| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. நந்த³னவக்³கோ³
2. Nandanavaggo
1. நந்த³னஸுத்தவண்ணனா
1. Nandanasuttavaṇṇanā
11. நந்த³னவக்³க³ஸ்ஸ பட²மே தத்ராதி தஸ்மிங் ஆராமே. கோ²தி ப்³யஞ்ஜனஸிலிட்ட²தாவஸேன நிபாதமத்தங். பி⁴க்கூ² ஆமந்தேஸீதி பரிஸஜெட்ட²கே பி⁴க்கூ² ஜானாபேஸி. பி⁴க்க²வோதி தேஸங் ஆமந்தனாகாரதீ³பனங். ப⁴த³ந்தேதி பதிவசனதா³னங். தே பி⁴க்கூ²தி யே தத்த² ஸம்முகீ²பூ⁴தா த⁴ம்மபடிக்³கா³ஹகா பி⁴க்கூ². ப⁴க³வதோ பச்சஸ்ஸோஸுந்தி ப⁴க³வதோ வசனங் பதிஅஸ்ஸோஸுங், அபி⁴முகா² ஹுத்வா ஸுணிங்ஸு ஸம்படிச்சி²ங்ஸூதி அத்தோ². ஏதத³வோசாதி ஏதங் இதா³னி வத்தப்³ப³ங் ‘‘பூ⁴தபுப்³ப³’’ந்திஆதி³வசனங் அவோச. தத்த² தாவதிங்ஸகாயிகாதி தாவதிங்ஸகாயே நிப்³ப³த்தா. தாவதிங்ஸகாயோ நாம து³தியதே³வலோகோ வுச்சதி. மகே⁴ன மாணவேன ஸத்³தி⁴ங் மசலகா³மே காலங் கத்வா தத்த² உப்பன்னே தெத்திங்ஸ தே³வபுத்தே உபாதா³ய கிர தஸ்ஸ தே³வலோகஸ்ஸ அயங் பண்ணத்தி ஜாதாதி வத³ந்தி. யஸ்மா பன ஸேஸசக்கவாளேஸுபி ச² காமாவசரதே³வலோகா அத்தி². வுத்தம்பி சேதங் ‘‘ஸஹஸ்ஸங் சாதுமஹாராஜிகானங் ஸஹஸ்ஸங் தாவதிங்ஸான’’ந்தி (அ॰ நி॰ 10.29), தஸ்மா நாமபண்ணத்தியேவேஸா தஸ்ஸ தே³வலோகஸ்ஸாதி வேதி³தப்³பா³. ஏவஞ்ஹி நித்³தோ³ஸங் பத³ங் ஹோதி.
11. Nandanavaggassa paṭhame tatrāti tasmiṃ ārāme. Khoti byañjanasiliṭṭhatāvasena nipātamattaṃ. Bhikkhū āmantesīti parisajeṭṭhake bhikkhū jānāpesi. Bhikkhavoti tesaṃ āmantanākāradīpanaṃ. Bhadanteti pativacanadānaṃ. Te bhikkhūti ye tattha sammukhībhūtā dhammapaṭiggāhakā bhikkhū. Bhagavato paccassosunti bhagavato vacanaṃ patiassosuṃ, abhimukhā hutvā suṇiṃsu sampaṭicchiṃsūti attho. Etadavocāti etaṃ idāni vattabbaṃ ‘‘bhūtapubba’’ntiādivacanaṃ avoca. Tattha tāvatiṃsakāyikāti tāvatiṃsakāye nibbattā. Tāvatiṃsakāyo nāma dutiyadevaloko vuccati. Maghena māṇavena saddhiṃ macalagāme kālaṃ katvā tattha uppanne tettiṃsa devaputte upādāya kira tassa devalokassa ayaṃ paṇṇatti jātāti vadanti. Yasmā pana sesacakkavāḷesupi cha kāmāvacaradevalokā atthi. Vuttampi cetaṃ ‘‘sahassaṃ cātumahārājikānaṃ sahassaṃ tāvatiṃsāna’’nti (a. ni. 10.29), tasmā nāmapaṇṇattiyevesā tassa devalokassāti veditabbā. Evañhi niddosaṃ padaṃ hoti.
நந்த³னே வனேதி எத்த² தங் வனங் பவிட்டே² பவிட்டே² நந்த³யதி தோஸேதீதி நந்த³னங். பஞ்சஸு ஹி மரணனிமித்தேஸு உப்பன்னேஸு ‘‘ஸம்பத்திங் பஹாய சவிஸ்ஸாமா’’தி பரிதே³வமானா தே³வதா ஸக்கோ தே³வானமிந்தோ³ ‘‘மா பரிதே³வித்த², அபி⁴ஜ்ஜனத⁴ம்மா நாம ஸங்கா²ரா நத்தீ²’’தி ஓவதி³த்வா தத்த² பவேஸாபேதி. தாஸங் அஞ்ஞாஹி தே³வதாஹி பா³ஹாஸு க³ஹெத்வா பவேஸிதானம்பி தஸ்ஸ ஸம்பத்திங் தி³ஸ்வாவ மரணஸோகோ வூபஸம்மதி, பீதிபாமோஜ்ஜமேவ உப்பஜ்ஜதி. அத² தஸ்மிங் கீளமானா ஏவ உண்ஹஸந்தத்தோ ஹிமபிண்டோ³ விய விலீயந்தி, வாதாபஹததீ³பஸிகா² விய விஜ்ஜா²யந்தீதி ஏவங் யங்கிஞ்சி அந்தோ பவிட்ட²ங் நந்த³யதி தோஸேதியேவாதி நந்த³னங், தஸ்மிங் நந்த³னே. அச்ச²ராஸங்க⁴பரிவுதாதி அச்ச²ராதி தே³வதீ⁴தானங் நாமங், தாஸங் ஸமூஹேன பரிவுதா.
Nandane vaneti ettha taṃ vanaṃ paviṭṭhe paviṭṭhe nandayati tosetīti nandanaṃ. Pañcasu hi maraṇanimittesu uppannesu ‘‘sampattiṃ pahāya cavissāmā’’ti paridevamānā devatā sakko devānamindo ‘‘mā paridevittha, abhijjanadhammā nāma saṅkhārā natthī’’ti ovaditvā tattha pavesāpeti. Tāsaṃ aññāhi devatāhi bāhāsu gahetvā pavesitānampi tassa sampattiṃ disvāva maraṇasoko vūpasammati, pītipāmojjameva uppajjati. Atha tasmiṃ kīḷamānā eva uṇhasantatto himapiṇḍo viya vilīyanti, vātāpahatadīpasikhā viya vijjhāyantīti evaṃ yaṃkiñci anto paviṭṭhaṃ nandayati tosetiyevāti nandanaṃ, tasmiṃ nandane. Accharāsaṅghaparivutāti accharāti devadhītānaṃ nāmaṃ, tāsaṃ samūhena parivutā.
தி³ப்³பே³ஹீதி தே³வலோகே நிப்³ப³த்தேஹி. பஞ்சஹி காமகு³ணேஹீதி மனாபியரூபஸத்³த³க³ந்த⁴ரஸபொ²ட்ட²ப்³ப³ஸங்கா²தேஹி பஞ்சஹி காமப³ந்த⁴னேஹி காமகொட்டா²ஸேஹி வா . ஸமப்பிதாதி உபேதா. இதரங் தஸ்ஸேவ வேவசனங். பரிசாரயமானாதி ரமமானா, தேஸு தேஸு வா ரூபாதீ³ஸு இந்த்³ரியானி ஸஞ்சாரயமானா. தாயங் வேலாயந்தி தஸ்மிங் பரிசாரணகாலே. ஸோ பனஸ்ஸ தே³வபுத்தஸ்ஸ அது⁴னா அபி⁴னிப்³ப³த்தகாலோ வேதி³தப்³போ³. தஸ்ஸ ஹி படிஸந்தி⁴க்க²ணேயேவ ரத்தஸுவண்ணக்க²ந்தோ⁴ விய விரோசயமானோ திகா³வுதப்பமாணோ அத்தபா⁴வோ நிப்³ப³த்தி. ஸோ தி³ப்³ப³வத்த²னிவத்தோ² தி³ப்³பா³லங்காரபடிமண்டி³தோ தி³ப்³ப³மாலாவிலேபனத⁴ரோ தி³ப்³பே³ஹி சந்த³னசுண்ணேஹி ஸமங் விகிரியமானோ தி³ப்³பே³ஹி பஞ்சஹி காமகு³ணேஹி ஓவுதோ நிவுதோ பரியோனத்³தோ⁴ லோபா⁴பி⁴பூ⁴தோ ஹுத்வா லோப⁴னிஸ்ஸரணங் நிப்³பா³னங் அபஸ்ஸந்தோ ஆஸபி⁴ங் வாசங் பா⁴ஸந்தோ விய மஹாஸத்³தே³ன ‘‘ந தே ஸுக²ங் பஜானந்தீ’’தி இமங் கா³த²ங் கா³யமானோ நந்த³னவனே விசரி. தேன வுத்தங் – ‘‘தாயங் வேலாயங் இமங் கா³த²ங் அபா⁴ஸீ’’தி.
Dibbehīti devaloke nibbattehi. Pañcahi kāmaguṇehīti manāpiyarūpasaddagandharasaphoṭṭhabbasaṅkhātehi pañcahi kāmabandhanehi kāmakoṭṭhāsehi vā . Samappitāti upetā. Itaraṃ tasseva vevacanaṃ. Paricārayamānāti ramamānā, tesu tesu vā rūpādīsu indriyāni sañcārayamānā. Tāyaṃ velāyanti tasmiṃ paricāraṇakāle. So panassa devaputtassa adhunā abhinibbattakālo veditabbo. Tassa hi paṭisandhikkhaṇeyeva rattasuvaṇṇakkhandho viya virocayamāno tigāvutappamāṇo attabhāvo nibbatti. So dibbavatthanivattho dibbālaṅkārapaṭimaṇḍito dibbamālāvilepanadharo dibbehi candanacuṇṇehi samaṃ vikiriyamāno dibbehi pañcahi kāmaguṇehi ovuto nivuto pariyonaddho lobhābhibhūto hutvā lobhanissaraṇaṃ nibbānaṃ apassanto āsabhiṃ vācaṃ bhāsanto viya mahāsaddena ‘‘na te sukhaṃ pajānantī’’ti imaṃ gāthaṃ gāyamāno nandanavane vicari. Tena vuttaṃ – ‘‘tāyaṃ velāyaṃ imaṃ gāthaṃ abhāsī’’ti.
யே ந பஸ்ஸந்தி நந்த³னந்தி யே தத்ர பஞ்சகாமகு³ணானுப⁴வனவஸேன நந்த³னவனங் ந பஸ்ஸந்தி. நரதே³வானந்தி தே³வனரானங், தே³வபுரிஸானந்தி அத்தோ². தித³ஸானந்தி திக்க²த்துங் த³ஸன்னங். யஸஸ்ஸினந்தி பரிவாரஸங்கா²தேன யஸேன ஸம்பன்னானங்.
Ye na passanti nandananti ye tatra pañcakāmaguṇānubhavanavasena nandanavanaṃ na passanti. Naradevānanti devanarānaṃ, devapurisānanti attho. Tidasānanti tikkhattuṃ dasannaṃ. Yasassinanti parivārasaṅkhātena yasena sampannānaṃ.
அஞ்ஞதரா தே³வதாதி ஏகா அரியஸாவிகா தே³வதா. பச்சபா⁴ஸீதி ‘‘அயங் பா³லதே³வதா இமங் ஸம்பத்திங் நிச்சங் அசலங் மஞ்ஞதி, நாஸ்ஸா சே²த³னபே⁴த³னவித்³த⁴ங்ஸனத⁴ம்மதங் ஜானாதீ’’தி அதி⁴ப்பாயங் விவட்டெத்வா த³ஸ்ஸெந்தீ ‘‘ந த்வங் பா³லே’’தி இமாய கா³தா²ய பதிஅபா⁴ஸி. யதா² அரஹதங் வசோதி யதா² அரஹந்தானங் வசனங், ததா² த்வங் ந ஜானாஸீதி. ஏவங் தஸ்ஸா அதி⁴ப்பாயங் படிக்கி²பித்வா இதா³னி அரஹந்தானங் வசனங் த³ஸ்ஸெந்தீ அனிச்சாதிஆதி³மாஹ. தத்த² அனிச்சா வத ஸங்கா²ராதி ஸப்³பே³ தேபூ⁴மகஸங்கா²ரா ஹுத்வா அபா⁴வத்தே²ன அனிச்சா. உப்பாத³வயத⁴ம்மினோதி உப்பாத³வயஸபா⁴வா. உப்பஜ்ஜித்வா நிருஜ்ஜ²ந்தீதி இத³ங் புரிமஸ்ஸேவ வேவசனங். யஸ்மா வா உப்பஜ்ஜித்வா நிருஜ்ஜ²ந்தி, தஸ்மா உப்பாத³வயத⁴ம்மினோதி. உப்பாத³வயக்³க³ஹணேன செத்த² தத³னந்தரா வேமஜ்ஜ²ட்டா²னங் க³ஹிதமேவ ஹோதி. தேஸங் வூபஸமோ ஸுகோ²தி தேஸங் ஸங்கா²ரானங் வூபஸமஸங்கா²தங் நிப்³பா³னமேவ ஸுக²ங். இத³ங் அரஹதங் வசோதி.
Aññatarā devatāti ekā ariyasāvikā devatā. Paccabhāsīti ‘‘ayaṃ bāladevatā imaṃ sampattiṃ niccaṃ acalaṃ maññati, nāssā chedanabhedanaviddhaṃsanadhammataṃ jānātī’’ti adhippāyaṃ vivaṭṭetvā dassentī ‘‘na tvaṃ bāle’’ti imāya gāthāya patiabhāsi. Yathā arahataṃ vacoti yathā arahantānaṃ vacanaṃ, tathā tvaṃ na jānāsīti. Evaṃ tassā adhippāyaṃ paṭikkhipitvā idāni arahantānaṃ vacanaṃ dassentī aniccātiādimāha. Tattha aniccā vata saṅkhārāti sabbe tebhūmakasaṅkhārā hutvā abhāvatthena aniccā. Uppādavayadhamminoti uppādavayasabhāvā. Uppajjitvā nirujjhantīti idaṃ purimasseva vevacanaṃ. Yasmā vā uppajjitvā nirujjhanti, tasmā uppādavayadhamminoti. Uppādavayaggahaṇena cettha tadanantarā vemajjhaṭṭhānaṃ gahitameva hoti. Tesaṃ vūpasamo sukhoti tesaṃ saṅkhārānaṃ vūpasamasaṅkhātaṃ nibbānameva sukhaṃ. Idaṃ arahataṃ vacoti.
நந்த³னஸுத்தவண்ணனா நிட்டி²தா.
Nandanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நந்த³னஸுத்தங் • 1. Nandanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நந்த³னஸுத்தவண்ணனா • 1. Nandanasuttavaṇṇanā
