| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
១០. នន្ទមាតាសុត្តវណ្ណនា
10. Nandamātāsuttavaṇṇanā
៥៣. ទសមេ ‘‘វុត្ថវស្សោ បវារេត្វា…បេ.… និក្ខមី’’តិ អង្គុត្តរភាណកានំ មតេនេតំ វុត្តំ។ មជ្ឈិមភាណកា បន វទន្តិ ‘‘ភគវា ឧបកដ្ឋាយ វស្សូបនាយិកាយ ជេតវនតោ ភិក្ខុសង្ឃបរិវុតោ ចារិកំ និក្ខមិ។ តេនេវ ច អកាលេ និក្ខន្តត្តា កោសលរាជាទយោ វារេតុំ អារភិំសុ។ បវារេត្វា ហិ ចរណំ ពុទ្ធាចិណ្ណ’’ន្តិ។ បុណ្ណាយ សម្មាបដិបត្តិំ បច្ចាសីសន្តោ ភគវា ‘‘មម និវត្តនបច្ចយា ត្វំ កិំ ករិស្សសី’’តិ អាហ។ បុណ្ណាបិ…បេ.… បព្ពជីតិ ឯត្ថ សេដ្ឋិ ‘‘បុណ្ណាយ ភគវា និវត្តិតោ’’តិ សុត្វា តំ ភុជិស្សំ កត្វា ធីតុដ្ឋានេ ឋបេសិ។ សា បព្ពជ្ជំ យាចិត្វា បព្ពជិ, បព្ពជិត្វា វិបស្សនំ អារភិ។ អថស្សា សត្ថា អារទ្ធវិបស្សកភាវំ ញត្វា ឥមំ ឱភាសគាថំ វិស្សជ្ជេសិ –
53. Dasame ‘‘vutthavasso pavāretvā…pe… nikkhamī’’ti aṅguttarabhāṇakānaṃ matenetaṃ vuttaṃ. Majjhimabhāṇakā pana vadanti ‘‘bhagavā upakaṭṭhāya vassūpanāyikāya jetavanato bhikkhusaṅghaparivuto cārikaṃ nikkhami. Teneva ca akāle nikkhantattā kosalarājādayo vāretuṃ ārabhiṃsu. Pavāretvā hi caraṇaṃ buddhāciṇṇa’’nti. Puṇṇāya sammāpaṭipattiṃ paccāsīsanto bhagavā ‘‘mama nivattanapaccayā tvaṃ kiṃ karissasī’’ti āha. Puṇṇāpi…pe… pabbajīti ettha seṭṭhi ‘‘puṇṇāya bhagavā nivattito’’ti sutvā taṃ bhujissaṃ katvā dhītuṭṭhāne ṭhapesi. Sā pabbajjaṃ yācitvā pabbaji, pabbajitvā vipassanaṃ ārabhi. Athassā satthā āraddhavipassakabhāvaṃ ñatvā imaṃ obhāsagāthaṃ vissajjesi –
‘‘បុណ្ណេ បូរស្សុ សទ្ធម្មំ, ចន្ទោ បន្នរសោ យថា;
‘‘Puṇṇe pūrassu saddhammaṃ, cando pannaraso yathā;
បរិបុណ្ណាយ បញ្ញាយ, ទុក្ខស្សន្តំ ករិស្សសី’’តិ។ (ថេរីគា. ៣);
Paripuṇṇāya paññāya, dukkhassantaṃ karissasī’’ti. (therīgā. 3);
សា គាថាបរិយោសានេ អរហត្តំ បត្វា អភិញ្ញាតា សាវិកា អហោសិ។ សេសមេត្ថ សុវិញ្ញេយ្យមេវ។
Sā gāthāpariyosāne arahattaṃ patvā abhiññātā sāvikā ahosi. Sesamettha suviññeyyameva.
នន្ទមាតាសុត្តវណ្ណនា និដ្ឋិតា។
Nandamātāsuttavaṇṇanā niṭṭhitā.
មហាយញ្ញវគ្គវណ្ណនា និដ្ឋិតា។
Mahāyaññavaggavaṇṇanā niṭṭhitā.
បឋមបណ្ណាសកំ និដ្ឋិតំ។
Paṭhamapaṇṇāsakaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. នន្ទមាតាសុត្តំ • 10. Nandamātāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. នន្ទមាតាសុត្តវណ្ណនា • 10. Nandamātāsuttavaṇṇanā
