| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
4. நந்த³கத்தே²ரகா³தா²வண்ணனா
4. Nandakattheragāthāvaṇṇanā
தி⁴ரத்தூ²திஆதி³கா ஆயஸ்மதோ நந்த³கத்தே²ரஸ்ஸ கா³தா². கா உப்பத்தி? அயம்பி கிர பது³முத்தரஸ்ஸ ப⁴க³வதோ காலே ஹங்ஸவதீனக³ரே மஹாவிப⁴வோ ஸெட்டி² ஹுத்வா ஸத்து² ஸந்திகே த⁴ம்மங் ஸுணந்தோ ஸத்தா²ரங் ஏகங் பி⁴க்கு²ங் பி⁴க்கு²னோவாத³கானங் அக்³க³ட்டா²னே ட²பெந்தங் தி³ஸ்வா தங் டா²னந்தரங் பத்தெ²த்வா ஸதஸஹஸ்ஸக்³க⁴னிகேன வத்தே²ன ப⁴க³வந்தங் பூஜெத்வா பணிதா⁴னமகாஸி, ஸத்து² போ³தி⁴ருக்கே² பதீ³பபூஜஞ்ச பவத்தேதி. ஸோ ததோ பட்டா²ய தே³வமனுஸ்ஸேஸு ஸங்ஸரந்தோ ககுஸந்த⁴ஸ்ஸ ப⁴க³வதோ காலே கரவிகஸகுணோ ஹுத்வா மது⁴ரகூஜிதங் கூஜந்தோ ஸத்தா²ரங் பத³க்கி²ணங் அகாஸி. அபரபா⁴கே³ மயூரோ ஹுத்வா அஞ்ஞதரஸ்ஸ பச்சேகபு³த்³த⁴ஸ்ஸ வஸனகு³ஹாய த்³வாரே பஸன்னமானஸோ தி³வஸே தி³வஸே திக்க²த்துங் மது⁴ரவஸ்ஸிதங் வஸ்ஸி, ஏவங் தத்த² தத்த² புஞ்ஞானி கத்வா அம்ஹாகங் ப⁴க³வதோ காலே ஸாவத்தி²யங் குலகே³ஹே நிப்³ப³த்தித்வா நந்த³கோதி லத்³த⁴னாமோ வயப்பத்தோ ஸத்து² ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பாபுணி. தேன வுத்தங் அபதா³னே (அப॰ தே²ர 2.46.22-26) –
Dhiratthūtiādikā āyasmato nandakattherassa gāthā. Kā uppatti? Ayampi kira padumuttarassa bhagavato kāle haṃsavatīnagare mahāvibhavo seṭṭhi hutvā satthu santike dhammaṃ suṇanto satthāraṃ ekaṃ bhikkhuṃ bhikkhunovādakānaṃ aggaṭṭhāne ṭhapentaṃ disvā taṃ ṭhānantaraṃ patthetvā satasahassagghanikena vatthena bhagavantaṃ pūjetvā paṇidhānamakāsi, satthu bodhirukkhe padīpapūjañca pavatteti. So tato paṭṭhāya devamanussesu saṃsaranto kakusandhassa bhagavato kāle karavikasakuṇo hutvā madhurakūjitaṃ kūjanto satthāraṃ padakkhiṇaṃ akāsi. Aparabhāge mayūro hutvā aññatarassa paccekabuddhassa vasanaguhāya dvāre pasannamānaso divase divase tikkhattuṃ madhuravassitaṃ vassi, evaṃ tattha tattha puññāni katvā amhākaṃ bhagavato kāle sāvatthiyaṃ kulagehe nibbattitvā nandakoti laddhanāmo vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.46.22-26) –
‘‘பது³முத்தரபு³த்³த⁴ஸ்ஸ போ³தி⁴யா பாத³புத்தமே;
‘‘Padumuttarabuddhassa bodhiyā pādaputtame;
பஸன்னசித்தோ ஸுமனோ, தயோ உக்கே அதா⁴ரயிங்.
Pasannacitto sumano, tayo ukke adhārayiṃ.
‘‘ஸதஸஹஸ்ஸிதோ கப்பே, ஸோஹங் உக்கமதா⁴ரயிங்;
‘‘Satasahassito kappe, sohaṃ ukkamadhārayiṃ;
து³க்³க³திங் நாபி⁴ஜானாமி, உக்கதா³னஸ்ஸித³ங் ப²லங்.
Duggatiṃ nābhijānāmi, ukkadānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹா பன ஹுத்வா விமுத்திஸுகே²ன வீதினாமெந்தோ ஸத்தா²ரா பி⁴க்கு²னீனங் ஓவாதே³ ஆணத்தோ ஏகஸ்மிங் உபோஸத²தி³வஸே பஞ்ச பி⁴க்கு²னிஸதானி ஏகோவாதே³னேவ அரஹத்தங் பாபேஸி. தேன நங் ப⁴க³வா பி⁴க்கு²னோவாத³கானங் அக்³க³ட்டா²னே ட²பேஸி. அதே²கதி³வஸங் தே²ரங் ஸாவத்தி²யங் பிண்டா³ய சரந்தங் அஞ்ஞதரா புராணது³தியிகா இத்தீ² கிலேஸவஸேன ஓலோகெத்வா ஹஸி. தே²ரோ தஸ்ஸா தங் கிரியங் தி³ஸ்வா ஸரீரஸ்ஸ படிக்கூலவிபா⁴வனமுகே²ன த⁴ம்மங் கதெ²ந்தோ –
Arahā pana hutvā vimuttisukhena vītināmento satthārā bhikkhunīnaṃ ovāde āṇatto ekasmiṃ uposathadivase pañca bhikkhunisatāni ekovādeneva arahattaṃ pāpesi. Tena naṃ bhagavā bhikkhunovādakānaṃ aggaṭṭhāne ṭhapesi. Athekadivasaṃ theraṃ sāvatthiyaṃ piṇḍāya carantaṃ aññatarā purāṇadutiyikā itthī kilesavasena oloketvā hasi. Thero tassā taṃ kiriyaṃ disvā sarīrassa paṭikkūlavibhāvanamukhena dhammaṃ kathento –
279.
279.
‘‘தி⁴ரத்து² பூரே து³க்³க³ந்தே⁴, மாரபக்கே² அவஸ்ஸுதே;
‘‘Dhiratthu pūre duggandhe, mārapakkhe avassute;
நவஸோதானி தே காயே, யானி ஸந்த³ந்தி ஸப்³ப³தா³.
Navasotāni te kāye, yāni sandanti sabbadā.
280.
280.
‘‘மா புராணங் அமஞ்ஞித்தோ², மாஸாதே³ஸி ததா²க³தே;
‘‘Mā purāṇaṃ amaññittho, māsādesi tathāgate;
ஸக்³கே³பி தே ந ரஜ்ஜந்தி, கிமங்க³ங் பன மானுஸே.
Saggepi te na rajjanti, kimaṅgaṃ pana mānuse.
281.
281.
‘‘யே ச கோ² பா³லா து³ம்மேதா⁴, து³ம்மந்தீ மோஹபாருதா;
‘‘Ye ca kho bālā dummedhā, dummantī mohapārutā;
தாதி³ஸா தத்த² ரஜ்ஜந்தி, மாரகி²த்தம்ஹி ப³ந்த⁴னே.
Tādisā tattha rajjanti, mārakhittamhi bandhane.
282.
282.
‘‘யேஸங் ராகோ³ ச தோ³ஸோ ச, அவிஜ்ஜா ச விராஜிதா;
‘‘Yesaṃ rāgo ca doso ca, avijjā ca virājitā;
தாதீ³ தத்த² ந ரஜ்ஜந்தி, சி²ன்னஸுத்தா அப³ந்த⁴னா’’தி. – கா³தா² அபா⁴ஸி;
Tādī tattha na rajjanti, chinnasuttā abandhanā’’ti. – gāthā abhāsi;
தத்த² தீ⁴தி ஜிகு³ச்ச²னத்தே² நிபாதோ, ரத்தூ²தி ர-காரோ பத³ஸந்தி⁴கரோ, தீ⁴ அத்து² தங் ஜிகு³ச்சா²மி தவ தி⁴க்காரோ ஹோதூதி அத்தோ². பூரேதிஆதீ³னி தஸ்ஸா தி⁴க்காதப்³ப³பா⁴வதீ³பனானி ஆமந்தனவசனானி. பூரேதி அதிவிய ஜேகு³ச்சே²ஹி நானாகுணபேஹி நானாவித⁴அஸுசீஹி ஸம்புண்ணே. து³க்³க³ந்தே⁴தி குணபபூரிதத்தா ஏவ ஸபா⁴வது³க்³க³ந்தே⁴. மாரபக்கே²தி யஸ்மா விஸபா⁴க³வத்து² அந்த⁴புது²ஜ்ஜனானங் அயோனிஸோமனஸிகாரனிமித்ததாய கிலேஸமாரங் வட்³டே⁴தி, தே³வபுத்தமாரஸ்ஸ ச ஓதாரங் பவிட்ட²ங் தே³தி. தஸ்மா மாரஸ்ஸ பக்கோ² ஹோதி. தேன வுத்தங் ‘‘மாரபக்கே²’’தி. அவஸ்ஸுதேதி ஸப்³ப³காலங் கிலேஸாவஸ்ஸவனேன தஹிங் தஹிங் அஸுசினிஸ்ஸந்த³னேன ச அவஸ்ஸுதே. இதா³னிஸ்ஸா நவஸோதானி தே காயே, யானி ஸந்த³ந்தி ஸப்³ப³தா³தி ‘‘அக்கி²ம்ஹா அக்கி²கூ³த²கோ’’திஆதி³னா (ஸு॰ நி॰ 199) வுத்தங் அஸுசினோ அவஸ்ஸவனட்டா²னங் த³ஸ்ஸேதி.
Tattha dhīti jigucchanatthe nipāto, ratthūti ra-kāro padasandhikaro, dhī atthu taṃ jigucchāmi tava dhikkāro hotūti attho. Pūretiādīni tassā dhikkātabbabhāvadīpanāni āmantanavacanāni. Pūreti ativiya jegucchehi nānākuṇapehi nānāvidhaasucīhi sampuṇṇe. Duggandheti kuṇapapūritattā eva sabhāvaduggandhe. Mārapakkheti yasmā visabhāgavatthu andhaputhujjanānaṃ ayonisomanasikāranimittatāya kilesamāraṃ vaḍḍheti, devaputtamārassa ca otāraṃ paviṭṭhaṃ deti. Tasmā mārassa pakkho hoti. Tena vuttaṃ ‘‘mārapakkhe’’ti. Avassuteti sabbakālaṃ kilesāvassavanena tahiṃ tahiṃ asucinissandanena ca avassute. Idānissā navasotāni te kāye, yāni sandanti sabbadāti ‘‘akkhimhā akkhigūthako’’tiādinā (su. ni. 199) vuttaṃ asucino avassavanaṭṭhānaṃ dasseti.
ஏவங் பன நவசி²த்³த³ங் து⁴வஸ்ஸவங் அஸுசிப⁴ரிதங் காயங் யதா²பூ⁴தங் ஜானந்தீ மா புராணங் அமஞ்ஞித்தோ²தி புராணங் அஜானநகாலே பவத்தங் ஹஸிதலபிதங் கீளிதங் மா மஞ்ஞி, ‘‘இதா³னிபி ஏவங் படிபஜ்ஜிஸ்ஸதீ’’தி மா சிந்தேஹி. மாஸாதே³ஸி ததா²க³தேதி யதா² உபனிஸ்ஸயஸம்பத்தியா புரிமகா பு³த்³த⁴ஸாவகா ஆக³தா, யதா² வா தே ஸம்மாபடிபத்தியா க³தா படிபன்னா, யதா² ச ரூபாரூபத⁴ம்மானங் தத²லக்க²ணங் தத²த⁴ம்மே ச அரியஸச்சானி ஆக³தா அதி⁴க³தா அவபு³த்³தா⁴, ததா² இமேபீதி ஏவங் ததா² ஆக³மனாதி³அத்தே²ன ததா²க³தே அரியஸாவகே பகதிஸத்தே விய அவஞ்ஞாய கிலேஸவஸேன ச உபஸங்கமமானா மாஸாதே³ஸி. அனாஸாதே³தப்³ப³தாய காரணமாஹ. ஸக்³கே³பி தே ந ரஜ்ஜந்தி, கிமங்க³ங் பன மானுஸேதி ஸப்³ப³ஞ்ஞுபு³த்³தே⁴னாபி அக்கா²னேன பரியோஸாபேதுங் அஸக்குணெய்யஸுகே² ஸக்³கே³பி தே ஸாவகபு³த்³தா⁴ ந ரஜ்ஜந்தி, ஸங்கா²ரேஸு ஆதீ³னவஸ்ஸ ஸுபரிதி³ட்ட²த்தா ராக³ங் ந ஜனெந்தி, கிமங்க³ங் பன மீள்ஹராஸிஸதி³ஸே மானுஸே காமகு³ணே, தத்த² ந ரஜ்ஜந்தீதி வத்தப்³ப³மேவ நத்தி².
Evaṃ pana navachiddaṃ dhuvassavaṃ asucibharitaṃ kāyaṃ yathābhūtaṃ jānantī mā purāṇaṃ amaññitthoti purāṇaṃ ajānanakāle pavattaṃ hasitalapitaṃ kīḷitaṃ mā maññi, ‘‘idānipi evaṃ paṭipajjissatī’’ti mā cintehi. Māsādesi tathāgateti yathā upanissayasampattiyā purimakā buddhasāvakā āgatā, yathā vā te sammāpaṭipattiyā gatā paṭipannā, yathā ca rūpārūpadhammānaṃ tathalakkhaṇaṃ tathadhamme ca ariyasaccāni āgatā adhigatā avabuddhā, tathā imepīti evaṃ tathā āgamanādiatthena tathāgate ariyasāvake pakatisatte viya avaññāya kilesavasena ca upasaṅkamamānā māsādesi. Anāsādetabbatāya kāraṇamāha. Saggepi te na rajjanti, kimaṅgaṃ pana mānuseti sabbaññubuddhenāpi akkhānena pariyosāpetuṃ asakkuṇeyyasukhe saggepi te sāvakabuddhā na rajjanti, saṅkhāresu ādīnavassa suparidiṭṭhattā rāgaṃ na janenti, kimaṅgaṃ pana mīḷharāsisadise mānuse kāmaguṇe, tattha na rajjantīti vattabbameva natthi.
யே ச கோ²தி யே பன பா³ல்யப்பயோக³தோ பா³லா, த⁴ம்மோஜபஞ்ஞாய அபா⁴வதோ து³ம்மேதா⁴, அஸுபே⁴ ஸுபா⁴னுபஸ்ஸனேன து³சிந்திதசிந்திதாய து³ம்மந்தீ, மோஹேன அஞ்ஞாணேன ஸப்³ப³ஸோ படிச்சா²தி³தசித்ததாய மோஹபாருதா தாதி³ஸா ததா²ரூபா அந்த⁴புது²ஜ்ஜனா, தத்த² தஸ்மிங் இத்தி²ஸஞ்ஞிதே, மாரகி²த்தம்ஹி ப³ந்த⁴னே மாரேன ஒட்³டி³தே மாரபாஸே, ரஜ்ஜந்தி ரத்தா கி³த்³தா⁴ க³தி⁴தா முச்சி²தா அஜ்ஜோ²பன்னா திட்ட²ந்தி.
Ye ca khoti ye pana bālyappayogato bālā, dhammojapaññāya abhāvato dummedhā, asubhe subhānupassanena ducintitacintitāya dummantī, mohena aññāṇena sabbaso paṭicchāditacittatāya mohapārutātādisā tathārūpā andhaputhujjanā, tattha tasmiṃ itthisaññite, mārakhittamhi bandhane mārena oḍḍite mārapāse, rajjanti rattā giddhā gadhitā mucchitā ajjhopannā tiṭṭhanti.
விராஜிதாதி யேஸங் பன கீ²ணாஸவானங் தேலஞ்ஜனராகோ³ விய து³ம்மோசனீயஸபா⁴வோ ராகோ³ ஸபத்தோ விய லத்³தோ⁴காஸோ து³ஸ்ஸனஸபா⁴வோ தோ³ஸோ அஞ்ஞாணஸபா⁴வா அவிஜ்ஜா ச அரியமக்³க³விராகே³ன ஸப்³ப³ஸோ விராஜிதா பஹீனா ஸமுச்சி²ன்னா, தாதி³ஸா அக்³க³மக்³க³ஸத்தே²ன சி²ன்னப⁴வனெத்திஸுத்தா ததோ ஏவ கத்த²சிபி ப³ந்த⁴னாபா⁴வதோ அப³ந்த⁴னா தத்த² தஸ்மிங் யதா²வுத்தே மாரபாஸே ந ரஜ்ஜந்தி. ஏவங் தே²ரோ தஸ்ஸா இத்தி²யா த⁴ம்மங் கதெ²த்வா க³தோ.
Virājitāti yesaṃ pana khīṇāsavānaṃ telañjanarāgo viya dummocanīyasabhāvo rāgo sapatto viya laddhokāso dussanasabhāvo doso aññāṇasabhāvā avijjā ca ariyamaggavirāgena sabbaso virājitā pahīnā samucchinnā, tādisā aggamaggasatthena chinnabhavanettisuttā tato eva katthacipi bandhanābhāvato abandhanā tattha tasmiṃ yathāvutte mārapāse na rajjanti. Evaṃ thero tassā itthiyā dhammaṃ kathetvā gato.
நந்த³கத்தே²ரகா³தா²வண்ணனா நிட்டி²தா.
Nandakattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 4. நந்த³கத்தே²ரகா³தா² • 4. Nandakattheragāthā
