| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ನನ್ದಸುತ್ತಂ
8. Nandasuttaṃ
೨೪೨. ಸಾವತ್ಥಿಯಂ ವಿಹರತಿ। ಅಥ ಖೋ ಆಯಸ್ಮಾ ನನ್ದೋ ಭಗವತೋ ಮಾತುಚ್ಛಾಪುತ್ತೋ ಆಕೋಟಿತಪಚ್ಚಾಕೋಟಿತಾನಿ ಚೀವರಾನಿ ಪಾರುಪಿತ್ವಾ ಅಕ್ಖೀನಿ ಅಞ್ಜೇತ್ವಾ ಅಚ್ಛಂ ಪತ್ತಂ ಗಹೇತ್ವಾ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಆಯಸ್ಮನ್ತಂ ನನ್ದಂ ಭಗವಾ ಏತದವೋಚ – ‘‘ನ ಖೋ ತೇ ತಂ, ನನ್ದ, ಪತಿರೂಪಂ ಕುಲಪುತ್ತಸ್ಸ ಸದ್ಧಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತಸ್ಸ, ಯಂ ತ್ವಂ ಆಕೋಟಿತಪಚ್ಚಾಕೋಟಿತಾನಿ ಚೀವರಾನಿ ಪಾರುಪೇಯ್ಯಾಸಿ, ಅಕ್ಖೀನಿ ಚ ಅಞ್ಜೇಯ್ಯಾಸಿ, ಅಚ್ಛಞ್ಚ ಪತ್ತಂ ಧಾರೇಯ್ಯಾಸಿ। ಏತಂ ಖೋ ತೇ, ನನ್ದ, ಪತಿರೂಪಂ ಕುಲಪುತ್ತಸ್ಸ ಸದ್ಧಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತಸ್ಸ, ಯಂ ತ್ವಂ ಆರಞ್ಞಿಕೋ ಚ ಅಸ್ಸಸಿ, ಪಿಣ್ಡಪಾತಿಕೋ ಚ ಪಂಸುಕುಲಿಕೋ ಚ ಕಾಮೇಸು ಚ ಅನಪೇಕ್ಖೋ ವಿಹರೇಯ್ಯಾಸೀ’’ತಿ। ಇದಮವೋಚ ಭಗವಾ…ಪೇ॰… ಸತ್ಥಾ –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘ಕದಾಹಂ ನನ್ದಂ ಪಸ್ಸೇಯ್ಯಂ, ಆರಞ್ಞಂ ಪಂಸುಕೂಲಿಕಂ।
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
ಅಞ್ಞಾತುಞ್ಛೇನ ಯಾಪೇನ್ತಂ, ಕಾಮೇಸು ಅನಪೇಕ್ಖಿನ’’ನ್ತಿ॥
Aññātuñchena yāpentaṃ, kāmesu anapekkhina’’nti.
ಅಥ ಖೋ ಆಯಸ್ಮಾ ನನ್ದೋ ಅಪರೇನ ಸಮಯೇನ ಆರಞ್ಞಿಕೋ ಚ ಪಿಣ್ಡಪಾತಿಕೋ ಚ ಪಂಸುಕೂಲಿಕೋ ಚ ಕಾಮೇಸು ಚ ಅನಪೇಕ್ಖೋ ವಿಹಾಸೀತಿ। ಅಟ್ಠಮಂ।
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ನನ್ದಸುತ್ತವಣ್ಣನಾ • 8. Nandasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ನನ್ದಸುತ್ತವಣ್ಣ್ಣನಾ • 8. Nandasuttavaṇṇṇanā
