| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
७. नन्दमाणवपुच्छा
7. Nandamāṇavapucchā
१०८३.
1083.
‘‘सन्ति लोके मुनयो, (इच्चायस्मा नन्दो)
‘‘Santi loke munayo, (iccāyasmā nando)
जना वदन्ति तयिदं कथंसु।
Janā vadanti tayidaṃ kathaṃsu;
ञाणूपपन्नं नो मुनिं 1 वदन्ति, उदाहु वे जीवितेनूपपन्नं’’॥
Ñāṇūpapannaṃ no muniṃ 2 vadanti, udāhu ve jīvitenūpapannaṃ’’.
१०८४.
1084.
‘‘न दिट्ठिया न सुतिया न ञाणेन, (न सीलब्बतेन) 3
‘‘Na diṭṭhiyā na sutiyā na ñāṇena, (na sīlabbatena) 4
मुनीध नन्द कुसला वदन्ति।
Munīdha nanda kusalā vadanti;
विसेनिकत्वा अनीघा निरासा, चरन्ति ये ते मुनयोति ब्रूमि’’॥
Visenikatvā anīghā nirāsā, caranti ye te munayoti brūmi’’.
१०८५.
1085.
‘‘ये केचिमे समणब्राह्मणासे, (इच्चायस्मा नन्दो)
‘‘Ye kecime samaṇabrāhmaṇāse, (iccāyasmā nando)
सीलब्बतेनापि वदन्ति सुद्धिं, अनेकरूपेन वदन्ति सुद्धिं।
Sīlabbatenāpi vadanti suddhiṃ, anekarūpena vadanti suddhiṃ;
कच्चिस्सु ते भगवा तत्थ यता चरन्ता, अतारु जातिञ्च जरञ्च मारिस।
Kaccissu te bhagavā tattha yatā carantā, atāru jātiñca jarañca mārisa;
पुच्छामि तं भगवा ब्रूहि मे तं’’॥
Pucchāmi taṃ bhagavā brūhi me taṃ’’.
१०८६.
1086.
‘‘ये केचिमे समणब्राह्मणासे, (नन्दाति भगवा)
‘‘Ye kecime samaṇabrāhmaṇāse, (nandāti bhagavā)
दिट्ठस्सुतेनापि वदन्ति सुद्धिं।
Diṭṭhassutenāpi vadanti suddhiṃ;
सीलब्बतेनापि वदन्ति सुद्धिं, अनेकरूपेन वदन्ति सुद्धिं।
Sīlabbatenāpi vadanti suddhiṃ, anekarūpena vadanti suddhiṃ;
किञ्चापि ते तत्थ यता चरन्ति, नारिंसु जातिजरन्ति ब्रूमि’’॥
Kiñcāpi te tattha yatā caranti, nāriṃsu jātijaranti brūmi’’.
१०८७.
1087.
‘‘ये केचिमे समणब्राह्मणासे, (इच्चायस्मा नन्दो)
‘‘Ye kecime samaṇabrāhmaṇāse, (iccāyasmā nando)
दिट्ठस्सुतेनापि वदन्ति सुद्धिं।
Diṭṭhassutenāpi vadanti suddhiṃ;
सीलब्बतेनापि वदन्ति सुद्धिं, अनेकरूपेन वदन्ति सुद्धिं।
Sīlabbatenāpi vadanti suddhiṃ, anekarūpena vadanti suddhiṃ;
ते चे मुनि 7 ब्रूसि अनोघतिण्णे, अथ को चरहि देवमनुस्सलोके।
Te ce muni 8 brūsi anoghatiṇṇe, atha ko carahi devamanussaloke;
अतारि जातिञ्च जरञ्च मारिस, पुच्छामि तं भगवा ब्रूहि मे तं’’॥
Atāri jātiñca jarañca mārisa, pucchāmi taṃ bhagavā brūhi me taṃ’’.
१०८८.
1088.
‘‘नाहं सब्बे समणब्राह्मणासे, (नन्दाति भगवा)
‘‘Nāhaṃ sabbe samaṇabrāhmaṇāse, (nandāti bhagavā)
जातिजराय निवुताति ब्रूमि।
Jātijarāya nivutāti brūmi;
ये सीध दिट्ठंव सुतं मुतं वा, सीलब्बतं वापि पहाय सब्बं।
Ye sīdha diṭṭhaṃva sutaṃ mutaṃ vā, sīlabbataṃ vāpi pahāya sabbaṃ;
अनेकरूपम्पि पहाय सब्बं, तण्हं परिञ्ञाय अनासवासे।
Anekarūpampi pahāya sabbaṃ, taṇhaṃ pariññāya anāsavāse;
ते वे नरा ओघतिण्णाति ब्रूमि’’॥
Te ve narā oghatiṇṇāti brūmi’’.
१०८९.
1089.
‘‘एताभिनन्दामि वचो महेसिनो, सुकित्तितं गोतमनूपधीकं।
‘‘Etābhinandāmi vaco mahesino, sukittitaṃ gotamanūpadhīkaṃ;
ये सीध दिट्ठं व सुतं मुतं वा, सीलब्बतं वापि पहाय सब्बं।
Ye sīdha diṭṭhaṃ va sutaṃ mutaṃ vā, sīlabbataṃ vāpi pahāya sabbaṃ;
अनेकरूपम्पि पहाय सब्बं, तण्हं परिञ्ञाय अनासवासे।
Anekarūpampi pahāya sabbaṃ, taṇhaṃ pariññāya anāsavāse;
अहम्पि ते ओघतिण्णाति ब्रूमी’’ति॥
Ahampi te oghatiṇṇāti brūmī’’ti.
नन्दमाणवपुच्छा सत्तमा निट्ठिता।
Nandamāṇavapucchā sattamā niṭṭhitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ७. नन्दसुत्तवण्णना • 7. Nandasuttavaṇṇanā
