| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੪. ਨਨ੍ਦਕਸੁਤ੍ਤવਣ੍ਣਨਾ
4. Nandakasuttavaṇṇanā
੪. ਚਤੁਤ੍ਥੇ ਉਪਟ੍ਠਾਨਸਾਲਾਯਨ੍ਤਿ ਭੋਜਨਸਾਲਾਯਂ। ਯੇਨੁਪਟ੍ਠਾਨਸਾਲਾਤਿ ਸਤ੍ਥਾ ਨਨ੍ਦਕਤ੍ਥੇਰੇਨ ਮਧੁਰਸ੍ਸਰੇਨ ਆਰਦ੍ਧਾਯ ਧਮ੍ਮਦੇਸਨਾਯ ਸਦ੍ਦਂ ਸੁਤ੍વਾ, ‘‘ਆਨਨ੍ਦ, ਕੋ ਏਸੋ ਉਪਟ੍ਠਾਨਸਾਲਾਯ ਮਧੁਰਸ੍ਸਰੇਨ ਧਮ੍ਮਂ ਦੇਸੇਤੀ’’ਤਿ ਪੁਚ੍ਛਿਤ੍વਾ ‘‘ਧਮ੍ਮਕਥਿਕਨਨ੍ਦਕਤ੍ਥੇਰਸ੍ਸ ਅਜ੍ਜ, ਭਨ੍ਤੇ, વਾਰੋ’’ਤਿ ਸੁਤ੍વਾ ‘‘ਅਤਿਮਧੁਰਂ ਕਤ੍વਾ, ਆਨਨ੍ਦ, ਏਸੋ ਭਿਕ੍ਖੁ ਧਮ੍ਮਂ ਕਥੇਤਿ, ਮਯਮ੍ਪਿ ਗਨ੍ਤ੍વਾ ਸੁਣਿਸ੍ਸਾਮਾ’’ਤਿ વਤ੍વਾ ਯੇਨੁਪਟ੍ਠਾਨਸਾਲਾ ਤੇਨੁਪਸਙ੍ਕਮਿ। ਬਹਿਦ੍વਾਰਕੋਟ੍ਠਕੇ ਅਟ੍ਠਾਸੀਤਿ ਛਬ੍ਬਣ੍ਣਰਸ੍ਮਿਯੋ ਚੀવਰਗਬ੍ਭੇ ਪਟਿਚ੍ਛਾਦੇਤ੍વਾ ਅਞ੍ਞਾਤਕવੇਸੇਨ ਅਟ੍ਠਾਸਿ। ਕਥਾਪਰਿਯੋਸਾਨਂ ਆਗਮਯਮਾਨੋਤਿ ‘‘ਇਦਮવੋਚਾ’’ਤਿ ਇਦਂ ਕਥਾવਸਾਨਂ ਉਦਿਕ੍ਖਮਾਨੋ ਧਮ੍ਮਕਥਂ ਸੁਣਨ੍ਤੋ ਅਟ੍ਠਾਸਿਯੇવ। ਅਥਾਯਸ੍ਮਾ ਆਨਨ੍ਦੋ ਨਿਕ੍ਖਨ੍ਤੇ ਪਠਮੇ ਯਾਮੇ ਸਤ੍ਥੁ ਸਞ੍ਞਂ ਅਦਾਸਿ – ‘‘ਪਠਮਯਾਮੋ ਅਤਿਕ੍ਕਨ੍ਤੋ, ਭਨ੍ਤੇ, ਥੋਕਂ વਿਸ੍ਸਮਥਾ’’ਤਿ। ਸਤ੍ਥਾ ਤਤ੍ਥੇવ ਅਟ੍ਠਾਸਿ। ਅਥਾਯਸ੍ਮਾ ਆਨਨ੍ਦੋ ਮਜ੍ਝਿਮਯਾਮੇਪਿ ਨਿਕ੍ਖਨ੍ਤੇ, ‘‘ਭਨ੍ਤੇ, ਤੁਮ੍ਹੇ ਪਕਤਿਯਾ ਖਤ੍ਤਿਯਸੁਖੁਮਾਲਾ, ਪੁਨ ਬੁਦ੍ਧਸੁਖੁਮਾਲਾਤਿ ਪਰਮਸੁਖੁਮਾਲਾ, ਮਜ੍ਝਿਮਯਾਮੋਪਿ ਅਤਿਕ੍ਕਨ੍ਤੋ, ਮੁਹੁਤ੍ਤਂ વਿਸ੍ਸਮਥਾ’’ਤਿ ਆਹ। ਸਤ੍ਥਾ ਤਤ੍ਥੇવ ਅਟ੍ਠਾਸਿ। ਤਤ੍ਥ ਠਿਤਕਸ੍ਸੇવਸ੍ਸ ਅਰੁਣਗ੍ਗਂ ਪਞ੍ਞਾਯਿਤ੍ਥ। ਅਰੁਣੁਗ੍ਗਮਨਞ੍ਚ ਥੇਰਸ੍ਸ ‘‘ਇਦਮવੋਚਾ’’ਤਿ ਪਾਪੇਤ੍વਾ ਕਥਾਪਰਿਯੋਸਾਨਞ੍ਚ ਦਸਬਲਸ੍ਸ ਛਬ੍ਬਣ੍ਣਸਰੀਰਸ੍ਮਿવਿਸ੍ਸਜ੍ਜਨਞ੍ਚ ਏਕਪ੍ਪਹਾਰੇਨੇવ ਅਹੋਸਿ। ਅਗ੍ਗਲ਼ਂ ਆਕੋਟੇਸੀਤਿ ਅਗ੍ਗਨਖੇਨ ਦ੍વਾਰਕવਾਟਂ ਆਕੋਟੇਸਿ।
4. Catutthe upaṭṭhānasālāyanti bhojanasālāyaṃ. Yenupaṭṭhānasālāti satthā nandakattherena madhurassarena āraddhāya dhammadesanāya saddaṃ sutvā, ‘‘ānanda, ko eso upaṭṭhānasālāya madhurassarena dhammaṃ desetī’’ti pucchitvā ‘‘dhammakathikanandakattherassa ajja, bhante, vāro’’ti sutvā ‘‘atimadhuraṃ katvā, ānanda, eso bhikkhu dhammaṃ katheti, mayampi gantvā suṇissāmā’’ti vatvā yenupaṭṭhānasālā tenupasaṅkami. Bahidvārakoṭṭhake aṭṭhāsīti chabbaṇṇarasmiyo cīvaragabbhe paṭicchādetvā aññātakavesena aṭṭhāsi. Kathāpariyosānaṃ āgamayamānoti ‘‘idamavocā’’ti idaṃ kathāvasānaṃ udikkhamāno dhammakathaṃ suṇanto aṭṭhāsiyeva. Athāyasmā ānando nikkhante paṭhame yāme satthu saññaṃ adāsi – ‘‘paṭhamayāmo atikkanto, bhante, thokaṃ vissamathā’’ti. Satthā tattheva aṭṭhāsi. Athāyasmā ānando majjhimayāmepi nikkhante, ‘‘bhante, tumhe pakatiyā khattiyasukhumālā, puna buddhasukhumālāti paramasukhumālā, majjhimayāmopi atikkanto, muhuttaṃ vissamathā’’ti āha. Satthā tattheva aṭṭhāsi. Tattha ṭhitakassevassa aruṇaggaṃ paññāyittha. Aruṇuggamanañca therassa ‘‘idamavocā’’ti pāpetvā kathāpariyosānañca dasabalassa chabbaṇṇasarīrasmivissajjanañca ekappahāreneva ahosi. Aggaḷaṃ ākoṭesīti agganakhena dvārakavāṭaṃ ākoṭesi.
ਸਾਰਜ੍ਜਮਾਨਰੂਪੋਤਿ ਹਰਾਯਮਾਨੋ ਓਤ੍ਤਪ੍ਪਮਾਨੋ। ਦੋਮਨਸ੍ਸਸਾਰਜ੍ਜਂ ਪਨਸ੍ਸ ਨਤ੍ਥਿ। ਏਤ੍ਤਕਮ੍ਪਿ ਨੋ ਨਪ੍ਪਟਿਭਾਸੇਯ੍ਯਾਤਿ ਪਟਿਸਮ੍ਭਿਦਾਪ੍ਪਤ੍ਤਸ੍ਸ ਅਪ੍ਪਟਿਭਾਨਂ ਨਾਮ ਨਤ੍ਥਿ। ਏਤ੍ਤਕਮ੍ਪਿ ਨ ਕਥੇਯ੍ਯਨ੍ਤਿ ਦਸ੍ਸੇਤਿ। ਸਾਧੁ ਸਾਧੂਤਿ ਥੇਰਸ੍ਸ ਧਮ੍ਮਦੇਸਨਂ ਸਮ੍ਪਹਂਸਨ੍ਤੋ ਆਹ। ਅਯਞ੍ਹੇਤ੍ਥ ਅਤ੍ਥੋ ‘‘ਸੁਗਹਿਤਾ ਚ ਤੇ ਧਮ੍ਮਦੇਸਨਾ ਸੁਕਥਿਤਾ ਚਾ’’ਤਿ। ਕੁਲਪੁਤ੍ਤਾਨਨ੍ਤਿ ਆਚਾਰਕੁਲਪੁਤ੍ਤਾਨਞ੍ਚੇવ ਜਾਤਿਕੁਲਪੁਤ੍ਤਾਨਞ੍ਚ। ਅਰਿਯੋ ਚ ਤੁਣ੍ਹਿਭਾવੋਤਿ ਦੁਤਿਯਜ੍ਝਾਨਸਮਾਪਤ੍ਤਿਂ ਸਨ੍ਧਾਯੇવਮਾਹ। ਅਧਿਪਞ੍ਞਾਧਮ੍ਮવਿਪਸ੍ਸਨਾਯਾਤਿ ਸਙ੍ਖਾਰਪਰਿਗ੍ਗਹવਿਪਸ੍ਸਨਾਞਾਣਸ੍ਸ । ਚਤੁਪ੍ਪਾਦਕੋਤਿ ਅਸ੍ਸਗੋਣਗਦ੍ਰਭਾਦਿਕੋ। ਇਦਂ વਤ੍વਾਤਿ ਇਮਂ ਚਤੂਹਙ੍ਗੇਹਿ ਸਮਨ੍ਨਾਗਤਂ ਧਮ੍ਮਂ ਕਥਯਿਤ੍વਾ। વਿਹਾਰਂ ਪਾવਿਸੀਤਿ ਗਨ੍ਧਕੁਟਿਂ ਪવਿਟ੍ਠੋ।
Sārajjamānarūpoti harāyamāno ottappamāno. Domanassasārajjaṃ panassa natthi. Ettakampi no nappaṭibhāseyyāti paṭisambhidāppattassa appaṭibhānaṃ nāma natthi. Ettakampi na katheyyanti dasseti. Sādhu sādhūti therassa dhammadesanaṃ sampahaṃsanto āha. Ayañhettha attho ‘‘sugahitā ca te dhammadesanā sukathitā cā’’ti. Kulaputtānanti ācārakulaputtānañceva jātikulaputtānañca. Ariyo ca tuṇhibhāvoti dutiyajjhānasamāpattiṃ sandhāyevamāha. Adhipaññādhammavipassanāyāti saṅkhārapariggahavipassanāñāṇassa . Catuppādakoti assagoṇagadrabhādiko. Idaṃ vatvāti imaṃ catūhaṅgehi samannāgataṃ dhammaṃ kathayitvā. Vihāraṃ pāvisīti gandhakuṭiṃ paviṭṭho.
ਕਾਲੇਨ ਧਮ੍ਮਸ੍ਸવਨੇਤਿ ਕਾਲੇ ਕਾਲੇ ਧਮ੍ਮਸ੍ਸવਨਸ੍ਮਿਂ। ਧਮ੍ਮਸਾਕਚ੍ਛਾਯਾਤਿ ਪਞ੍ਹਕਥਾਯ। ਗਮ੍ਭੀਰਂ ਅਤ੍ਥਪਦਨ੍ਤਿ ਗਮ੍ਭੀਰਂ ਗੁਲ਼੍ਹਂ ਰਹਸ੍ਸਂ ਅਤ੍ਥਂ। ਪਞ੍ਞਾਯਾਤਿ ਸਹવਿਪਸ੍ਸਨਾਯ ਮਗ੍ਗਪਞ੍ਞਾਯ। ਸਮ੍ਮਸਨਪਟਿવੇਧਪਞ੍ਞਾਪਿ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ વਟ੍ਟਤਿਯੇવ। ਪਤ੍ਤੋ વਾ ਪਜ੍ਜਤਿ વਾਤਿ ਅਰਹਤ੍ਤਂ ਪਤ੍ਤੋ વਾ ਪਾਪੁਣਿਸ੍ਸਤਿ વਾਤਿ ਏવਂ ਗੁਣਸਮ੍ਭਾવਨਾਯ ਸਮ੍ਭਾવੇਤਿ। ਅਪ੍ਪਤ੍ਤਮਾਨਸਾਤਿ ਅਪ੍ਪਤ੍ਤਅਰਹਤ੍ਤਾ, ਅਰਹਤ੍ਤਂ વਾ ਅਪ੍ਪਤ੍ਤਂ ਮਾਨਸਂ ਏਤੇਸਨ੍ਤਿਪਿ ਅਪ੍ਪਤ੍ਤਮਾਨਸਾ। ਦਿਟ੍ਠਧਮ੍ਮਸੁਖવਿਹਾਰਨ੍ਤਿ ਏਤ੍ਥ ਦਿਟ੍ਠਧਮ੍ਮਸੁਖવਿਹਾਰੋ ਲੋਕਿਯੋਪਿ વਟ੍ਟਤਿ ਲੋਕੁਤ੍ਤਰੋਪਿ।
Kālena dhammassavaneti kāle kāle dhammassavanasmiṃ. Dhammasākacchāyāti pañhakathāya. Gambhīraṃ atthapadanti gambhīraṃ guḷhaṃ rahassaṃ atthaṃ. Paññāyāti sahavipassanāya maggapaññāya. Sammasanapaṭivedhapaññāpi uggahaparipucchāpaññāpi vaṭṭatiyeva. Patto vā pajjati vāti arahattaṃ patto vā pāpuṇissati vāti evaṃ guṇasambhāvanāya sambhāveti. Appattamānasāti appattaarahattā, arahattaṃ vā appattaṃ mānasaṃ etesantipi appattamānasā. Diṭṭhadhammasukhavihāranti ettha diṭṭhadhammasukhavihāro lokiyopi vaṭṭati lokuttaropi.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਨਨ੍ਦਕਸੁਤ੍ਤਂ • 4. Nandakasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੪-੫. ਨਨ੍ਦਕਸੁਤ੍ਤਾਦਿવਣ੍ਣਨਾ • 4-5. Nandakasuttādivaṇṇanā
