| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੪. ਨਨ੍ਦਕੋવਾਦਸੁਤ੍ਤવਣ੍ਣਨਾ
4. Nandakovādasuttavaṇṇanā
੩੯੮. ਏવਂ ਮੇ ਸੁਤਨ੍ਤਿ ਨਨ੍ਦਕੋવਾਦਸੁਤ੍ਤਂ। ਤਤ੍ਥ ਤੇਨ ਖੋ ਪਨ ਸਮਯੇਨਾਤਿ ਭਗવਾ ਮਹਾਪਜਾਪਤਿਯਾ ਯਾਚਿਤੋ ਭਿਕ੍ਖੁਨਿਸਙ੍ਘਂ ਉਯ੍ਯੋਜੇਤ੍વਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍વਾ – ‘‘ਥੇਰਾ ਭਿਕ੍ਖੂ વਾਰੇਨ ਭਿਕ੍ਖੁਨਿਯੋ ਓવਦਨ੍ਤੂ’’ਤਿ ਸਙ੍ਘਸ੍ਸ ਭਾਰਂ ਅਕਾਸਿ। ਤਂ ਸਨ੍ਧਾਯੇਤਂ વੁਤ੍ਤਂ। ਤਤ੍ਥ ਪਰਿਯਾਯੇਨਾਤਿ વਾਰੇਨ। ਨ ਇਚ੍ਛਤੀਤਿ ਅਤ੍ਤਨੋ વਾਰੇ ਸਮ੍ਪਤ੍ਤੇ ਦੂਰਂ ਗਾਮਂ વਾ ਗਨ੍ਤ੍વਾ ਸੂਚਿਕਮ੍ਮਾਦੀਨਿ વਾ ਆਰਭਿਤ੍વਾ ‘‘ਅਯਂ ਨਾਮਸ੍ਸ ਪਪਞ੍ਚੋ’’ਤਿ વਦਾਪੇਸਿ। ਇਮਂ ਪਨ ਪਰਿਯਾਯੇਨ ਓવਾਦਂ ਭਗવਾ ਨਨ੍ਦਕਤ੍ਥੇਰਸ੍ਸੇવ ਕਾਰਣਾ ਅਕਾਸਿ। ਕਸ੍ਮਾ? ਇਮਾਸਞ੍ਹਿ ਭਿਕ੍ਖੁਨੀਨਂ ਥੇਰਂ ਦਿਸ੍વਾ ਚਿਤ੍ਤਂ ਏਕਗ੍ਗਂ ਹੋਤਿ ਪਸੀਦਤਿ। ਤੇਨ ਤਾ ਤਸ੍ਸ ਓવਾਦਂ ਸਮ੍ਪਟਿਚ੍ਛਿਤੁਕਾਮਾ, ਧਮ੍ਮਕਥਂ ਸੋਤੁਕਾਮਾ। ਤਸ੍ਮਾ ਭਗવਾ – ‘‘ਨਨ੍ਦਕੋ ਅਤ੍ਤਨੋ વਾਰੇ ਸਮ੍ਪਤ੍ਤੇ ਓવਾਦਂ ਦਸ੍ਸਤਿ, ਧਮ੍ਮਕਥਂ ਕਥੇਸ੍ਸਤੀ’’ਤਿ વਾਰੇਨ ਓવਾਦਂ ਅਕਾਸਿ। ਥੇਰੋ ਪਨ ਅਤ੍ਤਨੋ વਾਰਂ ਨ ਕਰੋਤਿ, ਕਸ੍ਮਾਤਿ ਚੇ? ਤਾ ਕਿਰ ਭਿਕ੍ਖੁਨਿਯੋ ਪੁਬ੍ਬੇ ਥੇਰਸ੍ਸ ਜਮ੍ਬੁਦੀਪੇ ਰਜ੍ਜਂ ਕਾਰੇਨ੍ਤਸ੍ਸ ਓਰੋਧਾ ਅਹੇਸੁਂ। ਥੇਰੋ ਪੁਬ੍ਬੇਨਿવਾਸਞਾਣੇਨ ਤਂ ਕਾਰਣਂ ਞਤ੍વਾ ਚਿਨ੍ਤੇਸਿ – ‘‘ਮਂ ਇਮਸ੍ਸ ਭਿਕ੍ਖੁਨਿਸਙ੍ਘਸ੍ਸ ਮਜ੍ਝੇ ਨਿਸਿਨ੍ਨਂ ਉਪਮਾਯੋ ਚ ਕਾਰਣਾਨਿ ਚ ਆਹਰਿਤ੍વਾ ਧਮ੍ਮਂ ਕਥਯਮਾਨਂ ਦਿਸ੍વਾ ਅਞ੍ਞੋ ਪੁਬ੍ਬੇਨਿવਾਸਞਾਣਲਾਭੀ ਭਿਕ੍ਖੁ ਇਮਂ ਕਾਰਣਂ ਓਲੋਕੇਤ੍વਾ ‘ਆਯਸ੍ਮਾ ਨਨ੍ਦਕੋ ਯਾવਜ੍ਜਦਿવਸਾ ਓਰੋਧੇ ਨ વਿਸ੍ਸਜ੍ਜੇਤਿ, ਸੋਭਤਾਯਮਾਯਸ੍ਮਾ ਓਰੋਧਪਰਿવੁਤੋ’ਤਿ વਤ੍ਤਬ੍ਬਂ ਮਞ੍ਞੇਯ੍ਯਾ’’ਤਿ। ਏਤਮਤ੍ਥਂ ਸਮ੍ਪਸ੍ਸਮਾਨੋ ਥੇਰੋ ਅਤ੍ਤਨੋ વਾਰਂ ਨ ਕਰੋਤਿ। ਇਮਾਸਞ੍ਚ ਕਿਰ ਭਿਕ੍ਖੁਨੀਨਂ ਥੇਰਸ੍ਸੇવ ਦੇਸਨਾ ਸਪ੍ਪਾਯਾ ਭવਿਸ੍ਸਤੀਤਿ ਞਤ੍વਾ ਅਥ ਖੋ ਭਗવਾ ਆਯਸ੍ਮਨ੍ਤਂ ਨਨ੍ਦਕਂ ਆਮਨ੍ਤੇਸਿ।
398.Evaṃme sutanti nandakovādasuttaṃ. Tattha tena kho pana samayenāti bhagavā mahāpajāpatiyā yācito bhikkhunisaṅghaṃ uyyojetvā bhikkhusaṅghaṃ sannipātetvā – ‘‘therā bhikkhū vārena bhikkhuniyo ovadantū’’ti saṅghassa bhāraṃ akāsi. Taṃ sandhāyetaṃ vuttaṃ. Tattha pariyāyenāti vārena. Na icchatīti attano vāre sampatte dūraṃ gāmaṃ vā gantvā sūcikammādīni vā ārabhitvā ‘‘ayaṃ nāmassa papañco’’ti vadāpesi. Imaṃ pana pariyāyena ovādaṃ bhagavā nandakattherasseva kāraṇā akāsi. Kasmā? Imāsañhi bhikkhunīnaṃ theraṃ disvā cittaṃ ekaggaṃ hoti pasīdati. Tena tā tassa ovādaṃ sampaṭicchitukāmā, dhammakathaṃ sotukāmā. Tasmā bhagavā – ‘‘nandako attano vāre sampatte ovādaṃ dassati, dhammakathaṃ kathessatī’’ti vārena ovādaṃ akāsi. Thero pana attano vāraṃ na karoti, kasmāti ce? Tā kira bhikkhuniyo pubbe therassa jambudīpe rajjaṃ kārentassa orodhā ahesuṃ. Thero pubbenivāsañāṇena taṃ kāraṇaṃ ñatvā cintesi – ‘‘maṃ imassa bhikkhunisaṅghassa majjhe nisinnaṃ upamāyo ca kāraṇāni ca āharitvā dhammaṃ kathayamānaṃ disvā añño pubbenivāsañāṇalābhī bhikkhu imaṃ kāraṇaṃ oloketvā ‘āyasmā nandako yāvajjadivasā orodhe na vissajjeti, sobhatāyamāyasmā orodhaparivuto’ti vattabbaṃ maññeyyā’’ti. Etamatthaṃ sampassamāno thero attano vāraṃ na karoti. Imāsañca kira bhikkhunīnaṃ therasseva desanā sappāyā bhavissatīti ñatvā atha kho bhagavā āyasmantaṃ nandakaṃ āmantesi.
ਤਾਸਂ ਭਿਕ੍ਖੁਨੀਨਂ ਪੁਬ੍ਬੇ ਤਸ੍ਸ ਓਰੋਧਭਾવਜਾਨਨਤ੍ਥਂ ਇਦਂ વਤ੍ਥੁਂ – ਪੁਬ੍ਬੇ ਕਿਰ ਬਾਰਾਣਸਿਯਂ ਪਞ੍ਚ ਦਾਸਸਤਾਨਿ ਪਞ੍ਚ ਦਾਸਿਸਤਾਨਿ ਚਾਤਿ ਜਙ੍ਘਸਹਸ੍ਸਂ ਏਕਤੋવ ਕਮ੍ਮਂ ਕਤ੍વਾ ਏਕਸ੍ਮਿਂ ਠਾਨੇ વਸਿ। ਅਯਂ ਨਨ੍ਦਕਤ੍ਥੇਰੋ ਤਸ੍ਮਿਂ ਕਾਲੇ ਜੇਟ੍ਠਕਦਾਸੋ ਹੋਤਿ , ਗੋਤਮੀ ਜੇਟ੍ਠਕਦਾਸੀ। ਸਾ ਜੇਟ੍ਠਕਦਾਸਸ੍ਸ ਪਾਦਪਰਿਚਾਰਿਕਾ ਅਹੋਸਿ ਪਣ੍ਡਿਤਾ ਬ੍ਯਤ੍ਤਾ। ਜਙ੍ਘਸਹਸ੍ਸਮ੍ਪਿ ਪੁਞ੍ਞਕਮ੍ਮਂ ਕਰੋਨ੍ਤਂ ਏਕਤੋ ਕਰੋਤਿ। ਅਥ વਸ੍ਸੂਪਨਾਯਿਕਸਮਯੇ ਪਞ੍ਚ ਪਚ੍ਚੇਕਬੁਦ੍ਧਾ ਨਨ੍ਦਮੂਲਕਪਬ੍ਭਾਰਤੋ ਇਸਿਪਤਨੇ ਓਤਰਿਤ੍વਾ ਨਗਰੇ ਪਿਣ੍ਡਾਯ ਚਰਿਤ੍વਾ ਇਸਿਪਤਨਮੇવ ਗਨ੍ਤ੍વਾ – ‘‘વਸ੍ਸੂਪਨਾਯਿਕਕੁਟਿਯਾ ਅਤ੍ਥਾਯ ਹਤ੍ਥਕਮ੍ਮਂ ਯਾਚਿਸ੍ਸਾਮਾ’’ਤਿ ਚੀવਰਂ ਪਾਰੁਪਿਤ੍વਾ ਸਾਯਨ੍ਹਸਮਯੇ ਨਗਰਂ ਪવਿਸਿਤ੍વਾ ਸੇਟ੍ਠਿਸ੍ਸ ਘਰਦ੍વਾਰੇ ਅਟ੍ਠਂਸੁ। ਜੇਟ੍ਠਕਦਾਸੀ ਕੁਟਂ ਗਹੇਤ੍વਾ ਉਦਕਤਿਤ੍ਥਂ ਗਚ੍ਛਨ੍ਤੀ ਪਚ੍ਚੇਕਬੁਦ੍ਧੇ ਨਗਰਂ ਪવਿਸਨ੍ਤੇ ਅਦ੍ਦਸ। ਸੇਟ੍ਠਿ ਤੇਸਂ ਆਗਤਕਾਰਣਂ ਸੁਤ੍વਾ ‘‘ਅਮ੍ਹਾਕਂ ਓਕਾਸੋ ਨਤ੍ਥਿ, ਗਚ੍ਛਨ੍ਤੂ’’ਤਿ ਆਹ।
Tāsaṃ bhikkhunīnaṃ pubbe tassa orodhabhāvajānanatthaṃ idaṃ vatthuṃ – pubbe kira bārāṇasiyaṃ pañca dāsasatāni pañca dāsisatāni cāti jaṅghasahassaṃ ekatova kammaṃ katvā ekasmiṃ ṭhāne vasi. Ayaṃ nandakatthero tasmiṃ kāle jeṭṭhakadāso hoti , gotamī jeṭṭhakadāsī. Sā jeṭṭhakadāsassa pādaparicārikā ahosi paṇḍitā byattā. Jaṅghasahassampi puññakammaṃ karontaṃ ekato karoti. Atha vassūpanāyikasamaye pañca paccekabuddhā nandamūlakapabbhārato isipatane otaritvā nagare piṇḍāya caritvā isipatanameva gantvā – ‘‘vassūpanāyikakuṭiyā atthāya hatthakammaṃ yācissāmā’’ti cīvaraṃ pārupitvā sāyanhasamaye nagaraṃ pavisitvā seṭṭhissa gharadvāre aṭṭhaṃsu. Jeṭṭhakadāsī kuṭaṃ gahetvā udakatitthaṃ gacchantī paccekabuddhe nagaraṃ pavisante addasa. Seṭṭhi tesaṃ āgatakāraṇaṃ sutvā ‘‘amhākaṃ okāso natthi, gacchantū’’ti āha.
ਅਥ ਤੇ ਨਗਰਾ ਨਿਕ੍ਖਮਨ੍ਤੇ ਜੇਟ੍ਠਕਦਾਸੀ ਕੁਟਂ ਗਹੇਤ੍વਾ ਪવਿਸਨ੍ਤੀ ਦਿਸ੍વਾ ਕੁਟਂ ਓਤਾਰੇਤ੍વਾ વਨ੍ਦਿਤ੍વਾ ਓਨਮਿਤ੍વਾ ਮੁਖਂ ਪਿਧਾਯ – ‘‘ਅਯ੍ਯਾ ਨਗਰਂ ਪવਿਟ੍ਠਮਤ੍ਤਾવ ਨਿਕ੍ਖਨ੍ਤਾ, ਕਿਂ ਨੁ ਖੋ’’ਤਿ ਪੁਚ੍ਛਿ। વਸ੍ਸੂਪਨਾਯਿਕਕੁਟਿਯਾ ਹਤ੍ਥਕਮ੍ਮਂ ਯਾਚਿਤੁਂ ਆਗਮਿਮ੍ਹਾਤਿ। ਲਦ੍ਧਂ, ਭਨ੍ਤੇਤਿ। ਨ ਲਦ੍ਧਂ ਉਪਾਸਿਕੇਤਿ? ਕਿਂ ਪਨੇਸਾ ਕੁਟਿ ਇਸ੍ਸਰੇਹੇવ ਕਾਤਬ੍ਬਾ, ਦੁਗ੍ਗਤੇਹਿਪਿ ਸਕ੍ਕਾ ਕਾਤੁਨ੍ਤਿ। ਯੇਨ ਕੇਨਚਿ ਸਕ੍ਕਾਤਿ? ਸਾਧੁ, ਭਨ੍ਤੇ, ਮਯਂ ਕਰਿਸ੍ਸਾਮ। ਸ੍વੇ ਮਯ੍ਹਂ ਭਿਕ੍ਖਂ ਗਣ੍ਹਥਾਤਿ ਨਿਮਨ੍ਤੇਤ੍વਾ ਉਦਕਂ ਨੇਤ੍વਾ ਪੁਨ ਕੁਟਂ ਗਹੇਤ੍વਾ ਆਗਮ੍ਮ ਤਿਤ੍ਥਮਗ੍ਗੇ ਠਤ੍વਾ ਆਗਤਾ ਅવਸੇਸਦਾਸਿਯੋ ‘‘ਏਤ੍ਥੇવ ਹੋਥਾ’’ਤਿ વਤ੍વਾ ਸਬ੍ਬਾਸਂ ਆਗਤਕਾਲੇ ਆਹ – ‘‘ਅਮ੍ਮ ਕਿਂ ਨਿਚ੍ਚਮੇવ ਪਰਸ੍ਸ ਦਾਸਕਮ੍ਮਂ ਕਰਿਸ੍ਸਥ, ਉਦਾਹੁ ਦਾਸਭਾવਤੋ ਮੁਚ੍ਚਿਤੁਂ ਇਚ੍ਛਥਾ’’ਤਿ? ਅਜ੍ਜੇવ ਮੁਚ੍ਚਿਤੁਮਿਚ੍ਛਾਮ ਅਯ੍ਯੇਤਿ। ਯਦਿ ਏવਂ ਮਯਾ ਪਞ੍ਚ ਪਚ੍ਚੇਕਬੁਦ੍ਧਾ ਹਤ੍ਥਕਮ੍ਮਂ ਅਲਭਨ੍ਤਾ ਸ੍વਾਤਨਾਯ ਨਿਮਨ੍ਤਿਤਾ, ਤੁਮ੍ਹਾਕਂ ਸਾਮਿਕੇਹਿ ਏਕਦਿવਸਂ ਹਤ੍ਥਕਮ੍ਮਂ ਦਾਪੇਥਾਤਿ। ਤਾ ਸਾਧੂਤਿ ਸਮ੍ਪਟਿਚ੍ਛਿਤ੍વਾ ਸਾਯਂ ਅਟવਿਤੋ ਆਗਤਕਾਲੇ ਸਾਮਿਕਾਨਂ ਆਰੋਚੇਸੁਂ। ਤੇ ਸਾਧੂਤਿ ਜੇਟ੍ਠਕਦਾਸਸ੍ਸ ਗੇਹਦ੍વਾਰੇ ਸਨ੍ਨਿਪਤਿਂਸੁ।
Atha te nagarā nikkhamante jeṭṭhakadāsī kuṭaṃ gahetvā pavisantī disvā kuṭaṃ otāretvā vanditvā onamitvā mukhaṃ pidhāya – ‘‘ayyā nagaraṃ paviṭṭhamattāva nikkhantā, kiṃ nu kho’’ti pucchi. Vassūpanāyikakuṭiyā hatthakammaṃ yācituṃ āgamimhāti. Laddhaṃ, bhanteti. Na laddhaṃ upāsiketi? Kiṃ panesā kuṭi issareheva kātabbā, duggatehipi sakkā kātunti. Yena kenaci sakkāti? Sādhu, bhante, mayaṃ karissāma. Sve mayhaṃ bhikkhaṃ gaṇhathāti nimantetvā udakaṃ netvā puna kuṭaṃ gahetvā āgamma titthamagge ṭhatvā āgatā avasesadāsiyo ‘‘ettheva hothā’’ti vatvā sabbāsaṃ āgatakāle āha – ‘‘amma kiṃ niccameva parassa dāsakammaṃ karissatha, udāhu dāsabhāvato muccituṃ icchathā’’ti? Ajjeva muccitumicchāma ayyeti. Yadi evaṃ mayā pañca paccekabuddhā hatthakammaṃ alabhantā svātanāya nimantitā, tumhākaṃ sāmikehi ekadivasaṃ hatthakammaṃ dāpethāti. Tā sādhūti sampaṭicchitvā sāyaṃ aṭavito āgatakāle sāmikānaṃ ārocesuṃ. Te sādhūti jeṭṭhakadāsassa gehadvāre sannipatiṃsu.
ਅਥ ਨੇ ਜੇਟ੍ਠਕਦਾਸੀ ਸ੍વੇ ਤਾਤਾ ਪਚ੍ਚੇਕਬੁਦ੍ਧਾਨਂ ਹਤ੍ਥਕਮ੍ਮਂ ਦੇਥਾਤਿ ਆਨਿਸਂਸਂ ਆਚਿਕ੍ਖਿਤ੍વਾ ਯੇਪਿ ਨ ਕਾਤੁਕਾਮਾ, ਤੇ ਗਾਲ਼੍ਹੇਨ ਓવਾਦੇਨ ਤਜ੍ਜੇਤ੍વਾ ਪਟਿਚ੍ਛਾਪੇਸਿ। ਸਾ ਪੁਨਦਿવਸੇ ਪਚ੍ਚੇਕਬੁਦ੍ਧਾਨਂ ਭਤ੍ਤਂ ਦਤ੍વਾ ਸਬ੍ਬੇਸਂ ਦਾਸਪੁਤ੍ਤਾਨਂ ਸਞ੍ਞਂ ਅਦਾਸਿ। ਤੇ ਤਾવਦੇવ ਅਰਞ੍ਞਂ ਪવਿਸਿਤ੍વਾ ਦਬ੍ਬਸਮ੍ਭਾਰੇ ਸਮੋਧਾਨੇਤ੍વਾ ਸਤਂ ਸਤਂ ਹੁਤ੍વਾ ਏਕੇਕਕੁਟਿਂ ਏਕੇਕਚਙ੍ਕਮਨਾਦਿਪਰਿવਾਰਂ ਕਤ੍વਾ ਮਞ੍ਚਪੀਠਪਾਨੀਯਪਰਿਭੋਜਨੀਯਭਾਜਨਾਦੀਨਿ ਠਪੇਤ੍વਾ ਪਚ੍ਚੇਕਬੁਦ੍ਧੇ ਤੇਮਾਸਂ ਤਤ੍ਥ વਸਨਤ੍ਥਾਯ ਪਟਿਞ੍ਞਂ ਕਾਰੇਤ੍વਾ વਾਰਭਿਕ੍ਖਂ ਪਟ੍ਠਪੇਸੁਂ। ਯੋ ਅਤ੍ਤਨੋ વਾਰਦਿવਸੇ ਨ ਸਕ੍ਕੋਤਿ। ਤਸ੍ਸ ਜੇਟ੍ਠਕਦਾਸੀ ਸਕਗੇਹਤੋ ਆਹਰਿਤ੍વਾ ਦੇਤਿ। ਏવਂ ਤੇਮਾਸਂ ਜਗ੍ਗਿਤ੍વਾ ਜੇਟ੍ਠਕਦਾਸੀ ਏਕੇਕਂ ਦਾਸਂ ਏਕੇਕਂ ਸਾਟਕਂ વਿਸ੍ਸਜ੍ਜਾਪੇਸਿ। ਪਞ੍ਚ ਥੂਲਸਾਟਕਸਤਾਨਿ ਅਹੇਸੁਂ। ਤਾਨਿ ਪਰਿવਤ੍ਤਾਪੇਤ੍વਾ ਪਞ੍ਚਨ੍ਨਂ ਪਚ੍ਚੇਕਬੁਦ੍ਧਾਨਂ ਤਿਚੀવਰਾਨਿ ਕਤ੍વਾ ਅਦਾਸਿ। ਪਚ੍ਚੇਕਬੁਦ੍ਧਾ ਯਥਾਫਾਸੁਕਂ ਅਗਮਂਸੁ। ਤਮ੍ਪਿ ਜਙ੍ਘਸਹਸ੍ਸਂ ਏਕਤੋ ਕੁਸਲਂ ਕਤ੍વਾ ਕਾਯਸ੍ਸ ਭੇਦਾ ਦੇવਲੋਕੇ ਨਿਬ੍ਬਤ੍ਤਿ। ਤਾਨਿ ਪਞ੍ਚ ਮਾਤੁਗਾਮਸਤਾਨਿ ਕਾਲੇਨ ਕਾਲਂ ਤੇਸਂ ਪਞ੍ਚਨ੍ਨਂ ਪੁਰਿਸਸਤਾਨਂ ਗੇਹੇ ਹੋਨ੍ਤਿ, ਕਾਲੇਨ ਕਾਲਂ ਸਬ੍ਬਾਪਿ ਜੇਟ੍ਠਕਦਾਸਪੁਤ੍ਤਸ੍ਸੇવ ਗੇਹੇ ਹੋਨ੍ਤਿ। ਅਥ ਏਕਸ੍ਮਿਂ ਕਾਲੇ ਜੇਟ੍ਠਕਦਾਸਪੁਤ੍ਤੋ ਦੇવਲੋਕਤੋ ਚવਿਤ੍વਾ ਰਾਜਕੁਲੇ ਨਿਬ੍ਬਤ੍ਤੋ। ਤਾਪਿ ਪਞ੍ਚਸਤਾ ਦੇવਕਞ੍ਞਾ ਮਹਾਭੋਗਕੁਲੇਸੁ ਨਿਬ੍ਬਤ੍ਤਿਤ੍વਾ ਤਸ੍ਸ ਰਜ੍ਜੇ ਠਿਤਸ੍ਸ ਗੇਹਂ ਅਗਮਂਸੁ। ਏਤੇਨ ਨਿਯਾਮੇਨ ਸਂਸਰਨ੍ਤਿਯੋ ਅਮ੍ਹਾਕਂ ਭਗવਤੋ ਕਾਲੇ ਕੋਲਿਯਨਗਰੇ ਦੇવਦਹਨਗਰੇ ਚ ਖਤ੍ਤਿਯਕੁਲੇਸੁ ਨਿਬ੍ਬਤ੍ਤਾ।
Atha ne jeṭṭhakadāsī sve tātā paccekabuddhānaṃ hatthakammaṃ dethāti ānisaṃsaṃ ācikkhitvā yepi na kātukāmā, te gāḷhena ovādena tajjetvā paṭicchāpesi. Sā punadivase paccekabuddhānaṃ bhattaṃ datvā sabbesaṃ dāsaputtānaṃ saññaṃ adāsi. Te tāvadeva araññaṃ pavisitvā dabbasambhāre samodhānetvā sataṃ sataṃ hutvā ekekakuṭiṃ ekekacaṅkamanādiparivāraṃ katvā mañcapīṭhapānīyaparibhojanīyabhājanādīni ṭhapetvā paccekabuddhe temāsaṃ tattha vasanatthāya paṭiññaṃ kāretvā vārabhikkhaṃ paṭṭhapesuṃ. Yo attano vāradivase na sakkoti. Tassa jeṭṭhakadāsī sakagehato āharitvā deti. Evaṃ temāsaṃ jaggitvā jeṭṭhakadāsī ekekaṃ dāsaṃ ekekaṃ sāṭakaṃ vissajjāpesi. Pañca thūlasāṭakasatāni ahesuṃ. Tāni parivattāpetvā pañcannaṃ paccekabuddhānaṃ ticīvarāni katvā adāsi. Paccekabuddhā yathāphāsukaṃ agamaṃsu. Tampi jaṅghasahassaṃ ekato kusalaṃ katvā kāyassa bhedā devaloke nibbatti. Tāni pañca mātugāmasatāni kālena kālaṃ tesaṃ pañcannaṃ purisasatānaṃ gehe honti, kālena kālaṃ sabbāpi jeṭṭhakadāsaputtasseva gehe honti. Atha ekasmiṃ kāle jeṭṭhakadāsaputto devalokato cavitvā rājakule nibbatto. Tāpi pañcasatā devakaññā mahābhogakulesu nibbattitvā tassa rajje ṭhitassa gehaṃ agamaṃsu. Etena niyāmena saṃsarantiyo amhākaṃ bhagavato kāle koliyanagare devadahanagare ca khattiyakulesu nibbattā.
ਨਨ੍ਦਕਤ੍ਥੇਰੋਪਿ ਪਬ੍ਬਜਿਤ੍વਾ ਅਰਹਤ੍ਤਂ ਪਤ੍ਤੋ, ਜੇਟ੍ਠਕਦਾਸਿਧੀਤਾ વਯਂ ਆਗਮ੍ਮ ਸੁਦ੍ਧੋਦਨਮਹਾਰਾਜਸ੍ਸ ਅਗ੍ਗਮਹੇਸਿਟ੍ਠਾਨੇ ਠਿਤਾ, ਇਤਰਾਪਿ ਤੇਸਂ ਤੇਸਂ ਰਾਜਪੁਤ੍ਤਾਨਂਯੇવ ਘਰਂ ਗਤਾ। ਤਾਸਂ ਸਾਮਿਕਾ ਪਞ੍ਚਸਤਾ ਰਾਜਕੁਮਾਰਾ ਉਦਕਚੁਮ੍ਬਟਕਲਹੇ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ ਪਬ੍ਬਜਿਤਾ, ਰਾਜਧੀਤਰੋ ਤੇਸਂ ਉਕ੍ਕਣ੍ਠਨਤ੍ਥਂ ਸਾਸਨਂ ਪੇਸੇਸੁਂ। ਤੇ ਉਕ੍ਕਣ੍ਠਿਤੇ ਭਗવਾ ਕੁਣਾਲਦਹਂ ਨੇਤ੍વਾ ਸੋਤਾਪਤ੍ਤਿਫਲੇ ਪਤਿਟ੍ਠਪੇਤ੍વਾ ਮਹਾਸਮਯਦਿવਸੇ ਅਰਹਤ੍ਤੇ ਪਤਿਟ੍ਠਾਪੇਸਿ। ਤਾਪਿ ਪਞ੍ਚਸਤਾ ਰਾਜਧੀਤਰੋ ਨਿਕ੍ਖਮਿਤ੍વਾ ਮਹਾਪਜਾਪਤਿਯਾ ਸਨ੍ਤਿਕੇ ਪਬ੍ਬਜਿਂਸੁ। ਅਯਮਾਯਸ੍ਮਾ ਨਨ੍ਦਕੋ ਏਤ੍ਤਾવ ਤਾ ਭਿਕ੍ਖੁਨਿਯੋਤਿ ਏવਮੇਤਂ વਤ੍ਥੁ ਦੀਪੇਤਬ੍ਬਂ।
Nandakattheropi pabbajitvā arahattaṃ patto, jeṭṭhakadāsidhītā vayaṃ āgamma suddhodanamahārājassa aggamahesiṭṭhāne ṭhitā, itarāpi tesaṃ tesaṃ rājaputtānaṃyeva gharaṃ gatā. Tāsaṃ sāmikā pañcasatā rājakumārā udakacumbaṭakalahe satthu dhammadesanaṃ sutvā pabbajitā, rājadhītaro tesaṃ ukkaṇṭhanatthaṃ sāsanaṃ pesesuṃ. Te ukkaṇṭhite bhagavā kuṇāladahaṃ netvā sotāpattiphale patiṭṭhapetvā mahāsamayadivase arahatte patiṭṭhāpesi. Tāpi pañcasatā rājadhītaro nikkhamitvā mahāpajāpatiyā santike pabbajiṃsu. Ayamāyasmā nandako ettāva tā bhikkhuniyoti evametaṃ vatthu dīpetabbaṃ.
ਰਾਜਕਾਰਾਮੋਤਿ ਪਸੇਨਦਿਨਾ ਕਾਰਿਤੋ ਨਗਰਸ੍ਸ ਦਕ੍ਖਿਣਦਿਸਾਭਾਗੇ ਥੂਪਾਰਾਮਸਦਿਸੇ ਠਾਨੇ વਿਹਾਰੋ।
Rājakārāmoti pasenadinā kārito nagarassa dakkhiṇadisābhāge thūpārāmasadise ṭhāne vihāro.
੩੯੯. ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਨ੍ਤਿ ਹੇਤੁਨਾ ਕਾਰਣੇਨ વਿਪਸ੍ਸਨਾਪਞ੍ਞਾਯ ਯਾਥਾવਸਰਸਤੋ ਦਿਟ੍ਠਂ।
399.Sammappaññāya sudiṭṭhanti hetunā kāraṇena vipassanāpaññāya yāthāvasarasato diṭṭhaṃ.
੪੦੧. ਤਜ੍ਜਂ ਤਜ੍ਜਨ੍ਤਿ ਤਂਸਭਾવਂ ਤਂਸਭਾવਂ, ਅਤ੍ਥਤੋ ਪਨ ਤਂ ਤਂ ਪਚ੍ਚਯਂ ਪਟਿਚ੍ਚ ਤਾ ਤਾ વੇਦਨਾ ਉਪ੍ਪਜ੍ਜਨ੍ਤੀਤਿ વੁਤ੍ਤਂ ਹੋਤਿ।
401.Tajjaṃ tajjanti taṃsabhāvaṃ taṃsabhāvaṃ, atthato pana taṃ taṃ paccayaṃ paṭicca tā tā vedanā uppajjantīti vuttaṃ hoti.
੪੦੨. ਪਗੇવਸ੍ਸ ਛਾਯਾਤਿ ਮੂਲਾਦੀਨਿ ਨਿਸ੍ਸਾਯ ਨਿਬ੍ਬਤ੍ਤਾ ਛਾਯਾ ਪਠਮਤਰਂਯੇવ ਅਨਿਚ੍ਚਾ।
402.Pagevassa chāyāti mūlādīni nissāya nibbattā chāyā paṭhamataraṃyeva aniccā.
੪੧੩. ਅਨੁਪਹਚ੍ਚਾਤਿ ਅਨੁਪਹਨਿਤ੍વਾ। ਤਤ੍ਥ ਮਂਸਂ ਪਿਣ੍ਡਂ ਪਿਣ੍ਡਂ ਕਤ੍વਾ ਚਮ੍ਮਂ ਅਲ੍ਲਿਯਾਪੇਨ੍ਤੋ ਮਂਸਕਾਯਂ ਉਪਹਨਤਿ ਨਾਮ। ਚਮ੍ਮਂ ਬਦ੍ਧਂ ਬਦ੍ਧਂ ਕਤ੍વਾ ਮਂਸੇ ਅਲ੍ਲਿਯਾਪੇਨ੍ਤੋ ਮਂਸਕਾਯਂ ਉਪਹਨਤਿ ਨਾਮ। ਏવਂ ਅਕਤ੍વਾ। વਿਲਿਮਂਸਂ ਨ੍ਹਾਰੁਬਨ੍ਧਨਨ੍ਤਿ ਸਬ੍ਬਚਮ੍ਮੇ ਲਗ੍ਗવਿਲੀਪਨਮਂਸਮੇવ। ਅਨ੍ਤਰਾਕਿਲੇਸਸਂਯੋਜਨਬਨ੍ਧਨਨ੍ਤਿ ਸਬ੍ਬਂ ਅਨ੍ਤਰਕਿਲੇਸਮੇવ ਸਨ੍ਧਾਯ વੁਤ੍ਤਂ।
413.Anupahaccāti anupahanitvā. Tattha maṃsaṃ piṇḍaṃ piṇḍaṃ katvā cammaṃ alliyāpento maṃsakāyaṃ upahanati nāma. Cammaṃ baddhaṃ baddhaṃ katvā maṃse alliyāpento maṃsakāyaṃ upahanati nāma. Evaṃ akatvā. Vilimaṃsaṃ nhārubandhananti sabbacamme laggavilīpanamaṃsameva. Antarākilesasaṃyojanabandhananti sabbaṃ antarakilesameva sandhāya vuttaṃ.
੪੧੪. ਸਤ੍ਤ ਖੋ ਪਨਿਮੇਤਿ ਕਸ੍ਮਾ ਆਹਾਤਿ? ਯਾ ਹਿ ਏਸਾ ਪਞ੍ਞਾ ਕਿਲੇਸੇ ਛਿਨ੍ਦਤੀਤਿ વੁਤ੍ਤਾ, ਸਾ ਨ ਏਕਿਕਾવ ਅਤ੍ਤਨੋ ਧਮ੍ਮਤਾਯ ਛਿਨ੍ਦਿਤੁਂ ਸਕ੍ਕੋਤਿ। ਯਥਾ ਪਨ ਕੁਠਾਰੀ ਨ ਅਤ੍ਤਨੋ ਧਮ੍ਮਤਾਯ ਛੇਜ੍ਜਂ ਛਿਨ੍ਦਤਿ, ਪੁਰਿਸਸ੍ਸ ਤਜ੍ਜਂ વਾਯਾਮਂ ਪਟਿਚ੍ਚੇવ ਛਿਨ੍ਦਤਿ, ਏવਂ ਨ વਿਨਾ ਛਹਿ ਬੋਜ੍ਝਙ੍ਗੇਹਿ ਪਞ੍ਞਾ ਕਿਲੇਸੇ ਛਿਨ੍ਦਿਤੁਂ ਸਕ੍ਕੋਤਿ। ਤਸ੍ਮਾ ਏવਮਾਹ। ਤੇਨ ਹੀਤਿ ਯੇਨ ਕਾਰਣੇਨ ਤਯਾ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ, ਛ ਬਾਹਿਰਾਨਿ , ਛ વਿਞ੍ਞਾਣਕਾਯੇ, ਦੀਪੋਪਮਂ, ਰੁਕ੍ਖੋਪਮਂ, ਗਾવੂਪਮਞ੍ਚ ਦਸ੍ਸੇਤ੍વਾ ਸਤ੍ਤਹਿ ਬੋਜ੍ਝਙ੍ਗੇਹਿ ਆਸવਕ੍ਖਯੇਨ ਦੇਸਨਾ ਨਿਟ੍ਠਪਿਤਾ, ਤੇਨ ਕਾਰਣੇਨ ਤ੍વਂ ਸ੍વੇਪਿ ਤਾ ਭਿਕ੍ਖੁਨਿਯੋ ਤੇਨੇવ ਓવਾਦੇਨ ਓવਦੇਯ੍ਯਾਸੀਤਿ।
414.Satta kho panimeti kasmā āhāti? Yā hi esā paññā kilese chindatīti vuttā, sā na ekikāva attano dhammatāya chindituṃ sakkoti. Yathā pana kuṭhārī na attano dhammatāya chejjaṃ chindati, purisassa tajjaṃ vāyāmaṃ paṭicceva chindati, evaṃ na vinā chahi bojjhaṅgehi paññā kilese chindituṃ sakkoti. Tasmā evamāha. Tena hīti yena kāraṇena tayā cha ajjhattikāni āyatanāni, cha bāhirāni , cha viññāṇakāye, dīpopamaṃ, rukkhopamaṃ, gāvūpamañca dassetvā sattahi bojjhaṅgehi āsavakkhayena desanā niṭṭhapitā, tena kāraṇena tvaṃ svepi tā bhikkhuniyo teneva ovādena ovadeyyāsīti.
੪੧੫. ਸਾ ਸੋਤਾਪਨ੍ਨਾਤਿ ਯਾ ਸਾ ਗੁਣੇਹਿ ਸਬ੍ਬਪਚ੍ਛਿਮਿਕਾ, ਸਾ ਸੋਤਾਪਨ੍ਨਾ। ਸੇਸਾ ਪਨ ਸਕਦਾਗਾਮਿਅਨਾਗਾਮਿਨਿਯੋ ਚ ਖੀਣਾਸવਾ ਚ। ਯਦਿ ਏવਂ ਕਥਂ ਪਰਿਪੁਣ੍ਣਸਙ੍ਕਪ੍ਪਾਤਿ। ਅਜ੍ਝਾਸਯਪਾਰਿਪੂਰਿਯਾ। ਯਸ੍ਸਾ ਹਿ ਭਿਕ੍ਖੁਨਿਯਾ ਏવਮਹੋਸਿ – ‘‘ਕਦਾ ਨੁ ਖੋ ਅਹਂ ਅਯ੍ਯਸ੍ਸ ਨਨ੍ਦਕਸ੍ਸ ਧਮ੍ਮਦੇਸਨਂ ਸੁਣਨ੍ਤੀ ਤਸ੍ਮਿਂਯੇવ ਆਸਨੇ ਸੋਤਾਪਤ੍ਤਿਫਲਂ ਸਚ੍ਛਿਕਰੇਯ੍ਯ’’ਨ੍ਤਿ, ਸਾ ਸੋਤਾਪਤ੍ਤਿਫਲਂ ਸਚ੍ਛਾਕਾਸਿ। ਯਸ੍ਸਾ ਅਹੋਸਿ ‘‘ਸਕਦਾਗਾਮਿਫਲਂ ਅਨਾਗਾਮਿਫਲਂ ਅਰਹਤ੍ਤ’’ਨ੍ਤਿ, ਸਾ ਅਰਹਤ੍ਤਂ ਸਚ੍ਛਾਕਾਸਿ। ਤੇਨਾਹ ਭਗવਾ ‘‘ਅਤ੍ਤਮਨਾ ਚੇવ ਪਰਿਪੁਣ੍ਣਸਙ੍ਕਪ੍ਪਾ ਚਾ’’ਤਿ।
415.Sā sotāpannāti yā sā guṇehi sabbapacchimikā, sā sotāpannā. Sesā pana sakadāgāmianāgāminiyo ca khīṇāsavā ca. Yadi evaṃ kathaṃ paripuṇṇasaṅkappāti. Ajjhāsayapāripūriyā. Yassā hi bhikkhuniyā evamahosi – ‘‘kadā nu kho ahaṃ ayyassa nandakassa dhammadesanaṃ suṇantī tasmiṃyeva āsane sotāpattiphalaṃ sacchikareyya’’nti, sā sotāpattiphalaṃ sacchākāsi. Yassā ahosi ‘‘sakadāgāmiphalaṃ anāgāmiphalaṃ arahatta’’nti, sā arahattaṃ sacchākāsi. Tenāha bhagavā ‘‘attamanā ceva paripuṇṇasaṅkappā cā’’ti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਨਨ੍ਦਕੋવਾਦਸੁਤ੍ਤવਣ੍ਣਨਾ ਨਿਟ੍ਠਿਤਾ।
Nandakovādasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੪. ਨਨ੍ਦਕੋવਾਦਸੁਤ੍ਤਂ • 4. Nandakovādasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੪. ਨਨ੍ਦਕੋવਾਦਸੁਤ੍ਤવਣ੍ਣਨਾ • 4. Nandakovādasuttavaṇṇanā
