| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. နန္ဒနသုတ္တဝဏ္ဏနာ
4. Nandanasuttavaṇṇanā
၉၅. စတုတ္ထေ ဂောတမာတိ ဘဂဝန္တံ ဂောတ္တေန အာလပတိ။ အနာဝဋန္တိ တထာဂတသ္သ ဟိ သဗ္ဗညုတညာဏံ ပေသေန္တသ္သ ရုက္ခော ဝာ ပဗ္ဗတော ဝာ အာဝရိတုံ သမတ္ထော နာမ နတ္ထိ။ တေနာဟ ‘‘အနာဝဋ’’န္တိ။ ဣတိ တထာဂတံ ထောမေတ္ဝာ ဒေဝလောကေ အဘိသင္ခတပဉ္ဟံ ပုစ္ဆန္တော ကထံဝိဓန္တိအာဒိမာဟ။ တတ္ထ ဒုက္ခမတိစ္စ ဣရိယတီတိ ဒုက္ခံ အတိက္ကမိတ္ဝာ ဝိဟရတိ။ သီလဝာတိ လောကိယလောကုတ္တရေန သီလေန သမန္နာဂတော ခီဏာသဝော။ ပညာဒယောပိ မိသ္သကာယေဝ ဝေဒိတဗ္ဗာ။ ပူဇယန္တီတိ ဂန္ဓပုပ္ဖာဒီဟိ ပူဇေန္တိ။ စတုတ္ထံ။
95. Catutthe gotamāti bhagavantaṃ gottena ālapati. Anāvaṭanti tathāgatassa hi sabbaññutaññāṇaṃ pesentassa rukkho vā pabbato vā āvarituṃ samattho nāma natthi. Tenāha ‘‘anāvaṭa’’nti. Iti tathāgataṃ thometvā devaloke abhisaṅkhatapañhaṃ pucchanto kathaṃvidhantiādimāha. Tattha dukkhamaticca iriyatīti dukkhaṃ atikkamitvā viharati. Sīlavāti lokiyalokuttarena sīlena samannāgato khīṇāsavo. Paññādayopi missakāyeva veditabbā. Pūjayantīti gandhapupphādīhi pūjenti. Catutthaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. နန္ဒနသုတ္တံ • 4. Nandanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. နန္ဒနသုတ္တဝဏ္ဏနာ • 4. Nandanasuttavaṇṇanā
