| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. நந்த³ஸுத்தங்
8. Nandasuttaṃ
242. ஸாவத்தி²யங் விஹரதி. அத² கோ² ஆயஸ்மா நந்தோ³ ப⁴க³வதோ மாதுச்சா²புத்தோ ஆகோடிதபச்சாகோடிதானி சீவரானி பாருபித்வா அக்கீ²னி அஞ்ஜெத்வா அச்ச²ங் பத்தங் க³ஹெத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் நந்த³ங் ப⁴க³வா ஏதத³வோச – ‘‘ந கோ² தே தங், நந்த³, பதிரூபங் குலபுத்தஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதஸ்ஸ, யங் த்வங் ஆகோடிதபச்சாகோடிதானி சீவரானி பாருபெய்யாஸி, அக்கீ²னி ச அஞ்ஜெய்யாஸி, அச்ச²ஞ்ச பத்தங் தா⁴ரெய்யாஸி. ஏதங் கோ² தே, நந்த³, பதிரூபங் குலபுத்தஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதஸ்ஸ, யங் த்வங் ஆரஞ்ஞிகோ ச அஸ்ஸஸி, பிண்ட³பாதிகோ ச பங்ஸுகுலிகோ ச காமேஸு ச அனபெக்கோ² விஹரெய்யாஸீ’’தி. இத³மவோச ப⁴க³வா…பே॰… ஸத்தா² –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘கதா³ஹங் நந்த³ங் பஸ்ஸெய்யங், ஆரஞ்ஞங் பங்ஸுகூலிகங்;
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
அஞ்ஞாதுஞ்சே²ன யாபெந்தங், காமேஸு அனபெக்கி²ன’’ந்தி.
Aññātuñchena yāpentaṃ, kāmesu anapekkhina’’nti.
அத² கோ² ஆயஸ்மா நந்தோ³ அபரேன ஸமயேன ஆரஞ்ஞிகோ ச பிண்ட³பாதிகோ ச பங்ஸுகூலிகோ ச காமேஸு ச அனபெக்கோ² விஹாஸீதி. அட்ட²மங்.
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. நந்த³ஸுத்தவண்ணனா • 8. Nandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. நந்த³ஸுத்தவண்ண்ணனா • 8. Nandasuttavaṇṇṇanā
