| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៨. នន្ទសុត្តំ
8. Nandasuttaṃ
២៤២. សាវត្ថិយំ វិហរតិ។ អថ ខោ អាយស្មា នន្ទោ ភគវតោ មាតុច្ឆាបុត្តោ អាកោដិតបច្ចាកោដិតានិ ចីវរានិ បារុបិត្វា អក្ខីនិ អញ្ជេត្វា អច្ឆំ បត្តំ គហេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នំ ខោ អាយស្មន្តំ នន្ទំ ភគវា ឯតទវោច – ‘‘ន ខោ តេ តំ, នន្ទ, បតិរូបំ កុលបុត្តស្ស សទ្ធា អគារស្មា អនគារិយំ បព្ពជិតស្ស, យំ ត្វំ អាកោដិតបច្ចាកោដិតានិ ចីវរានិ បារុបេយ្យាសិ, អក្ខីនិ ច អញ្ជេយ្យាសិ, អច្ឆញ្ច បត្តំ ធារេយ្យាសិ។ ឯតំ ខោ តេ, នន្ទ, បតិរូបំ កុលបុត្តស្ស សទ្ធា អគារស្មា អនគារិយំ បព្ពជិតស្ស, យំ ត្វំ អារញ្ញិកោ ច អស្សសិ, បិណ្ឌបាតិកោ ច បំសុកុលិកោ ច កាមេសុ ច អនបេក្ខោ វិហរេយ្យាសី’’តិ។ ឥទមវោច ភគវា…បេ.… សត្ថា –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘កទាហំ នន្ទំ បស្សេយ្យំ, អារញ្ញំ បំសុកូលិកំ;
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
អញ្ញាតុញ្ឆេន យាបេន្តំ, កាមេសុ អនបេក្ខិន’’ន្តិ។
Aññātuñchena yāpentaṃ, kāmesu anapekkhina’’nti.
អថ ខោ អាយស្មា នន្ទោ អបរេន សមយេន អារញ្ញិកោ ច បិណ្ឌបាតិកោ ច បំសុកូលិកោ ច កាមេសុ ច អនបេក្ខោ វិហាសីតិ។ អដ្ឋមំ។
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. នន្ទសុត្តវណ្ណនា • 8. Nandasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. នន្ទសុត្តវណ្ណ្ណនា • 8. Nandasuttavaṇṇṇanā
