| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൮. നന്ദസുത്തം
8. Nandasuttaṃ
൨൪൨. സാവത്ഥിയം വിഹരതി. അഥ ഖോ ആയസ്മാ നന്ദോ ഭഗവതോ മാതുച്ഛാപുത്തോ ആകോടിതപച്ചാകോടിതാനി ചീവരാനി പാരുപിത്വാ അക്ഖീനി അഞ്ജേത്വാ അച്ഛം പത്തം ഗഹേത്വാ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ ആയസ്മന്തം നന്ദം ഭഗവാ ഏതദവോച – ‘‘ന ഖോ തേ തം, നന്ദ, പതിരൂപം കുലപുത്തസ്സ സദ്ധാ അഗാരസ്മാ അനഗാരിയം പബ്ബജിതസ്സ, യം ത്വം ആകോടിതപച്ചാകോടിതാനി ചീവരാനി പാരുപേയ്യാസി, അക്ഖീനി ച അഞ്ജേയ്യാസി, അച്ഛഞ്ച പത്തം ധാരേയ്യാസി. ഏതം ഖോ തേ, നന്ദ, പതിരൂപം കുലപുത്തസ്സ സദ്ധാ അഗാരസ്മാ അനഗാരിയം പബ്ബജിതസ്സ, യം ത്വം ആരഞ്ഞികോ ച അസ്സസി, പിണ്ഡപാതികോ ച പംസുകുലികോ ച കാമേസു ച അനപേക്ഖോ വിഹരേയ്യാസീ’’തി. ഇദമവോച ഭഗവാ…പേ॰… സത്ഥാ –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘കദാഹം നന്ദം പസ്സേയ്യം, ആരഞ്ഞം പംസുകൂലികം;
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
അഞ്ഞാതുഞ്ഛേന യാപേന്തം, കാമേസു അനപേക്ഖിന’’ന്തി.
Aññātuñchena yāpentaṃ, kāmesu anapekkhina’’nti.
അഥ ഖോ ആയസ്മാ നന്ദോ അപരേന സമയേന ആരഞ്ഞികോ ച പിണ്ഡപാതികോ ച പംസുകൂലികോ ച കാമേസു ച അനപേക്ഖോ വിഹാസീതി. അട്ഠമം.
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൮. നന്ദസുത്തവണ്ണനാ • 8. Nandasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൮. നന്ദസുത്തവണ്ണ്ണനാ • 8. Nandasuttavaṇṇṇanā
