| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. නන්‌දසුත්‌තං
9. Nandasuttaṃ
9. ‘‘‘කුලපුත්‌තො’ති, භික්‌ඛවෙ, නන්‌දං සම්‌මා වදමානො වදෙය්‍ය. ‘බලවා’ති, භික්‌ඛවෙ, නන්‌දං සම්‌මා වදමානො වදෙය්‍ය. ‘පාසාදිකො’ති, භික්‌ඛවෙ, නන්‌දං සම්‌මා වදමානො වදෙය්‍ය. ‘තිබ්‌බරාගො’ති, භික්‌ඛවෙ, නන්‌දං සම්‌මා වදමානො වදෙය්‍ය. කිමඤ්‌ඤත්‍ර, භික්‌ඛවෙ, නන්‌දො ඉන්‌ද්‍රියෙසු ගුත්‌තද්‌වාරො, භොජනෙ මත්‌තඤ්‌ඤූ, ජාගරියං අනුයුත්‌තො, සතිසම්‌පජඤ්‌ඤෙන සමන්‌නාගතො, යෙහි 1 නන්‌දො සක්‌කොති පරිපුණ්‌ණං පරිසුද්‌ධං බ්‍රහ්‌මචරියං චරිතුං! තත්‍රිදං, භික්‌ඛවෙ, නන්‌දස්‌ස ඉන්‌ද්‍රියෙසු ගුත්‌තද්‌වාරතාය හොති. සචෙ , භික්‌ඛවෙ, නන්‌දස්‌ස පුරත්‌ථිමා දිසා ආලොකෙතබ්‌බා හොති, සබ්‌බං චෙතසා සමන්‌නාහරිත්‌වා නන්‌දො පුරත්‌ථිමං දිසං ආලොකෙති – ‘එවං මෙ පුරත්‌ථිමං දිසං ආලොකයතො නාභිජ්‌ඣාදොමනස්‌සා පාපකා අකුසලා ධම්‌මා අන්‌වාස්‌සවිස්‌සන්‌තී’ති. ඉතිහ තත්‌ථ සම්‌පජානො හොති.
9. ‘‘‘Kulaputto’ti, bhikkhave, nandaṃ sammā vadamāno vadeyya. ‘Balavā’ti, bhikkhave, nandaṃ sammā vadamāno vadeyya. ‘Pāsādiko’ti, bhikkhave, nandaṃ sammā vadamāno vadeyya. ‘Tibbarāgo’ti, bhikkhave, nandaṃ sammā vadamāno vadeyya. Kimaññatra, bhikkhave, nando indriyesu guttadvāro, bhojane mattaññū, jāgariyaṃ anuyutto, satisampajaññena samannāgato, yehi 2 nando sakkoti paripuṇṇaṃ parisuddhaṃ brahmacariyaṃ carituṃ! Tatridaṃ, bhikkhave, nandassa indriyesu guttadvāratāya hoti. Sace , bhikkhave, nandassa puratthimā disā āloketabbā hoti, sabbaṃ cetasā samannāharitvā nando puratthimaṃ disaṃ āloketi – ‘evaṃ me puratthimaṃ disaṃ ālokayato nābhijjhādomanassā pāpakā akusalā dhammā anvāssavissantī’ti. Itiha tattha sampajāno hoti.
‘‘සචෙ , භික්‌ඛවෙ, නන්‌දස්‌ස පච්‌ඡිමා දිසා ආලොකෙතබ්‌බා හොති…පෙ.… උත්‌තරා දිසා ආලොකෙතබ්‌බා හොති… දක්‌ඛිණා දිසා ආලොකෙතබ්‌බා හොති… උද්‌ධං උල්‌ලොකෙතබ්‌බා හොති… අධො ඔලොකෙතබ්‌බා හොති… අනුදිසා අනුවිලොකෙතබ්‌බා හොති, සබ්‌බං චෙතසා සමන්‌නාහරිත්‌වා නන්‌දො අනුදිසං අනුවිලොකෙති – ‘එවං මෙ අනුදිසං අනුවිලොකයතො නාභිජ්‌ඣාදොමනස්‌සා පාපකා අකුසලා ධම්‌මා අන්‌වාස්‌සවිස්‌සන්‌තී’ති. ඉතිහ තත්‌ථ සම්‌පජානො හොති. ඉදං ඛො, භික්‌ඛවෙ, නන්‌දස්‌ස ඉන්‌ද්‍රියෙසු ගුත්‌තද්‌වාරතාය හොති.
‘‘Sace , bhikkhave, nandassa pacchimā disā āloketabbā hoti…pe… uttarā disā āloketabbā hoti… dakkhiṇā disā āloketabbā hoti… uddhaṃ ulloketabbā hoti… adho oloketabbā hoti… anudisā anuviloketabbā hoti, sabbaṃ cetasā samannāharitvā nando anudisaṃ anuviloketi – ‘evaṃ me anudisaṃ anuvilokayato nābhijjhādomanassā pāpakā akusalā dhammā anvāssavissantī’ti. Itiha tattha sampajāno hoti. Idaṃ kho, bhikkhave, nandassa indriyesu guttadvāratāya hoti.
‘‘තත්‍රිදං, භික්‌ඛවෙ, නන්‌දස්‌ස භොජනෙ මත්‌තඤ්‌ඤුතාය හොති. ඉධ, භික්‌ඛවෙ, නන්‌දො පටිසඞ්‌ඛා යොනිසො ආහාරං ආහාරෙති – ‘නෙව දවාය න මදාය න මණ්‌ඩනාය න විභූසනාය, යාවදෙව ඉමස්‌ස කායස්‌ස ඨිතියා යාපනාය විහිංසූපරතියා බ්‍රහ්‌මචරියානුග්‌ගහාය ඉති පුරාණඤ්‌ච වෙදනං පටිහඞ්‌ඛාමි, නවඤ්‌ච වෙදනං න උප්‌පාදෙස්‌සාමි, යාත්‍රා ච මෙ භවිස්‌සති අනවජ්‌ජතා ච ඵාසුවිහාරො චා’ති. ඉදං ඛො, භික්‌ඛවෙ, නන්‌දස්‌ස භොජනෙ මත්‌තඤ්‌ඤුතාය හොති.
‘‘Tatridaṃ, bhikkhave, nandassa bhojane mattaññutāya hoti. Idha, bhikkhave, nando paṭisaṅkhā yoniso āhāraṃ āhāreti – ‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya iti purāṇañca vedanaṃ paṭihaṅkhāmi, navañca vedanaṃ na uppādessāmi, yātrā ca me bhavissati anavajjatā ca phāsuvihāro cā’ti. Idaṃ kho, bhikkhave, nandassa bhojane mattaññutāya hoti.
‘‘තත්‍රිදං, භික්‌ඛවෙ, නන්‌දස්‌ස ජාගරියානුයොගස්‌මිං හොති. ඉධ , භික්‌ඛවෙ, නන්‌දො දිවසං චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙති; රත්‌තියා පඨමං යාමං චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙති ; රත්‌තියා මජ්‌ඣිමං යාමං දක්‌ඛිණෙන පස්‌සෙන සීහසෙය්‍යං කප්‌පෙති පාදෙ පාදං අච්‌චාධාය සතො සම්‌පජානො උට්‌ඨානසඤ්‌ඤං මනසි කරිත්‌වා; රත්‌තියා පච්‌ඡිමං යාමං පච්‌චුට්‌ඨාය චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙති. ඉදං ඛො, භික්‌ඛවෙ, නන්‌දස්‌ස ජාගරියානුයොගස්‌මිං හොති.
‘‘Tatridaṃ, bhikkhave, nandassa jāgariyānuyogasmiṃ hoti. Idha , bhikkhave, nando divasaṃ caṅkamena nisajjāya āvaraṇīyehi dhammehi cittaṃ parisodheti; rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheti ; rattiyā majjhimaṃ yāmaṃ dakkhiṇena passena sīhaseyyaṃ kappeti pāde pādaṃ accādhāya sato sampajāno uṭṭhānasaññaṃ manasi karitvā; rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodheti. Idaṃ kho, bhikkhave, nandassa jāgariyānuyogasmiṃ hoti.
‘‘තත්‍රිදං, භික්‌ඛවෙ, නන්‌දස්‌ස සතිසම්‌පජඤ්‌ඤස්‌මිං හොති. ඉධ, භික්‌ඛවෙ, නන්‌දස්‌ස විදිතා වෙදනා උප්‌පජ්‌ජන්‌ති, විදිතා උපට්‌ඨහන්‌ති, විදිතා අබ්‌භත්‌ථං ගච්‌ඡන්‌ති; විදිතා සඤ්‌ඤා…පෙ.… විදිතා විතක්‌කා…පෙ.… අබ්‌භත්‌ථං ගච්‌ඡන්‌ති. ඉදං ඛො, භික්‌ඛවෙ, නන්‌දස්‌ස සතිසම්‌පජඤ්‌ඤස්‌මිං හොති.
‘‘Tatridaṃ, bhikkhave, nandassa satisampajaññasmiṃ hoti. Idha, bhikkhave, nandassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā…pe… viditā vitakkā…pe… abbhatthaṃ gacchanti. Idaṃ kho, bhikkhave, nandassa satisampajaññasmiṃ hoti.
‘‘කිමඤ්‌ඤත්‍ර, භික්‌ඛවෙ, නන්‌දො ඉන්‌ද්‍රියෙසු ගුත්‌තද්‌වාරො, භොජනෙ මත්‌තඤ්‌ඤූ, ජාගරියං අනුයුත්‌තො , සතිසම්‌පජඤ්‌ඤෙන සමන්‌නාගතො, යෙහි නන්‌දො සක්‌කොති පරිපුණ්‌ණං පරිසුද්‌ධං බ්‍රහ්‌මචරියං චරිතු’’න්‌ති! නවමං.
‘‘Kimaññatra, bhikkhave, nando indriyesu guttadvāro, bhojane mattaññū, jāgariyaṃ anuyutto , satisampajaññena samannāgato, yehi nando sakkoti paripuṇṇaṃ parisuddhaṃ brahmacariyaṃ caritu’’nti! Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. නන්‌දසුත්‌තවණ්‌ණනා • 9. Nandasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9. නන්‌දසුත්‌තවණ්‌ණනා • 9. Nandasuttavaṇṇanā
