| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
2. нанд̣̇асуд̇д̇аван̣н̣анаа
2. Nandasuttavaṇṇanā
22. д̣̇уд̇ияз нанд̣̇од̇и д̇асса наамам̣. со хи жаггавад̇д̇илагкан̣уубзд̇ад̇д̇аа маад̇аабид̇аро сабариж̇анам̣ сагалан̃жа н̃аад̇ибариваддам̣ нанд̣̇аяанд̇о ж̇аад̇од̇и ‘‘нанд̣̇о’’д̇и наамам̣ лабхи. бхаг̇авад̇о бхаад̇аад̇и бхаг̇авад̇о згабид̇убуд̇д̇ад̇ааяа бхаад̇аа. на хи бхаг̇авад̇о саход̣̇араа уббаж̇ж̇анд̇и, д̇зна вуд̇д̇ам̣ ‘‘маад̇ужчаабуд̇д̇о’’д̇и, жуул̣амаад̇убуд̇д̇од̇и ад̇т̇о. махаабаж̇аабад̇иг̇од̇амияаа хи со буд̇д̇о. анабхирад̇од̇и на абхирад̇о. б̣рахмажарияанд̇и б̣рахмам̣ сздтам̣ уд̇д̇амам̣ жарияам̣ згаасанам̣ згасзяяам̣ мзт̇унавирад̇им̣. санд̇хаарзд̇унд̇и батамажид̇д̇ад̇о яааважаримагажид̇д̇ам̣ саммаа барибун̣н̣ам̣ барисуд̣̇д̇хам̣ д̇хаарзд̇ум̣ бавад̇д̇зд̇ум̣. д̣̇уд̇иязна жзд̇т̇а б̣рахмажарияабад̣̇зна маг̇г̇аб̣рахмажарияассааби сан̇г̇ахо взд̣̇ид̇аб̣б̣о. сигкам̣ бажжагкааяаад̇и убасамбад̣̇агаалз бхигкубхаавзна сад̣̇д̇хим̣ самаад̣̇иннам̣ ниб̣б̣ад̇д̇зд̇аб̣б̣абхаавзна анудтид̇ам̣ д̇ивид̇хамби сигкам̣ бадигкибид̇ваа, виссаж̇ж̇зд̇ваад̇и ад̇т̇о. хийнааяаад̇и г̇ихибхаавааяа. аавад̇д̇иссаамийд̇и нивад̇д̇иссаами.
22. Dutiye nandoti tassa nāmaṃ. So hi cakkavattilakkhaṇūpetattā mātāpitaro saparijanaṃ sakalañca ñātiparivaṭṭaṃ nandayanto jātoti ‘‘nando’’ti nāmaṃ labhi. Bhagavato bhātāti bhagavato ekapituputtatāya bhātā. Na hi bhagavato sahodarā uppajjanti, tena vuttaṃ ‘‘mātucchāputto’’ti, cūḷamātuputtoti attho. Mahāpajāpatigotamiyā hi so putto. Anabhiratoti na abhirato. Brahmacariyanti brahmaṃ seṭṭhaṃ uttamaṃ cariyaṃ ekāsanaṃ ekaseyyaṃ methunaviratiṃ. Sandhāretunti paṭhamacittato yāvacarimakacittaṃ sammā paripuṇṇaṃ parisuddhaṃ dhāretuṃ pavattetuṃ. Dutiyena cettha brahmacariyapadena maggabrahmacariyassāpi saṅgaho veditabbo. Sikkhaṃ paccakkhāyāti upasampadakāle bhikkhubhāvena saddhiṃ samādinnaṃ nibbattetabbabhāvena anuṭṭhitaṃ tividhampi sikkhaṃ paṭikkhipitvā, vissajjetvāti attho. Hīnāyāti gihibhāvāya. Āvattissāmīti nivattissāmi.
гасмаа банааяам̣ звамаарожзсийд̇и? зд̇т̇ааяам̣ анубуб̣б̣игат̇аа – бхаг̇аваа бавад̇д̇аварад̇хаммажагго рааж̇аг̇ахам̣ г̇анд̇ваа взл̣уванз вихаранд̇о ‘‘буд̇д̇ам̣ мз аанзд̇ваа д̣̇ассзт̇аа’’д̇и суд̣̇д̇ход̣̇анамахаарааж̇зна бзсид̇зсу сахассасахассабариваарзсу д̣̇асасу д̣̇ууд̇зсу саха бариваарзна арахад̇д̇ам̣ бад̇д̇зсу саб̣б̣абажчаа г̇анд̇ваа арахад̇д̇аббад̇д̇зна гаал̣уд̣̇ааяид̇т̇зрзна г̇аманагаалам̣ н̃ад̇ваа маг̇г̇аван̣н̣анам̣ ван̣н̣зд̇ваа ж̇аад̇ибхуумиг̇аманааяа яаажид̇о вийсад̇исахассакийн̣аасавабаривуд̇д̇о габилавад̇т̇унаг̇арам̣ г̇анд̇ваа н̃аад̇исамааг̇амз богкаравассам̣ адтуббад̇д̇им̣ гад̇ваа взссанд̇араж̇аад̇агам̣ (ж̇аа. 2.22.1655 аад̣̇аяо) гат̇зд̇ваа бунад̣̇ивасз бин̣д̣ааяа бавидто ‘‘уд̇д̇идтз наббамаж̇ж̇зяяаа’’д̇и (д̇ха. ба. 168) г̇аат̇ааяа бид̇арам̣ сод̇аабад̇д̇ипалз бад̇идтаабзд̇ваа нивзсанам̣ г̇анд̇ваа ‘‘д̇хамман̃жарз’’д̇и (д̇ха. ба. 169) г̇аат̇ааяа махаабаж̇аабад̇им̣ сод̇аабад̇д̇ипалз, рааж̇аанам̣ сагад̣̇ааг̇аамипалз бад̇идтаабзси.
Kasmā panāyaṃ evamārocesīti? Etthāyaṃ anupubbikathā – bhagavā pavattavaradhammacakko rājagahaṃ gantvā veḷuvane viharanto ‘‘puttaṃ me ānetvā dassethā’’ti suddhodanamahārājena pesitesu sahassasahassaparivāresu dasasu dūtesu saha parivārena arahattaṃ pattesu sabbapacchā gantvā arahattappattena kāḷudāyittherena gamanakālaṃ ñatvā maggavaṇṇanaṃ vaṇṇetvā jātibhūmigamanāya yācito vīsatisahassakhīṇāsavaparivutto kapilavatthunagaraṃ gantvā ñātisamāgame pokkharavassaṃ aṭṭhuppattiṃ katvā vessantarajātakaṃ (jā. 2.22.1655 ādayo) kathetvā punadivase piṇḍāya paviṭṭho ‘‘uttiṭṭhe nappamajjeyyā’’ti (dha. pa. 168) gāthāya pitaraṃ sotāpattiphale patiṭṭhāpetvā nivesanaṃ gantvā ‘‘dhammañcare’’ti (dha. pa. 169) gāthāya mahāpajāpatiṃ sotāpattiphale, rājānaṃ sakadāgāmiphale patiṭṭhāpesi.
бхад̇д̇агижжаавасаанз бана раахуламаад̇уг̇ун̣агат̇ам̣ ниссааяа жанд̣̇агиннарийж̇аад̇агам̣ (ж̇аа. 1.14.18 аад̣̇аяо) гат̇зд̇ваа д̇ад̇ияад̣̇ивасз нанд̣̇агумаарасса абхисзгаг̇зхаббавзсанавиваахаман̇г̇алзсу вад̇д̇амаанзсу бин̣д̣ааяа бависид̇ваа нанд̣̇агумаарасса хад̇т̇з бад̇д̇ам̣ д̣̇ад̇ваа ман̇г̇алам̣ вад̇ваа удтааяаасанаа баггаманд̇о гумаарасса хад̇т̇ад̇о бад̇д̇ам̣ на г̇ан̣хи. соби д̇ат̇ааг̇ад̇з г̇ааравзна ‘‘бад̇д̇ам̣ д̇з, бханд̇з, г̇ан̣хат̇аа’’д̇и вад̇д̇ум̣ наасагки. звам̣ бана жинд̇зси, ‘‘собаанасийсз бад̇д̇ам̣ г̇ан̣хиссад̇ий’’д̇и, сад̇т̇аа д̇асмим̣ таанз на г̇ан̣хи. ид̇аро ‘‘собаанамуулз г̇ан̣хиссад̇ий’’д̇и жинд̇зси, сад̇т̇аа д̇ад̇т̇аби на г̇ан̣хи. ид̇аро ‘‘рааж̇ан̇г̇ан̣з г̇ан̣хиссад̇ий’’д̇и жинд̇зси, сад̇т̇аа д̇ад̇т̇аби на г̇ан̣хи. гумааро нивад̇д̇ид̇угаамо анижчааяа г̇ажчанд̇о г̇ааравзна ‘‘бад̇д̇ам̣ г̇ан̣хат̇аа’’д̇и вад̇д̇ум̣ на саггод̇и, ‘‘ид̇ха г̇ан̣хиссад̇и, зд̇т̇а г̇ан̣хиссад̇ий’’д̇и жинд̇знд̇о г̇ажчад̇и.
Bhattakiccāvasāne pana rāhulamātuguṇakathaṃ nissāya candakinnarījātakaṃ (jā. 1.14.18 ādayo) kathetvā tatiyadivase nandakumārassa abhisekagehappavesanavivāhamaṅgalesu vattamānesu piṇḍāya pavisitvā nandakumārassa hatthe pattaṃ datvā maṅgalaṃ vatvā uṭṭhāyāsanā pakkamanto kumārassa hatthato pattaṃ na gaṇhi. Sopi tathāgate gāravena ‘‘pattaṃ te, bhante, gaṇhathā’’ti vattuṃ nāsakkhi. Evaṃ pana cintesi, ‘‘sopānasīse pattaṃ gaṇhissatī’’ti, satthā tasmiṃ ṭhāne na gaṇhi. Itaro ‘‘sopānamūle gaṇhissatī’’ti cintesi, satthā tatthapi na gaṇhi. Itaro ‘‘rājaṅgaṇe gaṇhissatī’’ti cintesi, satthā tatthapi na gaṇhi. Kumāro nivattitukāmo anicchāya gacchanto gāravena ‘‘pattaṃ gaṇhathā’’ti vattuṃ na sakkoti, ‘‘idha gaṇhissati, ettha gaṇhissatī’’ti cintento gacchati.
д̇асмим̣ кан̣з ж̇анабад̣̇агаляаан̣ияаа аажигким̣су, ‘‘аяяз бхаг̇аваа, нанд̣̇арааж̇аанам̣ г̇ахзд̇ваа г̇ажчад̇и, д̇умхзхи винаа гариссад̇ий’’д̇и. саа уд̣̇агаб̣инд̣̇уухи баг̇гхаранд̇зхи ад̣дхулликид̇зхи гзсзхи взг̇зна баасаад̣̇ам̣ ааруяха сийхабан̃ж̇арад̣̇ваарз тад̇ваа ‘‘д̇увадам̣ ко, аяяабуд̇д̇а, ааг̇ажчзяяаасий’’д̇и ааха. д̇ам̣ д̇ассаа важанам̣ д̇асса хад̣̇аяз д̇ирияам̣ бад̇ид̇ваа вияа тид̇ам̣. сад̇т̇аабисса хад̇т̇ад̇о бад̇д̇ам̣ аг̇г̇ахзд̇ваава д̇ам̣ вихаарам̣ нзд̇ваа ‘‘баб̣б̣аж̇иссаси нанд̣̇аа’’д̇и ааха. со б̣уд̣̇д̇хаг̇ааравзна ‘‘на баб̣б̣аж̇иссаамий’’д̇и авад̇ваа, ‘‘аама, баб̣б̣аж̇иссаамий’’д̇и ааха. сад̇т̇аа д̇зна хи нанд̣̇ам̣ баб̣б̣ааж̇зт̇аад̇и габилавад̇т̇убурам̣ г̇анд̇ваа д̇ад̇ияад̣̇ивасз д̇ам̣ баб̣б̣ааж̇зси. сад̇д̇амз д̣̇ивасз маад̇араа алан̇гарид̇ваа бзсид̇ам̣ ‘‘д̣̇ааяаж̇ж̇ам̣ мз, саман̣а, д̣̇зхий’’д̇и вад̇ваа ад̇д̇анаа сад̣̇д̇хим̣ аараамааг̇ад̇ам̣ раахулагумаарам̣ баб̣б̣ааж̇зси. бунзгад̣̇ивасам̣ махаад̇хаммабаалаж̇аад̇агам̣ (ж̇аа. 1.10.92 аад̣̇аяо) гат̇зд̇ваа рааж̇аанам̣ анааг̇аамипалз бад̇идтаабзси.
Tasmiṃ khaṇe janapadakalyāṇiyā ācikkhiṃsu, ‘‘ayye bhagavā, nandarājānaṃ gahetvā gacchati, tumhehi vinā karissatī’’ti. Sā udakabindūhi paggharantehi aḍḍhullikhitehi kesehi vegena pāsādaṃ āruyha sīhapañjaradvāre ṭhatvā ‘‘tuvaṭaṃ kho, ayyaputta, āgaccheyyāsī’’ti āha. Taṃ tassā vacanaṃ tassa hadaye tiriyaṃ patitvā viya ṭhitaṃ. Satthāpissa hatthato pattaṃ aggahetvāva taṃ vihāraṃ netvā ‘‘pabbajissasi nandā’’ti āha. So buddhagāravena ‘‘na pabbajissāmī’’ti avatvā, ‘‘āma, pabbajissāmī’’ti āha. Satthā tena hi nandaṃ pabbājethāti kapilavatthupuraṃ gantvā tatiyadivase taṃ pabbājesi. Sattame divase mātarā alaṅkaritvā pesitaṃ ‘‘dāyajjaṃ me, samaṇa, dehī’’ti vatvā attanā saddhiṃ ārāmāgataṃ rāhulakumāraṃ pabbājesi. Punekadivasaṃ mahādhammapālajātakaṃ (jā. 1.10.92 ādayo) kathetvā rājānaṃ anāgāmiphale patiṭṭhāpesi.
ид̇и бхаг̇аваа махаабаж̇аабад̇им̣ сод̇аабад̇д̇ипалз, бид̇арам̣ д̇ийсу палзсу бад̇идтаабзд̇ваа бхигкусан̇гхабаривуд̇о бунад̣̇зва рааж̇аг̇ахам̣ г̇анд̇ваа д̇ад̇о анаат̇абин̣д̣игзна саавад̇т̇им̣ ааг̇аманад̇т̇ааяа г̇ахид̇абадин̃н̃о нидтид̇з ж̇зд̇аванамахаавихаарз д̇ад̇т̇а г̇анд̇ваа ваасам̣ габбзси. звам̣ сад̇т̇ари ж̇зд̇аванз вихаранд̇з ааяасмаа нанд̣̇о ад̇д̇ано анижчааяа баб̣б̣аж̇ид̇о гаамзсу анаад̣̇ийнавад̣̇ассаавий ж̇анабад̣̇агаляаан̣ияаа вуд̇д̇аважанамануссаранд̇о угган̣тид̇о худ̇ваа бхигкуунам̣ ад̇д̇ано анабхирад̇им̣ аарожзси. д̇зна вуд̇д̇ам̣ ‘‘д̇зна ко бана самаязна ааяасмаа нанд̣̇о…бз… хийнааяаавад̇д̇иссаамий’’д̇и.
Iti bhagavā mahāpajāpatiṃ sotāpattiphale, pitaraṃ tīsu phalesu patiṭṭhāpetvā bhikkhusaṅghaparivuto punadeva rājagahaṃ gantvā tato anāthapiṇḍikena sāvatthiṃ āgamanatthāya gahitapaṭiñño niṭṭhite jetavanamahāvihāre tattha gantvā vāsaṃ kappesi. Evaṃ satthari jetavane viharante āyasmā nando attano anicchāya pabbajito kāmesu anādīnavadassāvī janapadakalyāṇiyā vuttavacanamanussaranto ukkaṇṭhito hutvā bhikkhūnaṃ attano anabhiratiṃ ārocesi. Tena vuttaṃ ‘‘tena kho pana samayena āyasmā nando…pe… hīnāyāvattissāmī’’ti.
гасмаа бана нам̣ бхаг̇аваа звам̣ баб̣б̣ааж̇зсийд̇и? ‘‘бурзд̇арамзва аад̣̇ийнавам̣ д̣̇ассзд̇ваа гаамзхи нам̣ вивзжзд̇ум̣ на саггаа, баб̣б̣ааж̇зд̇ваа бана убааязна д̇ад̇о вивзжзд̇ваа убаривисзсам̣ ниб̣б̣ад̇д̇зссаамий’’д̇и взнзяяад̣̇аманагусало сад̇т̇аа звам̣ нам̣ батамам̣ баб̣б̣ааж̇зси.
Kasmā pana naṃ bhagavā evaṃ pabbājesīti? ‘‘Puretarameva ādīnavaṃ dassetvā kāmehi naṃ vivecetuṃ na sakkā, pabbājetvā pana upāyena tato vivecetvā uparivisesaṃ nibbattessāmī’’ti veneyyadamanakusalo satthā evaṃ naṃ paṭhamaṃ pabbājesi.
саагияаанийд̇и сагяарааж̇ад̇хийд̇аа. ж̇анабад̣̇агаляаан̣ийд̇и ж̇анабад̣̇амхи галяаан̣ий руубзна уд̇д̇амаа часарийрад̣̇осарахид̇аа, бан̃жагаляаан̣асаманнааг̇ад̇аа. саа хи яасмаа наад̇ид̣̇ийгхаа наад̇ирассаа наад̇игисаа наад̇ит̇уулаа наад̇игаал̣игаа нажжод̣̇аад̇аа ад̇игганд̇аа маанусагаван̣н̣ам̣ аббад̇д̇аа д̣̇иб̣б̣аван̣н̣ам̣, д̇асмаа часарийрад̣̇осарахид̇аа. чавигаляаан̣ам̣ мам̣сагаляаан̣ам̣ накагаляаан̣ам̣ адтигаляаан̣ам̣ ваяагаляаан̣анд̇и имзхи бан̃жахи галяаан̣зхи саманнааг̇ад̇аа.
Sākiyānīti sakyarājadhītā. Janapadakalyāṇīti janapadamhi kalyāṇī rūpena uttamā chasarīradosarahitā, pañcakalyāṇasamannāgatā. Sā hi yasmā nātidīghā nātirassā nātikisā nātithūlā nātikāḷikā naccodātā atikkantā mānusakavaṇṇaṃ appattā dibbavaṇṇaṃ, tasmā chasarīradosarahitā. Chavikalyāṇaṃ maṃsakalyāṇaṃ nakhakalyāṇaṃ aṭṭhikalyāṇaṃ vayakalyāṇanti imehi pañcahi kalyāṇehi samannāgatā.
д̇ад̇т̇а ад̇д̇ано сарийробхаасзна д̣̇асад̣̇ваад̣̇асахад̇т̇з таанз аалогам̣ гарод̇и, бияан̇г̇усамаа ваа суван̣н̣асамаа ваа ход̇и, аяамассаа чавигаляаан̣ад̇аа. жад̇д̇ааро банассаа хад̇т̇абаад̣̇аа мукабарияосаанан̃жа лаакаарасабаригаммагад̇ам̣ вияа рад̇д̇абаваал̣арад̇д̇агамб̣алзна сад̣̇исам̣ ход̇и, аяамассаа мам̣сагаляаан̣ад̇аа. вийсад̇и накабад̇д̇аани мам̣сад̇о амуд̇д̇адтаанз лаакаарасабаригид̇аани вияа муд̇д̇адтаанз кийрад̇хаараасад̣̇исаани хонд̇и, аяамассаа накагаляаан̣ад̇аа. д̣̇вад̇д̇им̣сад̣̇анд̇аа супусид̇аа барисуд̣̇д̇хабаваал̣абанд̇исад̣̇исаа важ̇ирабанд̇ий вияа кааяанд̇и, аяамассаа адтигаляаан̣ад̇аа. вийсад̇ивассасад̇игааби самаанаа сол̣асавассуд̣̇д̣̇зсигаа вияа ход̇и ниббалид̇аа, аяамассаа ваяагаляаан̣ад̇аа. сунд̣̇арий жа ход̇и зваруубаг̇ун̣асаманнааг̇ад̇аа, д̇зна вуд̇д̇ам̣ ‘‘ж̇анабад̣̇агаляаан̣ий’’д̇и.
Tattha attano sarīrobhāsena dasadvādasahatthe ṭhāne ālokaṃ karoti, piyaṅgusamā vā suvaṇṇasamā vā hoti, ayamassā chavikalyāṇatā. Cattāro panassā hatthapādā mukhapariyosānañca lākhārasaparikammakataṃ viya rattapavāḷarattakambalena sadisaṃ hoti, ayamassā maṃsakalyāṇatā. Vīsati nakhapattāni maṃsato amuttaṭṭhāne lākhārasaparikitāni viya muttaṭṭhāne khīradhārāsadisāni honti, ayamassā nakhakalyāṇatā. Dvattiṃsadantā suphusitā parisuddhapavāḷapantisadisā vajirapantī viya khāyanti, ayamassā aṭṭhikalyāṇatā. Vīsativassasatikāpi samānā soḷasavassuddesikā viya hoti nippalitā, ayamassā vayakalyāṇatā. Sundarī ca hoti evarūpaguṇasamannāgatā, tena vuttaṃ ‘‘janapadakalyāṇī’’ti.
гхараа нигкаманд̇ассаад̇и анаад̣̇арз саамиважанам̣, гхарад̇о нигкамад̇од̇и ад̇т̇о. ‘‘гхараа нигкаманд̇а’’нд̇иби батанд̇и. убад̣дхулликид̇зхи гзсзхийд̇и ид̇т̇амбхууд̇алагкан̣з гаран̣аважанам̣, виббагад̇улликид̇зхи гзсзхи убалагкид̇аад̇и ад̇т̇о. ‘‘ад̣дхулликид̇зхий’’д̇иби батанд̇и. улликананд̇и жа пан̣агаад̣̇ийхи гзсасан̣таабанам̣, ‘‘ад̣дхагааравид̇хаана’’нд̇иби вад̣̇анд̇и. абалогзд̇ваад̇и синзхарасавибпаарасам̣суужагзна ад̣дхагкинаа ааб̣анд̇ханд̇ий вияа ологзд̇ваа. мам̣, бханд̇зд̇и буб̣б̣зби ‘‘ма’’нд̇и вад̇ваа угган̣таагулажид̇д̇ад̇ааяа буна ‘‘мам̣ зд̇ад̣̇авожаа’’д̇и ааха. д̇уваданд̇и сийгхам̣. д̇амануссарамаанод̇и д̇ам̣ д̇ассаа важанам̣, д̇ам̣ ваа д̇ассаа аагаарасахид̇ам̣ важанам̣ ануссаранд̇о.
Gharā nikkhamantassāti anādare sāmivacanaṃ, gharato nikkhamatoti attho. ‘‘Gharā nikkhamanta’’ntipi paṭhanti. Upaḍḍhullikhitehikesehīti itthambhūtalakkhaṇe karaṇavacanaṃ, vippakatullikhitehi kesehi upalakkhitāti attho. ‘‘Aḍḍhullikhitehī’’tipi paṭhanti. Ullikhananti ca phaṇakādīhi kesasaṇṭhāpanaṃ, ‘‘aḍḍhakāravidhāna’’ntipi vadanti. Apaloketvāti sineharasavipphārasaṃsūcakena aḍḍhakkhinā ābandhantī viya oloketvā. Maṃ, bhanteti pubbepi ‘‘ma’’nti vatvā ukkaṇṭhākulacittatāya puna ‘‘maṃ etadavocā’’ti āha. Tuvaṭanti sīghaṃ. Tamanussaramānoti taṃ tassā vacanaṃ, taṃ vā tassā ākārasahitaṃ vacanaṃ anussaranto.
бхаг̇аваа д̇асса важанам̣ суд̇ваа ‘‘убааязнасса рааг̇ам̣ вуубасамзссаамий’’д̇и ид̣̇д̇хиб̣алзна нам̣ д̇аавад̇им̣сабхаванам̣ нзнд̇о анд̇араамаг̇г̇з згасмим̣ жхаамакзд̇д̇з жхаамакаан̣умад̇т̇агз нисиннам̣ чиннаган̣н̣анаасаанан̇г̇удтам̣ згам̣ балудтамаггадим̣ д̣̇ассзд̇ваа д̇аавад̇им̣сабхаванам̣ нзси. баал̣ияам̣ бана згагкан̣знзва сад̇т̇аараа д̇аавад̇им̣сабхаванам̣ г̇ад̇ам̣ вияа вуд̇д̇ам̣, д̇ам̣ г̇аманам̣ авад̇ваа д̇аавад̇им̣сабхаванам̣ санд̇хааяа вуд̇д̇ам̣. г̇ажчанд̇оязва хи бхаг̇аваа ааяасмад̇о нанд̣̇асса анд̇араамаг̇г̇з д̇ам̣ балудтамаггадим̣ д̣̇ассзд̇и. яад̣̇и звам̣ гат̇ам̣ самин̃ж̇анаад̣̇инид̣̇ассанам̣? д̇ам̣ анд̇арад̇хаананид̣̇ассананд̇и г̇ахзд̇аб̣б̣ам̣. звам̣ сад̇т̇аа д̇ам̣ д̇аавад̇им̣сабхаванам̣ нзд̇ваа саггасса д̣̇зваран̃н̃о убадтаанам̣ ааг̇ад̇аани гагудабаад̣̇аани бан̃жа ажчараасад̇аани ад̇д̇аанам̣ ванд̣̇ид̇ваа тид̇аани д̣̇ассзд̇ваа ж̇анабад̣̇агаляаан̣ияаа д̇аасам̣ бан̃жаннам̣ ажчараасад̇аанам̣ руубасамбад̇д̇им̣ бадижжа висзсам̣ бужчи. д̇зна вуд̇д̇ам̣ – ‘‘ат̇а ко бхаг̇аваа ааяасманд̇ам̣ нанд̣̇ам̣ б̣аахааяам̣ г̇ахзд̇ваа…бз… гагудабаад̣̇ааний’’д̇и.
Bhagavā tassa vacanaṃ sutvā ‘‘upāyenassa rāgaṃ vūpasamessāmī’’ti iddhibalena naṃ tāvatiṃsabhavanaṃ nento antarāmagge ekasmiṃ jhāmakhette jhāmakhāṇumatthake nisinnaṃ chinnakaṇṇanāsānaṅguṭṭhaṃ ekaṃ paluṭṭhamakkaṭiṃ dassetvā tāvatiṃsabhavanaṃ nesi. Pāḷiyaṃ pana ekakkhaṇeneva satthārā tāvatiṃsabhavanaṃ gataṃ viya vuttaṃ, taṃ gamanaṃ avatvā tāvatiṃsabhavanaṃ sandhāya vuttaṃ. Gacchantoyeva hi bhagavā āyasmato nandassa antarāmagge taṃ paluṭṭhamakkaṭiṃ dasseti. Yadi evaṃ kathaṃ samiñjanādinidassanaṃ? Taṃ antaradhānanidassananti gahetabbaṃ. Evaṃ satthā taṃ tāvatiṃsabhavanaṃ netvā sakkassa devarañño upaṭṭhānaṃ āgatāni kakuṭapādāni pañca accharāsatāni attānaṃ vanditvā ṭhitāni dassetvā janapadakalyāṇiyā tāsaṃ pañcannaṃ accharāsatānaṃ rūpasampattiṃ paṭicca visesaṃ pucchi. Tena vuttaṃ – ‘‘atha kho bhagavā āyasmantaṃ nandaṃ bāhāyaṃ gahetvā…pe… kakuṭapādānī’’ti.
д̇ад̇т̇а б̣аахааяам̣ г̇ахзд̇ваад̇и б̣аахумхи г̇ахзд̇ваа вияа. бхаг̇аваа хи д̇ад̣̇аа д̇аад̣̇исам̣ ид̣̇д̇хаабхисан̇каарам̣ абхисан̇каарзси, яат̇аа ааяасмаа нанд̣̇о бхуж̇з г̇ахзд̇ваа бхаг̇авад̇аа нийяамаано вияа ахоси. д̇ад̇т̇а жа бхаг̇авад̇аа сажз д̇асса ааяасмад̇о д̇аавад̇им̣сад̣̇звалогасса д̣̇ассанам̣ бавзсанамзва ваа ижчид̇ам̣ сияаа, яат̇аанисиннассзва д̇асса д̇ам̣ д̣̇звалогам̣ д̣̇ассзяяа логавиваран̣ид̣̇д̇хигаалз вияа, д̇амзва ваа ид̣̇д̇хияаа д̇ад̇т̇а бзсзяяа. яасмаа банасса д̣̇иб̣б̣ад̇д̇абхаавад̇о мануссад̇д̇абхаавасса яо нихийнаж̇иг̇ужчанийяабхааво, д̇асса сукаг̇г̇ахан̣ад̇т̇ам̣ анд̇араамаг̇г̇з д̇ам̣ маггадим̣ д̣̇ассзд̇угаамо, д̣̇звалогасиривибхавасамбад̇д̇ияо жа ог̇аахзд̇ваа д̣̇ассзд̇угаамо ахоси, д̇асмаа д̇ам̣ г̇ахзд̇ваа д̇ад̇т̇а нзси. зван̃хисса д̇ад̣̇ад̇т̇ам̣ б̣рахмажарияаваасз висзсад̇о абхирад̇и бхависсад̇ийд̇и.
Tattha bāhāyaṃ gahetvāti bāhumhi gahetvā viya. Bhagavā hi tadā tādisaṃ iddhābhisaṅkhāraṃ abhisaṅkhāresi, yathā āyasmā nando bhuje gahetvā bhagavatā nīyamāno viya ahosi. Tattha ca bhagavatā sace tassa āyasmato tāvatiṃsadevalokassa dassanaṃ pavesanameva vā icchitaṃ siyā, yathānisinnasseva tassa taṃ devalokaṃ dasseyya lokavivaraṇiddhikāle viya, tameva vā iddhiyā tattha peseyya. Yasmā panassa dibbattabhāvato manussattabhāvassa yo nihīnajigucchanīyabhāvo, tassa sukhaggahaṇatthaṃ antarāmagge taṃ makkaṭiṃ dassetukāmo, devalokasirivibhavasampattiyo ca ogāhetvā dassetukāmo ahosi, tasmā taṃ gahetvā tattha nesi. Evañhissa tadatthaṃ brahmacariyavāse visesato abhirati bhavissatīti.
гагудабаад̣̇аанийд̇и рад̇д̇аван̣н̣ад̇ааяа баараавад̇асад̣̇исабаад̣̇аани. д̇аа гира саб̣б̣ааби гассабасса бхаг̇авад̇о саавагаанам̣ баад̣̇амагканад̇злад̣̇аанзна д̇аад̣̇исаа сугумаарабаад̣̇аа ахзсум̣. бассаси нод̇и бассаси ну. абхируубад̇араад̇и висидтаруубад̇араа. д̣̇ассанийяад̇араад̇и д̣̇ивасамби бассанд̇аанам̣ ад̇ид̇д̇игаран̣адтзна бассид̇аб̣б̣ад̇араа. баасаад̣̇игад̇араад̇и саб̣б̣ааваяавасобхааяа саманд̇ад̇о басаад̣̇аавахад̇араа.
Kakuṭapādānīti rattavaṇṇatāya pārāvatasadisapādāni. Tā kira sabbāpi kassapassa bhagavato sāvakānaṃ pādamakkhanateladānena tādisā sukumārapādā ahesuṃ. Passasi noti passasi nu. Abhirūpatarāti visiṭṭharūpatarā. Dassanīyatarāti divasampi passantānaṃ atittikaraṇaṭṭhena passitabbatarā. Pāsādikatarāti sabbāvayavasobhāya samantato pasādāvahatarā.
гасмаа бана бхаг̇аваа авассуд̇ажид̇д̇ам̣ ааяасманд̇ам̣ нанд̣̇ам̣ ажчарааяо ологаабзси? сукзнзвасса гилзсз нийхарид̇ум̣. яат̇аа хи гусало взж̇ж̇о уссаннад̣̇осам̣ буг̇г̇алам̣ д̇игижчанд̇о синзхабаанаад̣̇инаа батамам̣ д̣̇осз уггилзд̣̇зд̇ваа бажчаа ваманавирзжанзхи саммад̣̇зва нийхараабзд̇и, звам̣ винзяяад̣̇аманагусало бхаг̇аваа уссаннарааг̇ам̣ ааяасманд̇ам̣ нанд̣̇ам̣ д̣̇зважчарааяо д̣̇ассзд̇ваа уггилзд̣̇зси арияамаг̇г̇абхзсаж̇ж̇зна анавасзсад̇о нийхарид̇угаамод̇и взд̣̇ид̇аб̣б̣ам̣.
Kasmā pana bhagavā avassutacittaṃ āyasmantaṃ nandaṃ accharāyo olokāpesi? Sukhenevassa kilese nīharituṃ. Yathā hi kusalo vejjo ussannadosaṃ puggalaṃ tikicchanto sinehapānādinā paṭhamaṃ dose ukkiledetvā pacchā vamanavirecanehi sammadeva nīharāpeti, evaṃ vineyyadamanakusalo bhagavā ussannarāgaṃ āyasmantaṃ nandaṃ devaccharāyo dassetvā ukkiledesi ariyamaggabhesajjena anavasesato nīharitukāmoti veditabbaṃ.
балудтамаггадийд̇и жхааман̇г̇абажжан̇г̇амаггадий. звамзва код̇и яат̇аа саа, бханд̇з, д̇умхзхи маяхам̣ д̣̇ассид̇аа чиннаган̣н̣анаасаа балудтамаггадий ж̇анабад̣̇агаляаан̣им̣ убаад̣̇ааяа , звамзва ж̇анабад̣̇агаляаан̣ий имаани бан̃жа ажчараасад̇аани убаад̣̇ааяаад̇и ад̇т̇о. бан̃жаннам̣ ажчараасад̇аананд̇и убаяог̇з саамиважанам̣, бан̃жа ажчараасад̇аанийд̇и ад̇т̇о. аваяавасамб̣анд̇хз ваа зд̇ам̣ саамиважанам̣, д̇зна бан̃жаннам̣ ажчараасад̇аанам̣ руубасамбад̇д̇им̣ убанид̇хааяаад̇и ад̇хиббааяо. убанид̇хааяаад̇и жа самийбз табзд̇ваа, убаад̣̇ааяаад̇и ад̇т̇о. сан̇кяанд̇и ид̇т̇ийд̇и г̇ан̣анам̣. галабхааг̇анд̇и галааяаби бхааг̇ам̣, згам̣ сол̣асагодтаасз гад̇ваа д̇ад̇о згагодтаасам̣ г̇ахзд̇ваа сол̣асад̇хаа г̇ан̣ид̇з д̇ад̇т̇а яо згзго годтаасо, со галабхааг̇од̇и ад̇хиббзд̇о, д̇амби галабхааг̇ам̣ на убзд̇ийд̇и вад̣̇ад̇и. убанид̇хинд̇и ‘‘имааяа аяам̣ сад̣̇исий’’д̇и убамаабхаавзна г̇ахзд̇ваа самийбз табанамби.
Paluṭṭhamakkaṭīti jhāmaṅgapaccaṅgamakkaṭī. Evameva khoti yathā sā, bhante, tumhehi mayhaṃ dassitā chinnakaṇṇanāsā paluṭṭhamakkaṭī janapadakalyāṇiṃ upādāya , evameva janapadakalyāṇī imāni pañca accharāsatāni upādāyāti attho. Pañcannaṃ accharāsatānanti upayoge sāmivacanaṃ, pañca accharāsatānīti attho. Avayavasambandhe vā etaṃ sāmivacanaṃ, tena pañcannaṃ accharāsatānaṃ rūpasampattiṃ upanidhāyāti adhippāyo. Upanidhāyāti ca samīpe ṭhapetvā, upādāyāti attho. Saṅkhyanti itthīti gaṇanaṃ. Kalabhāganti kalāyapi bhāgaṃ, ekaṃ soḷasakoṭṭhāse katvā tato ekakoṭṭhāsaṃ gahetvā soḷasadhā gaṇite tattha yo ekeko koṭṭhāso, so kalabhāgoti adhippeto, tampi kalabhāgaṃ na upetīti vadati. Upanidhinti ‘‘imāya ayaṃ sadisī’’ti upamābhāvena gahetvā samīpe ṭhapanampi.
яад̇т̇ааяам̣ анабхирад̇о, д̇ам̣ б̣рахмажарияам̣ буб̣б̣з вуд̇д̇ам̣ баагадан̃жаад̇и д̇ам̣ анаамасид̇ваа д̇ад̇т̇а абхирад̇ияам̣ аад̣̇араж̇ананад̇т̇ам̣ абхирама, нанд̣̇а, абхирама, нанд̣̇аа’’д̇и аамзд̣ид̇авасзна вуд̇д̇ам̣. ахам̣ д̇з баадибхог̇од̇и гасмаа бхаг̇аваа д̇асса б̣рахмажарияаваасам̣ ижчанд̇о аб̣рахмажарияаваасасса баадибхог̇ам̣ убаг̇ан̃чи? яад̇т̇асса аарамман̣з рааг̇о д̣̇ал̣хам̣ нибад̇и, д̇ам̣ ааг̇анд̇угаарамман̣з сан̇гаамзд̇ваа сукзна саггаа ж̇ахаабзд̇унд̇и баадибхог̇ам̣ убаг̇ан̃чи. анубуб̣б̣игат̇ааяам̣ саг̇г̇агат̇аа имасса ад̇т̇асса нид̣̇ассанам̣.
Yatthāyaṃ anabhirato, taṃ brahmacariyaṃ pubbe vuttaṃ pākaṭañcāti taṃ anāmasitvā tattha abhiratiyaṃ ādarajananatthaṃ abhirama, nanda, abhirama, nandā’’ti āmeḍitavasena vuttaṃ. Ahaṃ te pāṭibhogoti kasmā bhagavā tassa brahmacariyavāsaṃ icchanto abrahmacariyavāsassa pāṭibhogaṃ upagañchi? Yatthassa ārammaṇe rāgo daḷhaṃ nipati, taṃ āgantukārammaṇe saṅkāmetvā sukhena sakkā jahāpetunti pāṭibhogaṃ upagañchi. Anupubbikathāyaṃ saggakathā imassa atthassa nidassanaṃ.
ассосунд̇и гат̇амассосум̣? бхаг̇аваа хи д̇ад̣̇аа ааяасманд̇з нанд̣̇з вад̇д̇ам̣ д̣̇ассзд̇ваа ад̇д̇ано д̣̇иваадтаанам̣ г̇ад̇з убадтаанам̣ ааг̇ад̇аанам̣ бхигкуунам̣ д̇ам̣ бавад̇д̇им̣ гат̇зд̇ваа яат̇аа наама гусало бурисо анигканд̇ам̣ аан̣им̣ ан̃н̃ааяа аан̣ияаа нийхарид̇ваа буна д̇ам̣ хад̇т̇аад̣̇ийхи сан̃жаалзд̇ваа абанзд̇и, звамзва аажин̣н̣ависаяз д̇асса рааг̇ам̣ ааг̇анд̇угависаязна нийхарид̇ваа буна д̇ад̣̇аби б̣рахмажарияамаг̇г̇ахзд̇ум̣ гад̇ваа абанзд̇угаамо ‘‘зт̇а д̇умхз, бхигкавз, нанд̣̇ам̣ бхигкум̣ бхад̇агаваад̣̇зна жа убаггид̇агаваад̣̇зна жа самуд̣̇аажарат̇аа’’д̇и аан̣аабзси, звам̣ бхигкуу ассосум̣. гзжи бана ‘‘бхаг̇аваа д̇ат̇ааруубам̣ ид̣̇д̇хаабхисан̇каарам̣ абхисан̇каарзси, яат̇аа д̇з бхигкуу д̇амад̇т̇ам̣ ж̇ааним̣суу’’д̇и вад̣̇анд̇и.
Assosunti kathamassosuṃ? Bhagavā hi tadā āyasmante nande vattaṃ dassetvā attano divāṭṭhānaṃ gate upaṭṭhānaṃ āgatānaṃ bhikkhūnaṃ taṃ pavattiṃ kathetvā yathā nāma kusalo puriso anikkhantaṃ āṇiṃ aññāya āṇiyā nīharitvā puna taṃ hatthādīhi sañcāletvā apaneti, evameva āciṇṇavisaye tassa rāgaṃ āgantukavisayena nīharitvā puna tadapi brahmacariyamaggahetuṃ katvā apanetukāmo ‘‘etha tumhe, bhikkhave, nandaṃ bhikkhuṃ bhatakavādena ca upakkitakavādena ca samudācarathā’’ti āṇāpesi, evaṃ bhikkhū assosuṃ. Keci pana ‘‘bhagavā tathārūpaṃ iddhābhisaṅkhāraṃ abhisaṅkhāresi, yathā te bhikkhū tamatthaṃ jāniṃsū’’ti vadanti.
бхад̇агаваад̣̇знаад̇и бхад̇агод̇и ваад̣̇зна. яо хи бхад̇ияаа гаммам̣ гарод̇и, со бхад̇агод̇и вужжад̇и, аяамби ааяасмаа ажчараасамбхог̇анимид̇д̇ам̣ б̣рахмажарияам̣ жаранд̇о бхад̇аго вияа ход̇ийд̇и вуд̇д̇ам̣ ‘‘бхад̇агаваад̣̇знаа’’д̇и . убаггид̇агаваад̣̇знаад̇и яо гахаабан̣аад̣̇ийхи гин̃жи гин̣аад̇и, со убаггид̇агод̇и вужжад̇и, аяамби ааяасмаа ажчараанам̣ хзд̇у ад̇д̇ано б̣рахмажарияам̣ гин̣аад̇и, д̇асмаа ‘‘убаггид̇аго’’д̇и звам̣ важанзна. ат̇а ваа бхаг̇авад̇о аан̣ааяа ажчараасамбхог̇асан̇каад̇ааяа бхад̇ияаа б̣рахмажарияаваасасан̇каад̇ам̣ ж̇ийвид̇ам̣ бавад̇д̇знд̇о д̇ааяа бхад̇ияаа яаабанз бхаг̇авад̇аа бхарияамаано вияа ход̇ийд̇и ‘‘бхад̇аго’’д̇и вуд̇д̇о, д̇ат̇аа ажчараасамбхог̇асан̇каад̇ам̣ виггаяам̣ аад̣̇аад̇аб̣б̣ам̣ гад̇ваа бхаг̇авад̇о аан̣ад̇д̇ияам̣ д̇идтанд̇о д̇зна виггаязна бхаг̇авад̇аа убаггид̇о вияа ход̇ийд̇и вуд̇д̇ам̣ ‘‘убаггид̇аго’’д̇и.
Bhatakavādenāti bhatakoti vādena. Yo hi bhatiyā kammaṃ karoti, so bhatakoti vuccati, ayampi āyasmā accharāsambhoganimittaṃ brahmacariyaṃ caranto bhatako viya hotīti vuttaṃ ‘‘bhatakavādenā’’ti . Upakkitakavādenāti yo kahāpaṇādīhi kiñci kiṇāti, so upakkitakoti vuccati, ayampi āyasmā accharānaṃ hetu attano brahmacariyaṃ kiṇāti, tasmā ‘‘upakkitako’’ti evaṃ vacanena. Atha vā bhagavato āṇāya accharāsambhogasaṅkhātāya bhatiyā brahmacariyavāsasaṅkhātaṃ jīvitaṃ pavattento tāya bhatiyā yāpane bhagavatā bhariyamāno viya hotīti ‘‘bhatako’’ti vutto, tathā accharāsambhogasaṅkhātaṃ vikkayaṃ ādātabbaṃ katvā bhagavato āṇattiyaṃ tiṭṭhanto tena vikkayena bhagavatā upakkito viya hotīti vuttaṃ ‘‘upakkitako’’ti.
аддийяамаанод̇и бийл̣ияамаано д̣̇угкаабияамаано. харааяамаанод̇и лаж̇ж̇амаано. ж̇иг̇ужчамаанод̇и баадигуляад̇о д̣̇аханд̇о. згод̇и асахааяо. вуубагадтод̇и вад̇т̇угаамзхи гилзсагаамзхи жа гааязна жзва жид̇д̇зна жа вуубагадто. аббамад̇д̇од̇и гаммадтаанз сад̇им̣ авиж̇аханд̇о. аад̇аабийд̇и гааяигажзд̇асигавийрияаад̇аабзна аад̇аабаваа, аад̇аабзд̇и гилзсзд̇и аад̇аабо, вийрияам̣. бахид̇ад̇д̇од̇и гааяз жа ж̇ийвид̇з жа анабзгкад̇ааяа бзсид̇ад̇д̇о виссадтаад̇д̇абхааво, ниб̣б̣аанз ваа бзсид̇ажид̇д̇о. на жирассзваад̇и гаммадтаанаарамбхад̇о на жирзнзва. яассад̇т̇ааяаад̇и яасса ад̇т̇ааяа. гулабуд̇д̇аад̇и д̣̇увид̇хаа гулабуд̇д̇аа ж̇аад̇игулабуд̇д̇аа жа аажаарагулабуд̇д̇аа жа, аяам̣ бана убхаяат̇ааби гулабуд̇д̇о. саммад̣̇зваад̇и хзд̇унаа жа гааран̣зна жа. аг̇аарасмаад̇и гхарад̇о. анаг̇аарияанд̇и баб̣б̣аж̇ж̇ам̣. гасиван̣иж̇ж̇аад̣̇игамман̃хи аг̇аарасса хид̇анд̇и аг̇аарияам̣ наама, д̇ам̣ зд̇т̇а над̇т̇ийд̇и баб̣б̣аж̇ж̇аа анаг̇аарияаад̇и вужжад̇и. баб̣б̣аж̇анд̇ийд̇и убаг̇ажчанд̇и. д̇ад̣̇ануд̇д̇аранд̇и д̇ам̣ ануд̇д̇арам̣. б̣рахмажарияабарияосаананд̇и маг̇г̇аб̣рахмажарияасса барияосаанабхууд̇ам̣ арахад̇д̇апалам̣. д̇асса хи ад̇т̇ааяа гулабуд̇д̇аа ид̇ха баб̣б̣аж̇анд̇и. д̣̇идтзва д̇хаммзд̇и д̇асмим̣язва ад̇д̇абхаавз. саяам̣ абхин̃н̃аа сажчигад̇ваад̇и ад̇д̇анааязва бан̃н̃ааяа бажжагкам̣ гад̇ваа, абараббажжаязна н̃ад̇ваад̇и ад̇т̇о. убасамбаж̇ж̇а вихаасийд̇и баабун̣ид̇ваа самбаад̣̇зд̇ваа ваа вихааси. звам̣ вихаранд̇ова кийн̣аа ж̇аад̇и…бз… аб̣бхан̃н̃аасийд̇и. иминаа асса бажжавзгкан̣абхууми д̣̇ассид̇аа.
Aṭṭīyamānoti pīḷiyamāno dukkhāpiyamāno. Harāyamānoti lajjamāno. Jigucchamānoti pāṭikulyato dahanto. Ekoti asahāyo. Vūpakaṭṭhoti vatthukāmehi kilesakāmehi ca kāyena ceva cittena ca vūpakaṭṭho. Appamattoti kammaṭṭhāne satiṃ avijahanto. Ātāpīti kāyikacetasikavīriyātāpena ātāpavā, ātāpeti kileseti ātāpo, vīriyaṃ. Pahitattoti kāye ca jīvite ca anapekkhatāya pesitatto vissaṭṭhaattabhāvo, nibbāne vā pesitacitto. Na cirassevāti kammaṭṭhānārambhato na cireneva. Yassatthāyāti yassa atthāya. Kulaputtāti duvidhā kulaputtā jātikulaputtā ca ācārakulaputtā ca, ayaṃ pana ubhayathāpi kulaputto. Sammadevāti hetunā ca kāraṇena ca. Agārasmāti gharato. Anagāriyanti pabbajjaṃ. Kasivaṇijjādikammañhi agārassa hitanti agāriyaṃ nāma, taṃ ettha natthīti pabbajjā anagāriyāti vuccati. Pabbajantīti upagacchanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānabhūtaṃ arahattaphalaṃ. Tassa hi atthāya kulaputtā idha pabbajanti. Diṭṭheva dhammeti tasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayena ñatvāti attho. Upasampajja vihāsīti pāpuṇitvā sampādetvā vā vihāsi. Evaṃ viharantova khīṇā jāti…pe… abbhaññāsīti. Iminā assa paccavekkhaṇabhūmi dassitā.
д̇ад̇т̇а кийн̣аа ж̇аад̇ийд̇и на д̇аавасса ад̇ийд̇аа ж̇аад̇и кийн̣аа буб̣б̣зва кийн̣ад̇д̇аа, на анааг̇ад̇аа анааг̇ад̇ад̇д̇аа зва, на бажжуббаннаа виж̇ж̇амаанад̇д̇аа. маг̇г̇асса бана абхаавид̇ад̇д̇аа яаа згажад̇убан̃жавогаарабхавзсу згажад̇убан̃жагканд̇хаббабхзд̣̇аа ж̇аад̇и уббаж̇ж̇зяяа, саа маг̇г̇асса бхаавид̇ад̇д̇аа ануббаад̣̇ад̇хаммад̇ам̣ аабаж̇ж̇анзна кийн̣аа. д̇ам̣ со маг̇г̇абхааванааяа бахийнагилзсз бажжавзгкид̇ваа гилзсаабхаавзна виж̇ж̇амаанамби гаммам̣ ааяад̇им̣ аббадисанд̇хигам̣ ход̇ийд̇и ж̇аананзна аб̣бхан̃н̃ааси. вусид̇анд̇и вуд̇т̇ам̣ баривуд̇т̇ам̣ гад̇ам̣ жарид̇ам̣, нидтаабид̇анд̇и ад̇т̇о. б̣рахмажарияанд̇и маг̇г̇аб̣рахмажарияам̣. бут̇уж̇ж̇анагаляаан̣агзна хи сад̣̇д̇хим̣ сад̇д̇а сзгкаа б̣рахмажарияаваасам̣ васанд̇и наама, кийн̣аасаво вуд̇т̇аваасо, д̇асмаа со ад̇д̇ано б̣рахмажарияаваасам̣ бажжавзгканд̇о ‘‘вусид̇ам̣ б̣рахмажарияа’’нд̇и аб̣бхан̃н̃ааси. гад̇ам̣ гаран̣ийяанд̇и жад̇уусу сажжзсу жад̇уухи маг̇г̇зхи барин̃н̃аабахаанасажчигирияаабхааванаавасзна сол̣асавид̇хамби гижжам̣ нидтаабид̇ам̣. бут̇уж̇ж̇анагаляаан̣агаад̣̇аяо хи д̇ам̣ гижжам̣ гаронд̇и наама, кийн̣аасаво гад̇агаран̣ийяо, д̇асмаа со ад̇д̇ано гаран̣ийяам̣ бажжавзгканд̇о ‘‘гад̇ам̣ гаран̣ийяа’’нд̇и аб̣бхан̃н̃ааси. наабарам̣ ид̇т̇ад̇д̇ааяаад̇и ‘‘ид̣̇аани буна ид̇т̇абхаавааяа звам̣ сол̣асагижжабхаавааяа гилзсагкаяааяа ваа маг̇г̇абхааванааяа гижжам̣ мз над̇т̇ий’’д̇и аб̣бхан̃н̃ааси. наабарам̣ ид̇т̇ад̇д̇ааяаад̇и ваа ‘‘ид̇т̇абхаавад̇о имасмаа звам̣багаараа вад̇д̇амаанагканд̇хасанд̇аанаа абарам̣ канд̇хасанд̇аанам̣ маяхам̣ над̇т̇и, имз бана бан̃жагканд̇хаа барин̃н̃аад̇аа д̇идтанд̇и чиннамуулагаа вияа ругкаа, д̇з жаримагажид̇д̇анирод̇хзна анубаад̣̇аано вияа ж̇аад̇авзд̣̇о ниб̣б̣ааяиссанд̇и, абан̣н̣ад̇д̇игабхаавам̣ г̇амиссанд̇ий’’д̇и аб̣бхан̃н̃ааси. ан̃н̃ад̇арод̇и зго. арахад̇анд̇и бхаг̇авад̇о саавагаанам̣ араханд̇аанам̣ аб̣бханд̇аро зго махаасааваго ахосийд̇и ад̇т̇о.
Tattha khīṇā jātīti na tāvassa atītā jāti khīṇā pubbeva khīṇattā, na anāgatā anāgatattā eva, na paccuppannā vijjamānattā. Maggassa pana abhāvitattā yā ekacatupañcavokārabhavesu ekacatupañcakkhandhappabhedā jāti uppajjeyya, sā maggassa bhāvitattā anuppādadhammataṃ āpajjanena khīṇā. Taṃ so maggabhāvanāya pahīnakilese paccavekkhitvā kilesābhāvena vijjamānampi kammaṃ āyatiṃ appaṭisandhikaṃ hotīti jānanena abbhaññāsi. Vusitanti vutthaṃ parivutthaṃ kataṃ caritaṃ, niṭṭhāpitanti attho. Brahmacariyanti maggabrahmacariyaṃ. Puthujjanakalyāṇakena hi saddhiṃ satta sekkhā brahmacariyavāsaṃ vasanti nāma, khīṇāsavo vutthavāso, tasmā so attano brahmacariyavāsaṃ paccavekkhanto ‘‘vusitaṃ brahmacariya’’nti abbhaññāsi. Kataṃ karaṇīyanti catūsu saccesu catūhi maggehi pariññāpahānasacchikiriyābhāvanāvasena soḷasavidhampi kiccaṃ niṭṭhāpitaṃ. Puthujjanakalyāṇakādayo hi taṃ kiccaṃ karonti nāma, khīṇāsavo katakaraṇīyo, tasmā so attano karaṇīyaṃ paccavekkhanto ‘‘kataṃ karaṇīya’’nti abbhaññāsi. Nāparaṃ itthattāyāti ‘‘idāni puna itthabhāvāya evaṃ soḷasakiccabhāvāya kilesakkhayāya vā maggabhāvanāya kiccaṃ me natthī’’ti abbhaññāsi. Nāparaṃ itthattāyāti vā ‘‘itthabhāvato imasmā evaṃpakārā vattamānakkhandhasantānā aparaṃ khandhasantānaṃ mayhaṃ natthi, ime pana pañcakkhandhā pariññātā tiṭṭhanti chinnamūlakā viya rukkhā, te carimakacittanirodhena anupādāno viya jātavedo nibbāyissanti, apaṇṇattikabhāvaṃ gamissantī’’ti abbhaññāsi. Aññataroti eko. Arahatanti bhagavato sāvakānaṃ arahantānaṃ abbhantaro eko mahāsāvako ahosīti attho.
ан̃н̃ад̇араа д̣̇звад̇аад̇и ад̇хиг̇ад̇амаг̇г̇аа згаа б̣рахмад̣̇звад̇аа. саа хи саяам̣ асзгкад̇д̇аа асзгкависаяам̣ аб̣бхан̃н̃ааси. сзгкаа хи д̇ам̣ д̇ам̣ сзгкависаяам̣, бут̇уж̇ж̇анаа жа ад̇д̇ано бут̇уж̇ж̇анависаяамзва ж̇аананд̇и. абхигганд̇ааяа рад̇д̇ияаад̇и баригкийн̣ааяа рад̇д̇ияаа, маж̇жхимаяаамзд̇и ад̇т̇о. абхигганд̇аван̣н̣аад̇и ад̇иуд̇д̇амаван̣н̣аа. гзвалагаббанд̇и анавасзсзна саманд̇ад̇о. обхаасзд̇ваад̇и ад̇д̇ано бабхааяа жанд̣̇о вияа суурияо вияа жа ж̇зд̇аванам̣ згобхаасам̣ гад̇ваа. д̇знубасан̇гамийд̇и ааяасмад̇о нанд̣̇асса арахад̇д̇аббад̇д̇им̣ вид̣̇ид̇ваа бийд̇исоманассаж̇аад̇аа ‘‘д̇ам̣ бхаг̇авад̇о бадивзд̣̇зссаамий’’д̇и убасан̇гами.
Aññatarā devatāti adhigatamaggā ekā brahmadevatā. Sā hi sayaṃ asekkhattā asekkhavisayaṃ abbhaññāsi. Sekkhā hi taṃ taṃ sekkhavisayaṃ, puthujjanā ca attano puthujjanavisayameva jānanti. Abhikkantāya rattiyāti parikkhīṇāya rattiyā, majjhimayāmeti attho. Abhikkantavaṇṇāti atiuttamavaṇṇā. Kevalakappanti anavasesena samantato. Obhāsetvāti attano pabhāya cando viya sūriyo viya ca jetavanaṃ ekobhāsaṃ katvā. Tenupasaṅkamīti āyasmato nandassa arahattappattiṃ viditvā pītisomanassajātā ‘‘taṃ bhagavato paṭivedessāmī’’ti upasaṅkami.
аасаваанам̣ каяаад̇и зд̇т̇а аасаванд̇ийд̇и аасаваа, жагкуд̣̇ваараад̣̇ийхи бавад̇д̇анд̇ийд̇и ад̇т̇о. ат̇а ваа ааг̇од̇рабхум̣ аабхаваг̇г̇ам̣ ваа саванд̇ийд̇и аасаваа, зд̇з д̇хаммз зд̇ан̃жа огаасам̣ анд̇о гарид̇ваа бавад̇д̇анд̇ийд̇и ад̇т̇о. жирабаариваасияадтзна мад̣̇ираад̣̇иаасаваа вияаад̇и аасаваа. ‘‘буримаа, бхигкавз, годи на бан̃н̃ааяад̇и авиж̇ж̇ааяаа’’д̇иаад̣̇иважанзхи (а. ни. 10.61) нзсам̣ жирабаариваасияад̇аа взд̣̇ид̇аб̣б̣аа. ат̇а ваа ааяад̇ам̣ сам̣саарад̣̇угкам̣ саванд̇и басаванд̇ийд̇иби, аасаваа. буримо жзд̇т̇а ад̇т̇о гилзсзсу яуж̇ж̇ад̇и, бажчимо гаммзби. на гзвалан̃жа гаммагилзсаа зва аасаваа, ат̇а ко наанаббагаараа убад̣̇д̣̇авааби. д̇ат̇аа хи ‘‘наахам̣, жунд̣̇а , д̣̇идтад̇хаммигаанам̣язва аасаваанам̣ сам̣варааяа д̇хаммам̣ д̣̇зсзмий’’д̇и зд̇т̇а (д̣̇ий. ни. 3.182) виваад̣̇амуулабхууд̇аа гилзсаа аасаваад̇и ааг̇ад̇аа.
Āsavānaṃ khayāti ettha āsavantīti āsavā, cakkhudvārādīhi pavattantīti attho. Atha vā āgotrabhuṃ ābhavaggaṃ vā savantīti āsavā, ete dhamme etañca okāsaṃ anto karitvā pavattantīti attho. Cirapārivāsiyaṭṭhena madirādiāsavā viyāti āsavā. ‘‘Purimā, bhikkhave, koṭi na paññāyati avijjāyā’’tiādivacanehi (a. ni. 10.61) nesaṃ cirapārivāsiyatā veditabbā. Atha vā āyataṃ saṃsāradukkhaṃ savanti pasavantītipi, āsavā. Purimo cettha attho kilesesu yujjati, pacchimo kammepi. Na kevalañca kammakilesā eva āsavā, atha kho nānappakārā upaddavāpi. Tathā hi ‘‘nāhaṃ, cunda , diṭṭhadhammikānaṃyeva āsavānaṃ saṃvarāya dhammaṃ desemī’’ti ettha (dī. ni. 3.182) vivādamūlabhūtā kilesā āsavāti āgatā.
‘‘язна д̣̇звуубабад̇яасса, г̇анд̇хаб̣б̣о ваа вихан̇г̇амо;
‘‘Yena devūpapatyassa, gandhabbo vā vihaṅgamo;
яагкад̇д̇ам̣ язна г̇ажчзяяа, мануссад̇д̇ан̃жа аб̣б̣аж̇з;
Yakkhattaṃ yena gaccheyya, manussattañca abbaje;
д̇з маяхам̣ аасаваа кийн̣аа, вид̣̇д̇хасд̇аа виналийгад̇аа’’д̇и. (а. ни. 4.36) –
Te mayhaṃ āsavā khīṇā, viddhastā vinalīkatā’’ti. (a. ni. 4.36) –
зд̇т̇а д̇збхуумигам̣ гаммам̣ авасзсаа жа агусалаа д̇хаммаа аасаваад̇и ааг̇ад̇аа. ‘‘д̣̇идтад̇хаммигаанам̣ аасаваанам̣ сам̣варааяа, самбарааяигаанам̣ аасаваанам̣ бадигхаад̇ааяаа’’д̇и (баараа. 39) баруубагхаад̇авиббадисааравад̇хаб̣анд̇хаад̣̇аяо жзва абааяад̣̇угкабхууд̇аа жа наанаббагаараа убад̣̇д̣̇аваа.
Ettha tebhūmikaṃ kammaṃ avasesā ca akusalā dhammā āsavāti āgatā. ‘‘Diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāyā’’ti (pārā. 39) parūpaghātavippaṭisāravadhabandhādayo ceva apāyadukkhabhūtā ca nānappakārā upaddavā.
д̇з банзд̇з аасаваа винаяз – ‘‘д̣̇идтад̇хаммигаанам̣ аасаваанам̣ сам̣варааяа самбарааяигаанам̣ аасаваанам̣ бадигхаад̇ааяаа’’д̇и (баараа. 39) д̣̇вид̇хаа ааг̇ад̇аа. сал̣ааяад̇анз ‘‘д̇аяомз, аавусо, аасаваа – гаамаасаво, бхаваасаво, авиж̇ж̇аасаво’’д̇и (д̣̇ий. ни. 3.305) д̇ид̇хаа ааг̇ад̇аа, д̇ат̇аа ан̃н̃зсу жа суд̇д̇анд̇зсу. абхид̇хаммз д̇зязва д̣̇идтаасавзна сад̣̇д̇хим̣ жад̇уд̇хаа ааг̇ад̇аа. ниб̣б̣зд̇хигабарияааяз ‘‘ад̇т̇и, бхигкавз, аасаваа нираяаг̇ааминияаа’’д̇иаад̣̇инаа (а. ни. 6.63) бан̃жад̇хаа ааг̇ад̇аа. чагганибаад̇з ‘‘ад̇т̇и, бхигкавз, аасаваа сам̣варааяа бахаад̇аб̣б̣аа’’д̇иаад̣̇инаа (а. ни. 6.58) наязна чад̇хаа ааг̇ад̇аа. саб̣б̣аасавабарияааяз (ма. ни. 1.22) д̇зязва д̣̇ассанабахаад̇аб̣б̣зхи сад̣̇д̇хим̣ сад̇д̇ад̇хаа ааг̇ад̇аа. ид̇ха бана абхид̇хамманаязна жад̇д̇ааро аасаваа взд̣̇ид̇аб̣б̣аа.
Te panete āsavā vinaye – ‘‘diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti (pārā. 39) dvidhā āgatā. Saḷāyatane ‘‘tayome, āvuso, āsavā – kāmāsavo, bhavāsavo, avijjāsavo’’ti (dī. ni. 3.305) tidhā āgatā, tathā aññesu ca suttantesu. Abhidhamme teyeva diṭṭhāsavena saddhiṃ catudhā āgatā. Nibbedhikapariyāye ‘‘atthi, bhikkhave, āsavā nirayagāminiyā’’tiādinā (a. ni. 6.63) pañcadhā āgatā. Chakkanipāte ‘‘atthi, bhikkhave, āsavā saṃvarāya pahātabbā’’tiādinā (a. ni. 6.58) nayena chadhā āgatā. Sabbāsavapariyāye (ma. ni. 1.22) teyeva dassanapahātabbehi saddhiṃ sattadhā āgatā. Idha pana abhidhammanayena cattāro āsavā veditabbā.
каяаад̇и зд̇т̇а бана ‘‘яо аасаваанам̣ каяо бхзд̣̇о барибхзд̣̇о’’д̇иаад̣̇ийсу аасаваанам̣ сарасабхзд̣̇о аасавагкаяод̇и вуд̇д̇о. ‘‘ж̇аанад̇о ахам̣, бхигкавз, бассад̇о аасаваанам̣ каяам̣ вад̣̇аамий’’д̇иаад̣̇ийсу (ма. ни. 1.15) аасаваанам̣ ааяад̇им̣ ануббаад̣̇о аасавагкаяод̇и вуд̇д̇о.
Khayāti ettha pana ‘‘yo āsavānaṃ khayo bhedo paribhedo’’tiādīsu āsavānaṃ sarasabhedo āsavakkhayoti vutto. ‘‘Jānato ahaṃ, bhikkhave, passato āsavānaṃ khayaṃ vadāmī’’tiādīsu (ma. ni. 1.15) āsavānaṃ āyatiṃ anuppādo āsavakkhayoti vutto.
‘‘сзгкасса сигкамаанасса, уж̇умаг̇г̇аанусаарино;
‘‘Sekkhassa sikkhamānassa, ujumaggānusārino;
каяасмим̣ батамам̣ н̃аан̣ам̣, д̇ад̇о ан̃н̃аа ананд̇араа’’д̇и. (ид̇иву. 62) –
Khayasmiṃ paṭhamaṃ ñāṇaṃ, tato aññā anantarā’’ti. (itivu. 62) –
аад̣̇ийсу маг̇г̇о аасавагкаяод̇и вуд̇д̇о. ‘‘аасаваанам̣ каяаа саман̣о ход̇ий’’д̇иаад̣̇ийсу (ма. ни. 1.438) палам̣.
Ādīsu maggo āsavakkhayoti vutto. ‘‘Āsavānaṃ khayā samaṇo hotī’’tiādīsu (ma. ni. 1.438) phalaṃ.
‘‘бараваж̇ж̇аанубассисса, нижжам̣ уж̇жхаанасан̃н̃ино;
‘‘Paravajjānupassissa, niccaṃ ujjhānasaññino;
аасаваа д̇асса вад̣дханд̇и, аараа со аасавагкаяаа’’д̇и. –
Āsavā tassa vaḍḍhanti, ārā so āsavakkhayā’’ti. –
аад̣̇ийсу (д̇ха. ба. 253) ниб̣б̣аанам̣. ид̇ха бана аасаваанам̣ ажжанд̇акаяо ануббаад̣̇о ваа маг̇г̇о ваа ‘‘аасаваанам̣ каяо’’д̇и вуд̇д̇о.
Ādīsu (dha. pa. 253) nibbānaṃ. Idha pana āsavānaṃ accantakhayo anuppādo vā maggo vā ‘‘āsavānaṃ khayo’’ti vutto.
анаасаванд̇и бадибассад̣̇д̇хивасзна саб̣б̣асо бахийнаасавам̣. жзд̇овимуд̇д̇инд̇и арахад̇д̇апаласамаад̇хим̣. бан̃н̃аавимуд̇д̇инд̇и арахад̇д̇апалабан̃н̃ам̣. убхаяаважанам̣ маг̇г̇з вияа палзби самат̇авибассанаанам̣ яуг̇ананд̇хабхаавад̣̇ассанад̇т̇ам̣. н̃аан̣анд̇и саб̣б̣ан̃н̃уд̇ан̃н̃аан̣ам̣. д̣̇звад̇ааяа важанасамананд̇арамзва ‘‘гат̇ам̣ ну ко’’д̇и ааваж̇ж̇знд̇асса бхаг̇авад̇о н̃аан̣ам̣ уббаж̇ж̇и ‘‘нанд̣̇зна арахад̇д̇ам̣ сажчигад̇а’’нд̇и. со хи ааяасмаа сахааяабхигкуухи д̇ат̇аа уббан̣д̣ияамаано ‘‘бхаарияам̣ вад̇а маяаа гад̇ам̣, яохам̣ звам̣ сваагкаад̇з д̇хаммавинаяз баб̣б̣аж̇ид̇ваа ажчараанам̣ бадилаабхааяа сад̇т̇аарам̣ баадибхог̇ам̣ агааси’’нд̇и уббаннасам̣взг̇о хирод̇д̇аббам̣ бажжубадтабзд̇ваа гхадзнд̇о вааяаманд̇о арахад̇д̇ам̣ бад̇ваа жинд̇зси – ‘‘яам̣нуунаахам̣ бхаг̇аванд̇ам̣ зд̇асмаа бадиссаваа можзяяа’’нд̇и. со бхаг̇аванд̇ам̣ убасан̇гамид̇ваа ад̇д̇ано ад̇хиббааяам̣ сад̇т̇у аарожзси. д̇зна вуд̇д̇ам̣ – ‘‘ат̇а ко ааяасмаа нанд̣̇о…бз… зд̇асмаа бадиссаваа’’д̇и. д̇ад̇т̇а бадиссаваад̇и баадибхог̇аббадиссаваа, ‘‘ажчараанам̣ бадилаабхааяа ахам̣ бадибхууд̇о’’д̇и бадин̃н̃ааяа.
Anāsavanti paṭipassaddhivasena sabbaso pahīnāsavaṃ. Cetovimuttinti arahattaphalasamādhiṃ. Paññāvimuttinti arahattaphalapaññaṃ. Ubhayavacanaṃ magge viya phalepi samathavipassanānaṃ yuganandhabhāvadassanatthaṃ. Ñāṇanti sabbaññutaññāṇaṃ. Devatāya vacanasamanantarameva ‘‘kathaṃ nu kho’’ti āvajjentassa bhagavato ñāṇaṃ uppajji ‘‘nandena arahattaṃ sacchikata’’nti. So hi āyasmā sahāyabhikkhūhi tathā uppaṇḍiyamāno ‘‘bhāriyaṃ vata mayā kataṃ, yohaṃ evaṃ svākkhāte dhammavinaye pabbajitvā accharānaṃ paṭilābhāya satthāraṃ pāṭibhogaṃ akāsi’’nti uppannasaṃvego hirottappaṃ paccupaṭṭhapetvā ghaṭento vāyamanto arahattaṃ patvā cintesi – ‘‘yaṃnūnāhaṃ bhagavantaṃ etasmā paṭissavā moceyya’’nti. So bhagavantaṃ upasaṅkamitvā attano adhippāyaṃ satthu ārocesi. Tena vuttaṃ – ‘‘atha kho āyasmā nando…pe… etasmā paṭissavā’’ti. Tattha paṭissavāti pāṭibhogappaṭissavā, ‘‘accharānaṃ paṭilābhāya ahaṃ paṭibhūto’’ti paṭiññāya.
ат̇асса бхаг̇аваа ‘‘яасмаа д̇аяаа ан̃н̃аа аараад̇хид̇аад̇и н̃аад̇амзд̇ам̣ маяаа, д̣̇звад̇ааби мз аарожзси, д̇асмаа наахам̣ бадиссаваа ид̣̇аани можзд̇аб̣б̣о арахад̇д̇аббад̇д̇ияаава можид̇ад̇д̇аа’’д̇и ааха. д̇зна вуд̇д̇ам̣ ‘‘яад̣̇зва ко д̇з нанд̣̇аа’’д̇иаад̣̇и. д̇ад̇т̇а яад̣̇зваад̇и яад̣̇аа зва. д̇зд̇и д̇ава. муд̇д̇од̇и бамуд̇д̇о. ид̣̇ам̣ вуд̇д̇ам̣ ход̇и – яасмим̣язва гаалз аасавзхи д̇ава жид̇д̇ам̣ вимуд̇д̇ам̣, ат̇а ананд̇арамзваахам̣ д̇ад̇о баадибхог̇ад̇о муд̇д̇од̇и.
Athassa bhagavā ‘‘yasmā tayā aññā ārādhitāti ñātametaṃ mayā, devatāpi me ārocesi, tasmā nāhaṃ paṭissavā idāni mocetabbo arahattappattiyāva mocitattā’’ti āha. Tena vuttaṃ ‘‘yadeva kho te nandā’’tiādi. Tattha yadevāti yadā eva. Teti tava. Muttoti pamutto. Idaṃ vuttaṃ hoti – yasmiṃyeva kāle āsavehi tava cittaṃ vimuttaṃ, atha anantaramevāhaṃ tato pāṭibhogato muttoti.
соби ааяасмаа вибассанаагаалзязва ‘‘яад̣̇зваахам̣ инд̣̇рияаасам̣варам̣ ниссааяа имам̣ виббагаарам̣ бад̇д̇о, д̇амзва судту ниг̇г̇ахзссаамий’’д̇и уссаахаж̇аад̇о б̣алавахирод̇д̇аббо д̇ад̇т̇а жа гад̇аад̇хигаарад̇д̇аа инд̣̇рияасам̣варз уггадтабадибад̣̇амби аг̇амааси. вуд̇д̇ан̃хзд̇ам̣ –
Sopi āyasmā vipassanākāleyeva ‘‘yadevāhaṃ indriyāsaṃvaraṃ nissāya imaṃ vippakāraṃ patto, tameva suṭṭhu niggahessāmī’’ti ussāhajāto balavahirottappo tattha ca katādhikārattā indriyasaṃvare ukkaṭṭhapaṭipadampi agamāsi. Vuttañhetaṃ –
‘‘сажз , бхигкавз, нанд̣̇асса бурад̇т̇имаа д̣̇исаа аалогзд̇аб̣б̣аа ход̇и, саб̣б̣ам̣ жзд̇асо саманнаахарид̇ваа нанд̣̇о бурад̇т̇имам̣ д̣̇исам̣ аалогзд̇и ‘звам̣ мз бурад̇т̇имам̣ д̣̇исам̣ аалогаяад̇о на абхиж̇жхаад̣̇оманассаа баабагаа агусалаа д̇хаммаа анваассавзяяу’нд̇и, ид̇иха д̇ад̇т̇а самбаж̇аано ход̇и.
‘‘Sace , bhikkhave, nandassa puratthimā disā āloketabbā hoti, sabbaṃ cetaso samannāharitvā nando puratthimaṃ disaṃ āloketi ‘evaṃ me puratthimaṃ disaṃ ālokayato na abhijjhādomanassā pāpakā akusalā dhammā anvāssaveyyu’nti, itiha tattha sampajāno hoti.
‘‘сажз, бхигкавз, нанд̣̇асса бажчимаа…бз… уд̇д̇араа… д̣̇агкин̣аа… уд̣̇д̇хам̣… ад̇хо… ануд̣̇исаа аалогзд̇аб̣б̣аа ход̇и, саб̣б̣ам̣ жзд̇асо саманнаахарид̇ваа нанд̣̇о ануд̣̇исам̣ аалогзд̇и ‘звам̣ мз…бз… самбаж̇аано ход̇ий’’’д̇и (а. ни. 8.9).
‘‘Sace, bhikkhave, nandassa pacchimā…pe… uttarā… dakkhiṇā… uddhaṃ… adho… anudisā āloketabbā hoti, sabbaṃ cetaso samannāharitvā nando anudisaṃ āloketi ‘evaṃ me…pe… sampajāno hotī’’’ti (a. ni. 8.9).
д̇знзва д̇ам̣ ааяасманд̇ам̣ сад̇т̇аа ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ инд̣̇риязсу г̇уд̇д̇ад̣̇ваараанам̣ яад̣̇ид̣̇ам̣ нанд̣̇о’’д̇и (а. ни. 1.230) зд̇ад̣̇аг̇г̇з табзси.
Teneva taṃ āyasmantaṃ satthā ‘‘etadaggaṃ, bhikkhave, mama sāvakānaṃ bhikkhūnaṃ indriyesu guttadvārānaṃ yadidaṃ nando’’ti (a. ni. 1.230) etadagge ṭhapesi.
зд̇амад̇т̇ам̣ вид̣̇ид̇ваад̇и зд̇ам̣ ааяасмад̇о нанд̣̇асса саб̣б̣аасавз кзбзд̇ваа сукаад̣̇ийсу д̇аад̣̇ибхааваббад̇д̇исан̇каад̇ам̣ ад̇т̇ам̣ саб̣б̣аагаарад̇о вид̣̇ид̇ваа. имам̣ уд̣̇аананд̇и д̇ад̣̇ад̇т̇авибхааванам̣ имам̣ уд̣̇аанам̣ уд̣̇аанзси.
Etamatthaṃ viditvāti etaṃ āyasmato nandassa sabbāsave khepetvā sukhādīsu tādibhāvappattisaṅkhātaṃ atthaṃ sabbākārato viditvā. Imaṃ udānanti tadatthavibhāvanaṃ imaṃ udānaṃ udānesi.
д̇ад̇т̇а яасса нид̇д̇ин̣н̣о бан̇год̇и язна арияабуг̇г̇алзна арияамаг̇г̇асзд̇унаа саб̣б̣о д̣̇идтибан̇го сам̣саарабан̇го зва ваа ниб̣б̣аанабаараг̇аманзна д̇ин̣н̣о. мад̣̇д̣̇ид̇о гаамаган̣д̣агод̇и язна сад̇д̇аанам̣ виж̇жханад̇о. ‘‘гаамаган̣д̣аго’’д̇и лад̣̇д̇ханаамо саб̣б̣о гилзсагаамо саб̣б̣о гаамависууго аг̇г̇ан̃аан̣ад̣̇ан̣д̣зна мад̣̇д̣̇ид̇о бхаг̇г̇о анавасзсад̇о мат̇ид̇о. мохагкаяам̣ ануббад̇д̇од̇и звам̣бхууд̇о жа д̣̇угкаад̣̇ивисаяасса саб̣б̣асса саммохасса кзбанзна мохагкаяам̣ бад̇д̇о, арахад̇д̇апалам̣ ниб̣б̣аанан̃жа ануббад̇д̇о. сукад̣̇угкзсу на взд̇хад̇ий са бхигкууд̇и со бхиннагилзсо бхигку идтаарамман̣асамааяог̇ад̇о уббаннзсу сукзсу анидтаарамман̣асамааяог̇ад̇о уббаннзсу д̣̇угкзсу жа на взд̇хад̇и на гамбад̇и, д̇ам̣ нимид̇д̇ам̣ жид̇д̇авигаарам̣ наабаж̇ж̇ад̇и. ‘‘сукад̣̇угкзсуу’’д̇и жа д̣̇зсанаамад̇д̇ам̣, саб̣б̣зсуби логад̇хаммзсу на взд̇хад̇ийд̇и взд̣̇ид̇аб̣б̣ам̣.
Tattha yassa nittiṇṇo paṅkoti yena ariyapuggalena ariyamaggasetunā sabbo diṭṭhipaṅko saṃsārapaṅko eva vā nibbānapāragamanena tiṇṇo. Maddito kāmakaṇḍakoti yena sattānaṃ vijjhanato. ‘‘Kāmakaṇḍako’’ti laddhanāmo sabbo kilesakāmo sabbo kāmavisūko aggañāṇadaṇḍena maddito bhaggo anavasesato mathito. Mohakkhayaṃ anuppattoti evaṃbhūto ca dukkhādivisayassa sabbassa sammohassa khepanena mohakkhayaṃ patto, arahattaphalaṃ nibbānañca anuppatto. Sukhadukkhesu na vedhatī sa bhikkhūti so bhinnakileso bhikkhu iṭṭhārammaṇasamāyogato uppannesu sukhesu aniṭṭhārammaṇasamāyogato uppannesu dukkhesu ca na vedhati na kampati, taṃ nimittaṃ cittavikāraṃ nāpajjati. ‘‘Sukhadukkhesū’’ti ca desanāmattaṃ, sabbesupi lokadhammesu na vedhatīti veditabbaṃ.
д̣̇уд̇ияасуд̇д̇аван̣н̣анаа нидтид̇аа.
Dutiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 2. нанд̣̇асуд̇д̇ам̣ • 2. Nandasuttaṃ
