| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๘. นนฺทสุตฺตวณฺณนา
8. Nandasuttavaṇṇanā
๒๔๒. อฎฺฐเม อาโกฎิตปจฺจาโกฎิตานีติ เอกสฺมิํ ปเสฺส ปาณินา วา มุคฺคเรน วา อาโกฎเนน อาโกฎิตานิ, ปริวเตฺตตฺวา อาโกฎเนน ปจฺจาโกฎิตานิฯ อเญฺชตฺวาติ อญฺชเนน ปูเรตฺวาฯ อจฺฉํ ปตฺตนฺติ วิปฺปสนฺนวณฺณํ มตฺติกาปตฺตํฯ กสฺมา ปน เถโร เอวมกาสีติ? สตฺถุ อชฺฌาสยชานนตฺถํฯ เอวํ กิรสฺส อโหสิ ‘‘สเจ สตฺถา ‘โสภติ วต เม อยํ กนิฎฺฐภาติโก’ติ วกฺขติ, ยาวชีวํ อิมินา วากาเรน จริสฺสามิฯ สเจ เอตฺถ โทสํ ทสฺสติ, อิมํ อาการํ ปหาย สงฺการโจฬํ คเหตฺวา จีวรํ กตฺวา ธาเรโนฺต ปริยนฺตเสนาสเน วสโนฺต จริสฺสามี’’ติฯ อสฺสสีติ ภวิสฺสสิฯ
242. Aṭṭhame ākoṭitapaccākoṭitānīti ekasmiṃ passe pāṇinā vā muggarena vā ākoṭanena ākoṭitāni, parivattetvā ākoṭanena paccākoṭitāni. Añjetvāti añjanena pūretvā. Acchaṃ pattanti vippasannavaṇṇaṃ mattikāpattaṃ. Kasmā pana thero evamakāsīti? Satthu ajjhāsayajānanatthaṃ. Evaṃ kirassa ahosi ‘‘sace satthā ‘sobhati vata me ayaṃ kaniṭṭhabhātiko’ti vakkhati, yāvajīvaṃ iminā vākārena carissāmi. Sace ettha dosaṃ dassati, imaṃ ākāraṃ pahāya saṅkāracoḷaṃ gahetvā cīvaraṃ katvā dhārento pariyantasenāsane vasanto carissāmī’’ti. Assasīti bhavissasi.
อญฺญาตุเญฺฉนาติ อภิลกฺขิเตสุ อิสฺสรชนเคเหสุ กฎุกภณฺฑสมฺภารํ สุคนฺธํ โภชนํ ปริเยสนฺตสฺส อุโญฺฉ ญาตุโญฺฉ นามฯ ฆรปฎิปาฎิยา ปน ทฺวาเร ฐิเตน ลทฺธํ มิสฺสกโภชนํ อญฺญาตุโญฺฉ นามฯ อยมิธ อธิเปฺปโตฯ กาเมสุ อนเปกฺขินนฺติ วตฺถุกามกิเลสกาเมสุ นิรเปกฺขํฯ อารญฺญิโก จาติอาทิ สพฺพํ สมาทานวเสเนว วุตฺตํฯ กาเมสุ จ อนเปโกฺขติ อิทํ สุตฺตํ เทวโลเก อจฺฉราโย ทเสฺสตฺวา อาคเตน อปรภาเค กถิตํฯ อิมสฺส กถิตทิวสโต ปฎฺฐาย เถโร ฆเฎโนฺต วายมโนฺต กติปาเหเนว อรหเตฺต ปติฎฺฐาย สเทวเก โลเก อคฺคทกฺขิเณโยฺย ชาโตฯ อฎฺฐมํฯ
Aññātuñchenāti abhilakkhitesu issarajanagehesu kaṭukabhaṇḍasambhāraṃ sugandhaṃ bhojanaṃ pariyesantassa uñcho ñātuñcho nāma. Gharapaṭipāṭiyā pana dvāre ṭhitena laddhaṃ missakabhojanaṃ aññātuñcho nāma. Ayamidha adhippeto. Kāmesu anapekkhinanti vatthukāmakilesakāmesu nirapekkhaṃ. Āraññiko cātiādi sabbaṃ samādānavaseneva vuttaṃ. Kāmesu ca anapekkhoti idaṃ suttaṃ devaloke accharāyo dassetvā āgatena aparabhāge kathitaṃ. Imassa kathitadivasato paṭṭhāya thero ghaṭento vāyamanto katipāheneva arahatte patiṭṭhāya sadevake loke aggadakkhiṇeyyo jāto. Aṭṭhamaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๘. นนฺทสุตฺตํ • 8. Nandasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๘. นนฺทสุตฺตวณฺณฺณนา • 8. Nandasuttavaṇṇṇanā
