| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
7. நந்த³மாணவஸுத்தனித்³தே³ஸவண்ணனா
7. Nandamāṇavasuttaniddesavaṇṇanā
46. ஸத்தமே நந்த³ஸுத்தே – பட²மகா³தா²யத்தோ² – லோகே க²த்தியாத³யோஜனா ஆஜீவகனிக³ண்டா²தி³கே ஸந்தா⁴ய ‘‘ஸந்தி லோகே முனயோ’’தி வத³ந்தி. தயித³ங் கத²ங்ஸூதி கிங் நு கோ² தே ஸமாபத்திஞாணாதி³னா ஞாணேன உபபன்னத்தா ஞாணூபபன்னங் முனி நோ வத³ந்தி, ஏவங்வித⁴ங் நு வத³ந்தி, உதா³ஹு வே நானப்பகாரகேன லூக²ஜீவிதஸங்கா²தேன ஜீவிதேனூபபன்னந்தி.
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
நித்³தே³ஸே அட்ட²ஸமாபத்திஞாணேன வாதி பட²மஜ்ஜா²னாதி³அட்ட²ஸமாபத்திஸம்பயுத்தஞாணேன வா. பஞ்சாபி⁴ஞ்ஞாஞாணேன வாதி புப்³பே³னிவாஸாதி³ஜானநஞாணேன வா.
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
47. அத²ஸ்ஸ ப⁴க³வா தது³ப⁴யம்பி படிக்கி²பித்வா முனிங் த³ஸ்ஸெந்தோ ‘‘ந தி³ட்டி²யா’’தி கா³த²மாஹ.
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
48. இதா³னி ‘‘தி³ட்டா²தீ³ஹி ஸுத்³தீ⁴’’தி வத³ந்தானங் வாதே³ கங்கா²பஹானத்த²ங் ‘‘யே கேசிமே’’தி புச்ச²தி. தத்த² அனேகரூபேனாதி கோதூஹலமங்க³லாதி³னாபி. தத்த² யதா சரந்தாதி தத்த² ஸக்காயதி³ட்டி²யா கு³த்தா விஹரந்தா.
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
49. அத²ஸ்ஸ ததா² ஸுத்³தி⁴அபா⁴வங் தீ³பெந்தோ ப⁴க³வா சதுத்த²ங் கா³த²மாஹ.
49. Athassa tathā suddhiabhāvaṃ dīpento bhagavā catutthaṃ gāthamāha.
50. ஏவங் ‘‘நாதரிங்ஸூ’’தி ஸுத்வா இதா³னி யோ அதரி, தங் ஸோதுகாமோ ‘‘யே கேசிமே’’தி புச்ச²தி. அத²ஸ்ஸ ப⁴க³வா ஓக⁴திண்ணமுகே²ன ஜாதிஜராதிண்ணே த³ஸ்ஸெந்தோ ச²ட்ட²ங் கா³த²மாஹ.
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
51. தத்த² நிவுதாதி ஓவுடா பரியோனத்³தா⁴. யே ஸீதா⁴தி யே ஸு இத⁴, எத்த² ச ஸு-இதி நிபாதமத்தங். தண்ஹங் பரிஞ்ஞாயாதி தீஹி பரிஞ்ஞாஹி தண்ஹங் பரிஜானித்வா. ஸேஸங் ஸப்³ப³த்த² புப்³பே³ வுத்தனயத்தா பாகடமேவ.
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
52. ஏவங் ப⁴க³வா அரஹத்தனிகூடேனேவ தே³ஸனங் நிட்டா²பேஸி, தே³ஸனாபரியோஸானே பன நந்தோ³ ப⁴க³வதோ பா⁴ஸிதங் அபி⁴னந்த³மானோ ஏதாபி⁴னந்தா³மீதி கா³த²மாஹ. இதா⁴பி ச புப்³பே³ வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
நந்த³மாணவஸுத்தனித்³தே³ஸவண்ணனா நிட்டி²தா.
Nandamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
7. நந்த³மாணவபுச்சா² • 7. Nandamāṇavapucchā
7. நந்த³மாணவபுச்சா²னித்³தே³ஸோ • 7. Nandamāṇavapucchāniddeso
