| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៨. នន្ទសុត្តវណ្ណនា
8. Nandasuttavaṇṇanā
២៤២. អដ្ឋមេ អាកោដិតបច្ចាកោដិតានីតិ ឯកស្មិំ បស្សេ បាណិនា វា មុគ្គរេន វា អាកោដនេន អាកោដិតានិ, បរិវត្តេត្វា អាកោដនេន បច្ចាកោដិតានិ។ អញ្ជេត្វាតិ អញ្ជនេន បូរេត្វា។ អច្ឆំ បត្តន្តិ វិប្បសន្នវណ្ណំ មត្តិកាបត្តំ។ កស្មា បន ថេរោ ឯវមកាសីតិ? សត្ថុ អជ្ឈាសយជាននត្ថំ។ ឯវំ កិរស្ស អហោសិ ‘‘សចេ សត្ថា ‘សោភតិ វត មេ អយំ កនិដ្ឋភាតិកោ’តិ វក្ខតិ, យាវជីវំ ឥមិនា វាការេន ចរិស្សាមិ។ សចេ ឯត្ថ ទោសំ ទស្សតិ, ឥមំ អាការំ បហាយ សង្ការចោឡំ គហេត្វា ចីវរំ កត្វា ធារេន្តោ បរិយន្តសេនាសនេ វសន្តោ ចរិស្សាមី’’តិ។ អស្សសីតិ ភវិស្សសិ។
242. Aṭṭhame ākoṭitapaccākoṭitānīti ekasmiṃ passe pāṇinā vā muggarena vā ākoṭanena ākoṭitāni, parivattetvā ākoṭanena paccākoṭitāni. Añjetvāti añjanena pūretvā. Acchaṃ pattanti vippasannavaṇṇaṃ mattikāpattaṃ. Kasmā pana thero evamakāsīti? Satthu ajjhāsayajānanatthaṃ. Evaṃ kirassa ahosi ‘‘sace satthā ‘sobhati vata me ayaṃ kaniṭṭhabhātiko’ti vakkhati, yāvajīvaṃ iminā vākārena carissāmi. Sace ettha dosaṃ dassati, imaṃ ākāraṃ pahāya saṅkāracoḷaṃ gahetvā cīvaraṃ katvā dhārento pariyantasenāsane vasanto carissāmī’’ti. Assasīti bhavissasi.
អញ្ញាតុញ្ឆេនាតិ អភិលក្ខិតេសុ ឥស្សរជនគេហេសុ កដុកភណ្ឌសម្ភារំ សុគន្ធំ ភោជនំ បរិយេសន្តស្ស ឧញ្ឆោ ញាតុញ្ឆោ នាម។ ឃរបដិបាដិយា បន ទ្វារេ ឋិតេន លទ្ធំ មិស្សកភោជនំ អញ្ញាតុញ្ឆោ នាម។ អយមិធ អធិប្បេតោ។ កាមេសុ អនបេក្ខិនន្តិ វត្ថុកាមកិលេសកាមេសុ និរបេក្ខំ។ អារញ្ញិកោ ចាតិអាទិ សព្ពំ សមាទានវសេនេវ វុត្តំ។ កាមេសុ ច អនបេក្ខោតិ ឥទំ សុត្តំ ទេវលោកេ អច្ឆរាយោ ទស្សេត្វា អាគតេន អបរភាគេ កថិតំ។ ឥមស្ស កថិតទិវសតោ បដ្ឋាយ ថេរោ ឃដេន្តោ វាយមន្តោ កតិបាហេនេវ អរហត្តេ បតិដ្ឋាយ សទេវកេ លោកេ អគ្គទក្ខិណេយ្យោ ជាតោ។ អដ្ឋមំ។
Aññātuñchenāti abhilakkhitesu issarajanagehesu kaṭukabhaṇḍasambhāraṃ sugandhaṃ bhojanaṃ pariyesantassa uñcho ñātuñcho nāma. Gharapaṭipāṭiyā pana dvāre ṭhitena laddhaṃ missakabhojanaṃ aññātuñcho nāma. Ayamidha adhippeto. Kāmesu anapekkhinanti vatthukāmakilesakāmesu nirapekkhaṃ. Āraññiko cātiādi sabbaṃ samādānavaseneva vuttaṃ. Kāmesu ca anapekkhoti idaṃ suttaṃ devaloke accharāyo dassetvā āgatena aparabhāge kathitaṃ. Imassa kathitadivasato paṭṭhāya thero ghaṭento vāyamanto katipāheneva arahatte patiṭṭhāya sadevake loke aggadakkhiṇeyyo jāto. Aṭṭhamaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. នន្ទសុត្តំ • 8. Nandasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. នន្ទសុត្តវណ្ណ្ណនា • 8. Nandasuttavaṇṇṇanā
