| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. நந்த³ஸுத்தவண்ணனா
8. Nandasuttavaṇṇanā
242. அட்ட²மே ஆகோடிதபச்சாகோடிதானீதி ஏகஸ்மிங் பஸ்ஸே பாணினா வா முக்³க³ரேன வா ஆகோடனேன ஆகோடிதானி, பரிவத்தெத்வா ஆகோடனேன பச்சாகோடிதானி. அஞ்ஜெத்வாதி அஞ்ஜனேன பூரெத்வா. அச்ச²ங் பத்தந்தி விப்பஸன்னவண்ணங் மத்திகாபத்தங். கஸ்மா பன தே²ரோ ஏவமகாஸீதி? ஸத்து² அஜ்ஜா²ஸயஜானநத்த²ங். ஏவங் கிரஸ்ஸ அஹோஸி ‘‘ஸசே ஸத்தா² ‘ஸோப⁴தி வத மே அயங் கனிட்ட²பா⁴திகோ’தி வக்க²தி, யாவஜீவங் இமினா வாகாரேன சரிஸ்ஸாமி. ஸசே எத்த² தோ³ஸங் த³ஸ்ஸதி, இமங் ஆகாரங் பஹாய ஸங்காரசோளங் க³ஹெத்வா சீவரங் கத்வா தா⁴ரெந்தோ பரியந்தஸேனாஸனே வஸந்தோ சரிஸ்ஸாமீ’’தி. அஸ்ஸஸீதி ப⁴விஸ்ஸஸி.
242. Aṭṭhame ākoṭitapaccākoṭitānīti ekasmiṃ passe pāṇinā vā muggarena vā ākoṭanena ākoṭitāni, parivattetvā ākoṭanena paccākoṭitāni. Añjetvāti añjanena pūretvā. Acchaṃ pattanti vippasannavaṇṇaṃ mattikāpattaṃ. Kasmā pana thero evamakāsīti? Satthu ajjhāsayajānanatthaṃ. Evaṃ kirassa ahosi ‘‘sace satthā ‘sobhati vata me ayaṃ kaniṭṭhabhātiko’ti vakkhati, yāvajīvaṃ iminā vākārena carissāmi. Sace ettha dosaṃ dassati, imaṃ ākāraṃ pahāya saṅkāracoḷaṃ gahetvā cīvaraṃ katvā dhārento pariyantasenāsane vasanto carissāmī’’ti. Assasīti bhavissasi.
அஞ்ஞாதுஞ்சே²னாதி அபி⁴லக்கி²தேஸு இஸ்ஸரஜனகே³ஹேஸு கடுகப⁴ண்ட³ஸம்பா⁴ரங் ஸுக³ந்த⁴ங் போ⁴ஜனங் பரியேஸந்தஸ்ஸ உஞ்சோ² ஞாதுஞ்சோ² நாம. க⁴ரபடிபாடியா பன த்³வாரே டி²தேன லத்³த⁴ங் மிஸ்ஸகபோ⁴ஜனங் அஞ்ஞாதுஞ்சோ² நாம. அயமித⁴ அதி⁴ப்பேதோ. காமேஸு அனபெக்கி²னந்தி வத்து²காமகிலேஸகாமேஸு நிரபெக்க²ங். ஆரஞ்ஞிகோ சாதிஆதி³ ஸப்³ப³ங் ஸமாதா³னவஸேனேவ வுத்தங். காமேஸு ச அனபெக்கோ²தி இத³ங் ஸுத்தங் தே³வலோகே அச்ச²ராயோ த³ஸ்ஸெத்வா ஆக³தேன அபரபா⁴கே³ கதி²தங். இமஸ்ஸ கதி²ததி³வஸதோ பட்டா²ய தே²ரோ க⁴டெந்தோ வாயமந்தோ கதிபாஹேனேவ அரஹத்தே பதிட்டா²ய ஸதே³வகே லோகே அக்³க³த³க்கி²ணெய்யோ ஜாதோ. அட்ட²மங்.
Aññātuñchenāti abhilakkhitesu issarajanagehesu kaṭukabhaṇḍasambhāraṃ sugandhaṃ bhojanaṃ pariyesantassa uñcho ñātuñcho nāma. Gharapaṭipāṭiyā pana dvāre ṭhitena laddhaṃ missakabhojanaṃ aññātuñcho nāma. Ayamidha adhippeto. Kāmesu anapekkhinanti vatthukāmakilesakāmesu nirapekkhaṃ. Āraññiko cātiādi sabbaṃ samādānavaseneva vuttaṃ. Kāmesu ca anapekkhoti idaṃ suttaṃ devaloke accharāyo dassetvā āgatena aparabhāge kathitaṃ. Imassa kathitadivasato paṭṭhāya thero ghaṭento vāyamanto katipāheneva arahatte patiṭṭhāya sadevake loke aggadakkhiṇeyyo jāto. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. நந்த³ஸுத்தங் • 8. Nandasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. நந்த³ஸுத்தவண்ண்ணனா • 8. Nandasuttavaṇṇṇanā
