| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[385] 10. நந்தி³யமிக³ராஜஜாதகவண்ணனா
[385] 10. Nandiyamigarājajātakavaṇṇanā
ஸசே ப்³ராஹ்மண க³ச்சே²ஸீதி இத³ங் ஸத்தா² ஜேதவனே விஹரந்தோ ஏகங் மாதுபோஸகபி⁴க்கு²ங் ஆரப்³ப⁴ கதே²ஸி. தஞ்ஹி ஸத்தா² ‘‘ஸச்சங் கிர த்வங் பி⁴க்கு² கி³ஹீ போஸேஸீ’’தி புச்சி²த்வா ‘‘ஸச்சங், ப⁴ந்தே’’தி வுத்தே ‘‘கிங் தே ஹொந்தீ’’தி வுத்தே ‘‘மாதாபிதரோ மே, ப⁴ந்தே’’தி வுத்தே ‘‘ஸாது⁴ ஸாது⁴ பி⁴க்கு² போராணகபண்டி³தானங் வங்ஸங் பாலேஸி, போராணகபண்டி³தா ஹி திரச்சா²னயோனியங் நிப்³ப³த்தித்வாபி மாதாபிதூனங் ஜீவிதங் அத³ங்ஸூ’’தி வத்வா அதீதங் ஆஹரி.
Sacebrāhmaṇa gacchesīti idaṃ satthā jetavane viharanto ekaṃ mātuposakabhikkhuṃ ārabbha kathesi. Tañhi satthā ‘‘saccaṃ kira tvaṃ bhikkhu gihī posesī’’ti pucchitvā ‘‘saccaṃ, bhante’’ti vutte ‘‘kiṃ te hontī’’ti vutte ‘‘mātāpitaro me, bhante’’ti vutte ‘‘sādhu sādhu bhikkhu porāṇakapaṇḍitānaṃ vaṃsaṃ pālesi, porāṇakapaṇḍitā hi tiracchānayoniyaṃ nibbattitvāpi mātāpitūnaṃ jīvitaṃ adaṃsū’’ti vatvā atītaṃ āhari.
அதீதே கோஸலரட்டே² ஸாகேதே கோஸலராஜே ரஜ்ஜங் காரெந்தே போ³தி⁴ஸத்தோ மிக³யோனியங் நிப்³ப³த்தித்வா வயப்பத்தோ நந்தி³யமிகோ³ நாம ஹுத்வா ஸீலாசாரஸம்பன்னோ மாதாபிதரோ போஸேஸி. ததா³ கோஸலராஜா மிக³வித்தகோவ அஹோஸி. ஸோ பன மனுஸ்ஸானங் கஸிகம்மாதீ³னி காதுங் அத³த்வா மஹாபரிவாரோ தே³வஸிகங் மிக³வங் க³ச்ச²தி. மனுஸ்ஸா ஸன்னிபதித்வா ‘‘அய்யா, அயங் ராஜா அம்ஹாகங் கம்மச்சே²த³ங் கரோதி, க⁴ராவாஸோபி நஸ்ஸதி, யங்னூன மயங் அஜ்ஜுனவனங் உய்யானங் பரிக்கி²பித்வா த்³வாரங் யோஜெத்வா போரக்க²ணிங் க²ணித்வா திணானி ஆரோபெத்வா த³ண்ட³முக்³க³ராதி³ஹத்தா² அரஞ்ஞங் பவிஸித்வா கு³ம்பே³ பஹரந்தா மிகே³ நீஹரித்வா பரிவாரெத்வா கோ³ரூபானி விய வஜங் உய்யானங் பவேஸெத்வா த்³வாரங் பித³ஹித்வா ரஞ்ஞோ ஆரோசெத்வா அத்தனோ கம்மங் கரெய்யாமா’’தி மந்தயிங்ஸு. ‘‘அத்தே²ஸோ உபாயோ’’தி ஸப்³பே³ ஏகச்ச²ந்தா³ ஹுத்வா உய்யானங் ஸஜ்ஜெத்வா அரஞ்ஞங் பவிஸித்வா யோஜனமத்தட்டா²னங் பரிக்கி²பிங்ஸு.
Atīte kosalaraṭṭhe sākete kosalarāje rajjaṃ kārente bodhisatto migayoniyaṃ nibbattitvā vayappatto nandiyamigo nāma hutvā sīlācārasampanno mātāpitaro posesi. Tadā kosalarājā migavittakova ahosi. So pana manussānaṃ kasikammādīni kātuṃ adatvā mahāparivāro devasikaṃ migavaṃ gacchati. Manussā sannipatitvā ‘‘ayyā, ayaṃ rājā amhākaṃ kammacchedaṃ karoti, gharāvāsopi nassati, yaṃnūna mayaṃ ajjunavanaṃ uyyānaṃ parikkhipitvā dvāraṃ yojetvā porakkhaṇiṃ khaṇitvā tiṇāni āropetvā daṇḍamuggarādihatthā araññaṃ pavisitvā gumbe paharantā mige nīharitvā parivāretvā gorūpāni viya vajaṃ uyyānaṃ pavesetvā dvāraṃ pidahitvā rañño ārocetvā attano kammaṃ kareyyāmā’’ti mantayiṃsu. ‘‘Attheso upāyo’’ti sabbe ekacchandā hutvā uyyānaṃ sajjetvā araññaṃ pavisitvā yojanamattaṭṭhānaṃ parikkhipiṃsu.
தஸ்மிங் க²ணே நந்தி³யோ ஏகஸ்மிங் கு²த்³த³ககு³ம்பே³ மாதாபிதரோ க³ஹெத்வா பூ⁴மியங் நிபன்னோ ஹோதி. மனுஸ்ஸா நானாப²லகாவுத⁴ஹத்தா² பா³ஹுனா பா³ஹுங் பீளெத்வா தங் கு³ம்ப³ங் பரிக்கி²பிங்ஸு. அதே²கச்சே மிகே³ ஓலோகெந்தா தங் கு³ம்ப³ங் பவிஸிங்ஸு. நந்தி³யோ தே தி³ஸ்வா ‘‘அஜ்ஜ மயா ஜீவிதங் பரிச்சஜித்வா மாதாபிதூனங் ஜீவிதங் தா³துங் வட்டதீ’’தி சிந்தெத்வா உட்டா²ய மாதாபிதரோ வந்தி³த்வா ‘‘அம்மதாத, இமே மனுஸ்ஸா இமங் கு³ம்ப³ங் பவிஸித்வா அம்ஹே தயோபி பஸ்ஸிஸ்ஸந்தி, தும்ஹே ஏகேன உபாயேன ஜீவெய்யாத², ஜீவிதங் வோ ஸெய்யோ, அஹங் தும்ஹாகங் ஜீவிததா³னங் த³த்வா மனுஸ்ஸேஹி கு³ம்ப³பரியந்தே ட²த்வா கு³ம்பே³ பஹடமத்தேயேவ நிக்க²மிஸ்ஸாமி, அத² தே ‘இமஸ்மிங் கு²த்³த³ககு³ம்பே³ ஏகோயேவ மிகோ³ ப⁴விஸ்ஸதீ’தி மஞ்ஞமானா கு³ம்ப³ங் ந பவிஸிஸ்ஸந்தி, தும்ஹே அப்பமத்தா ஹோதா²’’தி மாதாபிதரோ க²மாபெத்வா க³மனஸஜ்ஜோ அட்டா²ஸி. ஸோ மனுஸ்ஸேஹி கு³ம்ப³பரியந்தே ட²த்வா உன்னாதெ³த்வா கு³ம்பே³ பஹடமத்தேயேவ ததோ நிக்க²மி. தே ‘‘ஏகோவெத்த² மிகோ³ ப⁴விஸ்ஸதீ’’தி கு³ம்ப³ங் ந பவிஸிங்ஸு. அத² நந்தி³யோ க³ந்த்வா மிகா³னங் அந்தரங் பாவிஸி. மனுஸ்ஸா பரிவாரெத்வா ஸப்³பே³ மிகே³ உய்யானங் பவேஸெத்வா த்³வாரங் த²கெத்வா ரஞ்ஞோ ஆரோசெத்வா ஸகஸகட்டா²னானி அக³மங்ஸு.
Tasmiṃ khaṇe nandiyo ekasmiṃ khuddakagumbe mātāpitaro gahetvā bhūmiyaṃ nipanno hoti. Manussā nānāphalakāvudhahatthā bāhunā bāhuṃ pīḷetvā taṃ gumbaṃ parikkhipiṃsu. Athekacce mige olokentā taṃ gumbaṃ pavisiṃsu. Nandiyo te disvā ‘‘ajja mayā jīvitaṃ pariccajitvā mātāpitūnaṃ jīvitaṃ dātuṃ vaṭṭatī’’ti cintetvā uṭṭhāya mātāpitaro vanditvā ‘‘ammatāta, ime manussā imaṃ gumbaṃ pavisitvā amhe tayopi passissanti, tumhe ekena upāyena jīveyyātha, jīvitaṃ vo seyyo, ahaṃ tumhākaṃ jīvitadānaṃ datvā manussehi gumbapariyante ṭhatvā gumbe pahaṭamatteyeva nikkhamissāmi, atha te ‘imasmiṃ khuddakagumbe ekoyeva migo bhavissatī’ti maññamānā gumbaṃ na pavisissanti, tumhe appamattā hothā’’ti mātāpitaro khamāpetvā gamanasajjo aṭṭhāsi. So manussehi gumbapariyante ṭhatvā unnādetvā gumbe pahaṭamatteyeva tato nikkhami. Te ‘‘ekovettha migo bhavissatī’’ti gumbaṃ na pavisiṃsu. Atha nandiyo gantvā migānaṃ antaraṃ pāvisi. Manussā parivāretvā sabbe mige uyyānaṃ pavesetvā dvāraṃ thaketvā rañño ārocetvā sakasakaṭṭhānāni agamaṃsu.
ததோ பட்டா²ய ராஜா ஸயமேவ க³ந்த்வா ஏகங் மிக³ங் விஜ்ஜி²த்வா தங் க³ஹெத்வா ஏஹீதி ஏகங் பேஸெத்வா ஆஹராபேஸி. மிகா³ வாரங் ட²பயிங்ஸு, பத்தவாரோ மிகோ³ ஏகமந்தே திட்ட²தி, தங் விஜ்ஜி²த்வா க³ண்ஹந்தி. நந்தி³யோ பொக்க²ரணியங் பானீயங் பிவதி, திணானி கா²த³தி, வாரோ பனஸ்ஸ ந தாவ பாபுணாதி. அத² ப³ஹூனங் தி³வஸானங் அச்சயேன தஸ்ஸ மாதாபிதரோ தங் த³ட்டு²காமா ஹுத்வா ‘‘அம்ஹாகங் புத்தோ நந்தி³யமிக³ராஜா நாக³ப³லோ தா²மஸம்பன்னோ, ஸசே ஜீவதி, அவஸ்ஸங் வதிங் லங்கி⁴த்வா அம்ஹாகங் த³ஸ்ஸனத்தா²ய ஆக³மிஸ்ஸதி, ஸாஸனமஸ்ஸ பேஸெஸ்ஸாமா’’தி சிந்தெத்வா மக்³க³ஸமீபே ட²த்வா ஏகங் ப்³ராஹ்மணங் தி³ஸ்வா ‘‘அய்ய, கஹங் க³ச்ச²ஸீ’’தி மானுஸிகாய வாசாய புச்சி²த்வா ‘‘ஸாகேத’’ந்தி வுத்தே புத்தஸ்ஸ ஸாஸனங் பஹிணந்தா பட²மங் கா³த²மாஹங்ஸு –
Tato paṭṭhāya rājā sayameva gantvā ekaṃ migaṃ vijjhitvā taṃ gahetvā ehīti ekaṃ pesetvā āharāpesi. Migā vāraṃ ṭhapayiṃsu, pattavāro migo ekamante tiṭṭhati, taṃ vijjhitvā gaṇhanti. Nandiyo pokkharaṇiyaṃ pānīyaṃ pivati, tiṇāni khādati, vāro panassa na tāva pāpuṇāti. Atha bahūnaṃ divasānaṃ accayena tassa mātāpitaro taṃ daṭṭhukāmā hutvā ‘‘amhākaṃ putto nandiyamigarājā nāgabalo thāmasampanno, sace jīvati, avassaṃ vatiṃ laṅghitvā amhākaṃ dassanatthāya āgamissati, sāsanamassa pesessāmā’’ti cintetvā maggasamīpe ṭhatvā ekaṃ brāhmaṇaṃ disvā ‘‘ayya, kahaṃ gacchasī’’ti mānusikāya vācāya pucchitvā ‘‘sāketa’’nti vutte puttassa sāsanaṃ pahiṇantā paṭhamaṃ gāthamāhaṃsu –
71.
71.
‘‘ஸசே ப்³ராஹ்மண க³ச்சே²ஸி, ஸாகேதே அஜ்ஜுனங் வனங்;
‘‘Sace brāhmaṇa gacchesi, sākete ajjunaṃ vanaṃ;
வஜ்ஜாஸி நந்தி³யங் நாம, புத்தங் அஸ்மாகமோரஸங்;
Vajjāsi nandiyaṃ nāma, puttaṃ asmākamorasaṃ;
மாதா பிதா ச தே வுத்³தா⁴, தே தங் இச்ச²ந்தி பஸ்ஸிது’’ந்தி.
Mātā pitā ca te vuddhā, te taṃ icchanti passitu’’nti.
தஸ்ஸத்தோ² – ஸசே, த்வங் ப்³ராஹ்மண, ஸாகேதங் க³ச்ச²ஸி, ஸாகேதே அஜ்ஜுனவனங் நாம உய்யானங் அத்தி², தத்த² அம்ஹாகங் புத்தோ நந்தி³யோ நாம மிகோ³ அத்தி², தங் வதெ³ய்யாஸி ‘‘மாதாபிதரோ தே வுட்³டா⁴ யாவ ந மரந்தி, தாவ தங் பஸ்ஸிதுங் இச்ச²ந்தீ’’தி.
Tassattho – sace, tvaṃ brāhmaṇa, sāketaṃ gacchasi, sākete ajjunavanaṃ nāma uyyānaṃ atthi, tattha amhākaṃ putto nandiyo nāma migo atthi, taṃ vadeyyāsi ‘‘mātāpitaro te vuḍḍhā yāva na maranti, tāva taṃ passituṃ icchantī’’ti.
ஸோ ‘‘ஸாதூ⁴’’தி ஸம்படிச்சி²த்வா ஸாகேதங் க³ந்த்வா புனதி³வஸே உய்யானங் பவிஸித்வா ‘‘நந்தி³யமிகோ³ நாம கதரோ’’தி புச்சி². மிகோ³ ஆக³ந்த்வா தஸ்ஸ ஸமீபே ட²த்வா ‘‘அஹ’’ந்தி ஆஹ. ப்³ராஹ்மணோ தமத்த²ங் ஆரோசேஸி. நந்தி³யோ தங் ஸுத்வா ‘‘க³ச்செ²ய்யாமஹங், ப்³ராஹ்மண, வதிங் லங்கி⁴த்வா நோ ந க³ச்செ²ய்யங், மயா பன ரஞ்ஞோ ஸந்தகங் நிவாபபானபோ⁴ஜனங் பு⁴த்தங், தங் மே இணட்டா²னே டி²தங், இமேஸஞ்ச மிகா³னங் மஜ்ஜே² சிரவுத்தொ²ஸ்மி, தஸ்ஸ மே ரஞ்ஞோ சேவ ஏதேஸஞ்ச ஸொத்தி²பா⁴வங் அகத்வா அத்தனோ ப³லங் அத³ஸ்ஸெத்வா க³மனங் நாம ந யுத்தங், அத்தனோ வாரே பன ஸம்பத்தே அஹங் ஏதேஸங் ஸொத்தி²பா⁴வங் கத்வா ஸுகி²தோ ஆக³ச்சி²ஸ்ஸாமீ’’தி தமத்த²ங் பகாஸெந்தோ த்³வே கா³தா² அபா⁴ஸி –
So ‘‘sādhū’’ti sampaṭicchitvā sāketaṃ gantvā punadivase uyyānaṃ pavisitvā ‘‘nandiyamigo nāma kataro’’ti pucchi. Migo āgantvā tassa samīpe ṭhatvā ‘‘aha’’nti āha. Brāhmaṇo tamatthaṃ ārocesi. Nandiyo taṃ sutvā ‘‘gaccheyyāmahaṃ, brāhmaṇa, vatiṃ laṅghitvā no na gaccheyyaṃ, mayā pana rañño santakaṃ nivāpapānabhojanaṃ bhuttaṃ, taṃ me iṇaṭṭhāne ṭhitaṃ, imesañca migānaṃ majjhe ciravutthosmi, tassa me rañño ceva etesañca sotthibhāvaṃ akatvā attano balaṃ adassetvā gamanaṃ nāma na yuttaṃ, attano vāre pana sampatte ahaṃ etesaṃ sotthibhāvaṃ katvā sukhito āgacchissāmī’’ti tamatthaṃ pakāsento dve gāthā abhāsi –
72.
72.
‘‘பு⁴த்தா மயா நிவாபானி, ராஜினோ பானபோ⁴ஜனங்;
‘‘Bhuttā mayā nivāpāni, rājino pānabhojanaṃ;
தங் ராஜபிண்ட³ங் அவபொ⁴த்துங், நாஹங் ப்³ராஹ்மண முஸ்ஸஹே.
Taṃ rājapiṇḍaṃ avabhottuṃ, nāhaṃ brāhmaṇa mussahe.
73.
73.
‘‘ஓத³ஹிஸ்ஸாமஹங் பஸ்ஸங், கு²ரப்பானிஸ்ஸ ராஜினோ;
‘‘Odahissāmahaṃ passaṃ, khurappānissa rājino;
ததா³ஹங் ஸுகி²தோ முத்தோ, அபி பஸ்ஸெய்ய மாதர’’ந்தி.
Tadāhaṃ sukhito mutto, api passeyya mātara’’nti.
தத்த² நிவாபானீதி தேஸு தேஸு டா²னேஸு நிவுதானி நிவாபானி. பானபோ⁴ஜனந்தி பானீயஞ்ச அவஸேஸதிணஞ்ச. தங் ராஜபிண்ட³ந்தி தங் ரஞ்ஞோ ஸந்தகங் ஸங்கட்³டி⁴த்வா ஸமோதா⁴னகட்டே²ன பிண்ட³ங். அவபொ⁴த்துந்தி து³ப்³பு⁴த்தங் பு⁴ஞ்ஜிதுங் . ரஞ்ஞோ ஹி கிச்சங் அனிப்பா²தெ³ந்தோ தங் அவபு⁴த்தங் பு⁴ஞ்ஜதி நாம, ஸ்வாஹங் ஏவங் அவபொ⁴த்துங் ந உஸ்ஸஹாமீதி வத³தி. ப்³ராஹ்மண முஸ்ஸஹேதி செத்த² ப்³ராஹ்மணாதி ஆலபனங், ம-காரோ பத³ஸந்தி⁴வஸேன வுத்தோ.
Tattha nivāpānīti tesu tesu ṭhānesu nivutāni nivāpāni. Pānabhojananti pānīyañca avasesatiṇañca. Taṃ rājapiṇḍanti taṃ rañño santakaṃ saṅkaḍḍhitvā samodhānakaṭṭhena piṇḍaṃ. Avabhottunti dubbhuttaṃ bhuñjituṃ . Rañño hi kiccaṃ anipphādento taṃ avabhuttaṃ bhuñjati nāma, svāhaṃ evaṃ avabhottuṃ na ussahāmīti vadati. Brāhmaṇa mussaheti cettha brāhmaṇāti ālapanaṃ, ma-kāro padasandhivasena vutto.
ஓத³ஹிஸ்ஸாமஹங் பஸ்ஸங், கு²ரப்பானிஸ்ஸ ராஜினோதி அஹங், ப்³ராஹ்மண, அத்தனோ வாரே ஸம்பத்தே கு²ரப்பங் ஸன்னய்ஹித்வா ஆக³தஸ்ஸ ரஞ்ஞோ மிக³யூத²தோ நிக்க²மித்வா ஏகமந்தே ட²த்வா ‘‘மங் விஜ்ஜ², மஹாராஜா’’தி வத்வா அத்தனோ மஹாபா²ஸுகபஸ்ஸங் ஓத³ஹிஸ்ஸாமி ஒட்³டெ³ஸ்ஸாமி. ஸுகி²தோ முத்தோதி ததா³ அஹங் மரணப⁴யா முத்தோ ஸுகி²தோ நித்³து³க்கோ² ரஞ்ஞா அனுஞ்ஞாதோ அபி நாம மாதரங் பஸ்ஸெய்யந்தி.
Odahissāmahaṃ passaṃ, khurappānissa rājinoti ahaṃ, brāhmaṇa, attano vāre sampatte khurappaṃ sannayhitvā āgatassa rañño migayūthato nikkhamitvā ekamante ṭhatvā ‘‘maṃ vijjha, mahārājā’’ti vatvā attano mahāphāsukapassaṃ odahissāmi oḍḍessāmi. Sukhito muttoti tadā ahaṃ maraṇabhayā mutto sukhito niddukkho raññā anuññāto api nāma mātaraṃ passeyyanti.
தங் ஸுத்வா ப்³ராஹ்மணோ பக்காமி. அபரபா⁴கே³ தஸ்ஸ வாரதி³வஸே ராஜா மஹந்தேன பரிவாரேன உய்யானங் ஆக³ச்சி². மஹாஸத்தோ ஏகமந்தே அட்டா²ஸி. ராஜா ‘‘மிக³ங் விஜ்ஜி²ஸ்ஸாமீ’’தி கு²ரப்பங் ஸன்னய்ஹி. மஹாஸத்தோ யதா² அஞ்ஞே மரணப⁴யதஜ்ஜிதா பலாயந்தி, ஏவங் அபலாயித்வா நிப்³ப⁴யோ ஹுத்வா மெத்தங் புரேசாரிகங் கத்வா மஹாபா²ஸுகபஸ்ஸங் ஓத³ஹித்வா நிச்சலோவ அட்டா²ஸி. ராஜா தஸ்ஸ மெத்தானுபா⁴வேன ஸரங் விஸ்ஸஜ்ஜேதுங் நாஸக்கி². மஹாஸத்தோ ‘‘கிங், மஹாராஜ, ஸரங் ந முச்சேஸி, முஞ்சாஹீ’’தி ஆஹ. ‘‘ந ஸக்கோமி, மிக³ராஜா’’தி. ‘‘தேன ஹி கு³ணவந்தானங் கு³ணங் ஜான, மஹாராஜா’’தி. ததா³ ராஜா போ³தி⁴ஸத்தே பஸீதி³த்வா த⁴னுங் ச²ட்³டெ³த்வா ‘‘இமங் அசித்தகங் கலிங்க³ரகண்ட³ம்பி தாவ தவ கு³ணங் ஜானாதி, அஹங் ஸசித்தகோ மனுஸ்ஸபூ⁴தோபி தவ கு³ணங் ந ஜானாமி, மிக³ராஜ, மய்ஹங் க²ம, அப⁴யங் தே த³ம்மீ’’தி ஆஹ. ‘‘மஹாராஜ, மய்ஹங் தாவ அப⁴யங் தே³ஸி, அயங் பன உய்யானே மிக³க³ணோ கிங் கரிஸ்ஸதீ’’தி? ‘‘ஏதஸ்ஸபி அப⁴யங் த³ம்மீ’’தி. ஏவங் மஹாஸத்தோ நிக்³ரோத⁴ஜாதகே (ஜா॰ 1.1.12) வுத்தனயேனேவ ஸப்³பே³ஸங் அரஞ்ஞே மிகா³னங் ஆகாஸக³தஸகுணானங் ஜலசரமச்சா²னஞ்ச அப⁴யங் தா³பெத்வா ராஜானங் பஞ்சஸு ஸீலேஸு பதிட்டா²பெத்வா ‘‘மஹாராஜ, ரஞ்ஞா நாம அக³திக³மனங் பஹாய த³ஸ ராஜத⁴ம்மே அகோபெந்தேன த⁴ம்மேன ஸமேன ரஜ்ஜங் காரேதுங் வட்டதீ’’தி.
Taṃ sutvā brāhmaṇo pakkāmi. Aparabhāge tassa vāradivase rājā mahantena parivārena uyyānaṃ āgacchi. Mahāsatto ekamante aṭṭhāsi. Rājā ‘‘migaṃ vijjhissāmī’’ti khurappaṃ sannayhi. Mahāsatto yathā aññe maraṇabhayatajjitā palāyanti, evaṃ apalāyitvā nibbhayo hutvā mettaṃ purecārikaṃ katvā mahāphāsukapassaṃ odahitvā niccalova aṭṭhāsi. Rājā tassa mettānubhāvena saraṃ vissajjetuṃ nāsakkhi. Mahāsatto ‘‘kiṃ, mahārāja, saraṃ na muccesi, muñcāhī’’ti āha. ‘‘Na sakkomi, migarājā’’ti. ‘‘Tena hi guṇavantānaṃ guṇaṃ jāna, mahārājā’’ti. Tadā rājā bodhisatte pasīditvā dhanuṃ chaḍḍetvā ‘‘imaṃ acittakaṃ kaliṅgarakaṇḍampi tāva tava guṇaṃ jānāti, ahaṃ sacittako manussabhūtopi tava guṇaṃ na jānāmi, migarāja, mayhaṃ khama, abhayaṃ te dammī’’ti āha. ‘‘Mahārāja, mayhaṃ tāva abhayaṃ desi, ayaṃ pana uyyāne migagaṇo kiṃ karissatī’’ti? ‘‘Etassapi abhayaṃ dammī’’ti. Evaṃ mahāsatto nigrodhajātake (jā. 1.1.12) vuttanayeneva sabbesaṃ araññe migānaṃ ākāsagatasakuṇānaṃ jalacaramacchānañca abhayaṃ dāpetvā rājānaṃ pañcasu sīlesu patiṭṭhāpetvā ‘‘mahārāja, raññā nāma agatigamanaṃ pahāya dasa rājadhamme akopentena dhammena samena rajjaṃ kāretuṃ vaṭṭatī’’ti.
‘‘தா³னங் ஸீலங் பரிச்சாக³ங், அஜ்ஜவங் மத்³த³வங் தபங்;
‘‘Dānaṃ sīlaṃ pariccāgaṃ, ajjavaṃ maddavaṃ tapaṃ;
அக்கோத⁴ங் அவிஹிங்ஸஞ்ச, க²ந்திஞ்ச அவிரோத⁴னங்.
Akkodhaṃ avihiṃsañca, khantiñca avirodhanaṃ.
‘‘இச்சேதே குஸலே த⁴ம்மே, டி²தே பஸ்ஸாமி அத்தனி;
‘‘Iccete kusale dhamme, ṭhite passāmi attani;
ததோ மே ஜாயதே பீதி, ஸோமனஸ்ஸஞ்சனப்பக’’ந்தி. (ஜா॰ 2.21.176-177) –
Tato me jāyate pīti, somanassañcanappaka’’nti. (jā. 2.21.176-177) –
ஏவங் வுத்தே ராஜத⁴ம்மே கா³தா²ப³ந்தே⁴னேவ தே³ஸெத்வா கதிபாஹங் ரஞ்ஞோ ஸந்திகே வஸித்வா நக³ரே ஸப்³ப³ஸத்தானங் அப⁴யதா³னபகாஸனத்த²ங் ஸுவண்ணபே⁴ரிங் சராபெத்வா ‘‘அப்பமத்தோ ஹோஹி, மஹாராஜா’’தி வத்வா மாதாபிதூனங் த³ஸ்ஸனத்தா²ய க³தோ.
Evaṃ vutte rājadhamme gāthābandheneva desetvā katipāhaṃ rañño santike vasitvā nagare sabbasattānaṃ abhayadānapakāsanatthaṃ suvaṇṇabheriṃ carāpetvā ‘‘appamatto hohi, mahārājā’’ti vatvā mātāpitūnaṃ dassanatthāya gato.
74.
74.
‘‘மிக³ராஜா புரே ஆஸிங், கோஸலஸ்ஸ நிகேதனே;
‘‘Migarājā pure āsiṃ, kosalassa niketane;
நந்தி³யோ நாம நாமேன, அபி⁴ரூபோ சதுப்பதோ³.
Nandiyo nāma nāmena, abhirūpo catuppado.
75.
75.
‘‘தங் மங் வதி⁴துமாக³ச்சி², தா³யஸ்மிங் அஜ்ஜுனே வனே;
‘‘Taṃ maṃ vadhitumāgacchi, dāyasmiṃ ajjune vane;
த⁴னுங் ஆரஜ்ஜங் கத்வான, உஸுங் ஸன்னய்ஹ கோஸலோ.
Dhanuṃ ārajjaṃ katvāna, usuṃ sannayha kosalo.
76.
76.
‘‘தஸ்ஸாஹங் ஓத³ஹிங் பஸ்ஸங், கு²ரப்பானிஸ்ஸ ராஜினோ;
‘‘Tassāhaṃ odahiṃ passaṃ, khurappānissa rājino;
ததா³ஹங் ஸுகி²தோ முத்தோ, மாதரங் த³ட்டு²மாக³தோ’’தி. –
Tadāhaṃ sukhito mutto, mātaraṃ daṭṭhumāgato’’ti. –
இமா திஸ்ஸோ அபி⁴ஸம்பு³த்³த⁴கா³தா² ஹொந்தி.
Imā tisso abhisambuddhagāthā honti.
தத்த² கோஸலஸ்ஸ நிகேதனேதி கோஸலஸ்ஸ ரஞ்ஞோ நிகேதனே வஸனட்டா²னே, தஸ்ஸ ஸந்திகே அரஞ்ஞஸ்மிந்தி அத்தோ². தா³யஸ்மிந்தி மிகா³னங் வஸனத்தா²ய தி³ன்னஉய்யானே. ஆரஜ்ஜங் கத்வானாதி ஜியாய ஸத்³தி⁴ங் ஏகதோ கத்வா , ஆரோபெத்வாதி அத்தோ². ஸன்னய்ஹாதி ஸன்னய்ஹித்வா யோஜெத்வா. ஓத³ஹிந்தி ஒட்³டே³ஸிங். மாதரங் த³ட்டு²மாக³தோதி தே³ஸனாஸீஸமேதங், ரஞ்ஞோ த⁴ம்மங் தே³ஸெத்வா ஸப்³ப³ஸத்தானங் அப⁴யத்தா²ய ஸுவண்ணபே⁴ரிங் சராபெத்வா மாதாபிதரோ த³ட்டு²ங் ஆக³தொஸ்மீதி அத்தோ².
Tattha kosalassa niketaneti kosalassa rañño niketane vasanaṭṭhāne, tassa santike araññasminti attho. Dāyasminti migānaṃ vasanatthāya dinnauyyāne. Ārajjaṃ katvānāti jiyāya saddhiṃ ekato katvā , āropetvāti attho. Sannayhāti sannayhitvā yojetvā. Odahinti oḍḍesiṃ. Mātaraṃ daṭṭhumāgatoti desanāsīsametaṃ, rañño dhammaṃ desetvā sabbasattānaṃ abhayatthāya suvaṇṇabheriṃ carāpetvā mātāpitaro daṭṭhuṃ āgatosmīti attho.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே மாதுபோஸகபி⁴க்கு² ஸோதாபத்திப²லே பதிட்ட²ஹி. ததா³ மாதாபிதரோ மஹாராஜகுலானி அஹேஸுங், ப்³ராஹ்மணோ ஸாரிபுத்தோ, ராஜா ஆனந்தோ³, நந்தி³யமிக³ராஜா பன அஹமேவ அஹோஸிந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne mātuposakabhikkhu sotāpattiphale patiṭṭhahi. Tadā mātāpitaro mahārājakulāni ahesuṃ, brāhmaṇo sāriputto, rājā ānando, nandiyamigarājā pana ahameva ahosinti.
நந்தி³யமிக³ராஜஜாதகவண்ணனா த³ஸமா.
Nandiyamigarājajātakavaṇṇanā dasamā.
அவாரியவக்³கோ³ பட²மோ.
Avāriyavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 385. நந்தி³யமிக³ராஜஜாதகங் • 385. Nandiyamigarājajātakaṃ
