| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. நந்த³கஸுத்தவண்ணனா
4. Nandakasuttavaṇṇanā
4. சதுத்தே² உபட்டா²னஸாலாயந்தி போ⁴ஜனஸாலாயங். யேனுபட்டா²னஸாலாதி ஸத்தா² நந்த³கத்தே²ரேன மது⁴ரஸ்ஸரேன ஆரத்³தா⁴ய த⁴ம்மதே³ஸனாய ஸத்³த³ங் ஸுத்வா, ‘‘ஆனந்த³, கோ ஏஸோ உபட்டா²னஸாலாய மது⁴ரஸ்ஸரேன த⁴ம்மங் தே³ஸேதீ’’தி புச்சி²த்வா ‘‘த⁴ம்மகதி²கனந்த³கத்தே²ரஸ்ஸ அஜ்ஜ, ப⁴ந்தே, வாரோ’’தி ஸுத்வா ‘‘அதிமது⁴ரங் கத்வா, ஆனந்த³, ஏஸோ பி⁴க்கு² த⁴ம்மங் கதே²தி, மயம்பி க³ந்த்வா ஸுணிஸ்ஸாமா’’தி வத்வா யேனுபட்டா²னஸாலா தேனுபஸங்கமி. ப³ஹித்³வாரகொட்ட²கே அட்டா²ஸீதி ச²ப்³ப³ண்ணரஸ்மியோ சீவரக³ப்³பே⁴ படிச்சா²தெ³த்வா அஞ்ஞாதகவேஸேன அட்டா²ஸி. கதா²பரியோஸானங் ஆக³மயமானோதி ‘‘இத³மவோசா’’தி இத³ங் கதா²வஸானங் உதி³க்க²மானோ த⁴ம்மகத²ங் ஸுணந்தோ அட்டா²ஸியேவ. அதா²யஸ்மா ஆனந்தோ³ நிக்க²ந்தே பட²மே யாமே ஸத்து² ஸஞ்ஞங் அதா³ஸி – ‘‘பட²மயாமோ அதிக்கந்தோ, ப⁴ந்தே, தோ²கங் விஸ்ஸமதா²’’தி. ஸத்தா² தத்தே²வ அட்டா²ஸி. அதா²யஸ்மா ஆனந்தோ³ மஜ்ஜி²மயாமேபி நிக்க²ந்தே, ‘‘ப⁴ந்தே, தும்ஹே பகதியா க²த்தியஸுகு²மாலா, புன பு³த்³த⁴ஸுகு²மாலாதி பரமஸுகு²மாலா, மஜ்ஜி²மயாமோபி அதிக்கந்தோ, முஹுத்தங் விஸ்ஸமதா²’’தி ஆஹ. ஸத்தா² தத்தே²வ அட்டா²ஸி. தத்த² டி²தகஸ்ஸேவஸ்ஸ அருணக்³க³ங் பஞ்ஞாயித்த². அருணுக்³க³மனஞ்ச தே²ரஸ்ஸ ‘‘இத³மவோசா’’தி பாபெத்வா கதா²பரியோஸானஞ்ச த³ஸப³லஸ்ஸ ச²ப்³ப³ண்ணஸரீரஸ்மிவிஸ்ஸஜ்ஜனஞ்ச ஏகப்பஹாரேனேவ அஹோஸி. அக்³க³ளங் ஆகோடேஸீதி அக்³க³னகே²ன த்³வாரகவாடங் ஆகோடேஸி.
4. Catutthe upaṭṭhānasālāyanti bhojanasālāyaṃ. Yenupaṭṭhānasālāti satthā nandakattherena madhurassarena āraddhāya dhammadesanāya saddaṃ sutvā, ‘‘ānanda, ko eso upaṭṭhānasālāya madhurassarena dhammaṃ desetī’’ti pucchitvā ‘‘dhammakathikanandakattherassa ajja, bhante, vāro’’ti sutvā ‘‘atimadhuraṃ katvā, ānanda, eso bhikkhu dhammaṃ katheti, mayampi gantvā suṇissāmā’’ti vatvā yenupaṭṭhānasālā tenupasaṅkami. Bahidvārakoṭṭhake aṭṭhāsīti chabbaṇṇarasmiyo cīvaragabbhe paṭicchādetvā aññātakavesena aṭṭhāsi. Kathāpariyosānaṃ āgamayamānoti ‘‘idamavocā’’ti idaṃ kathāvasānaṃ udikkhamāno dhammakathaṃ suṇanto aṭṭhāsiyeva. Athāyasmā ānando nikkhante paṭhame yāme satthu saññaṃ adāsi – ‘‘paṭhamayāmo atikkanto, bhante, thokaṃ vissamathā’’ti. Satthā tattheva aṭṭhāsi. Athāyasmā ānando majjhimayāmepi nikkhante, ‘‘bhante, tumhe pakatiyā khattiyasukhumālā, puna buddhasukhumālāti paramasukhumālā, majjhimayāmopi atikkanto, muhuttaṃ vissamathā’’ti āha. Satthā tattheva aṭṭhāsi. Tattha ṭhitakassevassa aruṇaggaṃ paññāyittha. Aruṇuggamanañca therassa ‘‘idamavocā’’ti pāpetvā kathāpariyosānañca dasabalassa chabbaṇṇasarīrasmivissajjanañca ekappahāreneva ahosi. Aggaḷaṃ ākoṭesīti agganakhena dvārakavāṭaṃ ākoṭesi.
ஸாரஜ்ஜமானரூபோதி ஹராயமானோ ஒத்தப்பமானோ. தோ³மனஸ்ஸஸாரஜ்ஜங் பனஸ்ஸ நத்தி². எத்தகம்பி நோ நப்படிபா⁴ஸெய்யாதி படிஸம்பி⁴தா³ப்பத்தஸ்ஸ அப்படிபா⁴னங் நாம நத்தி². எத்தகம்பி ந கதெ²ய்யந்தி த³ஸ்ஸேதி. ஸாது⁴ ஸாதூ⁴தி தே²ரஸ்ஸ த⁴ம்மதே³ஸனங் ஸம்பஹங்ஸந்தோ ஆஹ. அயஞ்ஹெத்த² அத்தோ² ‘‘ஸுக³ஹிதா ச தே த⁴ம்மதே³ஸனா ஸுகதி²தா சா’’தி. குலபுத்தானந்தி ஆசாரகுலபுத்தானஞ்சேவ ஜாதிகுலபுத்தானஞ்ச. அரியோ ச துண்ஹிபா⁴வோதி து³தியஜ்ஜா²னஸமாபத்திங் ஸந்தா⁴யேவமாஹ. அதி⁴பஞ்ஞாத⁴ம்மவிபஸ்ஸனாயாதி ஸங்கா²ரபரிக்³க³ஹவிபஸ்ஸனாஞாணஸ்ஸ . சதுப்பாத³கோதி அஸ்ஸகோ³ணக³த்³ரபா⁴தி³கோ. இத³ங் வத்வாதி இமங் சதூஹங்கே³ஹி ஸமன்னாக³தங் த⁴ம்மங் கத²யித்வா. விஹாரங் பாவிஸீதி க³ந்த⁴குடிங் பவிட்டோ².
Sārajjamānarūpoti harāyamāno ottappamāno. Domanassasārajjaṃ panassa natthi. Ettakampi no nappaṭibhāseyyāti paṭisambhidāppattassa appaṭibhānaṃ nāma natthi. Ettakampi na katheyyanti dasseti. Sādhu sādhūti therassa dhammadesanaṃ sampahaṃsanto āha. Ayañhettha attho ‘‘sugahitā ca te dhammadesanā sukathitā cā’’ti. Kulaputtānanti ācārakulaputtānañceva jātikulaputtānañca. Ariyo ca tuṇhibhāvoti dutiyajjhānasamāpattiṃ sandhāyevamāha. Adhipaññādhammavipassanāyāti saṅkhārapariggahavipassanāñāṇassa . Catuppādakoti assagoṇagadrabhādiko. Idaṃ vatvāti imaṃ catūhaṅgehi samannāgataṃ dhammaṃ kathayitvā. Vihāraṃ pāvisīti gandhakuṭiṃ paviṭṭho.
காலேன த⁴ம்மஸ்ஸவனேதி காலே காலே த⁴ம்மஸ்ஸவனஸ்மிங். த⁴ம்மஸாகச்சா²யாதி பஞ்ஹகதா²ய. க³ம்பீ⁴ரங் அத்த²பத³ந்தி க³ம்பீ⁴ரங் கு³ள்ஹங் ரஹஸ்ஸங் அத்த²ங். பஞ்ஞாயாதி ஸஹவிபஸ்ஸனாய மக்³க³பஞ்ஞாய. ஸம்மஸனபடிவேத⁴பஞ்ஞாபி உக்³க³ஹபரிபுச்சா²பஞ்ஞாபி வட்டதியேவ. பத்தோ வா பஜ்ஜதி வாதி அரஹத்தங் பத்தோ வா பாபுணிஸ்ஸதி வாதி ஏவங் கு³ணஸம்பா⁴வனாய ஸம்பா⁴வேதி. அப்பத்தமானஸாதி அப்பத்தஅரஹத்தா, அரஹத்தங் வா அப்பத்தங் மானஸங் ஏதேஸந்திபி அப்பத்தமானஸா. தி³ட்ட²த⁴ம்மஸுக²விஹாரந்தி எத்த² தி³ட்ட²த⁴ம்மஸுக²விஹாரோ லோகியோபி வட்டதி லோகுத்தரோபி.
Kālena dhammassavaneti kāle kāle dhammassavanasmiṃ. Dhammasākacchāyāti pañhakathāya. Gambhīraṃ atthapadanti gambhīraṃ guḷhaṃ rahassaṃ atthaṃ. Paññāyāti sahavipassanāya maggapaññāya. Sammasanapaṭivedhapaññāpi uggahaparipucchāpaññāpi vaṭṭatiyeva. Patto vā pajjati vāti arahattaṃ patto vā pāpuṇissati vāti evaṃ guṇasambhāvanāya sambhāveti. Appattamānasāti appattaarahattā, arahattaṃ vā appattaṃ mānasaṃ etesantipi appattamānasā. Diṭṭhadhammasukhavihāranti ettha diṭṭhadhammasukhavihāro lokiyopi vaṭṭati lokuttaropi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. நந்த³கஸுத்தங் • 4. Nandakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-5. நந்த³கஸுத்தாதி³வண்ணனா • 4-5. Nandakasuttādivaṇṇanā
