| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৪. নন্দকোৰাদসুত্তৰণ্ণনা
4. Nandakovādasuttavaṇṇanā
৩৯৮. এৰং মে সুতন্তি নন্দকোৰাদসুত্তং। তত্থ তেন খো পন সমযেনাতি ভগৰা মহাপজাপতিযা যাচিতো ভিক্খুনিসঙ্ঘং উয্যোজেত্ৰা ভিক্খুসঙ্ঘং সন্নিপাতেত্ৰা – ‘‘থেরা ভিক্খূ ৰারেন ভিক্খুনিযো ওৰদন্তূ’’তি সঙ্ঘস্স ভারং অকাসি। তং সন্ধাযেতং ৰুত্তং। তত্থ পরিযাযেনাতি ৰারেন। ন ইচ্ছতীতি অত্তনো ৰারে সম্পত্তে দূরং গামং ৰা গন্ত্ৰা সূচিকম্মাদীনি ৰা আরভিত্ৰা ‘‘অযং নামস্স পপঞ্চো’’তি ৰদাপেসি। ইমং পন পরিযাযেন ওৰাদং ভগৰা নন্দকত্থেরস্সেৰ কারণা অকাসি। কস্মা? ইমাসঞ্হি ভিক্খুনীনং থেরং দিস্ৰা চিত্তং একগ্গং হোতি পসীদতি। তেন তা তস্স ওৰাদং সম্পটিচ্ছিতুকামা, ধম্মকথং সোতুকামা। তস্মা ভগৰা – ‘‘নন্দকো অত্তনো ৰারে সম্পত্তে ওৰাদং দস্সতি, ধম্মকথং কথেস্সতী’’তি ৰারেন ওৰাদং অকাসি। থেরো পন অত্তনো ৰারং ন করোতি, কস্মাতি চে? তা কির ভিক্খুনিযো পুব্বে থেরস্স জম্বুদীপে রজ্জং কারেন্তস্স ওরোধা অহেসুং। থেরো পুব্বেনিৰাসঞাণেন তং কারণং ঞত্ৰা চিন্তেসি – ‘‘মং ইমস্স ভিক্খুনিসঙ্ঘস্স মজ্ঝে নিসিন্নং উপমাযো চ কারণানি চ আহরিত্ৰা ধম্মং কথযমানং দিস্ৰা অঞ্ঞো পুব্বেনিৰাসঞাণলাভী ভিক্খু ইমং কারণং ওলোকেত্ৰা ‘আযস্মা নন্দকো যাৰজ্জদিৰসা ওরোধে ন ৰিস্সজ্জেতি, সোভতাযমাযস্মা ওরোধপরিৰুতো’তি ৰত্তব্বং মঞ্ঞেয্যা’’তি। এতমত্থং সম্পস্সমানো থেরো অত্তনো ৰারং ন করোতি। ইমাসঞ্চ কির ভিক্খুনীনং থেরস্সেৰ দেসনা সপ্পাযা ভৰিস্সতীতি ঞত্ৰা অথ খো ভগৰা আযস্মন্তং নন্দকং আমন্তেসি।
398.Evaṃme sutanti nandakovādasuttaṃ. Tattha tena kho pana samayenāti bhagavā mahāpajāpatiyā yācito bhikkhunisaṅghaṃ uyyojetvā bhikkhusaṅghaṃ sannipātetvā – ‘‘therā bhikkhū vārena bhikkhuniyo ovadantū’’ti saṅghassa bhāraṃ akāsi. Taṃ sandhāyetaṃ vuttaṃ. Tattha pariyāyenāti vārena. Na icchatīti attano vāre sampatte dūraṃ gāmaṃ vā gantvā sūcikammādīni vā ārabhitvā ‘‘ayaṃ nāmassa papañco’’ti vadāpesi. Imaṃ pana pariyāyena ovādaṃ bhagavā nandakattherasseva kāraṇā akāsi. Kasmā? Imāsañhi bhikkhunīnaṃ theraṃ disvā cittaṃ ekaggaṃ hoti pasīdati. Tena tā tassa ovādaṃ sampaṭicchitukāmā, dhammakathaṃ sotukāmā. Tasmā bhagavā – ‘‘nandako attano vāre sampatte ovādaṃ dassati, dhammakathaṃ kathessatī’’ti vārena ovādaṃ akāsi. Thero pana attano vāraṃ na karoti, kasmāti ce? Tā kira bhikkhuniyo pubbe therassa jambudīpe rajjaṃ kārentassa orodhā ahesuṃ. Thero pubbenivāsañāṇena taṃ kāraṇaṃ ñatvā cintesi – ‘‘maṃ imassa bhikkhunisaṅghassa majjhe nisinnaṃ upamāyo ca kāraṇāni ca āharitvā dhammaṃ kathayamānaṃ disvā añño pubbenivāsañāṇalābhī bhikkhu imaṃ kāraṇaṃ oloketvā ‘āyasmā nandako yāvajjadivasā orodhe na vissajjeti, sobhatāyamāyasmā orodhaparivuto’ti vattabbaṃ maññeyyā’’ti. Etamatthaṃ sampassamāno thero attano vāraṃ na karoti. Imāsañca kira bhikkhunīnaṃ therasseva desanā sappāyā bhavissatīti ñatvā atha kho bhagavā āyasmantaṃ nandakaṃ āmantesi.
তাসং ভিক্খুনীনং পুব্বে তস্স ওরোধভাৰজাননত্থং ইদং ৰত্থুং – পুব্বে কির বারাণসিযং পঞ্চ দাসসতানি পঞ্চ দাসিসতানি চাতি জঙ্ঘসহস্সং একতোৰ কম্মং কত্ৰা একস্মিং ঠানে ৰসি। অযং নন্দকত্থেরো তস্মিং কালে জেট্ঠকদাসো হোতি , গোতমী জেট্ঠকদাসী। সা জেট্ঠকদাসস্স পাদপরিচারিকা অহোসি পণ্ডিতা ব্যত্তা। জঙ্ঘসহস্সম্পি পুঞ্ঞকম্মং করোন্তং একতো করোতি। অথ ৰস্সূপনাযিকসমযে পঞ্চ পচ্চেকবুদ্ধা নন্দমূলকপব্ভারতো ইসিপতনে ওতরিত্ৰা নগরে পিণ্ডায চরিত্ৰা ইসিপতনমেৰ গন্ত্ৰা – ‘‘ৰস্সূপনাযিককুটিযা অত্থায হত্থকম্মং যাচিস্সামা’’তি চীৰরং পারুপিত্ৰা সাযন্হসমযে নগরং পৰিসিত্ৰা সেট্ঠিস্স ঘরদ্ৰারে অট্ঠংসু। জেট্ঠকদাসী কুটং গহেত্ৰা উদকতিত্থং গচ্ছন্তী পচ্চেকবুদ্ধে নগরং পৰিসন্তে অদ্দস। সেট্ঠি তেসং আগতকারণং সুত্ৰা ‘‘অম্হাকং ওকাসো নত্থি, গচ্ছন্তূ’’তি আহ।
Tāsaṃ bhikkhunīnaṃ pubbe tassa orodhabhāvajānanatthaṃ idaṃ vatthuṃ – pubbe kira bārāṇasiyaṃ pañca dāsasatāni pañca dāsisatāni cāti jaṅghasahassaṃ ekatova kammaṃ katvā ekasmiṃ ṭhāne vasi. Ayaṃ nandakatthero tasmiṃ kāle jeṭṭhakadāso hoti , gotamī jeṭṭhakadāsī. Sā jeṭṭhakadāsassa pādaparicārikā ahosi paṇḍitā byattā. Jaṅghasahassampi puññakammaṃ karontaṃ ekato karoti. Atha vassūpanāyikasamaye pañca paccekabuddhā nandamūlakapabbhārato isipatane otaritvā nagare piṇḍāya caritvā isipatanameva gantvā – ‘‘vassūpanāyikakuṭiyā atthāya hatthakammaṃ yācissāmā’’ti cīvaraṃ pārupitvā sāyanhasamaye nagaraṃ pavisitvā seṭṭhissa gharadvāre aṭṭhaṃsu. Jeṭṭhakadāsī kuṭaṃ gahetvā udakatitthaṃ gacchantī paccekabuddhe nagaraṃ pavisante addasa. Seṭṭhi tesaṃ āgatakāraṇaṃ sutvā ‘‘amhākaṃ okāso natthi, gacchantū’’ti āha.
অথ তে নগরা নিক্খমন্তে জেট্ঠকদাসী কুটং গহেত্ৰা পৰিসন্তী দিস্ৰা কুটং ওতারেত্ৰা ৰন্দিত্ৰা ওনমিত্ৰা মুখং পিধায – ‘‘অয্যা নগরং পৰিট্ঠমত্তাৰ নিক্খন্তা, কিং নু খো’’তি পুচ্ছি। ৰস্সূপনাযিককুটিযা হত্থকম্মং যাচিতুং আগমিম্হাতি। লদ্ধং, ভন্তেতি। ন লদ্ধং উপাসিকেতি? কিং পনেসা কুটি ইস্সরেহেৰ কাতব্বা, দুগ্গতেহিপি সক্কা কাতুন্তি। যেন কেনচি সক্কাতি? সাধু, ভন্তে, মযং করিস্সাম। স্ৰে ময্হং ভিক্খং গণ্হথাতি নিমন্তেত্ৰা উদকং নেত্ৰা পুন কুটং গহেত্ৰা আগম্ম তিত্থমগ্গে ঠত্ৰা আগতা অৰসেসদাসিযো ‘‘এত্থেৰ হোথা’’তি ৰত্ৰা সব্বাসং আগতকালে আহ – ‘‘অম্ম কিং নিচ্চমেৰ পরস্স দাসকম্মং করিস্সথ, উদাহু দাসভাৰতো মুচ্চিতুং ইচ্ছথা’’তি? অজ্জেৰ মুচ্চিতুমিচ্ছাম অয্যেতি। যদি এৰং মযা পঞ্চ পচ্চেকবুদ্ধা হত্থকম্মং অলভন্তা স্ৰাতনায নিমন্তিতা, তুম্হাকং সামিকেহি একদিৰসং হত্থকম্মং দাপেথাতি। তা সাধূতি সম্পটিচ্ছিত্ৰা সাযং অটৰিতো আগতকালে সামিকানং আরোচেসুং। তে সাধূতি জেট্ঠকদাসস্স গেহদ্ৰারে সন্নিপতিংসু।
Atha te nagarā nikkhamante jeṭṭhakadāsī kuṭaṃ gahetvā pavisantī disvā kuṭaṃ otāretvā vanditvā onamitvā mukhaṃ pidhāya – ‘‘ayyā nagaraṃ paviṭṭhamattāva nikkhantā, kiṃ nu kho’’ti pucchi. Vassūpanāyikakuṭiyā hatthakammaṃ yācituṃ āgamimhāti. Laddhaṃ, bhanteti. Na laddhaṃ upāsiketi? Kiṃ panesā kuṭi issareheva kātabbā, duggatehipi sakkā kātunti. Yena kenaci sakkāti? Sādhu, bhante, mayaṃ karissāma. Sve mayhaṃ bhikkhaṃ gaṇhathāti nimantetvā udakaṃ netvā puna kuṭaṃ gahetvā āgamma titthamagge ṭhatvā āgatā avasesadāsiyo ‘‘ettheva hothā’’ti vatvā sabbāsaṃ āgatakāle āha – ‘‘amma kiṃ niccameva parassa dāsakammaṃ karissatha, udāhu dāsabhāvato muccituṃ icchathā’’ti? Ajjeva muccitumicchāma ayyeti. Yadi evaṃ mayā pañca paccekabuddhā hatthakammaṃ alabhantā svātanāya nimantitā, tumhākaṃ sāmikehi ekadivasaṃ hatthakammaṃ dāpethāti. Tā sādhūti sampaṭicchitvā sāyaṃ aṭavito āgatakāle sāmikānaṃ ārocesuṃ. Te sādhūti jeṭṭhakadāsassa gehadvāre sannipatiṃsu.
অথ নে জেট্ঠকদাসী স্ৰে তাতা পচ্চেকবুদ্ধানং হত্থকম্মং দেথাতি আনিসংসং আচিক্খিত্ৰা যেপি ন কাতুকামা, তে গাল়্হেন ওৰাদেন তজ্জেত্ৰা পটিচ্ছাপেসি। সা পুনদিৰসে পচ্চেকবুদ্ধানং ভত্তং দত্ৰা সব্বেসং দাসপুত্তানং সঞ্ঞং অদাসি। তে তাৰদেৰ অরঞ্ঞং পৰিসিত্ৰা দব্বসম্ভারে সমোধানেত্ৰা সতং সতং হুত্ৰা একেককুটিং একেকচঙ্কমনাদিপরিৰারং কত্ৰা মঞ্চপীঠপানীযপরিভোজনীযভাজনাদীনি ঠপেত্ৰা পচ্চেকবুদ্ধে তেমাসং তত্থ ৰসনত্থায পটিঞ্ঞং কারেত্ৰা ৰারভিক্খং পট্ঠপেসুং। যো অত্তনো ৰারদিৰসে ন সক্কোতি। তস্স জেট্ঠকদাসী সকগেহতো আহরিত্ৰা দেতি। এৰং তেমাসং জগ্গিত্ৰা জেট্ঠকদাসী একেকং দাসং একেকং সাটকং ৰিস্সজ্জাপেসি। পঞ্চ থূলসাটকসতানি অহেসুং। তানি পরিৰত্তাপেত্ৰা পঞ্চন্নং পচ্চেকবুদ্ধানং তিচীৰরানি কত্ৰা অদাসি। পচ্চেকবুদ্ধা যথাফাসুকং অগমংসু। তম্পি জঙ্ঘসহস্সং একতো কুসলং কত্ৰা কাযস্স ভেদা দেৰলোকে নিব্বত্তি। তানি পঞ্চ মাতুগামসতানি কালেন কালং তেসং পঞ্চন্নং পুরিসসতানং গেহে হোন্তি, কালেন কালং সব্বাপি জেট্ঠকদাসপুত্তস্সেৰ গেহে হোন্তি। অথ একস্মিং কালে জেট্ঠকদাসপুত্তো দেৰলোকতো চৰিত্ৰা রাজকুলে নিব্বত্তো। তাপি পঞ্চসতা দেৰকঞ্ঞা মহাভোগকুলেসু নিব্বত্তিত্ৰা তস্স রজ্জে ঠিতস্স গেহং অগমংসু। এতেন নিযামেন সংসরন্তিযো অম্হাকং ভগৰতো কালে কোলিযনগরে দেৰদহনগরে চ খত্তিযকুলেসু নিব্বত্তা।
Atha ne jeṭṭhakadāsī sve tātā paccekabuddhānaṃ hatthakammaṃ dethāti ānisaṃsaṃ ācikkhitvā yepi na kātukāmā, te gāḷhena ovādena tajjetvā paṭicchāpesi. Sā punadivase paccekabuddhānaṃ bhattaṃ datvā sabbesaṃ dāsaputtānaṃ saññaṃ adāsi. Te tāvadeva araññaṃ pavisitvā dabbasambhāre samodhānetvā sataṃ sataṃ hutvā ekekakuṭiṃ ekekacaṅkamanādiparivāraṃ katvā mañcapīṭhapānīyaparibhojanīyabhājanādīni ṭhapetvā paccekabuddhe temāsaṃ tattha vasanatthāya paṭiññaṃ kāretvā vārabhikkhaṃ paṭṭhapesuṃ. Yo attano vāradivase na sakkoti. Tassa jeṭṭhakadāsī sakagehato āharitvā deti. Evaṃ temāsaṃ jaggitvā jeṭṭhakadāsī ekekaṃ dāsaṃ ekekaṃ sāṭakaṃ vissajjāpesi. Pañca thūlasāṭakasatāni ahesuṃ. Tāni parivattāpetvā pañcannaṃ paccekabuddhānaṃ ticīvarāni katvā adāsi. Paccekabuddhā yathāphāsukaṃ agamaṃsu. Tampi jaṅghasahassaṃ ekato kusalaṃ katvā kāyassa bhedā devaloke nibbatti. Tāni pañca mātugāmasatāni kālena kālaṃ tesaṃ pañcannaṃ purisasatānaṃ gehe honti, kālena kālaṃ sabbāpi jeṭṭhakadāsaputtasseva gehe honti. Atha ekasmiṃ kāle jeṭṭhakadāsaputto devalokato cavitvā rājakule nibbatto. Tāpi pañcasatā devakaññā mahābhogakulesu nibbattitvā tassa rajje ṭhitassa gehaṃ agamaṃsu. Etena niyāmena saṃsarantiyo amhākaṃ bhagavato kāle koliyanagare devadahanagare ca khattiyakulesu nibbattā.
নন্দকত্থেরোপি পব্বজিত্ৰা অরহত্তং পত্তো, জেট্ঠকদাসিধীতা ৰযং আগম্ম সুদ্ধোদনমহারাজস্স অগ্গমহেসিট্ঠানে ঠিতা, ইতরাপি তেসং তেসং রাজপুত্তানংযেৰ ঘরং গতা। তাসং সামিকা পঞ্চসতা রাজকুমারা উদকচুম্বটকলহে সত্থু ধম্মদেসনং সুত্ৰা পব্বজিতা, রাজধীতরো তেসং উক্কণ্ঠনত্থং সাসনং পেসেসুং। তে উক্কণ্ঠিতে ভগৰা কুণালদহং নেত্ৰা সোতাপত্তিফলে পতিট্ঠপেত্ৰা মহাসমযদিৰসে অরহত্তে পতিট্ঠাপেসি। তাপি পঞ্চসতা রাজধীতরো নিক্খমিত্ৰা মহাপজাপতিযা সন্তিকে পব্বজিংসু। অযমাযস্মা নন্দকো এত্তাৰ তা ভিক্খুনিযোতি এৰমেতং ৰত্থু দীপেতব্বং।
Nandakattheropi pabbajitvā arahattaṃ patto, jeṭṭhakadāsidhītā vayaṃ āgamma suddhodanamahārājassa aggamahesiṭṭhāne ṭhitā, itarāpi tesaṃ tesaṃ rājaputtānaṃyeva gharaṃ gatā. Tāsaṃ sāmikā pañcasatā rājakumārā udakacumbaṭakalahe satthu dhammadesanaṃ sutvā pabbajitā, rājadhītaro tesaṃ ukkaṇṭhanatthaṃ sāsanaṃ pesesuṃ. Te ukkaṇṭhite bhagavā kuṇāladahaṃ netvā sotāpattiphale patiṭṭhapetvā mahāsamayadivase arahatte patiṭṭhāpesi. Tāpi pañcasatā rājadhītaro nikkhamitvā mahāpajāpatiyā santike pabbajiṃsu. Ayamāyasmā nandako ettāva tā bhikkhuniyoti evametaṃ vatthu dīpetabbaṃ.
রাজকারামোতি পসেনদিনা কারিতো নগরস্স দক্খিণদিসাভাগে থূপারামসদিসে ঠানে ৰিহারো।
Rājakārāmoti pasenadinā kārito nagarassa dakkhiṇadisābhāge thūpārāmasadise ṭhāne vihāro.
৩৯৯. সম্মপ্পঞ্ঞায সুদিট্ঠন্তি হেতুনা কারণেন ৰিপস্সনাপঞ্ঞায যাথাৰসরসতো দিট্ঠং।
399.Sammappaññāya sudiṭṭhanti hetunā kāraṇena vipassanāpaññāya yāthāvasarasato diṭṭhaṃ.
৪০১. তজ্জং তজ্জন্তি তংসভাৰং তংসভাৰং, অত্থতো পন তং তং পচ্চযং পটিচ্চ তা তা ৰেদনা উপ্পজ্জন্তীতি ৰুত্তং হোতি।
401.Tajjaṃ tajjanti taṃsabhāvaṃ taṃsabhāvaṃ, atthato pana taṃ taṃ paccayaṃ paṭicca tā tā vedanā uppajjantīti vuttaṃ hoti.
৪০২. পগেৰস্স ছাযাতি মূলাদীনি নিস্সায নিব্বত্তা ছাযা পঠমতরংযেৰ অনিচ্চা।
402.Pagevassa chāyāti mūlādīni nissāya nibbattā chāyā paṭhamataraṃyeva aniccā.
৪১৩. অনুপহচ্চাতি অনুপহনিত্ৰা। তত্থ মংসং পিণ্ডং পিণ্ডং কত্ৰা চম্মং অল্লিযাপেন্তো মংসকাযং উপহনতি নাম। চম্মং বদ্ধং বদ্ধং কত্ৰা মংসে অল্লিযাপেন্তো মংসকাযং উপহনতি নাম। এৰং অকত্ৰা। ৰিলিমংসং ন্হারুবন্ধনন্তি সব্বচম্মে লগ্গৰিলীপনমংসমেৰ। অন্তরাকিলেসসংযোজনবন্ধনন্তি সব্বং অন্তরকিলেসমেৰ সন্ধায ৰুত্তং।
413.Anupahaccāti anupahanitvā. Tattha maṃsaṃ piṇḍaṃ piṇḍaṃ katvā cammaṃ alliyāpento maṃsakāyaṃ upahanati nāma. Cammaṃ baddhaṃ baddhaṃ katvā maṃse alliyāpento maṃsakāyaṃ upahanati nāma. Evaṃ akatvā. Vilimaṃsaṃ nhārubandhananti sabbacamme laggavilīpanamaṃsameva. Antarākilesasaṃyojanabandhananti sabbaṃ antarakilesameva sandhāya vuttaṃ.
৪১৪. সত্ত খো পনিমেতি কস্মা আহাতি? যা হি এসা পঞ্ঞা কিলেসে ছিন্দতীতি ৰুত্তা, সা ন একিকাৰ অত্তনো ধম্মতায ছিন্দিতুং সক্কোতি। যথা পন কুঠারী ন অত্তনো ধম্মতায ছেজ্জং ছিন্দতি, পুরিসস্স তজ্জং ৰাযামং পটিচ্চেৰ ছিন্দতি, এৰং ন ৰিনা ছহি বোজ্ঝঙ্গেহি পঞ্ঞা কিলেসে ছিন্দিতুং সক্কোতি। তস্মা এৰমাহ। তেন হীতি যেন কারণেন তযা ছ অজ্ঝত্তিকানি আযতনানি, ছ বাহিরানি , ছ ৰিঞ্ঞাণকাযে, দীপোপমং, রুক্খোপমং, গাৰূপমঞ্চ দস্সেত্ৰা সত্তহি বোজ্ঝঙ্গেহি আসৰক্খযেন দেসনা নিট্ঠপিতা, তেন কারণেন ত্ৰং স্ৰেপি তা ভিক্খুনিযো তেনেৰ ওৰাদেন ওৰদেয্যাসীতি।
414.Satta kho panimeti kasmā āhāti? Yā hi esā paññā kilese chindatīti vuttā, sā na ekikāva attano dhammatāya chindituṃ sakkoti. Yathā pana kuṭhārī na attano dhammatāya chejjaṃ chindati, purisassa tajjaṃ vāyāmaṃ paṭicceva chindati, evaṃ na vinā chahi bojjhaṅgehi paññā kilese chindituṃ sakkoti. Tasmā evamāha. Tena hīti yena kāraṇena tayā cha ajjhattikāni āyatanāni, cha bāhirāni , cha viññāṇakāye, dīpopamaṃ, rukkhopamaṃ, gāvūpamañca dassetvā sattahi bojjhaṅgehi āsavakkhayena desanā niṭṭhapitā, tena kāraṇena tvaṃ svepi tā bhikkhuniyo teneva ovādena ovadeyyāsīti.
৪১৫. সা সোতাপন্নাতি যা সা গুণেহি সব্বপচ্ছিমিকা, সা সোতাপন্না। সেসা পন সকদাগামিঅনাগামিনিযো চ খীণাসৰা চ। যদি এৰং কথং পরিপুণ্ণসঙ্কপ্পাতি। অজ্ঝাসযপারিপূরিযা। যস্সা হি ভিক্খুনিযা এৰমহোসি – ‘‘কদা নু খো অহং অয্যস্স নন্দকস্স ধম্মদেসনং সুণন্তী তস্মিংযেৰ আসনে সোতাপত্তিফলং সচ্ছিকরেয্য’’ন্তি, সা সোতাপত্তিফলং সচ্ছাকাসি। যস্সা অহোসি ‘‘সকদাগামিফলং অনাগামিফলং অরহত্ত’’ন্তি, সা অরহত্তং সচ্ছাকাসি। তেনাহ ভগৰা ‘‘অত্তমনা চেৰ পরিপুণ্ণসঙ্কপ্পা চা’’তি।
415.Sā sotāpannāti yā sā guṇehi sabbapacchimikā, sā sotāpannā. Sesā pana sakadāgāmianāgāminiyo ca khīṇāsavā ca. Yadi evaṃ kathaṃ paripuṇṇasaṅkappāti. Ajjhāsayapāripūriyā. Yassā hi bhikkhuniyā evamahosi – ‘‘kadā nu kho ahaṃ ayyassa nandakassa dhammadesanaṃ suṇantī tasmiṃyeva āsane sotāpattiphalaṃ sacchikareyya’’nti, sā sotāpattiphalaṃ sacchākāsi. Yassā ahosi ‘‘sakadāgāmiphalaṃ anāgāmiphalaṃ arahatta’’nti, sā arahattaṃ sacchākāsi. Tenāha bhagavā ‘‘attamanā ceva paripuṇṇasaṅkappā cā’’ti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
নন্দকোৰাদসুত্তৰণ্ণনা নিট্ঠিতা।
Nandakovādasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৪. নন্দকোৰাদসুত্তং • 4. Nandakovādasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৪. নন্দকোৰাদসুত্তৰণ্ণনা • 4. Nandakovādasuttavaṇṇanā
