| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. নন্দসুত্তং
8. Nandasuttaṃ
২৪২. সাৰত্থিযং ৰিহরতি। অথ খো আযস্মা নন্দো ভগৰতো মাতুচ্ছাপুত্তো আকোটিতপচ্চাকোটিতানি চীৰরানি পারুপিত্ৰা অক্খীনি অঞ্জেত্ৰা অচ্ছং পত্তং গহেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং নন্দং ভগৰা এতদৰোচ – ‘‘ন খো তে তং, নন্দ, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স, যং ত্ৰং আকোটিতপচ্চাকোটিতানি চীৰরানি পারুপেয্যাসি, অক্খীনি চ অঞ্জেয্যাসি, অচ্ছঞ্চ পত্তং ধারেয্যাসি। এতং খো তে, নন্দ, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স, যং ত্ৰং আরঞ্ঞিকো চ অস্সসি, পিণ্ডপাতিকো চ পংসুকুলিকো চ কামেসু চ অনপেক্খো ৰিহরেয্যাসী’’তি। ইদমৰোচ ভগৰা…পে॰… সত্থা –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘কদাহং নন্দং পস্সেয্যং, আরঞ্ঞং পংসুকূলিকং।
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
অঞ্ঞাতুঞ্ছেন যাপেন্তং, কামেসু অনপেক্খিন’’ন্তি॥
Aññātuñchena yāpentaṃ, kāmesu anapekkhina’’nti.
অথ খো আযস্মা নন্দো অপরেন সমযেন আরঞ্ঞিকো চ পিণ্ডপাতিকো চ পংসুকূলিকো চ কামেসু চ অনপেক্খো ৰিহাসীতি। অট্ঠমং।
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. নন্দসুত্তৰণ্ণনা • 8. Nandasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. নন্দসুত্তৰণ্ণ্ণনা • 8. Nandasuttavaṇṇṇanā
