| Library / Tipiṭaka / ਤਿਪਿਟਕ • Tipiṭaka / ਚੂਲ਼ਨਿਦ੍ਦੇਸ-ਅਟ੍ਠਕਥਾ • Cūḷaniddesa-aṭṭhakathā |
੭. ਨਨ੍ਦਮਾਣવਸੁਤ੍ਤਨਿਦ੍ਦੇਸવਣ੍ਣਨਾ
7. Nandamāṇavasuttaniddesavaṇṇanā
੪੬. ਸਤ੍ਤਮੇ ਨਨ੍ਦਸੁਤ੍ਤੇ – ਪਠਮਗਾਥਾਯਤ੍ਥੋ – ਲੋਕੇ ਖਤ੍ਤਿਯਾਦਯੋਜਨਾ ਆਜੀવਕਨਿਗਣ੍ਠਾਦਿਕੇ ਸਨ੍ਧਾਯ ‘‘ਸਨ੍ਤਿ ਲੋਕੇ ਮੁਨਯੋ’’ਤਿ વਦਨ੍ਤਿ। ਤਯਿਦਂ ਕਥਂਸੂਤਿ ਕਿਂ ਨੁ ਖੋ ਤੇ ਸਮਾਪਤ੍ਤਿਞਾਣਾਦਿਨਾ ਞਾਣੇਨ ਉਪਪਨ੍ਨਤ੍ਤਾ ਞਾਣੂਪਪਨ੍ਨਂ ਮੁਨਿ ਨੋ વਦਨ੍ਤਿ, ਏવਂવਿਧਂ ਨੁ વਦਨ੍ਤਿ, ਉਦਾਹੁ વੇ ਨਾਨਪ੍ਪਕਾਰਕੇਨ ਲੂਖਜੀવਿਤਸਙ੍ਖਾਤੇਨ ਜੀવਿਤੇਨੂਪਪਨ੍ਨਨ੍ਤਿ।
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
ਨਿਦ੍ਦੇਸੇ ਅਟ੍ਠਸਮਾਪਤ੍ਤਿਞਾਣੇਨ વਾਤਿ ਪਠਮਜ੍ਝਾਨਾਦਿਅਟ੍ਠਸਮਾਪਤ੍ਤਿਸਮ੍ਪਯੁਤ੍ਤਞਾਣੇਨ વਾ। ਪਞ੍ਚਾਭਿਞ੍ਞਾਞਾਣੇਨ વਾਤਿ ਪੁਬ੍ਬੇਨਿવਾਸਾਦਿਜਾਨਨਞਾਣੇਨ વਾ।
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
੪੭. ਅਥਸ੍ਸ ਭਗવਾ ਤਦੁਭਯਮ੍ਪਿ ਪਟਿਕ੍ਖਿਪਿਤ੍વਾ ਮੁਨਿਂ ਦਸ੍ਸੇਨ੍ਤੋ ‘‘ਨ ਦਿਟ੍ਠਿਯਾ’’ਤਿ ਗਾਥਮਾਹ।
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
੪੮. ਇਦਾਨਿ ‘‘ਦਿਟ੍ਠਾਦੀਹਿ ਸੁਦ੍ਧੀ’’ਤਿ વਦਨ੍ਤਾਨਂ વਾਦੇ ਕਙ੍ਖਾਪਹਾਨਤ੍ਥਂ ‘‘ਯੇ ਕੇਚਿਮੇ’’ਤਿ ਪੁਚ੍ਛਤਿ। ਤਤ੍ਥ ਅਨੇਕਰੂਪੇਨਾਤਿ ਕੋਤੂਹਲਮਙ੍ਗਲਾਦਿਨਾਪਿ। ਤਤ੍ਥ ਯਤਾ ਚਰਨ੍ਤਾਤਿ ਤਤ੍ਥ ਸਕ੍ਕਾਯਦਿਟ੍ਠਿਯਾ ਗੁਤ੍ਤਾ વਿਹਰਨ੍ਤਾ।
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
੪੯. ਅਥਸ੍ਸ ਤਥਾ ਸੁਦ੍ਧਿਅਭਾવਂ ਦੀਪੇਨ੍ਤੋ ਭਗવਾ ਚਤੁਤ੍ਥਂ ਗਾਥਮਾਹ।
49. Athassa tathā suddhiabhāvaṃ dīpento bhagavā catutthaṃ gāthamāha.
੫੦. ਏવਂ ‘‘ਨਾਤਰਿਂਸੂ’’ਤਿ ਸੁਤ੍વਾ ਇਦਾਨਿ ਯੋ ਅਤਰਿ, ਤਂ ਸੋਤੁਕਾਮੋ ‘‘ਯੇ ਕੇਚਿਮੇ’’ਤਿ ਪੁਚ੍ਛਤਿ। ਅਥਸ੍ਸ ਭਗવਾ ਓਘਤਿਣ੍ਣਮੁਖੇਨ ਜਾਤਿਜਰਾਤਿਣ੍ਣੇ ਦਸ੍ਸੇਨ੍ਤੋ ਛਟ੍ਠਂ ਗਾਥਮਾਹ।
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
੫੧. ਤਤ੍ਥ ਨਿવੁਤਾਤਿ ਓવੁਟਾ ਪਰਿਯੋਨਦ੍ਧਾ। ਯੇ ਸੀਧਾਤਿ ਯੇ ਸੁ ਇਧ, ਏਤ੍ਥ ਚ ਸੁ-ਇਤਿ ਨਿਪਾਤਮਤ੍ਤਂ। ਤਣ੍ਹਂ ਪਰਿਞ੍ਞਾਯਾਤਿ ਤੀਹਿ ਪਰਿਞ੍ਞਾਹਿ ਤਣ੍ਹਂ ਪਰਿਜਾਨਿਤ੍વਾ। ਸੇਸਂ ਸਬ੍ਬਤ੍ਥ ਪੁਬ੍ਬੇ વੁਤ੍ਤਨਯਤ੍ਤਾ ਪਾਕਟਮੇવ।
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
੫੨. ਏવਂ ਭਗવਾ ਅਰਹਤ੍ਤਨਿਕੂਟੇਨੇવ ਦੇਸਨਂ ਨਿਟ੍ਠਾਪੇਸਿ, ਦੇਸਨਾਪਰਿਯੋਸਾਨੇ ਪਨ ਨਨ੍ਦੋ ਭਗવਤੋ ਭਾਸਿਤਂ ਅਭਿਨਨ੍ਦਮਾਨੋ ਏਤਾਭਿਨਨ੍ਦਾਮੀਤਿ ਗਾਥਮਾਹ। ਇਧਾਪਿ ਚ ਪੁਬ੍ਬੇ વੁਤ੍ਤਸਦਿਸੋ ਏવ ਧਮ੍ਮਾਭਿਸਮਯੋ ਅਹੋਸੀਤਿ।
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਚੂਲ਼ਨਿਦ੍ਦੇਸ-ਅਟ੍ਠਕਥਾਯ
Saddhammappajjotikāya cūḷaniddesa-aṭṭhakathāya
ਨਨ੍ਦਮਾਣવਸੁਤ੍ਤਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Nandamāṇavasuttaniddesavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਚੂਲ਼ਨਿਦ੍ਦੇਸਪਾਲ਼ਿ • Cūḷaniddesapāḷi
੭. ਨਨ੍ਦਮਾਣવਪੁਚ੍ਛਾ • 7. Nandamāṇavapucchā
੭. ਨਨ੍ਦਮਾਣવਪੁਚ੍ਛਾਨਿਦ੍ਦੇਸੋ • 7. Nandamāṇavapucchāniddeso
