyena , ānubhāvo ayaṃ tavā’’ti raññā pucchitamatthaṃ ācikkhitvā taṃ saraṇesu ceva sīlesu ca patiṭṭhāpetukāmo ‘‘taṃ suṇohi mahārājā’’tiādimāha. Tattha sīlesuposathe ratāti niccasīlesu ca uposathasīlesu ca abhiratā. Adāti adāsi. Taṃ dhammanti taṃ aṭṭhaṅgikaṃ maggaṃ amatapadañca.

709-12. звам̣ бзд̇зна саран̣зсу сийлзсу жа самаад̣̇абид̇о рааж̇аа басаннамаанасо д̇зна ад̇д̇ано гад̇ам̣ убагаарам̣ д̇аава гид̇д̇зд̇ваа саран̣аад̣̇ийсу бад̇идтаханд̇о ‘‘ад̇т̇агаамо’’д̇иаад̣̇игаа д̇иссо г̇аат̇аа вад̇ваа буб̣б̣з ад̇д̇анаа г̇ахид̇ааяа баабигааяа д̣̇идтияаа бадиниссадтабхаавам̣ багаасзнд̇о ‘‘опун̣аамий’’д̇и г̇аат̇амааха.

709-12. Evaṃ petena saraṇesu sīlesu ca samādapito rājā pasannamānaso tena attano kataṃ upakāraṃ tāva kittetvā saraṇādīsu patiṭṭhahanto ‘‘atthakāmo’’tiādikā tisso gāthā vatvā pubbe attanā gahitāya pāpikāya diṭṭhiyā paṭinissaṭṭhabhāvaṃ pakāsento ‘‘ophuṇāmī’’ti gāthamāha.

д̇ад̇т̇а опун̣аами махааваад̇зд̇и маханд̇з ваад̇з вааяанд̇з бхусам̣ вияа д̇ам̣ баабагам̣ д̣̇идтим̣, яагка, д̇ава д̇хаммад̣̇зсанааваад̇з опун̣аами нид̣̇д̇хунаами. над̣̇ияаа ваа сийгхаг̇аамияаад̇и сийгхасод̇ааяа махаанад̣̇ияаа ваа д̇ин̣агадтабан̣н̣агасадам̣ вияа баабигам̣ д̣̇идтим̣ баваахзмийд̇и ад̇хиббааяо. вамаами баабигам̣ д̣̇идтинд̇и мама маномукаг̇ад̇ам̣ баабигам̣ д̣̇идтим̣ ужчад̣д̣аяаами. д̇ад̇т̇а гааран̣амааха ‘‘б̣уд̣̇д̇хаанам̣ саасанз рад̇о’’д̇и. яасмаа згам̣сзна амад̇аавахз б̣уд̣̇д̇хаанам̣ бхаг̇аванд̇аанам̣ саасанз рад̇о абхирад̇о, д̇асмаа д̇ам̣ д̣̇идтисан̇каад̇ам̣ висам̣ вамаамийд̇и яож̇анаа.

Tattha ophuṇāmi mahāvāteti mahante vāte vāyante bhusaṃ viya taṃ pāpakaṃ diṭṭhiṃ, yakkha, tava dhammadesanāvāte ophuṇāmi niddhunāmi. Nadiyā vā sīghagāmiyāti sīghasotāya mahānadiyā vā tiṇakaṭṭhapaṇṇakasaṭaṃ viya pāpikaṃ diṭṭhiṃ pavāhemīti adhippāyo. Vamāmi pāpikaṃ diṭṭhinti mama manomukhagataṃ pāpikaṃ diṭṭhiṃ ucchaḍḍayāmi. Tattha kāraṇamāha ‘‘buddhānaṃ sāsane rato’’ti. Yasmā ekaṃsena amatāvahe buddhānaṃ bhagavantānaṃ sāsane rato abhirato, tasmā taṃ diṭṭhisaṅkhātaṃ visaṃ vamāmīti yojanā.

713. д̇и осаанаг̇аат̇аа сан̇г̇ийд̇игаарзхи табид̇аа. д̇ад̇т̇а баамогкод̇ибаажийнад̣̇исаабхимуко худ̇ваа. рат̇амаарухийд̇и рааж̇аа г̇аманасаж̇ж̇ам̣ ад̇д̇ано рааж̇арат̇ам̣ абхирухи, ааруяха яагкаанубхаавзна д̇ам̣ д̣̇ивасамзва ад̇д̇ано наг̇арам̣ бад̇ваа рааж̇абхаванам̣ баависи. со абарзна самаязна имам̣ бавад̇д̇им̣ бхигкуунам̣ аарожзси, бхигкуу д̇ам̣ т̇зраанам̣ аарожзсум̣, т̇зраа д̇ад̇ияасан̇г̇ийд̇ияам̣ сан̇г̇ахам̣ ааробзсум̣.

713. Ti osānagāthā saṅgītikārehi ṭhapitā. Tattha pāmokkhotipācīnadisābhimukho hutvā. Rathamāruhīti rājā gamanasajjaṃ attano rājarathaṃ abhiruhi, āruyha yakkhānubhāvena taṃ divasameva attano nagaraṃ patvā rājabhavanaṃ pāvisi. So aparena samayena imaṃ pavattiṃ bhikkhūnaṃ ārocesi, bhikkhū taṃ therānaṃ ārocesuṃ, therā tatiyasaṅgītiyaṃ saṅgahaṃ āropesuṃ.

нанд̣̇агабзд̇авад̇т̇уван̣н̣анаа нидтид̇аа.

Nandakapetavatthuvaṇṇanā niṭṭhitā.

Next: 4. рзвад̇ийбзд̇авад̇т̇уван̣н̣анаа • 4. Revatīpetavatthuvaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 3. нанд̣̇агабзд̇авад̇т̇у • 3. Nandakapetavatthu

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact