| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਨਨ੍ਦਮਾਤਾਸੁਤ੍ਤવਣ੍ਣਨਾ
10. Nandamātāsuttavaṇṇanā
੫੩. ਦਸਮਂ ਅਤ੍ਥੁਪ੍ਪਤ੍ਤਿવਸੇਨ ਦੇਸਿਤਂ। ਸਤ੍ਥਾ ਕਿਰ વੁਤ੍ਥવਸ੍ਸੋ ਪવਾਰੇਤ੍વਾ ਦ੍વੇ ਅਗ੍ਗਸਾવਕੇ ਓਹਾਯ ‘‘ਦਕ੍ਖਿਣਾਗਿਰਿਂ ਚਾਰਿਕਂ ਗਮਿਸ੍ਸਾਮੀ’’ਤਿ ਨਿਕ੍ਖਮਿ, ਰਾਜਾ ਪਸੇਨਦਿ ਕੋਸਲੋ, ਅਨਾਥਪਿਣ੍ਡਿਕੋ ਗਹਪਤਿ, વਿਸਾਖਾ ਮਹਾਉਪਾਸਿਕਾ, ਅਞ੍ਞੇ ਚ ਬਹੁਜਨਾ ਦਸਬਲਂ ਨਿવਤ੍ਤੇਤੁਂ ਨਾਸਕ੍ਖਿਂਸੁ। ਅਨਾਥਪਿਣ੍ਡਿਕੋ ਗਹਪਤਿ ‘‘ਸਤ੍ਥਾਰਂ ਨਿવਤ੍ਤੇਤੁਂ ਨਾਸਕ੍ਖਿ’’ਨ੍ਤਿ ਰਹੋ ਚਿਨ੍ਤਯਮਾਨੋ ਨਿਸੀਦਿ। ਅਥ ਨਂ ਪੁਣ੍ਣਾ ਨਾਮ ਦਾਸੀ ਦਿਸ੍વਾ ‘‘ਕਿਂ ਨੁ ਖੋ ਤੇ, ਸਾਮਿ, ਨ ਪੁਬ੍ਬੇ વਿਯ ਇਨ੍ਦ੍ਰਿਯਾਨਿ વਿਪ੍ਪਸਨ੍ਨਾਨੀ’’ਤਿ ਪੁਚ੍ਛਿ। ਆਮ, ਪੁਣ੍ਣੇ, ਸਤ੍ਥਾ ਚਾਰਿਕਂ ਪਕ੍ਕਨ੍ਤੋ, ਤਮਹਂ ਨਿવਤ੍ਤੇਤੁਂ ਨਾਸਕ੍ਖਿਂ। ਨ ਖੋ ਪਨ ਸਕ੍ਕਾ ਜਾਨਿਤੁਂ ਪੁਨ ਸੀਘਂ ਆਗਚ੍ਛੇਯ੍ਯ વਾ ਨ વਾ, ਤੇਨਾਹਂ ਚਿਨ੍ਤਯਮਾਨੋ ਨਿਸਿਨ੍ਨੋਤਿ। ਸਚਾਹਂ ਦਸਬਲਂ ਨਿવਤ੍ਤੇਯ੍ਯਂ, ਕਿਂ ਮੇ ਕਰੇਯ੍ਯਾਸੀਤਿ? ਭੁਜਿਸ੍ਸਂ ਤਂ ਕਰਿਸ੍ਸਾਮੀਤਿ। ਸਾ ਗਨ੍ਤ੍વਾ ਸਤ੍ਥਾਰਂ વਨ੍ਦਿਤ੍વਾ ‘‘ਨਿવਤ੍ਤਥ, ਭਨ੍ਤੇ’’ਤਿ ਆਹ। ਮਮ ਨਿવਤ੍ਤਨਪਚ੍ਚਯਾ ਤ੍વਂ ਕਿਂ ਕਰਿਸ੍ਸਸੀਤਿ? ਤੁਮ੍ਹੇ, ਭਨ੍ਤੇ, ਮਮ ਪਰਾਧੀਨਭਾવਂ ਜਾਨਾਥ, ਅਞ੍ਞਂ ਕਿਞ੍ਚਿ ਕਾਤੁਂ ਨ ਸਕ੍ਕੋਮਿ, ਸਰਣੇਸੁ ਪਨ ਪਤਿਟ੍ਠਾਯ ਪਞ੍ਚ ਸੀਲਾਨਿ ਰਕ੍ਖਿਸ੍ਸਾਮੀਤਿ। ਸਾਧੁ ਸਾਧੁ ਪੁਣ੍ਣੇਤਿ, ਸਤ੍ਥਾ ਧਮ੍ਮਗਾਰવੇਨ ਏਕਪਦਸ੍ਮਿਞ੍ਞੇવ ਨਿવਤ੍ਤਿ। વੁਤ੍ਤਞ੍ਹੇਤਂ – ‘‘ਧਮ੍ਮਗਰੁ, ਭਿਕ੍ਖવੇ, ਤਥਾਗਤੋ ਧਮ੍ਮਗਾਰવੋ’’ਤਿ (ਅ॰ ਨਿ॰ ੫.੯੯)।
53. Dasamaṃ atthuppattivasena desitaṃ. Satthā kira vutthavasso pavāretvā dve aggasāvake ohāya ‘‘dakkhiṇāgiriṃ cārikaṃ gamissāmī’’ti nikkhami, rājā pasenadi kosalo, anāthapiṇḍiko gahapati, visākhā mahāupāsikā, aññe ca bahujanā dasabalaṃ nivattetuṃ nāsakkhiṃsu. Anāthapiṇḍiko gahapati ‘‘satthāraṃ nivattetuṃ nāsakkhi’’nti raho cintayamāno nisīdi. Atha naṃ puṇṇā nāma dāsī disvā ‘‘kiṃ nu kho te, sāmi, na pubbe viya indriyāni vippasannānī’’ti pucchi. Āma, puṇṇe, satthā cārikaṃ pakkanto, tamahaṃ nivattetuṃ nāsakkhiṃ. Na kho pana sakkā jānituṃ puna sīghaṃ āgaccheyya vā na vā, tenāhaṃ cintayamāno nisinnoti. Sacāhaṃ dasabalaṃ nivatteyyaṃ, kiṃ me kareyyāsīti? Bhujissaṃ taṃ karissāmīti. Sā gantvā satthāraṃ vanditvā ‘‘nivattatha, bhante’’ti āha. Mama nivattanapaccayā tvaṃ kiṃ karissasīti? Tumhe, bhante, mama parādhīnabhāvaṃ jānātha, aññaṃ kiñci kātuṃ na sakkomi, saraṇesu pana patiṭṭhāya pañca sīlāni rakkhissāmīti. Sādhu sādhu puṇṇeti, satthā dhammagāravena ekapadasmiññeva nivatti. Vuttañhetaṃ – ‘‘dhammagaru, bhikkhave, tathāgato dhammagāravo’’ti (a. ni. 5.99).
ਸਤ੍ਥਾ ਨਿવਤ੍ਤਿਤ੍વਾ ਜੇਤવਨਮਹਾવਿਹਾਰਂ ਪਾવਿਸਿ। ਮਹਾਜਨੋ ਪੁਣ੍ਣਾਯ ਸਾਧੁਕਾਰਸਹਸ੍ਸਾਨਿ ਅਦਾਸਿ। ਸਤ੍ਥਾ ਤਸ੍ਮਿਂ ਸਮਾਗਮੇ ਧਮ੍ਮਂ ਦੇਸੇਸਿ, ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿવਿਂਸੁ। ਪੁਣ੍ਣਾਪਿ ਸੇਟ੍ਠਿਨਾ ਅਨੁਞ੍ਞਾਤਾ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍વਾ ਪਬ੍ਬਜਿ। ਸਮ੍ਮਾਸਮ੍ਬੁਦ੍ਧੋ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਤ੍વਾ ‘‘ਅਹਂ ਯਂ ਦਿਸਂ ਚਾਰਿਕਾਯ ਨਿਕ੍ਖਨ੍ਤੋ, ਤਤ੍ਥ ਨ ਗਚ੍ਛਾਮਿ। ਤੁਮ੍ਹੇ ਤੁਮ੍ਹਾਕਂ ਪਰਿਸਾਯ ਸਦ੍ਧਿਂ ਤਂ ਦਿਸਂ ਚਾਰਿਕਂ ਗਚ੍ਛਥਾ’’ਤਿ વਤ੍વਾ ਉਯ੍ਯੋਜੇਸਿ। ਇਮਿਸ੍ਸਂ ਅਤ੍ਥੁਪ੍ਪਤ੍ਤਿਯਂ ਏਕਂ ਸਮਯਂ ਆਯਸ੍ਮਾ ਸਾਰਿਪੁਤ੍ਤੋਤਿਆਦਿ વੁਤ੍ਤਂ।
Satthā nivattitvā jetavanamahāvihāraṃ pāvisi. Mahājano puṇṇāya sādhukārasahassāni adāsi. Satthā tasmiṃ samāgame dhammaṃ desesi, caturāsītipāṇasahassāni amatapānaṃ piviṃsu. Puṇṇāpi seṭṭhinā anuññātā bhikkhuniupassayaṃ gantvā pabbaji. Sammāsambuddho sāriputtamoggallāne āmantetvā ‘‘ahaṃ yaṃ disaṃ cārikāya nikkhanto, tattha na gacchāmi. Tumhe tumhākaṃ parisāya saddhiṃ taṃ disaṃ cārikaṃ gacchathā’’ti vatvā uyyojesi. Imissaṃ atthuppattiyaṃ ekaṃ samayaṃ āyasmā sāriputtotiādi vuttaṃ.
ਤਤ੍ਥ વੇਲ਼ੁਕਣ੍ਡਕੀਤਿ વੇਲ਼ੁਕਣ੍ਟਕਨਗਰવਾਸਿਨੀ। ਤਸ੍ਸ ਕਿਰ ਨਗਰਸ੍ਸ ਪਾਕਾਰਗੁਤ੍ਤਤ੍ਥਾਯ ਪਾਕਾਰਪਰਿਯਨ੍ਤੇਨ વੇਲ਼ੂ ਰੋਪਿਤਾ, ਤੇਨਸ੍ਸ વੇਲ਼ੁਕਣ੍ਟਕਨ੍ਤੇવ ਨਾਮਂ ਜਾਤਂ। ਪਾਰਾਯਨਨ੍ਤਿ ਨਿਬ੍ਬਾਨਸਙ੍ਖਾਤਪਾਰਂ ਅਯਨਤੋ ਪਾਰਾਯਨਨ੍ਤਿ ਲਦ੍ਧવੋਹਾਰਂ ਧਮ੍ਮਂ। ਸਰੇਨ ਭਾਸਤੀਤਿ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਮਤਲੇ ਸੁਸਂવਿਹਿਤਾਰਕ੍ਖਟ੍ਠਾਨੇ ਨਿਸਿਨ੍ਨਾ ਸਮਾਪਤ੍ਤਿਬਲੇਨ ਰਤ੍ਤਿਭਾਗਂ વੀਤਿਨਾਮੇਤ੍વਾ ਸਮਾਪਤ੍ਤਿਤੋ વੁਟ੍ਠਾਯ ‘‘ਇਮਂ ਰਤ੍ਤਾવਸੇਸਂ ਕਤਰਾਯ ਰਤਿਯਾ વੀਤਿਨਾਮੇਸ੍ਸਾਮੀ’’ਤਿ ਚਿਨ੍ਤੇਤ੍વਾ ‘‘ਧਮ੍ਮਰਤਿਯਾ’’ਤਿ ਕਤਸਨ੍ਨਿਟ੍ਠਾਨਾ ਤੀਣਿ ਫਲਾਨਿ ਪਤ੍ਤਾ ਅਰਿਯਸਾવਿਕਾ ਅਡ੍ਢਤੇਯ੍ਯਗਾਥਾਸਤਪਰਿਮਾਣਂ ਪਾਰਾਯਨਸੁਤ੍ਤਂ ਮਧੁਰੇਨ ਸਰਭਞ੍ਞੇਨ ਭਾਸਤਿ। ਅਸ੍ਸੋਸਿ ਖੋਤਿ ਆਕਾਸਟ੍ਠਕવਿਮਾਨਾਨਿ ਪਰਿਹਰਿਤ੍વਾ ਤਸ੍ਸ ਪਾਸਾਦਸ੍ਸ ਉਪਰਿਭਾਗਂ ਗਤੇਨ ਮਗ੍ਗੇਨ ਨਰવਾਹਨਯਾਨਂ ਆਰੁਯ੍ਹ ਗਚ੍ਛਮਾਨੋ ਅਸ੍ਸੋਸਿ। ਕਥਾਪਰਿਯੋਸਾਨਂ ਆਗਮਯਮਾਨੋ ਅਟ੍ਠਾਸੀਤਿ ‘‘ਕਿਂ ਸਦ੍ਦੋ ਏਸ ਭਣੇ’’ਤਿ ਪੁਚ੍ਛਿਤ੍વਾ ‘‘ਨਨ੍ਦਮਾਤਾਯ ਉਪਾਸਿਕਾਯ ਸਰਭਞ੍ਞਸਦ੍ਦੋ’’ਤਿ વੁਤ੍ਤੇ ਓਤਰਿਤ੍વਾ ‘‘ਇਦਮવੋਚਾ’’ਤਿ ਇਦਂ ਦੇਸਨਾਪਰਿਯੋਸਾਨਂ ਓਲੋਕੇਨ੍ਤੋ ਅવਿਦੂਰਟ੍ਠਾਨੇ ਆਕਾਸੇ ਅਟ੍ਠਾਸਿ।
Tattha veḷukaṇḍakīti veḷukaṇṭakanagaravāsinī. Tassa kira nagarassa pākāraguttatthāya pākārapariyantena veḷū ropitā, tenassa veḷukaṇṭakanteva nāmaṃ jātaṃ. Pārāyananti nibbānasaṅkhātapāraṃ ayanato pārāyananti laddhavohāraṃ dhammaṃ. Sarena bhāsatīti sattabhūmikassa pāsādassa uparimatale susaṃvihitārakkhaṭṭhāne nisinnā samāpattibalena rattibhāgaṃ vītināmetvā samāpattito vuṭṭhāya ‘‘imaṃ rattāvasesaṃ katarāya ratiyā vītināmessāmī’’ti cintetvā ‘‘dhammaratiyā’’ti katasanniṭṭhānā tīṇi phalāni pattā ariyasāvikā aḍḍhateyyagāthāsataparimāṇaṃ pārāyanasuttaṃ madhurena sarabhaññena bhāsati. Assosi khoti ākāsaṭṭhakavimānāni pariharitvā tassa pāsādassa uparibhāgaṃ gatena maggena naravāhanayānaṃ āruyha gacchamāno assosi. Kathāpariyosānaṃ āgamayamāno aṭṭhāsīti ‘‘kiṃ saddo esa bhaṇe’’ti pucchitvā ‘‘nandamātāya upāsikāya sarabhaññasaddo’’ti vutte otaritvā ‘‘idamavocā’’ti idaṃ desanāpariyosānaṃ olokento avidūraṭṭhāne ākāse aṭṭhāsi.
ਸਾਧੁ ਭਗਿਨਿ, ਸਾਧੁ ਭਗਿਨੀਤਿ ‘‘ਸੁਗ੍ਗਹਿਤਾ ਤੇ ਭਗਿਨਿ ਧਮ੍ਮਦੇਸਨਾ ਸੁਕਥਿਤਾ, ਪਾਸਾਣਕਚੇਤਿਯੇ ਨਿਸੀਦਿਤ੍વਾ ਸੋਲ਼ਸਨ੍ਨਂ ਪਾਰਾਯਨਿਕਬ੍ਰਾਹ੍ਮਣਾਨਂ ਸਮ੍ਮਾਸਮ੍ਬੁਦ੍ਧੇਨ ਕਥਿਤਦਿવਸੇ ਚ ਅਜ੍ਜ ਚ ਨ ਕਿਞ੍ਚਿ ਅਨ੍ਤਰਂ ਪਸ੍ਸਾਮਿ, ਮਜ੍ਝੇ ਭਿਨ੍ਨਸੁવਣ੍ਣਂ વਿਯ ਤੇ ਸਤ੍ਥੁ ਕਥਿਤੇਨ ਸਦ੍ਧਿਂ ਸਦਿਸਮੇવ ਕਥਿਤ’’ਨ੍ਤਿ વਤ੍વਾ ਸਾਧੁਕਾਰਂ ਦਦਨ੍ਤੋ ਏવਮਾਹ। ਕੋ ਪਨੇਸੋ ਭਦ੍ਰਮੁਖਾਤਿ ਇਮਸ੍ਮਿਂ ਸੁਸਂવਿਹਿਤਾਰਕ੍ਖਟ੍ਠਾਨੇ ਏવਂ ਮਹਨ੍ਤੇਨ ਸਦ੍ਦੇਨ ਕੋ ਨਾਮੇਸ, ਭਦ੍ਰਮੁਖ, ਲਦ੍ਧਮੁਖ, ਕਿਂ ਨਾਗੋ ਸੁਪਣ੍ਣੋ ਦੇવੋ ਮਾਰੋ ਬ੍ਰਹ੍ਮਾਤਿ ਸੁવਣ੍ਣਪਟ੍ਟવਣ੍ਣਂ વਾਤਪਾਨਂ વਿવਰਿਤ੍વਾ વਿਗਤਸਾਰਜ੍ਜਾ ਤੀਣਿ ਫਲਾਨਿ ਪਤ੍ਤਾ ਅਰਿਯਸਾવਿਕਾ વੇਸ੍ਸવਣੇਨ ਸਦ੍ਧਿਂ ਕਥਯਮਾਨਾ ਏવਮਾਹ। ਅਹਂ ਤੇ ਭਗਿਨਿ ਭਾਤਾਤਿ ਸਯਂ ਸੋਤਾਪਨ੍ਨਤ੍ਤਾ ਅਨਾਗਾਮਿਅਰਿਯਸਾવਿਕਂ ਜੇਟ੍ਠਿਕਂ ਮਞ੍ਞਮਾਨੋ ‘‘ਭਗਿਨੀ’’ਤਿ વਤ੍વਾ ਪੁਨ ਤਂ ਪਠਮવਯੇ ਠਿਤਤ੍ਤਾ ਅਤ੍ਤਨੋ ਕਨਿਟ੍ਠਂ, ਅਤ੍ਤਾਨਂ ਪਨ ਨવੁਤਿવਸ੍ਸਸਤਸਹਸ੍ਸਾਯੁਕਤ੍ਤਾ ਮਹਲ੍ਲਕਤਰਂ ਮਞ੍ਞਮਾਨੋ ‘‘ਭਾਤਾ’’ਤਿ ਆਹ। ਸਾਧੁ ਭਦ੍ਰਮੁਖਾਤਿ, ਭਦ੍ਰਮੁਖ, ਸਾਧੁ ਸੁਨ੍ਦਰਂ, ਸ੍વਾਗਮਨਂ ਤੇ ਆਗਮਨਂ, ਆਗਨ੍ਤੁਂ ਯੁਤ੍ਤਟ੍ਠਾਨਮੇવਸਿ ਆਗਤੋਤਿ ਅਤ੍ਥੋ। ਇਦਂ ਤੇ ਹੋਤੁ ਆਤਿਥੇਯ੍ਯਨ੍ਤਿ ਇਦਮੇવ ਧਮ੍ਮਭਣਨਂ ਤવ ਅਤਿਥਿਪਣ੍ਣਾਕਾਰੋ ਹੋਤੁ, ਨ ਹਿ ਤੇ ਅਞ੍ਞਂ ਇਤੋ ਉਤ੍ਤਰਿਤਰਂ ਦਾਤਬ੍ਬਂ ਪਸ੍ਸਾਮੀਤਿ ਅਧਿਪ੍ਪਾਯੋ । ਏવਞ੍ਚੇવ ਮੇ ਭવਿਸ੍ਸਤਿ ਆਤਿਥੇਯ੍ਯਨ੍ਤਿ ਏવਂ ਅਤ੍ਤਨੋ ਪਤ੍ਤਿਦਾਨਂ ਯਾਚਿਤ੍વਾ ‘‘ਅਯਂ ਤੇ ਧਮ੍ਮਕਥਿਕਸਕ੍ਕਾਰੋ’’ਤਿ ਅਡ੍ਢਤੇਲ਼ਸਾਨਿ ਕੋਟ੍ਠਸਤਾਨਿ ਰਤ੍ਤਸਾਲੀਨਂ ਪੂਰੇਤ੍વਾ ‘‘ਯਾવਾਯਂ ਉਪਾਸਿਕਾ ਚਰਤਿ, ਤਾવ ਮਾ ਖਯਂ ਗਮਿਂਸੂ’’ਤਿ ਅਧਿਟ੍ਠਹਿਤ੍વਾ ਪਕ੍ਕਾਮਿ। ਯਾવ ਉਪਾਸਿਕਾ ਅਟ੍ਠਾਸਿ, ਤਾવ ਕੋਟ੍ਠਾਨਂ ਹੇਟ੍ਠਿਮਤਲਂ ਨਾਮ ਦਟ੍ਠੁਂ ਨਾਸਕ੍ਖਿਂਸੁ। ਤਤੋ ਪਟ੍ਠਾਯ ‘‘ਨਨ੍ਦਮਾਤਾਯ ਕੋਟ੍ਠਾਗਾਰਂ વਿਯਾ’’ਤਿ વੋਹਾਰੋ ਉਦਪਾਦਿ।
Sādhu bhagini, sādhu bhaginīti ‘‘suggahitā te bhagini dhammadesanā sukathitā, pāsāṇakacetiye nisīditvā soḷasannaṃ pārāyanikabrāhmaṇānaṃ sammāsambuddhena kathitadivase ca ajja ca na kiñci antaraṃ passāmi, majjhe bhinnasuvaṇṇaṃ viya te satthu kathitena saddhiṃ sadisameva kathita’’nti vatvā sādhukāraṃ dadanto evamāha. Ko paneso bhadramukhāti imasmiṃ susaṃvihitārakkhaṭṭhāne evaṃ mahantena saddena ko nāmesa, bhadramukha, laddhamukha, kiṃ nāgo supaṇṇo devo māro brahmāti suvaṇṇapaṭṭavaṇṇaṃ vātapānaṃ vivaritvā vigatasārajjā tīṇi phalāni pattā ariyasāvikā vessavaṇena saddhiṃ kathayamānā evamāha. Ahaṃ te bhagini bhātāti sayaṃ sotāpannattā anāgāmiariyasāvikaṃ jeṭṭhikaṃ maññamāno ‘‘bhaginī’’ti vatvā puna taṃ paṭhamavaye ṭhitattā attano kaniṭṭhaṃ, attānaṃ pana navutivassasatasahassāyukattā mahallakataraṃ maññamāno ‘‘bhātā’’ti āha. Sādhu bhadramukhāti, bhadramukha, sādhu sundaraṃ, svāgamanaṃ te āgamanaṃ, āgantuṃ yuttaṭṭhānamevasi āgatoti attho. Idaṃ te hotu ātitheyyanti idameva dhammabhaṇanaṃ tava atithipaṇṇākāro hotu, na hi te aññaṃ ito uttaritaraṃ dātabbaṃ passāmīti adhippāyo . Evañceva me bhavissati ātitheyyanti evaṃ attano pattidānaṃ yācitvā ‘‘ayaṃ te dhammakathikasakkāro’’ti aḍḍhateḷasāni koṭṭhasatāni rattasālīnaṃ pūretvā ‘‘yāvāyaṃ upāsikā carati, tāva mā khayaṃ gamiṃsū’’ti adhiṭṭhahitvā pakkāmi. Yāva upāsikā aṭṭhāsi, tāva koṭṭhānaṃ heṭṭhimatalaṃ nāma daṭṭhuṃ nāsakkhiṃsu. Tato paṭṭhāya ‘‘nandamātāya koṭṭhāgāraṃ viyā’’ti vohāro udapādi.
ਅਕਤਪਾਤਰਾਸੋਤਿ ਅਭੁਤ੍ਤਪਾਤਰਾਸੋ। ਪੁਞ੍ਞਨ੍ਤਿ ਪੁਬ੍ਬਚੇਤਨਾ ਚ ਮੁਞ੍ਚਨਚੇਤਨਾ ਚ। ਪੁਞ੍ਞਮਹੀਤਿ ਅਪਰਚੇਤਨਾ। ਸੁਖਾਯ ਹੋਤੂਤਿ ਸੁਖਤ੍ਥਾਯ ਹਿਤਤ੍ਥਾਯ ਹੋਤੁ। ਏવਂ ਅਤ੍ਤਨੋ ਦਾਨੇ વੇਸ੍ਸવਣਸ੍ਸ ਪਤ੍ਤਿਂ ਅਦਾਸਿ।
Akatapātarāsoti abhuttapātarāso. Puññanti pubbacetanā ca muñcanacetanā ca. Puññamahīti aparacetanā. Sukhāya hotūti sukhatthāya hitatthāya hotu. Evaṃ attano dāne vessavaṇassa pattiṃ adāsi.
ਪਕਰਣੇਤਿ ਕਾਰਣੇ। ਓਕ੍ਕਸ੍ਸ ਪਸਯ੍ਹਾਤਿ ਆਕਡ੍ਢਿਤ੍વਾ ਅਭਿਭવਿਤ੍વਾ। ਯਕ੍ਖਯੋਨਿਨ੍ਤਿ ਭੁਮ੍ਮਦੇવਤਾਭਾવਂ। ਤੇਨੇવ ਪੁਰਿਮੇਨ ਅਤ੍ਤਭਾવੇਨ ਉਦ੍ਦਸ੍ਸੇਤੀਤਿ ਪੁਰਿਮਸਰੀਰਸਦਿਸਮੇવ ਸਰੀਰਂ ਮਾਪੇਤ੍વਾ ਅਲਙ੍ਕਤਪਟਿਯਤ੍ਤੋ ਸਿਰਿਗਬ੍ਭਸਯਨਤਲੇ ਅਤ੍ਤਾਨਂ ਦਸ੍ਸੇਤਿ। ਉਪਾਸਿਕਾ ਪਟਿਦੇਸਿਤਾਤਿ ਉਪਾਸਿਕਾ ਅਹਨ੍ਤਿ ਏવਂ ਉਪਾਸਿਕਾਭਾવਂ ਦੇਸੇਸਿਂ। ਯਾવਦੇਤਿ ਯਾવਦੇવ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
Pakaraṇeti kāraṇe. Okkassa pasayhāti ākaḍḍhitvā abhibhavitvā. Yakkhayoninti bhummadevatābhāvaṃ. Teneva purimena attabhāvena uddassetīti purimasarīrasadisameva sarīraṃ māpetvā alaṅkatapaṭiyatto sirigabbhasayanatale attānaṃ dasseti. Upāsikā paṭidesitāti upāsikā ahanti evaṃ upāsikābhāvaṃ desesiṃ. Yāvadeti yāvadeva. Sesaṃ sabbattha uttānamevāti.
ਮਹਾਯਞ੍ਞવਗ੍ਗੋ ਪਞ੍ਚਮੋ।
Mahāyaññavaggo pañcamo.
ਪਣ੍ਣਾਸਕਂ ਨਿਟ੍ਠਿਤਂ।
Paṇṇāsakaṃ niṭṭhitaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਨਨ੍ਦਮਾਤਾਸੁਤ੍ਤਂ • 10. Nandamātāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਨਨ੍ਦਮਾਤਾਸੁਤ੍ਤવਣ੍ਣਨਾ • 10. Nandamātāsuttavaṇṇanā
