| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. নন্দকত্থেরগাথাৰণ্ণনা
4. Nandakattheragāthāvaṇṇanā
ধিরত্থূতিআদিকা আযস্মতো নন্দকত্থেরস্স গাথা। কা উপ্পত্তি? অযম্পি কির পদুমুত্তরস্স ভগৰতো কালে হংসৰতীনগরে মহাৰিভৰো সেট্ঠি হুত্ৰা সত্থু সন্তিকে ধম্মং সুণন্তো সত্থারং একং ভিক্খুং ভিক্খুনোৰাদকানং অগ্গট্ঠানে ঠপেন্তং দিস্ৰা তং ঠানন্তরং পত্থেত্ৰা সতসহস্সগ্ঘনিকেন ৰত্থেন ভগৰন্তং পূজেত্ৰা পণিধানমকাসি, সত্থু বোধিরুক্খে পদীপপূজঞ্চ পৰত্তেতি। সো ততো পট্ঠায দেৰমনুস্সেসু সংসরন্তো ককুসন্ধস্স ভগৰতো কালে করৰিকসকুণো হুত্ৰা মধুরকূজিতং কূজন্তো সত্থারং পদক্খিণং অকাসি। অপরভাগে মযূরো হুত্ৰা অঞ্ঞতরস্স পচ্চেকবুদ্ধস্স ৰসনগুহায দ্ৰারে পসন্নমানসো দিৰসে দিৰসে তিক্খত্তুং মধুরৰস্সিতং ৰস্সি, এৰং তত্থ তত্থ পুঞ্ঞানি কত্ৰা অম্হাকং ভগৰতো কালে সাৰত্থিযং কুলগেহে নিব্বত্তিত্ৰা নন্দকোতি লদ্ধনামো ৰযপ্পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি। তেন ৰুত্তং অপদানে (অপ॰ থের ২.৪৬.২২-২৬) –
Dhiratthūtiādikā āyasmato nandakattherassa gāthā. Kā uppatti? Ayampi kira padumuttarassa bhagavato kāle haṃsavatīnagare mahāvibhavo seṭṭhi hutvā satthu santike dhammaṃ suṇanto satthāraṃ ekaṃ bhikkhuṃ bhikkhunovādakānaṃ aggaṭṭhāne ṭhapentaṃ disvā taṃ ṭhānantaraṃ patthetvā satasahassagghanikena vatthena bhagavantaṃ pūjetvā paṇidhānamakāsi, satthu bodhirukkhe padīpapūjañca pavatteti. So tato paṭṭhāya devamanussesu saṃsaranto kakusandhassa bhagavato kāle karavikasakuṇo hutvā madhurakūjitaṃ kūjanto satthāraṃ padakkhiṇaṃ akāsi. Aparabhāge mayūro hutvā aññatarassa paccekabuddhassa vasanaguhāya dvāre pasannamānaso divase divase tikkhattuṃ madhuravassitaṃ vassi, evaṃ tattha tattha puññāni katvā amhākaṃ bhagavato kāle sāvatthiyaṃ kulagehe nibbattitvā nandakoti laddhanāmo vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.46.22-26) –
‘‘পদুমুত্তরবুদ্ধস্স বোধিযা পাদপুত্তমে।
‘‘Padumuttarabuddhassa bodhiyā pādaputtame;
পসন্নচিত্তো সুমনো, তযো উক্কে অধারযিং॥
Pasannacitto sumano, tayo ukke adhārayiṃ.
‘‘সতসহস্সিতো কপ্পে, সোহং উক্কমধারযিং।
‘‘Satasahassito kappe, sohaṃ ukkamadhārayiṃ;
দুগ্গতিং নাভিজানামি, উক্কদানস্সিদং ফলং॥
Duggatiṃ nābhijānāmi, ukkadānassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহা পন হুত্ৰা ৰিমুত্তিসুখেন ৰীতিনামেন্তো সত্থারা ভিক্খুনীনং ওৰাদে আণত্তো একস্মিং উপোসথদিৰসে পঞ্চ ভিক্খুনিসতানি একোৰাদেনেৰ অরহত্তং পাপেসি। তেন নং ভগৰা ভিক্খুনোৰাদকানং অগ্গট্ঠানে ঠপেসি। অথেকদিৰসং থেরং সাৰত্থিযং পিণ্ডায চরন্তং অঞ্ঞতরা পুরাণদুতিযিকা ইত্থী কিলেসৰসেন ওলোকেত্ৰা হসি। থেরো তস্সা তং কিরিযং দিস্ৰা সরীরস্স পটিক্কূলৰিভাৰনমুখেন ধম্মং কথেন্তো –
Arahā pana hutvā vimuttisukhena vītināmento satthārā bhikkhunīnaṃ ovāde āṇatto ekasmiṃ uposathadivase pañca bhikkhunisatāni ekovādeneva arahattaṃ pāpesi. Tena naṃ bhagavā bhikkhunovādakānaṃ aggaṭṭhāne ṭhapesi. Athekadivasaṃ theraṃ sāvatthiyaṃ piṇḍāya carantaṃ aññatarā purāṇadutiyikā itthī kilesavasena oloketvā hasi. Thero tassā taṃ kiriyaṃ disvā sarīrassa paṭikkūlavibhāvanamukhena dhammaṃ kathento –
২৭৯.
279.
‘‘ধিরত্থু পূরে দুগ্গন্ধে, মারপক্খে অৰস্সুতে।
‘‘Dhiratthu pūre duggandhe, mārapakkhe avassute;
নৰসোতানি তে কাযে, যানি সন্দন্তি সব্বদা॥
Navasotāni te kāye, yāni sandanti sabbadā.
২৮০.
280.
‘‘মা পুরাণং অমঞ্ঞিত্থো, মাসাদেসি তথাগতে।
‘‘Mā purāṇaṃ amaññittho, māsādesi tathāgate;
সগ্গেপি তে ন রজ্জন্তি, কিমঙ্গং পন মানুসে॥
Saggepi te na rajjanti, kimaṅgaṃ pana mānuse.
২৮১.
281.
‘‘যে চ খো বালা দুম্মেধা, দুম্মন্তী মোহপারুতা।
‘‘Ye ca kho bālā dummedhā, dummantī mohapārutā;
তাদিসা তত্থ রজ্জন্তি, মারখিত্তম্হি বন্ধনে॥
Tādisā tattha rajjanti, mārakhittamhi bandhane.
২৮২.
282.
‘‘যেসং রাগো চ দোসো চ, অৰিজ্জা চ ৰিরাজিতা।
‘‘Yesaṃ rāgo ca doso ca, avijjā ca virājitā;
তাদী তত্থ ন রজ্জন্তি, ছিন্নসুত্তা অবন্ধনা’’তি॥ – গাথা অভাসি।
Tādī tattha na rajjanti, chinnasuttā abandhanā’’ti. – gāthā abhāsi;
তত্থ ধীতি জিগুচ্ছনত্থে নিপাতো, রত্থূতি র-কারো পদসন্ধিকরো, ধী অত্থু তং জিগুচ্ছামি তৰ ধিক্কারো হোতূতি অত্থো। পূরেতিআদীনি তস্সা ধিক্কাতব্বভাৰদীপনানি আমন্তনৰচনানি। পূরেতি অতিৰিয জেগুচ্ছেহি নানাকুণপেহি নানাৰিধঅসুচীহি সম্পুণ্ণে। দুগ্গন্ধেতি কুণপপূরিতত্তা এৰ সভাৰদুগ্গন্ধে। মারপক্খেতি যস্মা ৰিসভাগৰত্থু অন্ধপুথুজ্জনানং অযোনিসোমনসিকারনিমিত্ততায কিলেসমারং ৰড্ঢেতি, দেৰপুত্তমারস্স চ ওতারং পৰিট্ঠং দেতি। তস্মা মারস্স পক্খো হোতি। তেন ৰুত্তং ‘‘মারপক্খে’’তি। অৰস্সুতেতি সব্বকালং কিলেসাৰস্সৰনেন তহিং তহিং অসুচিনিস্সন্দনেন চ অৰস্সুতে। ইদানিস্সা নৰসোতানি তে কাযে, যানি সন্দন্তি সব্বদাতি ‘‘অক্খিম্হা অক্খিগূথকো’’তিআদিনা (সু॰ নি॰ ১৯৯) ৰুত্তং অসুচিনো অৰস্সৰনট্ঠানং দস্সেতি।
Tattha dhīti jigucchanatthe nipāto, ratthūti ra-kāro padasandhikaro, dhī atthu taṃ jigucchāmi tava dhikkāro hotūti attho. Pūretiādīni tassā dhikkātabbabhāvadīpanāni āmantanavacanāni. Pūreti ativiya jegucchehi nānākuṇapehi nānāvidhaasucīhi sampuṇṇe. Duggandheti kuṇapapūritattā eva sabhāvaduggandhe. Mārapakkheti yasmā visabhāgavatthu andhaputhujjanānaṃ ayonisomanasikāranimittatāya kilesamāraṃ vaḍḍheti, devaputtamārassa ca otāraṃ paviṭṭhaṃ deti. Tasmā mārassa pakkho hoti. Tena vuttaṃ ‘‘mārapakkhe’’ti. Avassuteti sabbakālaṃ kilesāvassavanena tahiṃ tahiṃ asucinissandanena ca avassute. Idānissā navasotāni te kāye, yāni sandanti sabbadāti ‘‘akkhimhā akkhigūthako’’tiādinā (su. ni. 199) vuttaṃ asucino avassavanaṭṭhānaṃ dasseti.
এৰং পন নৰছিদ্দং ধুৰস্সৰং অসুচিভরিতং কাযং যথাভূতং জানন্তী মা পুরাণং অমঞ্ঞিত্থোতি পুরাণং অজাননকালে পৰত্তং হসিতলপিতং কীল়িতং মা মঞ্ঞি, ‘‘ইদানিপি এৰং পটিপজ্জিস্সতী’’তি মা চিন্তেহি। মাসাদেসি তথাগতেতি যথা উপনিস্সযসম্পত্তিযা পুরিমকা বুদ্ধসাৰকা আগতা, যথা ৰা তে সম্মাপটিপত্তিযা গতা পটিপন্না, যথা চ রূপারূপধম্মানং তথলক্খণং তথধম্মে চ অরিযসচ্চানি আগতা অধিগতা অৰবুদ্ধা, তথা ইমেপীতি এৰং তথা আগমনাদিঅত্থেন তথাগতে অরিযসাৰকে পকতিসত্তে ৰিয অৰঞ্ঞায কিলেসৰসেন চ উপসঙ্কমমানা মাসাদেসি। অনাসাদেতব্বতায কারণমাহ। সগ্গেপি তে ন রজ্জন্তি, কিমঙ্গং পন মানুসেতি সব্বঞ্ঞুবুদ্ধেনাপি অক্খানেন পরিযোসাপেতুং অসক্কুণেয্যসুখে সগ্গেপি তে সাৰকবুদ্ধা ন রজ্জন্তি, সঙ্খারেসু আদীনৰস্স সুপরিদিট্ঠত্তা রাগং ন জনেন্তি, কিমঙ্গং পন মীল়্হরাসিসদিসে মানুসে কামগুণে, তত্থ ন রজ্জন্তীতি ৰত্তব্বমেৰ নত্থি।
Evaṃ pana navachiddaṃ dhuvassavaṃ asucibharitaṃ kāyaṃ yathābhūtaṃ jānantī mā purāṇaṃ amaññitthoti purāṇaṃ ajānanakāle pavattaṃ hasitalapitaṃ kīḷitaṃ mā maññi, ‘‘idānipi evaṃ paṭipajjissatī’’ti mā cintehi. Māsādesi tathāgateti yathā upanissayasampattiyā purimakā buddhasāvakā āgatā, yathā vā te sammāpaṭipattiyā gatā paṭipannā, yathā ca rūpārūpadhammānaṃ tathalakkhaṇaṃ tathadhamme ca ariyasaccāni āgatā adhigatā avabuddhā, tathā imepīti evaṃ tathā āgamanādiatthena tathāgate ariyasāvake pakatisatte viya avaññāya kilesavasena ca upasaṅkamamānā māsādesi. Anāsādetabbatāya kāraṇamāha. Saggepi te na rajjanti, kimaṅgaṃ pana mānuseti sabbaññubuddhenāpi akkhānena pariyosāpetuṃ asakkuṇeyyasukhe saggepi te sāvakabuddhā na rajjanti, saṅkhāresu ādīnavassa suparidiṭṭhattā rāgaṃ na janenti, kimaṅgaṃ pana mīḷharāsisadise mānuse kāmaguṇe, tattha na rajjantīti vattabbameva natthi.
যে চ খোতি যে পন বাল্যপ্পযোগতো বালা, ধম্মোজপঞ্ঞায অভাৰতো দুম্মেধা, অসুভে সুভানুপস্সনেন দুচিন্তিতচিন্তিতায দুম্মন্তী, মোহেন অঞ্ঞাণেন সব্বসো পটিচ্ছাদিতচিত্ততায মোহপারুতা তাদিসা তথারূপা অন্ধপুথুজ্জনা, তত্থ তস্মিং ইত্থিসঞ্ঞিতে, মারখিত্তম্হি বন্ধনে মারেন ওড্ডিতে মারপাসে, রজ্জন্তি রত্তা গিদ্ধা গধিতা মুচ্ছিতা অজ্ঝোপন্না তিট্ঠন্তি।
Ye ca khoti ye pana bālyappayogato bālā, dhammojapaññāya abhāvato dummedhā, asubhe subhānupassanena ducintitacintitāya dummantī, mohena aññāṇena sabbaso paṭicchāditacittatāya mohapārutātādisā tathārūpā andhaputhujjanā, tattha tasmiṃ itthisaññite, mārakhittamhi bandhane mārena oḍḍite mārapāse, rajjanti rattā giddhā gadhitā mucchitā ajjhopannā tiṭṭhanti.
ৰিরাজিতাতি যেসং পন খীণাসৰানং তেলঞ্জনরাগো ৰিয দুম্মোচনীযসভাৰো রাগো সপত্তো ৰিয লদ্ধোকাসো দুস্সনসভাৰো দোসো অঞ্ঞাণসভাৰা অৰিজ্জা চ অরিযমগ্গৰিরাগেন সব্বসো ৰিরাজিতা পহীনা সমুচ্ছিন্না, তাদিসা অগ্গমগ্গসত্থেন ছিন্নভৰনেত্তিসুত্তা ততো এৰ কত্থচিপি বন্ধনাভাৰতো অবন্ধনা তত্থ তস্মিং যথাৰুত্তে মারপাসে ন রজ্জন্তি। এৰং থেরো তস্সা ইত্থিযা ধম্মং কথেত্ৰা গতো।
Virājitāti yesaṃ pana khīṇāsavānaṃ telañjanarāgo viya dummocanīyasabhāvo rāgo sapatto viya laddhokāso dussanasabhāvo doso aññāṇasabhāvā avijjā ca ariyamaggavirāgena sabbaso virājitā pahīnā samucchinnā, tādisā aggamaggasatthena chinnabhavanettisuttā tato eva katthacipi bandhanābhāvato abandhanā tattha tasmiṃ yathāvutte mārapāse na rajjanti. Evaṃ thero tassā itthiyā dhammaṃ kathetvā gato.
নন্দকত্থেরগাথাৰণ্ণনা নিট্ঠিতা।
Nandakattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৪. নন্দকত্থেরগাথা • 4. Nandakattheragāthā
