| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3. нанд̣̇ад̇т̇зраабад̣̇аанаван̣н̣анаа
3. Nandattheraapadānavaṇṇanā
бад̣̇умуд̇д̇арасса бхаг̇авад̇од̇иаад̣̇игам̣ ааяасмад̇о нанд̣̇ад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бад̣̇умуд̇д̇арасса бхаг̇авад̇о гаалз хам̣савад̇ийнаг̇арз згасмим̣ гулз ниб̣б̣ад̇д̇ид̇ваа вин̃н̃уд̇ам̣ бад̇д̇о бхаг̇авад̇о санд̇игз д̇хаммам̣ сун̣анд̇о сад̇т̇аарам̣ згам̣ бхигкум̣ инд̣̇риязсу г̇уд̇д̇ад̣̇ваараанам̣ аг̇г̇адтаанз табзнд̇ам̣ д̣̇исваа саяам̣ д̇ам̣ таананд̇арам̣ бад̇т̇знд̇о бхаг̇авад̇о бхигкусан̇гхасса жа бууж̇аасаггаараб̣ахулам̣ махаад̣̇аанам̣ бавад̇д̇зд̇ваа ‘‘ахам̣, бханд̇з, анааг̇ад̇з д̇умхаад̣̇исасса б̣уд̣̇д̇хасса зваруубо сааваго бхавзяяа’’нд̇и бан̣ид̇хаанам̣ агааси.
Padumuttarassabhagavatotiādikaṃ āyasmato nandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare ekasmiṃ kule nibbattitvā viññutaṃ patto bhagavato santike dhammaṃ suṇanto satthāraṃ ekaṃ bhikkhuṃ indriyesu guttadvārānaṃ aggaṭṭhāne ṭhapentaṃ disvā sayaṃ taṃ ṭhānantaraṃ patthento bhagavato bhikkhusaṅghassa ca pūjāsakkārabahulaṃ mahādānaṃ pavattetvā ‘‘ahaṃ, bhante, anāgate tumhādisassa buddhassa evarūpo sāvako bhaveyya’’nti paṇidhānaṃ akāsi.
со д̇ад̇о бадтааяа д̣̇звамануссзсу сам̣саранд̇о ад̇т̇ад̣̇ассисса бхаг̇авад̇о гаалз д̇хаммад̇ааяа наама над̣̇ияаа маханд̇о гажчабо худ̇ваа ниб̣б̣ад̇д̇о згад̣̇ивасам̣ сад̇т̇аарам̣ над̣̇им̣ д̇арид̇ум̣ д̇ийрз тид̇ам̣ д̣̇исваа саяам̣ бхаг̇аванд̇ам̣ д̇аарзд̇угаамо сад̇т̇у баад̣̇амуулз нибаж̇ж̇и. сад̇т̇аа д̇асса аж̇жхаасаяам̣ н̃ад̇ваа бидтим̣ абхирухи. со хадтад̇удто взг̇зна сод̇ам̣ чинд̣̇анд̇о сийгхад̇арам̣ барад̇ийрам̣ баабзси. бхаг̇аваа д̇асса анумод̣̇анам̣ вад̣̇анд̇о бхаавиним̣ самбад̇д̇им̣ гат̇зд̇ваа баггаами.
So tato paṭṭhāya devamanussesu saṃsaranto atthadassissa bhagavato kāle dhammatāya nāma nadiyā mahanto kacchapo hutvā nibbatto ekadivasaṃ satthāraṃ nadiṃ tarituṃ tīre ṭhitaṃ disvā sayaṃ bhagavantaṃ tāretukāmo satthu pādamūle nipajji. Satthā tassa ajjhāsayaṃ ñatvā piṭṭhiṃ abhiruhi. So haṭṭhatuṭṭho vegena sotaṃ chindanto sīghataraṃ paratīraṃ pāpesi. Bhagavā tassa anumodanaṃ vadanto bhāviniṃ sampattiṃ kathetvā pakkāmi.
со д̇зна бун̃н̃агаммзна суг̇ад̇ийсуязва сам̣саранд̇о имасмим̣ б̣уд̣̇д̇хуббаад̣̇з габилавад̇т̇усмим̣ суд̣̇д̇ход̣̇анамахаарааж̇асса аг̇г̇амахзсияаа махаабаж̇аабад̇иг̇од̇амияаа гужчимхи ниб̣б̣ад̇д̇о, д̇асса наамаг̇г̇ахан̣ад̣̇ивасз н̃аад̇исан̇гхам̣ нанд̣̇аяанд̇о ж̇аад̇од̇и ‘‘нанд̣̇о’’д̇взва наамам̣ агам̣су. д̇асса ваяаббад̇д̇агаалз бхаг̇аваа бавад̇д̇ид̇аварад̇хаммажагго логаануг̇г̇ахам̣ гаронд̇о ануггамзна габилавад̇т̇ум̣ г̇анд̇ваа н̃аад̇исамааг̇амз богкаравассам̣ адтуббад̇д̇им̣ гад̇ваа взссанд̇араж̇аад̇агам̣ (ж̇аа. 2.22.1655 аад̣̇аяо) гат̇зд̇ваа д̣̇уд̇ияад̣̇ивасз бин̣д̣ааяа бавидто ‘‘уд̇д̇идтз наббамаж̇ж̇зяяаа’’д̇и (д̇ха. ба. 168) г̇аат̇ааяа бид̇арам̣ сод̇аабад̇д̇ипалз бад̇идтаабзд̇ваа нивзсанам̣ г̇анд̇ваа ‘‘д̇хамман̃жарз сужарид̇а’’нд̇и (д̇ха. ба. 169) г̇аат̇ааяа махаабаж̇аабад̇им̣ сод̇аабад̇д̇ипалз рааж̇аанам̣ сагад̣̇ааг̇аамипалз бад̇идтаабзд̇ваа д̇ад̇ияад̣̇ивасз нанд̣̇агумаарасса абхисзгаг̇зхабавзсанаааваахаман̇г̇алзсу вад̇д̇амаанзсу бин̣д̣ааяа баависи. сад̇т̇аа нанд̣̇агумаарасса хад̇т̇з бад̇д̇ам̣ д̣̇ад̇ваа ман̇г̇алам̣ вад̇ваа д̇асса хад̇т̇ад̇о бад̇д̇ам̣ аг̇г̇ахзд̇ваава вихаарам̣ г̇ад̇о , д̇ам̣ бад̇д̇ахад̇т̇ам̣ вихаарам̣ ааг̇ад̇ам̣ анижчамаанам̣язва баб̣б̣ааж̇зд̇ваа д̇ат̇аабаб̣б̣ааж̇ид̇ад̇д̇ааязва анабхирад̇ияаа бийл̣ид̇ам̣ н̃ад̇ваа убааязна д̇асса д̇ам̣ анабхирад̇им̣ винод̣̇зси. со яонисо бадисан̇кааяа вибассанам̣ бадтабзд̇ваа нажирассзва арахад̇д̇ам̣ баабун̣и. т̇зро буна д̣̇ивасз бхаг̇аванд̇ам̣ убасан̇гамид̇ваа звамааха – ‘‘яам̣ мз, бханд̇з, бхаг̇аваа баадибхог̇о бан̃жаннам̣ ажчараасад̇аанам̣ бадилаабхааяа гагудабаад̣̇аанам̣, мун̃жаамахам̣, бханд̇з, бхаг̇аванд̇ам̣ зд̇асмаа бадиссаваа’’д̇и. бхаг̇авааби ‘‘яад̣̇зва д̇з, нанд̣̇а, анубаад̣̇ааяа аасавзхи жид̇д̇ам̣ вимуд̇д̇ам̣, д̇ад̣̇аахам̣ муд̇д̇о зд̇асмаа бадиссаваа’’д̇и ааха. ат̇асса бхаг̇аваа сависзсам̣ инд̣̇риязсу г̇уд̇д̇ад̣̇ваарад̇ам̣ н̃ад̇ваа д̇ам̣ г̇ун̣ам̣ вибхаавзнд̇о ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ инд̣̇риязсу г̇уд̇д̇ад̣̇ваараанам̣ яад̣̇ид̣̇ам̣ нанд̣̇о’’д̇и (а. ни. 1.219, 230) инд̣̇риязсу г̇уд̇д̇ад̣̇ваарабхаавзна нам̣ зд̇ад̣̇аг̇г̇з табзси. т̇зро хи ‘‘инд̣̇рияаасам̣варам̣ ниссааяа имам̣ виббагаарам̣ бад̇д̇о, д̇амахам̣ судту ниг̇г̇ан̣хиссаамий’’д̇и уссаахаж̇аад̇о б̣алавахирод̇д̇аббо д̇ад̇т̇а жа гад̇аад̇хигаарад̇д̇аа инд̣̇рияасам̣варз уггам̣сабаарамим̣ аг̇амааси.
So tena puññakammena sugatīsuyeva saṃsaranto imasmiṃ buddhuppāde kapilavatthusmiṃ suddhodanamahārājassa aggamahesiyā mahāpajāpatigotamiyā kucchimhi nibbatto, tassa nāmaggahaṇadivase ñātisaṅghaṃ nandayanto jātoti ‘‘nando’’tveva nāmaṃ akaṃsu. Tassa vayappattakāle bhagavā pavattitavaradhammacakko lokānuggahaṃ karonto anukkamena kapilavatthuṃ gantvā ñātisamāgame pokkharavassaṃ aṭṭhuppattiṃ katvā vessantarajātakaṃ (jā. 2.22.1655 ādayo) kathetvā dutiyadivase piṇḍāya paviṭṭho ‘‘uttiṭṭhe nappamajjeyyā’’ti (dha. pa. 168) gāthāya pitaraṃ sotāpattiphale patiṭṭhāpetvā nivesanaṃ gantvā ‘‘dhammañcare sucarita’’nti (dha. pa. 169) gāthāya mahāpajāpatiṃ sotāpattiphale rājānaṃ sakadāgāmiphale patiṭṭhāpetvā tatiyadivase nandakumārassa abhisekagehapavesanaāvāhamaṅgalesu vattamānesu piṇḍāya pāvisi. Satthā nandakumārassa hatthe pattaṃ datvā maṅgalaṃ vatvā tassa hatthato pattaṃ aggahetvāva vihāraṃ gato , taṃ pattahatthaṃ vihāraṃ āgataṃ anicchamānaṃyeva pabbājetvā tathāpabbājitattāyeva anabhiratiyā pīḷitaṃ ñatvā upāyena tassa taṃ anabhiratiṃ vinodesi. So yoniso paṭisaṅkhāya vipassanaṃ paṭṭhapetvā nacirasseva arahattaṃ pāpuṇi. Thero puna divase bhagavantaṃ upasaṅkamitvā evamāha – ‘‘yaṃ me, bhante, bhagavā pāṭibhogo pañcannaṃ accharāsatānaṃ paṭilābhāya kakuṭapādānaṃ, muñcāmahaṃ, bhante, bhagavantaṃ etasmā paṭissavā’’ti. Bhagavāpi ‘‘yadeva te, nanda, anupādāya āsavehi cittaṃ vimuttaṃ, tadāhaṃ mutto etasmā paṭissavā’’ti āha. Athassa bhagavā savisesaṃ indriyesu guttadvārataṃ ñatvā taṃ guṇaṃ vibhāvento ‘‘etadaggaṃ, bhikkhave, mama sāvakānaṃ bhikkhūnaṃ indriyesu guttadvārānaṃ yadidaṃ nando’’ti (a. ni. 1.219, 230) indriyesu guttadvārabhāvena naṃ etadagge ṭhapesi. Thero hi ‘‘indriyāsaṃvaraṃ nissāya imaṃ vippakāraṃ patto, tamahaṃ suṭṭhu niggaṇhissāmī’’ti ussāhajāto balavahirottappo tattha ca katādhikārattā indriyasaṃvare ukkaṃsapāramiṃ agamāsi.
27. звам̣ со зд̇ад̣̇аг̇г̇адтаанам̣ бад̇ваа ад̇д̇ано буб̣б̣агаммам̣ сарид̇ваа соманассаббад̇д̇о буб̣б̣ажарид̇аабад̣̇аанам̣ багаасзнд̇о бад̣̇умуд̇д̇арасса бхаг̇авад̇од̇иаад̣̇имааха. вад̇т̇ам̣ комам̣ маяаа д̣̇иннанд̇и комарадтз ж̇аад̇ам̣ вад̇т̇ам̣ бхаг̇авад̇и жид̇д̇аббасаад̣̇зна г̇аараваб̣ахумаанзна маяаа барамасукумам̣ комавад̇т̇ам̣ д̣̇иннанд̇и ад̇т̇о. саяамбхуссаад̇и саяамзва бхууд̇асса ж̇аад̇асса арияааяа ж̇аад̇ияаа ниб̣б̣ад̇д̇асса. махзсинод̇и маханд̇з сийласамаад̇хибан̃н̃аавимуд̇д̇ивимуд̇д̇ин̃аан̣ад̣̇ассанагканд̇хз зси г̇авзсийд̇и махзси, д̇асса махзсино саяамбхусса жийварад̇т̇ааяа комавад̇т̇ам̣ маяаа д̣̇иннанд̇и самб̣анд̇хо.
27. Evaṃ so etadaggaṭṭhānaṃ patvā attano pubbakammaṃ saritvā somanassappatto pubbacaritāpadānaṃ pakāsento padumuttarassa bhagavatotiādimāha. Vatthaṃ khomaṃ mayā dinnanti khomaraṭṭhe jātaṃ vatthaṃ bhagavati cittappasādena gāravabahumānena mayā paramasukhumaṃ khomavatthaṃ dinnanti attho. Sayambhussāti sayameva bhūtassa jātassa ariyāya jātiyā nibbattassa. Mahesinoti mahante sīlasamādhipaññāvimuttivimuttiñāṇadassanakkhandhe esi gavesīti mahesi, tassa mahesino sayambhussa cīvaratthāya khomavatthaṃ mayā dinnanti sambandho.
28. д̇ам̣ мз б̣уд̣̇д̇хо вияаагаасийд̇и зд̇т̇а д̇анд̇и саамяад̇т̇з убаяог̇аважанам̣, д̇асса вад̇т̇ад̣̇ааяагасса мз д̣̇аанапалам̣ висзсзна агааси гат̇зси б̣уд̣̇д̇ход̇и ад̇т̇о. ж̇алаж̇уд̇д̇аманаамагод̇и бад̣̇умуд̇д̇аранаамаго. ‘‘ж̇аларуд̇д̇аманааяаго’’д̇иби баато, д̇асса ж̇аламаанаанам̣ д̣̇зваб̣рахмаанам̣ уд̇д̇аманааяаго бад̇хаанод̇и ад̇т̇о. иминаа вад̇т̇ад̣̇аанзнаад̇и иминаа вад̇т̇ад̣̇аанасса ниссанд̣̇зна д̇вам̣ анааг̇ад̇з хзмаван̣н̣о суван̣н̣аван̣н̣о бхависсаси.
28.Taṃ me buddho viyākāsīti ettha tanti sāmyatthe upayogavacanaṃ, tassa vatthadāyakassa me dānaphalaṃ visesena akāsi kathesi buddhoti attho. Jalajuttamanāmakoti padumuttaranāmako. ‘‘Jalaruttamanāyako’’tipi pāṭho, tassa jalamānānaṃ devabrahmānaṃ uttamanāyako padhānoti attho. Iminā vatthadānenāti iminā vatthadānassa nissandena tvaṃ anāgate hemavaṇṇo suvaṇṇavaṇṇo bhavissasi.
29. д̣̇вз самбад̇д̇им̣ анубход̇ваад̇и д̣̇иб̣б̣амануссасан̇каад̇аа д̣̇вз самбад̇д̇ияо анубхавид̇ваа. гусаламуулзхи жод̣̇ид̇од̇и гусалааваяавзхи гусалагодтаасзхи жод̣̇ид̇о бзсид̇о, ‘‘д̇вам̣ иминаа бун̃н̃зна сад̇т̇у гулам̣ басаваахий’’д̇и бзсид̇о вияаад̇и ад̇т̇о. ‘‘г̇од̇амасса бхаг̇авад̇о ганидто д̇вам̣ бхависсасий’’д̇и б̣яаагаасийд̇и самб̣анд̇хо.
29.Dvesampattiṃ anubhotvāti dibbamanussasaṅkhātā dve sampattiyo anubhavitvā. Kusalamūlehi coditoti kusalāvayavehi kusalakoṭṭhāsehi codito pesito, ‘‘tvaṃ iminā puññena satthu kulaṃ pasavāhī’’ti pesito viyāti attho. ‘‘Gotamassa bhagavato kaniṭṭho tvaṃ bhavissasī’’ti byākāsīti sambandho.
30. рааг̇арад̇д̇о сукасийлод̇и гилзсагаамзхи рад̇д̇о аллийно гааяасукажид̇д̇асукаанубхаванасабхааво. гаамзсу г̇зд̇хамааяуд̇од̇и вад̇т̇угаамзсу г̇зд̇хасан̇каад̇ааяа д̇ан̣хааяа ааяуд̇о яож̇ид̇од̇и ад̇т̇о. б̣уд̣̇д̇хзна жод̣̇ид̇о санд̇о, д̇ад̣̇аа д̇ванд̇и яасмаа гаамзсу г̇зд̇хид̇о, д̇ад̣̇аа д̇асмаа д̇вам̣ ад̇д̇ано бхаад̇угзна г̇од̇амаб̣уд̣̇д̇хзна жод̣̇ид̇о баб̣б̣аж̇ж̇ааяа уяяож̇ид̇о д̇асса санд̇игз баб̣б̣аж̇иссасийд̇и самб̣анд̇хо.
30.Rāgaratto sukhasīloti kilesakāmehi ratto allīno kāyasukhacittasukhānubhavanasabhāvo. Kāmesu gedhamāyutoti vatthukāmesu gedhasaṅkhātāya taṇhāya āyuto yojitoti attho. Buddhena codito santo, tadā tvanti yasmā kāmesu gedhito, tadā tasmā tvaṃ attano bhātukena gotamabuddhena codito pabbajjāya uyyojito tassa santike pabbajissasīti sambandho.
31. баб̣б̣аж̇ид̇ваана д̇вам̣ д̇ад̇т̇аад̇и д̇асмим̣ г̇од̇амасса бхаг̇авад̇о саасанз д̇вам̣ баб̣б̣аж̇ид̇ваа гусаламуулзна муулабхууд̇зна бун̃н̃асамбхаарзна жод̣̇ид̇о бхааванааяам̣ нияож̇ид̇о саб̣б̣аасавз сагалаасавз барин̃н̃ааяа ж̇аанид̇ваа баж̇ахид̇ваа анаамаяо нид̣̇д̣̇угко ниб̣б̣ааяиссаси ад̣̇ассанам̣ баабзссаси, абан̣н̣ад̇д̇игабхаавам̣ г̇амиссасийд̇и ад̇т̇о.
31.Pabbajitvāna tvaṃ tatthāti tasmiṃ gotamassa bhagavato sāsane tvaṃ pabbajitvā kusalamūlena mūlabhūtena puññasambhārena codito bhāvanāyaṃ niyojito sabbāsave sakalāsave pariññāya jānitvā pajahitvā anāmayo niddukkho nibbāyissasi adassanaṃ pāpessasi, apaṇṇattikabhāvaṃ gamissasīti attho.
32. сад̇агаббасахассамхийд̇и ид̇о габбад̇о буб̣б̣з сад̇агаббаад̇хигз сахассамз габбамхи жзл̣анаамагаа жад̇д̇ааро жаггавад̇д̇ирааж̇аано ахзсунд̇и ад̇т̇о. садти габбасахассаанийд̇и габбасахассаани садти жа ад̇иггамид̇ваа хздтаа згасмим̣ габбз жад̇д̇ааро ж̇анаа убажзл̣аа наама жаггавад̇д̇ирааж̇аано жад̇уусу ж̇аад̇ийсу ахзсунд̇и ад̇т̇о.
32.Satakappasahassamhīti ito kappato pubbe satakappādhike sahassame kappamhi ceḷanāmakā cattāro cakkavattirājāno ahesunti attho. Saṭṭhi kappasahassānīti kappasahassāni saṭṭhi ca atikkamitvā heṭṭhā ekasmiṃ kappe cattāro janā upaceḷā nāma cakkavattirājāno catūsu jātīsu ahesunti attho.
33. бан̃жагаббасахассамхийд̇и бан̃жагаббаад̇хигз сахассамз габбамхи жзл̣аа наама жад̇д̇ааро ж̇анаа жаггавад̇д̇ирааж̇аано сад̇д̇ахи рад̇анзхи самбаннаа саман̇г̇ийбхууд̇аа ж̇амб̣уд̣̇ийбаабараг̇ояаанауд̇д̇арагурубуб̣б̣авид̣̇зхад̣̇ийбасан̇каад̇з жад̇уд̣̇ийбамхи иссараа бад̇хаанаа висум̣ ахзсунд̇и ад̇т̇о. сзсам̣ вуд̇д̇анаяамзваад̇и.
33.Pañcakappasahassamhīti pañcakappādhike sahassame kappamhi ceḷā nāma cattāro janā cakkavattirājāno sattahi ratanehi sampannā samaṅgībhūtā jambudīpaaparagoyānauttarakurupubbavidehadīpasaṅkhāte catudīpamhi issarā padhānā visuṃ ahesunti attho. Sesaṃ vuttanayamevāti.
нанд̣̇ад̇т̇зраабад̣̇аанаван̣н̣анаа самад̇д̇аа.
Nandattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3. нанд̣̇ад̇т̇зраабад̣̇аанам̣ • 3. Nandattheraapadānaṃ
