| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. நந்த³திஸுத்தவண்ணனா
2. Nandatisuttavaṇṇanā
12. து³தியே நந்த³தீதி துஸ்ஸதி அத்தமனோ ஹோதி. புத்திமாதி ப³ஹுபுத்தோ. தஸ்ஸ ஹி ஏகச்சே புத்தா கஸிகம்மங் கத்வா த⁴ஞ்ஞஸ்ஸ கொட்டே² பூரெந்தி, ஏகச்சே வணிஜ்ஜங் கத்வா ஹிரஞ்ஞஸுவண்ணங் ஆஹரந்தி, ஏகச்சே ராஜானங் உபட்ட²ஹித்வா யானவாஹனகா³மனிக³மாதீ³னி லப⁴ந்தி. அத² தேஸங் ஆனுபா⁴வஸங்கா²தங் ஸிரிங் அனுப⁴வமானா மாதா வா பிதா வா நந்த³தி. ச²ணதி³வஸாதீ³ஸு வா மண்டி³தபஸாதி⁴தே புத்தே ஸம்பத்திங் அனுப⁴வமானே தி³ஸ்வா நந்த³தீதி, ‘‘நந்த³தி புத்தேஹி புத்திமா’’தி ஆஹ. கோ³ஹி ததே²வாதி யதா² புத்திமா புத்தேஹி, ததா² கோ³ஸாமிகோபி ஸம்பன்னங் கோ³மண்ட³லங் தி³ஸ்வா கா³வோ நிஸ்ஸாய கோ³ரஸஸம்பத்திங் அனுப⁴வமானோ கோ³ஹி நந்த³தி. உபதீ⁴ ஹி நரஸ்ஸ நந்த³னாதி, எத்த² உபதீ⁴தி சத்தாரோ உபதீ⁴ – காமூபதி⁴, க²ந்தூ⁴பதி⁴, கிலேஸூபதி⁴, அபி⁴ஸங்கா²ரூபதீ⁴தி. காமாபி ஹி ‘‘யங் பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங், அயங் காமானங் அஸ்ஸாதோ³’’தி (ம॰ நி॰ 1.166) ஏவங் வுத்தஸ்ஸ ஸுக²ஸ்ஸ அதி⁴ட்டா²னபா⁴வதோ ‘‘உபதி⁴யதி எத்த² ஸுக²’’ந்தி இமினா வசனத்தே²ன உபதீ⁴தி வுச்சதி. க²ந்தா⁴பி க²ந்த⁴மூலகஸ்ஸ து³க்க²ஸ்ஸ அதி⁴ட்டா²னபா⁴வதோ, கிலேஸாபி அபாயது³க்க²ஸ்ஸ அதி⁴ட்டா²னபா⁴வதோ, அபி⁴ஸங்கா²ராபி ப⁴வது³க்க²ஸ்ஸ அதி⁴ட்டா²னபா⁴வதோதி. இத⁴ பன காமூபதி⁴ அதி⁴ப்பேதோ. பஞ்ச ஹி காமகு³ணா தேபூ⁴மிகாதி³பாஸாத³-உளாரஸயன-வத்தா²லங்கார-நாடகபரிவாராதி³வஸேன பச்சுபட்டி²தா பீதிஸோமனஸ்ஸங் உபஸங்ஹரமானா நரங் நந்த³யந்தி. தஸ்மா யதா² புத்தா ச கா³வோ ச, ஏவங் இமேபி உபதீ⁴ ஹி நரஸ்ஸ நந்த³னாதி வேதி³தப்³பா³. ந ஹி ஸோ நந்த³தி யோ நிரூபதீ⁴தி யோ காமகு³ணஸம்பத்திரஹிதோ த³லித்³தோ³ து³ல்லப⁴கா⁴ஸச்சா²த³னோ , ந ஹி ஸோ நந்த³தி. ஏவரூபோ மனுஸ்ஸபேதோ ச மனுஸ்ஸனேரயிகோ ச கிங் நந்தி³ஸ்ஸதி ப⁴க³வாதி ஆஹ.
12. Dutiye nandatīti tussati attamano hoti. Puttimāti bahuputto. Tassa hi ekacce puttā kasikammaṃ katvā dhaññassa koṭṭhe pūrenti, ekacce vaṇijjaṃ katvā hiraññasuvaṇṇaṃ āharanti, ekacce rājānaṃ upaṭṭhahitvā yānavāhanagāmanigamādīni labhanti. Atha tesaṃ ānubhāvasaṅkhātaṃ siriṃ anubhavamānā mātā vā pitā vā nandati. Chaṇadivasādīsu vā maṇḍitapasādhite putte sampattiṃ anubhavamāne disvā nandatīti, ‘‘nandati puttehi puttimā’’ti āha. Gohi tathevāti yathā puttimā puttehi, tathā gosāmikopi sampannaṃ gomaṇḍalaṃ disvā gāvo nissāya gorasasampattiṃ anubhavamāno gohi nandati. Upadhī hi narassa nandanāti, ettha upadhīti cattāro upadhī – kāmūpadhi, khandhūpadhi, kilesūpadhi, abhisaṅkhārūpadhīti. Kāmāpi hi ‘‘yaṃ pañca kāmaguṇe paṭicca uppajjati sukhaṃ somanassaṃ, ayaṃ kāmānaṃ assādo’’ti (ma. ni. 1.166) evaṃ vuttassa sukhassa adhiṭṭhānabhāvato ‘‘upadhiyati ettha sukha’’nti iminā vacanatthena upadhīti vuccati. Khandhāpi khandhamūlakassa dukkhassa adhiṭṭhānabhāvato, kilesāpi apāyadukkhassa adhiṭṭhānabhāvato, abhisaṅkhārāpi bhavadukkhassa adhiṭṭhānabhāvatoti. Idha pana kāmūpadhi adhippeto. Pañca hi kāmaguṇā tebhūmikādipāsāda-uḷārasayana-vatthālaṅkāra-nāṭakaparivārādivasena paccupaṭṭhitā pītisomanassaṃ upasaṃharamānā naraṃ nandayanti. Tasmā yathā puttā ca gāvo ca, evaṃ imepi upadhī hi narassa nandanāti veditabbā. Na hi so nandati yo nirūpadhīti yo kāmaguṇasampattirahito daliddo dullabhaghāsacchādano , na hi so nandati. Evarūpo manussapeto ca manussanerayiko ca kiṃ nandissati bhagavāti āha.
இத³ங் ஸுத்வா ஸத்தா² சிந்தேஸி – ‘‘அயங் தே³வதா ஸோகவத்து²மேவ நந்த³வத்து²ங் கரோதி, ஸோகவத்து²பா⁴வமஸ்ஸா தீ³பெஸ்ஸாமீ’’தி ப²லேன ப²லங் பாதெந்தோ விய தாயேவ உபமாய தஸ்ஸா வாத³ங் பி⁴ந்த³ந்தோ தமேவ கா³த²ங் பரிவத்தெத்வா ஸோசதீதி ஆஹ. தத்த² ஸோசதி புத்தேஹீதி விதே³ஸக³மனாதி³வஸேன புத்தேஸு நட்டே²ஸுபி நஸ்ஸந்தேஸுபி இதா³னி நஸ்ஸிஸ்ஸந்தீதி நாஸஸங்கீபி ஸோசதி, ததா² மதேஸுபி மரந்தேஸுபி சோரேஹி ராஜபுரிஸேஹி க³ஹிதேஸு வா பச்சத்தி²கானங் ஹத்த²ங் உபக³தேஸு வா மரணஸங்கீபி ஹுத்வா ஸோசதி. ருக்க²பப்³ப³தாதீ³ஹி பதித்வா ஹத்த²பாதா³தீ³னங் பே⁴த³வஸேன பி⁴ன்னேஸுபி பி⁴ஜ்ஜந்தேஸுபி பே⁴த³ஸங்கீபி ஹுத்வா ஸோசதி. யதா² ச புத்தேஹி புத்திமா, கோ³ஸாமிகோபி ததே²வ நவஹாகாரேஹி கோ³ஹி ஸோசதி. உபதீ⁴ ஹி நரஸ்ஸ ஸோசனாதி யதா² ச புத்தகா³வோ, ஏவங் பஞ்ச காமகு³ணோபதீ⁴பி –
Idaṃ sutvā satthā cintesi – ‘‘ayaṃ devatā sokavatthumeva nandavatthuṃ karoti, sokavatthubhāvamassā dīpessāmī’’ti phalena phalaṃ pātento viya tāyeva upamāya tassā vādaṃ bhindanto tameva gāthaṃ parivattetvā socatīti āha. Tattha socati puttehīti videsagamanādivasena puttesu naṭṭhesupi nassantesupi idāni nassissantīti nāsasaṅkīpi socati, tathā matesupi marantesupi corehi rājapurisehi gahitesu vā paccatthikānaṃ hatthaṃ upagatesu vā maraṇasaṅkīpi hutvā socati. Rukkhapabbatādīhi patitvā hatthapādādīnaṃ bhedavasena bhinnesupi bhijjantesupi bhedasaṅkīpi hutvā socati. Yathā ca puttehi puttimā, gosāmikopi tatheva navahākārehi gohi socati. Upadhī hi narassa socanāti yathā ca puttagāvo, evaṃ pañca kāmaguṇopadhīpi –
‘‘தஸ்ஸ சே காமயானஸ்ஸ, ச²ந்த³ஜாதஸ்ஸ ஜந்துனோ;
‘‘Tassa ce kāmayānassa, chandajātassa jantuno;
தே காமா பரிஹாயந்தி, ஸல்லவித்³தோ⁴வ ருப்பதீ’’தி. (ஸு॰ நி॰ 773) –
Te kāmā parihāyanti, sallaviddhova ruppatī’’ti. (su. ni. 773) –
வுத்தனயேன நரங் ஸோசந்தி. தஸ்மா நரஸ்ஸ ஸோசனா ஸோகவத்து²கமேவாதி வேதி³தப்³பா³. ந ஹி ஸோ ஸோசதி, யோ நிரூபதீ⁴தி யஸ்ஸ பன சதுப்³பி³தா⁴பேதே உபதி⁴யோ நத்தி², ஸோ நிருபதி⁴ மஹாகீ²ணாஸவோ கிங் ஸோசிஸ்ஸதி, ந ஸோசதி தே³வதேதி.
Vuttanayena naraṃ socanti. Tasmā narassa socanā sokavatthukamevāti veditabbā. Na hi so socati, yo nirūpadhīti yassa pana catubbidhāpete upadhiyo natthi, so nirupadhi mahākhīṇāsavo kiṃ socissati, na socati devateti.
நந்த³திஸுத்தவண்ணனா நிட்டி²தா.
Nandatisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. நந்த³திஸுத்தங் • 2. Nandatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. நந்த³திஸுத்தவண்ணனா • 2. Nandatisuttavaṇṇanā
