| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) |
೪. ನನ್ದಕೋವಾದಸುತ್ತವಣ್ಣನಾ
4. Nandakovādasuttavaṇṇanā
೩೯೮. ಸಙ್ಘಸ್ಸ ಭಾರಂ ಅಕಾಸಿ ಉಪಾಯೇನ ನನ್ದಕತ್ಥೇರಸ್ಸ ಓವಾದೇನ ವಿನೇತಬ್ಬಾನಂ ಭಿಕ್ಖುನೀನಂ ವಿನಯತ್ಥಂ। ತೇನಾಹ ‘‘ಇಮಂ ಪನಾ’’ತಿಆದಿ। ಪರಿಯಾಯತಿ ಪವತ್ತತೀತಿ ಪರಿಯಾಯೋ, ಪಟಿಪಾಟೀತಿ ಆಹ – ‘‘ಪರಿಯಾಯೇನಾತಿ ವಾರೇನಾ’’ತಿ। ಅಸ್ಸಾತಿ ನನ್ದಕತ್ಥೇರಸ್ಸ। ವದಾಪೇಸಿ ಅಞ್ಞೇಹಿ ಅತ್ತನೋ ಅನೋಕಾಸಭಾವಂ। ಪರಿಯಾಯೇನ ಓವದನ್ತೀತಿ ಓವದಿತುಂ ಸಮತ್ಥಾ ಭಿಕ್ಖುನಿಯೋ ವಾರೇನ ಓವದನ್ತಿ। ಇದಂ ಪರಿಯಾಯೇನ ಓವದನಂ। ಚಿತ್ತಂ ಏಕಗ್ಗಂ ಹೋತಿ ಪಸೀದತಿ ಪುಬ್ಬಚರಿಯಸಿದ್ಧೇನ ಗಾರವಬಹುಮಾನೇನ ಗೇಹಸ್ಸಿತಪೇಮವಸೇನ।
398.Saṅghassabhāraṃ akāsi upāyena nandakattherassa ovādena vinetabbānaṃ bhikkhunīnaṃ vinayatthaṃ. Tenāha ‘‘imaṃ panā’’tiādi. Pariyāyati pavattatīti pariyāyo, paṭipāṭīti āha – ‘‘pariyāyenāti vārenā’’ti. Assāti nandakattherassa. Vadāpesi aññehi attano anokāsabhāvaṃ. Pariyāyena ovadantīti ovadituṃ samatthā bhikkhuniyo vārena ovadanti. Idaṃ pariyāyena ovadanaṃ. Cittaṃ ekaggaṃ hoti pasīdati pubbacariyasiddhena gāravabahumānena gehassitapemavasena.
ಗೋತಮೀತಿ ಮಹಾಪಜಾಪತಿಗೋತಮೀ। ಸೇಟ್ಠಿಸ್ಸಾತಿ ಬಾರಾಣಸಿಸೇಟ್ಠಿನೋ।
Gotamīti mahāpajāpatigotamī. Seṭṭhissāti bārāṇasiseṭṭhino.
ತೇತಿ ಪಚ್ಚೇಕಬುದ್ಧೇ। ಕಿಂ ನು ಖೋತಿ ಪುಚ್ಛಿ ಚಿರತರಕಾಲಂ ಪುಞ್ಞಕಿರಿಯಾಯ ಪರಿಭಾವಿತಸನ್ತಾನತಾಯ, ಪಚ್ಚೇಕಬುದ್ಧೇಸು ಚ ಗಾರವಬಹುಮಾನತಾಯ। ದುಗ್ಗತೇಹಿಪಿ ಸಕ್ಕಾ ಕಾತುನ್ತಿ ದುಗ್ಗತೇಹಿಪಿ ಯಥಾವಿಭವಂ ಕತಾ ಕುಟಿ ತುಮ್ಹಾಕಂ ವಸಿತುಂ ಸಕ್ಕಾತಿ ಪುಚ್ಛಿ।
Teti paccekabuddhe. Kiṃ nu khoti pucchi ciratarakālaṃ puññakiriyāya paribhāvitasantānatāya, paccekabuddhesu ca gāravabahumānatāya. Duggatehipi sakkā kātunti duggatehipi yathāvibhavaṃ katā kuṭi tumhākaṃ vasituṃ sakkāti pucchi.
ಹತ್ಥಕಮ್ಮಂ ದೇಥಾತಿ ಹತ್ಥಕಮ್ಮಂ ಕತ್ವಾ ದೇಥಾತಿ ಅತ್ಥೋ। ಆನಿಸಂಸಂ ಆಚಿಕ್ಖಿತ್ವಾತಿ ‘‘ತಾದಿಸಾನಂ ಮಹೇಸೀನಂ ಕತಂ ವೇಯ್ಯಾವಚ್ಚಂ ಅಮ್ಹಾಕಮ್ಪಿ ದೀಘರತ್ತಂ ಹಿತಾಯ ಹೋತಿ। ಆವಾಸದಾನಞ್ಚ ನಾಮ ಮಹಪ್ಫಲಂ ಮಹಾನಿಸಂಸಂ ನಿಬ್ಬತ್ತಟ್ಠಾನೇ ಮಹಾಸಮ್ಪತ್ತಿಆವಹಂ ಭವಿಸ್ಸತೀ’’ತಿಆದಿನಾ ಆನಿಸಂಸಂ ಆಚಿಕ್ಖಿತ್ವಾ। ಗಾಳ್ಹೇನ ಓವಾದೇನ ತಜ್ಜೇತ್ವಾತಿ, ‘‘ಇಮೇಸು ನಾಮ ಕರೋನ್ತೇಸು ತ್ವಂ ಕಸ್ಮಾ ನ ಕರೋಸಿ, ಮಮ ಜೇಟ್ಠಕದಾಸಸ್ಸ ಭರಿಯಭಾವಂ ನ ಜಾನಾಸಿ। ಸಬ್ಬೇಹಿಪಿ ಕರಿಯಮಾನಸ್ಸ ಹತ್ಥಕಮ್ಮಸ್ಸ ಅಕರಣೇ ತುಯ್ಹಂ ಇದಞ್ಚಿದಞ್ಚ ದುಕ್ಖಂ ಆಗಮಿಸ್ಸತೀ’’ತಿ ಭಯೇನ ತಜ್ಜೇತ್ವಾ। ಸತಂ ಸತಂ ಹುತ್ವಾತಿ ಸತಂ ಸತಂ ದಾಸಪುತ್ತಾ ಏಕಜ್ಝಂ ಹುತ್ವಾ ಏಕಞ್ಚ ಏಕಞ್ಚ ಕುಟಿಂ ಕತ್ವಾ ಅದಾಸಿ। ಚಙ್ಕಮನಾದಿಪರಿವಾರನ್ತಿ ಚಙ್ಕಮನರತ್ತಿಟ್ಠಾನದಿವಾಟ್ಠಾನಭೋಜನಾದಿಪರಿವಾರಟ್ಠಾನಸಹಿತಂ। ಜಗ್ಗಿತ್ವಾ ಉಪಟ್ಠಾಪೇತ್ವಾ। ವಿಸ್ಸಜ್ಜಾಪೇಸೀತಿ ಪರಿಚ್ಚಜಾಪೇಸಿ। ಪರಿವತ್ತಾಪೇತ್ವಾತಿ ಚೇತಾಪೇತ್ವಾ। ತಿಚೀವರಾನೀತಿ ಸಹಸ್ಸಗ್ಘನಿಕಾನಿ ತಿಚೀವರಾನಿ ಕತ್ವಾ ಅದಾಸಿ। ಕಾಲೇನ ಕಾಲನ್ತಿ ಕಾಲೇ ಕಾಲೇ, ಕಿಸ್ಮಿಞ್ಚಿ ಕಾಲೇತಿ ಅತ್ಥೋ। ರಜ್ಜೇ ಠಿತಸ್ಸಾತಿ ಸಬ್ಬಭೂತೂಪಕಾರರಜ್ಜೇ ಠಿತಸ್ಸ।
Hatthakammaṃ dethāti hatthakammaṃ katvā dethāti attho. Ānisaṃsaṃ ācikkhitvāti ‘‘tādisānaṃ mahesīnaṃ kataṃ veyyāvaccaṃ amhākampi dīgharattaṃ hitāya hoti. Āvāsadānañca nāma mahapphalaṃ mahānisaṃsaṃ nibbattaṭṭhāne mahāsampattiāvahaṃ bhavissatī’’tiādinā ānisaṃsaṃ ācikkhitvā. Gāḷhena ovādena tajjetvāti, ‘‘imesu nāma karontesu tvaṃ kasmā na karosi, mama jeṭṭhakadāsassa bhariyabhāvaṃ na jānāsi. Sabbehipi kariyamānassa hatthakammassa akaraṇe tuyhaṃ idañcidañca dukkhaṃ āgamissatī’’ti bhayena tajjetvā. Sataṃ sataṃ hutvāti sataṃ sataṃ dāsaputtā ekajjhaṃ hutvā ekañca ekañca kuṭiṃ katvā adāsi. Caṅkamanādiparivāranti caṅkamanarattiṭṭhānadivāṭṭhānabhojanādiparivāraṭṭhānasahitaṃ. Jaggitvā upaṭṭhāpetvā. Vissajjāpesīti pariccajāpesi. Parivattāpetvāti cetāpetvā. Ticīvarānīti sahassagghanikāni ticīvarāni katvā adāsi. Kālena kālanti kāle kāle, kismiñci kāleti attho. Rajje ṭhitassāti sabbabhūtūpakārarajje ṭhitassa.
ನನ್ದಕತ್ಥೇರೋಪೀತಿ ತದಾ ಜೇಟ್ಠಕದಾಸೋ ಏತರಹಿ ನನ್ದಕತ್ಥೇರೋ ಪಬ್ಬಜಿತ್ವಾ ಅರಹತ್ತಂ ಪತ್ತೋ। ಜೇಟ್ಠಕದಾಸಿಧೀತಾ …ಪೇ॰… ಅಗ್ಗಮಹೇಸಿಟ್ಠಾನೇ ಠಿತಾತಿ ಮಹಾಪಜಾಪತಿಗೋತಮಿಂ ಸನ್ಧಾಯ ವದತಿ। ಅಯಮಾಯಸ್ಮಾ ನನ್ದಕೋತಿ ಅಯಮೇವ ಸಮುದಾಗಮತೋ ಆಯಸ್ಮಾ ನನ್ದಕತ್ಥೇರೋ। ಏತಾವ ತಾ ಭಿಕ್ಖುನಿಯೋತಿ ಏತಾವತಾ ಸಮುದಾಗಮತೋ ಪಞ್ಚಸತಾ ಭಿಕ್ಖುನಿಯೋ।
Nandakattheropīti tadā jeṭṭhakadāso etarahi nandakatthero pabbajitvā arahattaṃ patto. Jeṭṭhakadāsidhītā …pe… aggamahesiṭṭhāne ṭhitāti mahāpajāpatigotamiṃ sandhāya vadati. Ayamāyasmā nandakoti ayameva samudāgamato āyasmā nandakatthero. Etāva tā bhikkhuniyoti etāvatā samudāgamato pañcasatā bhikkhuniyo.
೩೯೯. ಹೇತುನಾತಿ ಞಾಯೇನ ಅವಿಪರೀತಪಟಿಪತ್ತಿಯಾ। ಪುಬ್ಬಭಾಗಾ ಹಿ ಪುರಿಮಾ ಪುರಿಮಾ ಪಟಿಪದಾ ಪಚ್ಛಿಮಾಯ ಕಾರಣಂ। ಯಾಥಾವಸರಸತೋ ದಿಟ್ಠನ್ತಿ ಯಥಾಭೂತಸಭಾವತೋ ಪಚ್ಚಕ್ಖಂ ವಿಯ।
399.Hetunāti ñāyena aviparītapaṭipattiyā. Pubbabhāgā hi purimā purimā paṭipadā pacchimāya kāraṇaṃ. Yāthāvasarasato diṭṭhanti yathābhūtasabhāvato paccakkhaṃ viya.
೪೦೧. ತಂ ಸಭಾವಂ ತಂಸಭಾವನ್ತಿ ತಸ್ಸಾ ವೇದನಾಯ ಪಚ್ಚಯಭಾವೇನ ಅನುರೂಪಂ।
401.Taṃ sabhāvaṃ taṃsabhāvanti tassā vedanāya paccayabhāvena anurūpaṃ.
೪೦೩. ಪಠಮತರಂಯೇವ ಅನಿಚ್ಚಾತಿ ತಸ್ಸಾಪಿ ಛಾಯಾಯ ಅನಿಚ್ಚಭಾವೋ ಪಠಮತರಂಯೇವ ಸಿದ್ಧೋ। ನ ಹಿ ಕದಾಚಿ ಅನಿಚ್ಚಂ ನಿಸ್ಸಾಯ ಪವತ್ತಂ ಕಿಞ್ಚಿ ನಿಚ್ಚಂ ನಾಮ ಅತ್ಥೀತಿ।
403.Paṭhamataraṃyeva aniccāti tassāpi chāyāya aniccabhāvo paṭhamataraṃyeva siddho. Na hi kadāci aniccaṃ nissāya pavattaṃ kiñci niccaṃ nāma atthīti.
೪೦೪. ಅನುಪಹನಿತ್ವಾತಿ ಅವಿನಾಸೇತ್ವಾ। ಕಥಂ ಪನ ಮಂಸಕಾಯಂ ಚಮ್ಮಕಾಯಞ್ಚ ಅವಿನಾಸೇತ್ವಾ ಇತರೇಸಂ ಕನ್ತನಂ ಹೋತೀತಿ ಬ್ಯತಿರೇಕಮುಖೇನ ದಸ್ಸೇತುಂ, ‘‘ತತ್ಥಾ’’ತಿಆದಿ ವುತ್ತಂ। ಚಮ್ಮಂ ಅಲ್ಲಿಯಾಪೇನ್ತೋತಿ ಚಮ್ಮೇ ಲಗ್ಗಾಪೇನ್ತೋ ಚಮ್ಮಪಟಿಬದ್ಧಂ ಕರೋನ್ತೋ। ಚಮ್ಮಂ ಬದ್ಧಂ ಕತ್ವಾತಿ ವಿವರಕಾಲೇ ನ ಫಾಲೇನ್ತೋ ಚಮ್ಮಬದ್ಧೇ ಕತ್ವಾ। ಏವಂ ಅಕತ್ವಾತಿ ಏವಂ ಮಂಸಚಮ್ಮಕಾಯಾನಂ ವಿನಾಸನಂ ಅಕತ್ವಾ, ವಿಲಿಮಂಸಾದಿವಿಕನ್ತನೇನ ಅಞ್ಞಮಞ್ಞಂ ವಿವೇಚೇತ್ವಾ। ತತ್ಥ ವಿಲಿಮಂಸನ್ತಿ ಚಮ್ಮನಿಸ್ಸಿತಮಂಸಂ, ಪಟಿಚ್ಛನ್ನಕಿಲೋಮಕನ್ತಿ ಚ ವದನ್ತಿ। ನ್ಹಾರೂತಿ ಸುಖುಮನ್ಹಾರು। ಬನ್ಧನನ್ತಿ ಚಮ್ಮಮಂಸಾನಂ ಸಮ್ಬನ್ಧಂ। ತೇನಾಹ – ‘‘ಸಬ್ಬಚಮ್ಮೇ ಲಗ್ಗವಿಲಿಪನಮಂಸಮೇವಾ’’ತಿ। ಅನ್ತರಕಿಲೇಸಮೇವಾತಿ ಅನ್ತರೇ ಚಿತ್ತೇ ಜಾತತ್ತಾ ಸತ್ತಸನ್ತಾನನ್ತೋಗಧತಾಯ ಅಬ್ಭನ್ತರಭೂತಕಿಲೇಸಮೇವ।
404.Anupahanitvāti avināsetvā. Kathaṃ pana maṃsakāyaṃ cammakāyañca avināsetvā itaresaṃ kantanaṃ hotīti byatirekamukhena dassetuṃ, ‘‘tatthā’’tiādi vuttaṃ. Cammaṃ alliyāpentoti camme laggāpento cammapaṭibaddhaṃ karonto. Cammaṃ baddhaṃ katvāti vivarakāle na phālento cammabaddhe katvā. Evaṃ akatvāti evaṃ maṃsacammakāyānaṃ vināsanaṃ akatvā, vilimaṃsādivikantanena aññamaññaṃ vivecetvā. Tattha vilimaṃsanti cammanissitamaṃsaṃ, paṭicchannakilomakanti ca vadanti. Nhārūti sukhumanhāru. Bandhananti cammamaṃsānaṃ sambandhaṃ. Tenāha – ‘‘sabbacamme laggavilipanamaṃsamevā’’ti. Antarakilesamevāti antare citte jātattā sattasantānantogadhatāya abbhantarabhūtakilesameva.
೪೦೫. ತಜ್ಜಂ ವಾಯಾಮನ್ತಿ ನಿದಸ್ಸನಮತ್ತಂ ದಟ್ಠಬ್ಬಂ। ತಥಾ ಹಿ ಪುರಿಸೇನ ಕುಠಾರಿನಾ ಛೇಜ್ಜಂ ಛಿನ್ದಿತೇ ಛೇಜ್ಜಟ್ಠಾನಸ್ಸ ಸಲ್ಲಕ್ಖಣಂ ಇಚ್ಛಿತಬ್ಬಂ, ತಸ್ಸ ಪಟಿಘಾತಭಾವೋ ಇಚ್ಛಿತಬ್ಬೋ, ಕಾಯಪರಿಳಾಹಾಭಾವೋ ಇಚ್ಛಿತಬ್ಬೋ, ತಸ್ಸ ಅವಟ್ಠಾನಂ ಇಚ್ಛಿತಬ್ಬಂ, ಕಿಚ್ಚನ್ತರೇ ಅಜ್ಝುಪೇಕ್ಖಣಂ ಇಚ್ಛಿತಬ್ಬಂ, ಏವಂ ಪಞ್ಞಾಯ ಕಿಲೇಸೇ ಛಿನ್ದನ್ತಸ್ಸ ಯೋಗಿನೋ ವೀರಿಯಬಲೇನ ಸದ್ಧಿಂ ಸತಿ-ಪೀತಿ-ಪಸ್ಸದ್ಧಿ-ಸಮಾಧಿ-ಉಪೇಕ್ಖಾಸಮ್ಬೋಜ್ಝಙ್ಗಂ ಇಚ್ಛಿತಬ್ಬನ್ತಿ ಆಹ – ‘‘ಏವಂ ನ ವಿನಾ ಛಹಿ…ಪೇ॰… ಸಕ್ಕೋತೀ’’ತಿ।
405.Tajjaṃ vāyāmanti nidassanamattaṃ daṭṭhabbaṃ. Tathā hi purisena kuṭhārinā chejjaṃ chindite chejjaṭṭhānassa sallakkhaṇaṃ icchitabbaṃ, tassa paṭighātabhāvo icchitabbo, kāyapariḷāhābhāvo icchitabbo, tassa avaṭṭhānaṃ icchitabbaṃ, kiccantare ajjhupekkhaṇaṃ icchitabbaṃ, evaṃ paññāya kilese chindantassa yogino vīriyabalena saddhiṃ sati-pīti-passaddhi-samādhi-upekkhāsambojjhaṅgaṃ icchitabbanti āha – ‘‘evaṃ na vinā chahi…pe… sakkotī’’ti.
೪೦೭. ತೇನ ಕಾರಣೇನಾತಿ ಯೇನ ತಾಸಂ ಭಿಕ್ಖುನೀನಂ ಸಾ ಧಮ್ಮದೇಸನಾ ಸಪ್ಪಾಯಾ, ಆಸೇವನಮನ್ದತಾಯ ಪನ ಅಜ್ಝಾಸಯೇನ ಪರಿಪುಣ್ಣಸಙ್ಕಪ್ಪಾ ನ ಜಾತಾಯೇವ; ಪುನ ತಥಾ ದೇಸನಾಯ ಸತಿ ಆಸೇವನಬಲವತಾಯ ಪರಿಪುಣ್ಣಸಙ್ಕಪ್ಪಾ ಭವಿಸ್ಸನ್ತಿ; ತೇನ ಕಾರಣೇನ ತ್ವಮ್ಪಿ ತಾ ಭಿಕ್ಖುನಿಯೋ ತೇನೇವ ಓವಾದೇನ ಓವದೇಯ್ಯಾಸೀತಿ।
407.Tena kāraṇenāti yena tāsaṃ bhikkhunīnaṃ sā dhammadesanā sappāyā, āsevanamandatāya pana ajjhāsayena paripuṇṇasaṅkappā na jātāyeva; puna tathā desanāya sati āsevanabalavatāya paripuṇṇasaṅkappā bhavissanti; tena kāraṇena tvampi tā bhikkhuniyo teneva ovādena ovadeyyāsīti.
೪೧೫. ಸಬ್ಬಪಚ್ಛಿಮಿಕಾತಿ ಸಬ್ಬಾಸಂ ಕನಿಟ್ಠಾ ಸೋತಾಪನ್ನಾ, ಅನರಿಯಾ ತತ್ಥ ಕಾಚಿ ನತ್ಥೀತಿ ಅತ್ಥೋ। ತೇನಾಹ – ‘‘ಸೇಸಾ ಪನ…ಪೇ॰… ಖೀಣಾಸವಾ ಚಾ’’ತಿ। ಯದಿ ಏವನ್ತಿ ಅಖೀಣಾಸವಾಪಿ ತಾದಿಸಾ ಭಿಕ್ಖುನೀ ಅತ್ಥಿ। ಏವಂ ಸತಿ ಸುಕ್ಖವಿಪಸ್ಸಕಭಾವೇನಪಿ ಸತಿ ಖೀಣಾಸವಭಾವೇ ಅರಿಯಸ್ಸ ವಿನಯೇ ಅಪರಿಪುಣ್ಣಸಙ್ಕಪ್ಪಾವಾತಿ ಅಧಿಪ್ಪಾಯೇನ ಚೋದೇತಿ, ‘‘ಕಥಂ ಪರಿಪುಣ್ಣಸಙ್ಕಪ್ಪಾ’’ತಿ? ಇತರೋ ಅಜ್ಝಾಸಯಪಾರಿಪೂರಿಯಾತಿ ಕಾರಣಂ ವತ್ವಾ, ‘‘ಯಸ್ಸ ಹೀ’’ತಿಆದಿನಾ ತಮತ್ಥಂ ವಿವರತಿ। ಅಜ್ಝಾಸಯಪಾರಿಪೂರಿಯಾತಿ ತತ್ಥ ಅಧಿಪ್ಪಾಯಪಾರಿಪೂರಿಯಾ, ನ ಸಬ್ಬಸೋ ಗುಣಪಾರಿಪೂರಿಯಾತಿ ಅಧಿಪ್ಪಾಯೋ। ತೇನಾಹ ‘‘ಕದಾ ನು ಖೋ’’ತಿಆದಿ। ಏತೇನ ಪಾದಕಜ್ಝಾನಸಮ್ಮಸಿತಜ್ಝಾನಾನಂ ವಿಸದಿಸತಾಯ ಪುಗ್ಗಲಸ್ಸ ವಿಪಸ್ಸನಾಕಾಲೇ ಪವತ್ತಅಜ್ಝಾಸಯವಸೇನ ಅರಿಯಮಗ್ಗೇ ಬೋಜ್ಝಙ್ಗಮಗ್ಗಙ್ಗಝಾನಙ್ಗಾನಂ ವಿಸೇಸತಾತಿ ಅಯಮತ್ಥೋ ದೀಪಿತೋತಿ ವೇದಿತಬ್ಬೋ। ಸೇಸಂ ಸುವಿಞ್ಞೇಯ್ಯಮೇವ।
415.Sabbapacchimikāti sabbāsaṃ kaniṭṭhā sotāpannā, anariyā tattha kāci natthīti attho. Tenāha – ‘‘sesā pana…pe… khīṇāsavā cā’’ti. Yadi evanti akhīṇāsavāpi tādisā bhikkhunī atthi. Evaṃ sati sukkhavipassakabhāvenapi sati khīṇāsavabhāve ariyassa vinaye aparipuṇṇasaṅkappāvāti adhippāyena codeti, ‘‘kathaṃ paripuṇṇasaṅkappā’’ti? Itaro ajjhāsayapāripūriyāti kāraṇaṃ vatvā, ‘‘yassa hī’’tiādinā tamatthaṃ vivarati. Ajjhāsayapāripūriyāti tattha adhippāyapāripūriyā, na sabbaso guṇapāripūriyāti adhippāyo. Tenāha ‘‘kadā nu kho’’tiādi. Etena pādakajjhānasammasitajjhānānaṃ visadisatāya puggalassa vipassanākāle pavattaajjhāsayavasena ariyamagge bojjhaṅgamaggaṅgajhānaṅgānaṃ visesatāti ayamattho dīpitoti veditabbo. Sesaṃ suviññeyyameva.
ನನ್ದಕೋವಾದಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Nandakovādasuttavaṇṇanāya līnatthappakāsanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೪. ನನ್ದಕೋವಾದಸುತ್ತಂ • 4. Nandakovādasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) / ೪. ನನ್ದಕೋವಾದಸುತ್ತವಣ್ಣನಾ • 4. Nandakovādasuttavaṇṇanā
