| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[385] 10. нанд̣̇ияамиг̇арааж̇аж̇аад̇агаван̣н̣анаа
[385] 10. Nandiyamigarājajātakavaṇṇanā
сажз б̣раахман̣а г̇ажчзсийд̇и ид̣̇ам̣ сад̇т̇аа ж̇зд̇аванз вихаранд̇о згам̣ маад̇убосагабхигкум̣ аараб̣бха гат̇зси. д̇ан̃хи сад̇т̇аа ‘‘сажжам̣ гира д̇вам̣ бхигку г̇ихий босзсий’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘гим̣ д̇з хонд̇ий’’д̇и вуд̇д̇з ‘‘маад̇аабид̇аро мз, бханд̇з’’д̇и вуд̇д̇з ‘‘саад̇ху саад̇ху бхигку бораан̣агабан̣д̣ид̇аанам̣ вам̣сам̣ баалзси, бораан̣агабан̣д̣ид̇аа хи д̇иражчаанаяонияам̣ ниб̣б̣ад̇д̇ид̇вааби маад̇аабид̇уунам̣ ж̇ийвид̇ам̣ ад̣̇ам̣суу’’д̇и вад̇ваа ад̇ийд̇ам̣ аахари.
Sacebrāhmaṇa gacchesīti idaṃ satthā jetavane viharanto ekaṃ mātuposakabhikkhuṃ ārabbha kathesi. Tañhi satthā ‘‘saccaṃ kira tvaṃ bhikkhu gihī posesī’’ti pucchitvā ‘‘saccaṃ, bhante’’ti vutte ‘‘kiṃ te hontī’’ti vutte ‘‘mātāpitaro me, bhante’’ti vutte ‘‘sādhu sādhu bhikkhu porāṇakapaṇḍitānaṃ vaṃsaṃ pālesi, porāṇakapaṇḍitā hi tiracchānayoniyaṃ nibbattitvāpi mātāpitūnaṃ jīvitaṃ adaṃsū’’ti vatvā atītaṃ āhari.
ад̇ийд̇з госаларадтз саагзд̇з госаларааж̇з раж̇ж̇ам̣ гаарзнд̇з б̣од̇хисад̇д̇о миг̇аяонияам̣ ниб̣б̣ад̇д̇ид̇ваа ваяаббад̇д̇о нанд̣̇ияамиг̇о наама худ̇ваа сийлаажаарасамбанно маад̇аабид̇аро босзси. д̇ад̣̇аа госаларааж̇аа миг̇авид̇д̇агова ахоси. со бана мануссаанам̣ гасигаммаад̣̇ийни гаад̇ум̣ ад̣̇ад̇ваа махаабаривааро д̣̇звасигам̣ миг̇авам̣ г̇ажчад̇и. мануссаа саннибад̇ид̇ваа ‘‘аяяаа, аяам̣ рааж̇аа амхаагам̣ гаммажчзд̣̇ам̣ гарод̇и, гхарааваасоби нассад̇и, яам̣нууна маяам̣ аж̇ж̇унаванам̣ уяяаанам̣ баригкибид̇ваа д̣̇ваарам̣ яож̇зд̇ваа борагкан̣им̣ кан̣ид̇ваа д̇ин̣аани ааробзд̇ваа д̣̇ан̣д̣амуг̇г̇араад̣̇ихад̇т̇аа аран̃н̃ам̣ бависид̇ваа г̇умб̣з бахаранд̇аа миг̇з нийхарид̇ваа бариваарзд̇ваа г̇оруубаани вияа важ̇ам̣ уяяаанам̣ бавзсзд̇ваа д̣̇ваарам̣ бид̣̇ахид̇ваа ран̃н̃о аарожзд̇ваа ад̇д̇ано гаммам̣ гарзяяаамаа’’д̇и манд̇аяим̣су. ‘‘ад̇т̇зсо убааяо’’д̇и саб̣б̣з згажчанд̣̇аа худ̇ваа уяяаанам̣ саж̇ж̇зд̇ваа аран̃н̃ам̣ бависид̇ваа яож̇анамад̇д̇адтаанам̣ баригкибим̣су.
Atīte kosalaraṭṭhe sākete kosalarāje rajjaṃ kārente bodhisatto migayoniyaṃ nibbattitvā vayappatto nandiyamigo nāma hutvā sīlācārasampanno mātāpitaro posesi. Tadā kosalarājā migavittakova ahosi. So pana manussānaṃ kasikammādīni kātuṃ adatvā mahāparivāro devasikaṃ migavaṃ gacchati. Manussā sannipatitvā ‘‘ayyā, ayaṃ rājā amhākaṃ kammacchedaṃ karoti, gharāvāsopi nassati, yaṃnūna mayaṃ ajjunavanaṃ uyyānaṃ parikkhipitvā dvāraṃ yojetvā porakkhaṇiṃ khaṇitvā tiṇāni āropetvā daṇḍamuggarādihatthā araññaṃ pavisitvā gumbe paharantā mige nīharitvā parivāretvā gorūpāni viya vajaṃ uyyānaṃ pavesetvā dvāraṃ pidahitvā rañño ārocetvā attano kammaṃ kareyyāmā’’ti mantayiṃsu. ‘‘Attheso upāyo’’ti sabbe ekacchandā hutvā uyyānaṃ sajjetvā araññaṃ pavisitvā yojanamattaṭṭhānaṃ parikkhipiṃsu.
д̇асмим̣ кан̣з нанд̣̇ияо згасмим̣ куд̣̇д̣̇агаг̇умб̣з маад̇аабид̇аро г̇ахзд̇ваа бхуумияам̣ нибанно ход̇и. мануссаа наанаапалагаавуд̇хахад̇т̇аа б̣аахунаа б̣аахум̣ бийл̣зд̇ваа д̇ам̣ г̇умб̣ам̣ баригкибим̣су. ат̇згажжз миг̇з ологзнд̇аа д̇ам̣ г̇умб̣ам̣ бависим̣су. нанд̣̇ияо д̇з д̣̇исваа ‘‘аж̇ж̇а маяаа ж̇ийвид̇ам̣ барижжаж̇ид̇ваа маад̇аабид̇уунам̣ ж̇ийвид̇ам̣ д̣̇аад̇ум̣ ваддад̇ий’’д̇и жинд̇зд̇ваа удтааяа маад̇аабид̇аро ванд̣̇ид̇ваа ‘‘аммад̇аад̇а, имз мануссаа имам̣ г̇умб̣ам̣ бависид̇ваа амхз д̇аяоби бассиссанд̇и, д̇умхз згзна убааязна ж̇ийвзяяаат̇а, ж̇ийвид̇ам̣ во сзяяо, ахам̣ д̇умхаагам̣ ж̇ийвид̇ад̣̇аанам̣ д̣̇ад̇ваа мануссзхи г̇умб̣абарияанд̇з тад̇ваа г̇умб̣з бахадамад̇д̇зязва нигкамиссаами, ат̇а д̇з ‘имасмим̣ куд̣̇д̣̇агаг̇умб̣з згоязва миг̇о бхависсад̇ий’д̇и ман̃н̃амаанаа г̇умб̣ам̣ на бависиссанд̇и, д̇умхз аббамад̇д̇аа хот̇аа’’д̇и маад̇аабид̇аро камаабзд̇ваа г̇аманасаж̇ж̇о адтааси. со мануссзхи г̇умб̣абарияанд̇з тад̇ваа уннаад̣̇зд̇ваа г̇умб̣з бахадамад̇д̇зязва д̇ад̇о нигками. д̇з ‘‘зговзд̇т̇а миг̇о бхависсад̇ий’’д̇и г̇умб̣ам̣ на бависим̣су. ат̇а нанд̣̇ияо г̇анд̇ваа миг̇аанам̣ анд̇арам̣ баависи. мануссаа бариваарзд̇ваа саб̣б̣з миг̇з уяяаанам̣ бавзсзд̇ваа д̣̇ваарам̣ т̇агзд̇ваа ран̃н̃о аарожзд̇ваа сагасагадтаанаани аг̇амам̣су.
Tasmiṃ khaṇe nandiyo ekasmiṃ khuddakagumbe mātāpitaro gahetvā bhūmiyaṃ nipanno hoti. Manussā nānāphalakāvudhahatthā bāhunā bāhuṃ pīḷetvā taṃ gumbaṃ parikkhipiṃsu. Athekacce mige olokentā taṃ gumbaṃ pavisiṃsu. Nandiyo te disvā ‘‘ajja mayā jīvitaṃ pariccajitvā mātāpitūnaṃ jīvitaṃ dātuṃ vaṭṭatī’’ti cintetvā uṭṭhāya mātāpitaro vanditvā ‘‘ammatāta, ime manussā imaṃ gumbaṃ pavisitvā amhe tayopi passissanti, tumhe ekena upāyena jīveyyātha, jīvitaṃ vo seyyo, ahaṃ tumhākaṃ jīvitadānaṃ datvā manussehi gumbapariyante ṭhatvā gumbe pahaṭamatteyeva nikkhamissāmi, atha te ‘imasmiṃ khuddakagumbe ekoyeva migo bhavissatī’ti maññamānā gumbaṃ na pavisissanti, tumhe appamattā hothā’’ti mātāpitaro khamāpetvā gamanasajjo aṭṭhāsi. So manussehi gumbapariyante ṭhatvā unnādetvā gumbe pahaṭamatteyeva tato nikkhami. Te ‘‘ekovettha migo bhavissatī’’ti gumbaṃ na pavisiṃsu. Atha nandiyo gantvā migānaṃ antaraṃ pāvisi. Manussā parivāretvā sabbe mige uyyānaṃ pavesetvā dvāraṃ thaketvā rañño ārocetvā sakasakaṭṭhānāni agamaṃsu.
д̇ад̇о бадтааяа рааж̇аа саяамзва г̇анд̇ваа згам̣ миг̇ам̣ виж̇жхид̇ваа д̇ам̣ г̇ахзд̇ваа зхийд̇и згам̣ бзсзд̇ваа аахараабзси. миг̇аа ваарам̣ табаяим̣су, бад̇д̇авааро миг̇о згаманд̇з д̇идтад̇и, д̇ам̣ виж̇жхид̇ваа г̇ан̣ханд̇и. нанд̣̇ияо богкаран̣ияам̣ баанийяам̣ бивад̇и, д̇ин̣аани каад̣̇ад̇и, вааро банасса на д̇аава баабун̣аад̇и. ат̇а б̣ахуунам̣ д̣̇ивасаанам̣ ажжаязна д̇асса маад̇аабид̇аро д̇ам̣ д̣̇адтугаамаа худ̇ваа ‘‘амхаагам̣ буд̇д̇о нанд̣̇ияамиг̇арааж̇аа нааг̇аб̣ало т̇аамасамбанно, сажз ж̇ийвад̇и, авассам̣ вад̇им̣ лан̇гхид̇ваа амхаагам̣ д̣̇ассанад̇т̇ааяа ааг̇амиссад̇и, саасанамасса бзсзссаамаа’’д̇и жинд̇зд̇ваа маг̇г̇асамийбз тад̇ваа згам̣ б̣раахман̣ам̣ д̣̇исваа ‘‘аяяа, гахам̣ г̇ажчасий’’д̇и маанусигааяа ваажааяа бужчид̇ваа ‘‘саагзд̇а’’нд̇и вуд̇д̇з буд̇д̇асса саасанам̣ бахин̣анд̇аа батамам̣ г̇аат̇амаахам̣су –
Tato paṭṭhāya rājā sayameva gantvā ekaṃ migaṃ vijjhitvā taṃ gahetvā ehīti ekaṃ pesetvā āharāpesi. Migā vāraṃ ṭhapayiṃsu, pattavāro migo ekamante tiṭṭhati, taṃ vijjhitvā gaṇhanti. Nandiyo pokkharaṇiyaṃ pānīyaṃ pivati, tiṇāni khādati, vāro panassa na tāva pāpuṇāti. Atha bahūnaṃ divasānaṃ accayena tassa mātāpitaro taṃ daṭṭhukāmā hutvā ‘‘amhākaṃ putto nandiyamigarājā nāgabalo thāmasampanno, sace jīvati, avassaṃ vatiṃ laṅghitvā amhākaṃ dassanatthāya āgamissati, sāsanamassa pesessāmā’’ti cintetvā maggasamīpe ṭhatvā ekaṃ brāhmaṇaṃ disvā ‘‘ayya, kahaṃ gacchasī’’ti mānusikāya vācāya pucchitvā ‘‘sāketa’’nti vutte puttassa sāsanaṃ pahiṇantā paṭhamaṃ gāthamāhaṃsu –
71.
71.
‘‘сажз б̣раахман̣а г̇ажчзси, саагзд̇з аж̇ж̇унам̣ ванам̣;
‘‘Sace brāhmaṇa gacchesi, sākete ajjunaṃ vanaṃ;
важ̇ж̇ааси нанд̣̇ияам̣ наама, буд̇д̇ам̣ асмаагаморасам̣;
Vajjāsi nandiyaṃ nāma, puttaṃ asmākamorasaṃ;
маад̇аа бид̇аа жа д̇з вуд̣̇д̇хаа, д̇з д̇ам̣ ижчанд̇и бассид̇у’’нд̇и.
Mātā pitā ca te vuddhā, te taṃ icchanti passitu’’nti.
д̇ассад̇т̇о – сажз, д̇вам̣ б̣раахман̣а, саагзд̇ам̣ г̇ажчаси, саагзд̇з аж̇ж̇унаванам̣ наама уяяаанам̣ ад̇т̇и, д̇ад̇т̇а амхаагам̣ буд̇д̇о нанд̣̇ияо наама миг̇о ад̇т̇и, д̇ам̣ вад̣̇зяяааси ‘‘маад̇аабид̇аро д̇з вуд̣дхаа яаава на маранд̇и, д̇аава д̇ам̣ бассид̇ум̣ ижчанд̇ий’’д̇и.
Tassattho – sace, tvaṃ brāhmaṇa, sāketaṃ gacchasi, sākete ajjunavanaṃ nāma uyyānaṃ atthi, tattha amhākaṃ putto nandiyo nāma migo atthi, taṃ vadeyyāsi ‘‘mātāpitaro te vuḍḍhā yāva na maranti, tāva taṃ passituṃ icchantī’’ti.
со ‘‘саад̇хуу’’д̇и самбадижчид̇ваа саагзд̇ам̣ г̇анд̇ваа бунад̣̇ивасз уяяаанам̣ бависид̇ваа ‘‘нанд̣̇ияамиг̇о наама гад̇аро’’д̇и бужчи. миг̇о ааг̇анд̇ваа д̇асса самийбз тад̇ваа ‘‘аха’’нд̇и ааха. б̣раахман̣о д̇амад̇т̇ам̣ аарожзси. нанд̣̇ияо д̇ам̣ суд̇ваа ‘‘г̇ажчзяяаамахам̣, б̣раахман̣а, вад̇им̣ лан̇гхид̇ваа но на г̇ажчзяяам̣, маяаа бана ран̃н̃о санд̇агам̣ ниваабабаанабхож̇анам̣ бхуд̇д̇ам̣, д̇ам̣ мз ин̣адтаанз тид̇ам̣, имзсан̃жа миг̇аанам̣ маж̇жхз жиравуд̇т̇осми, д̇асса мз ран̃н̃о жзва зд̇зсан̃жа сод̇т̇ибхаавам̣ агад̇ваа ад̇д̇ано б̣алам̣ ад̣̇ассзд̇ваа г̇аманам̣ наама на яуд̇д̇ам̣, ад̇д̇ано ваарз бана самбад̇д̇з ахам̣ зд̇зсам̣ сод̇т̇ибхаавам̣ гад̇ваа сукид̇о ааг̇ажчиссаамий’’д̇и д̇амад̇т̇ам̣ багаасзнд̇о д̣̇вз г̇аат̇аа абхааси –
So ‘‘sādhū’’ti sampaṭicchitvā sāketaṃ gantvā punadivase uyyānaṃ pavisitvā ‘‘nandiyamigo nāma kataro’’ti pucchi. Migo āgantvā tassa samīpe ṭhatvā ‘‘aha’’nti āha. Brāhmaṇo tamatthaṃ ārocesi. Nandiyo taṃ sutvā ‘‘gaccheyyāmahaṃ, brāhmaṇa, vatiṃ laṅghitvā no na gaccheyyaṃ, mayā pana rañño santakaṃ nivāpapānabhojanaṃ bhuttaṃ, taṃ me iṇaṭṭhāne ṭhitaṃ, imesañca migānaṃ majjhe ciravutthosmi, tassa me rañño ceva etesañca sotthibhāvaṃ akatvā attano balaṃ adassetvā gamanaṃ nāma na yuttaṃ, attano vāre pana sampatte ahaṃ etesaṃ sotthibhāvaṃ katvā sukhito āgacchissāmī’’ti tamatthaṃ pakāsento dve gāthā abhāsi –
72.
72.
‘‘бхуд̇д̇аа маяаа ниваабаани, рааж̇ино баанабхож̇анам̣;
‘‘Bhuttā mayā nivāpāni, rājino pānabhojanaṃ;
д̇ам̣ рааж̇абин̣д̣ам̣ авабход̇д̇ум̣, наахам̣ б̣раахман̣а муссахз.
Taṃ rājapiṇḍaṃ avabhottuṃ, nāhaṃ brāhmaṇa mussahe.
73.
73.
‘‘од̣̇ахиссаамахам̣ бассам̣, кураббаанисса рааж̇ино;
‘‘Odahissāmahaṃ passaṃ, khurappānissa rājino;
д̇ад̣̇аахам̣ сукид̇о муд̇д̇о, аби бассзяяа маад̇ара’’нд̇и.
Tadāhaṃ sukhito mutto, api passeyya mātara’’nti.
д̇ад̇т̇а ниваабаанийд̇и д̇зсу д̇зсу таанзсу нивуд̇аани ниваабаани. баанабхож̇ананд̇и баанийяан̃жа авасзсад̇ин̣ан̃жа. д̇ам̣ рааж̇абин̣д̣анд̇и д̇ам̣ ран̃н̃о санд̇агам̣ сан̇гад̣дхид̇ваа самод̇хаанагадтзна бин̣д̣ам̣. авабход̇д̇унд̇и д̣̇уб̣бхуд̇д̇ам̣ бхун̃ж̇ид̇ум̣ . ран̃н̃о хи гижжам̣ анибпаад̣̇знд̇о д̇ам̣ авабхуд̇д̇ам̣ бхун̃ж̇ад̇и наама, сваахам̣ звам̣ авабход̇д̇ум̣ на уссахаамийд̇и вад̣̇ад̇и. б̣раахман̣а муссахзд̇и жзд̇т̇а б̣раахман̣аад̇и аалабанам̣, ма-гааро бад̣̇асанд̇хивасзна вуд̇д̇о.
Tattha nivāpānīti tesu tesu ṭhānesu nivutāni nivāpāni. Pānabhojananti pānīyañca avasesatiṇañca. Taṃ rājapiṇḍanti taṃ rañño santakaṃ saṅkaḍḍhitvā samodhānakaṭṭhena piṇḍaṃ. Avabhottunti dubbhuttaṃ bhuñjituṃ . Rañño hi kiccaṃ anipphādento taṃ avabhuttaṃ bhuñjati nāma, svāhaṃ evaṃ avabhottuṃ na ussahāmīti vadati. Brāhmaṇa mussaheti cettha brāhmaṇāti ālapanaṃ, ma-kāro padasandhivasena vutto.
од̣̇ахиссаамахам̣ бассам̣, кураббаанисса рааж̇инод̇и ахам̣, б̣раахман̣а, ад̇д̇ано ваарз самбад̇д̇з кураббам̣ саннаяхид̇ваа ааг̇ад̇асса ран̃н̃о миг̇аяуут̇ад̇о нигкамид̇ваа згаманд̇з тад̇ваа ‘‘мам̣ виж̇жха, махаарааж̇аа’’д̇и вад̇ваа ад̇д̇ано махаапаасугабассам̣ од̣̇ахиссаами од̣д̣зссаами. сукид̇о муд̇д̇од̇и д̇ад̣̇аа ахам̣ маран̣абхаяаа муд̇д̇о сукид̇о нид̣̇д̣̇угко ран̃н̃аа анун̃н̃аад̇о аби наама маад̇арам̣ бассзяяанд̇и.
Odahissāmahaṃ passaṃ, khurappānissa rājinoti ahaṃ, brāhmaṇa, attano vāre sampatte khurappaṃ sannayhitvā āgatassa rañño migayūthato nikkhamitvā ekamante ṭhatvā ‘‘maṃ vijjha, mahārājā’’ti vatvā attano mahāphāsukapassaṃ odahissāmi oḍḍessāmi. Sukhito muttoti tadā ahaṃ maraṇabhayā mutto sukhito niddukkho raññā anuññāto api nāma mātaraṃ passeyyanti.
д̇ам̣ суд̇ваа б̣раахман̣о баггаами. абарабхааг̇з д̇асса ваарад̣̇ивасз рааж̇аа маханд̇зна бариваарзна уяяаанам̣ ааг̇ажчи. махаасад̇д̇о згаманд̇з адтааси. рааж̇аа ‘‘миг̇ам̣ виж̇жхиссаамий’’д̇и кураббам̣ саннаяхи. махаасад̇д̇о яат̇аа ан̃н̃з маран̣абхаяад̇аж̇ж̇ид̇аа балааяанд̇и, звам̣ абалааяид̇ваа ниб̣бхаяо худ̇ваа мзд̇д̇ам̣ бурзжааригам̣ гад̇ваа махаапаасугабассам̣ од̣̇ахид̇ваа нижжалова адтааси. рааж̇аа д̇асса мзд̇д̇аанубхаавзна сарам̣ виссаж̇ж̇зд̇ум̣ наасагки. махаасад̇д̇о ‘‘гим̣, махаарааж̇а, сарам̣ на мужжзси, мун̃жаахий’’д̇и ааха. ‘‘на саггоми, миг̇арааж̇аа’’д̇и. ‘‘д̇зна хи г̇ун̣аванд̇аанам̣ г̇ун̣ам̣ ж̇аана, махаарааж̇аа’’д̇и. д̇ад̣̇аа рааж̇аа б̣од̇хисад̇д̇з басийд̣̇ид̇ваа д̇ханум̣ чад̣д̣зд̇ваа ‘‘имам̣ ажид̇д̇агам̣ галин̇г̇араган̣д̣амби д̇аава д̇ава г̇ун̣ам̣ ж̇аанаад̇и, ахам̣ сажид̇д̇аго мануссабхууд̇оби д̇ава г̇ун̣ам̣ на ж̇аанаами, миг̇арааж̇а, маяхам̣ кама, абхаяам̣ д̇з д̣̇аммий’’д̇и ааха. ‘‘махаарааж̇а, маяхам̣ д̇аава абхаяам̣ д̣̇зси, аяам̣ бана уяяаанз миг̇аг̇ан̣о гим̣ гариссад̇ий’’д̇и? ‘‘зд̇ассаби абхаяам̣ д̣̇аммий’’д̇и. звам̣ махаасад̇д̇о ниг̇род̇хаж̇аад̇агз (ж̇аа. 1.1.12) вуд̇д̇анаязнзва саб̣б̣зсам̣ аран̃н̃з миг̇аанам̣ аагаасаг̇ад̇асагун̣аанам̣ ж̇алажарамажчаанан̃жа абхаяам̣ д̣̇аабзд̇ваа рааж̇аанам̣ бан̃жасу сийлзсу бад̇идтаабзд̇ваа ‘‘махаарааж̇а, ран̃н̃аа наама аг̇ад̇иг̇аманам̣ бахааяа д̣̇аса рааж̇ад̇хаммз агобзнд̇зна д̇хаммзна самзна раж̇ж̇ам̣ гаарзд̇ум̣ ваддад̇ий’’д̇и.
Taṃ sutvā brāhmaṇo pakkāmi. Aparabhāge tassa vāradivase rājā mahantena parivārena uyyānaṃ āgacchi. Mahāsatto ekamante aṭṭhāsi. Rājā ‘‘migaṃ vijjhissāmī’’ti khurappaṃ sannayhi. Mahāsatto yathā aññe maraṇabhayatajjitā palāyanti, evaṃ apalāyitvā nibbhayo hutvā mettaṃ purecārikaṃ katvā mahāphāsukapassaṃ odahitvā niccalova aṭṭhāsi. Rājā tassa mettānubhāvena saraṃ vissajjetuṃ nāsakkhi. Mahāsatto ‘‘kiṃ, mahārāja, saraṃ na muccesi, muñcāhī’’ti āha. ‘‘Na sakkomi, migarājā’’ti. ‘‘Tena hi guṇavantānaṃ guṇaṃ jāna, mahārājā’’ti. Tadā rājā bodhisatte pasīditvā dhanuṃ chaḍḍetvā ‘‘imaṃ acittakaṃ kaliṅgarakaṇḍampi tāva tava guṇaṃ jānāti, ahaṃ sacittako manussabhūtopi tava guṇaṃ na jānāmi, migarāja, mayhaṃ khama, abhayaṃ te dammī’’ti āha. ‘‘Mahārāja, mayhaṃ tāva abhayaṃ desi, ayaṃ pana uyyāne migagaṇo kiṃ karissatī’’ti? ‘‘Etassapi abhayaṃ dammī’’ti. Evaṃ mahāsatto nigrodhajātake (jā. 1.1.12) vuttanayeneva sabbesaṃ araññe migānaṃ ākāsagatasakuṇānaṃ jalacaramacchānañca abhayaṃ dāpetvā rājānaṃ pañcasu sīlesu patiṭṭhāpetvā ‘‘mahārāja, raññā nāma agatigamanaṃ pahāya dasa rājadhamme akopentena dhammena samena rajjaṃ kāretuṃ vaṭṭatī’’ti.
‘‘д̣̇аанам̣ сийлам̣ барижжааг̇ам̣, аж̇ж̇авам̣ мад̣̇д̣̇авам̣ д̇абам̣;
‘‘Dānaṃ sīlaṃ pariccāgaṃ, ajjavaṃ maddavaṃ tapaṃ;
аггод̇хам̣ авихим̣сан̃жа, канд̇ин̃жа авирод̇ханам̣.
Akkodhaṃ avihiṃsañca, khantiñca avirodhanaṃ.
‘‘ижжзд̇з гусалз д̇хаммз, тид̇з бассаами ад̇д̇ани;
‘‘Iccete kusale dhamme, ṭhite passāmi attani;
д̇ад̇о мз ж̇ааяад̇з бийд̇и, соманассан̃жанаббага’’нд̇и. (ж̇аа. 2.21.176-177) –
Tato me jāyate pīti, somanassañcanappaka’’nti. (jā. 2.21.176-177) –
звам̣ вуд̇д̇з рааж̇ад̇хаммз г̇аат̇ааб̣анд̇хзнзва д̣̇зсзд̇ваа гад̇ибаахам̣ ран̃н̃о санд̇игз васид̇ваа наг̇арз саб̣б̣асад̇д̇аанам̣ абхаяад̣̇аанабагаасанад̇т̇ам̣ суван̣н̣абхзрим̣ жараабзд̇ваа ‘‘аббамад̇д̇о хохи, махаарааж̇аа’’д̇и вад̇ваа маад̇аабид̇уунам̣ д̣̇ассанад̇т̇ааяа г̇ад̇о.
Evaṃ vutte rājadhamme gāthābandheneva desetvā katipāhaṃ rañño santike vasitvā nagare sabbasattānaṃ abhayadānapakāsanatthaṃ suvaṇṇabheriṃ carāpetvā ‘‘appamatto hohi, mahārājā’’ti vatvā mātāpitūnaṃ dassanatthāya gato.
74.
74.
‘‘миг̇арааж̇аа бурз аасим̣, госаласса нигзд̇анз;
‘‘Migarājā pure āsiṃ, kosalassa niketane;
нанд̣̇ияо наама наамзна, абхируубо жад̇уббад̣̇о.
Nandiyo nāma nāmena, abhirūpo catuppado.
75.
75.
‘‘д̇ам̣ мам̣ вад̇хид̇умааг̇ажчи, д̣̇ааяасмим̣ аж̇ж̇унз ванз;
‘‘Taṃ maṃ vadhitumāgacchi, dāyasmiṃ ajjune vane;
д̇ханум̣ аараж̇ж̇ам̣ гад̇ваана, усум̣ саннаяха госало.
Dhanuṃ ārajjaṃ katvāna, usuṃ sannayha kosalo.
76.
76.
‘‘д̇ассаахам̣ од̣̇ахим̣ бассам̣, кураббаанисса рааж̇ино;
‘‘Tassāhaṃ odahiṃ passaṃ, khurappānissa rājino;
д̇ад̣̇аахам̣ сукид̇о муд̇д̇о, маад̇арам̣ д̣̇адтумааг̇ад̇о’’д̇и. –
Tadāhaṃ sukhito mutto, mātaraṃ daṭṭhumāgato’’ti. –
имаа д̇иссо абхисамб̣уд̣̇д̇хаг̇аат̇аа хонд̇и.
Imā tisso abhisambuddhagāthā honti.
д̇ад̇т̇а госаласса нигзд̇анзд̇и госаласса ран̃н̃о нигзд̇анз васанадтаанз, д̇асса санд̇игз аран̃н̃асминд̇и ад̇т̇о. д̣̇ааяасминд̇и миг̇аанам̣ васанад̇т̇ааяа д̣̇иннауяяаанз. аараж̇ж̇ам̣ гад̇ваанаад̇и ж̇ияааяа сад̣̇д̇хим̣ згад̇о гад̇ваа , ааробзд̇ваад̇и ад̇т̇о. саннаяхаад̇и саннаяхид̇ваа яож̇зд̇ваа. од̣̇ахинд̇и од̣д̣зсим̣. маад̇арам̣ д̣̇адтумааг̇ад̇од̇и д̣̇зсанаасийсамзд̇ам̣, ран̃н̃о д̇хаммам̣ д̣̇зсзд̇ваа саб̣б̣асад̇д̇аанам̣ абхаяад̇т̇ааяа суван̣н̣абхзрим̣ жараабзд̇ваа маад̇аабид̇аро д̣̇адтум̣ ааг̇ад̇осмийд̇и ад̇т̇о.
Tattha kosalassa niketaneti kosalassa rañño niketane vasanaṭṭhāne, tassa santike araññasminti attho. Dāyasminti migānaṃ vasanatthāya dinnauyyāne. Ārajjaṃ katvānāti jiyāya saddhiṃ ekato katvā , āropetvāti attho. Sannayhāti sannayhitvā yojetvā. Odahinti oḍḍesiṃ. Mātaraṃ daṭṭhumāgatoti desanāsīsametaṃ, rañño dhammaṃ desetvā sabbasattānaṃ abhayatthāya suvaṇṇabheriṃ carāpetvā mātāpitaro daṭṭhuṃ āgatosmīti attho.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз маад̇убосагабхигку сод̇аабад̇д̇ипалз бад̇идтахи. д̇ад̣̇аа маад̇аабид̇аро махаарааж̇агулаани ахзсум̣, б̣раахман̣о саарибуд̇д̇о, рааж̇аа аананд̣̇о, нанд̣̇ияамиг̇арааж̇аа бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne mātuposakabhikkhu sotāpattiphale patiṭṭhahi. Tadā mātāpitaro mahārājakulāni ahesuṃ, brāhmaṇo sāriputto, rājā ānando, nandiyamigarājā pana ahameva ahosinti.
нанд̣̇ияамиг̇арааж̇аж̇аад̇агаван̣н̣анаа д̣̇асамаа.
Nandiyamigarājajātakavaṇṇanā dasamā.
аваарияаваг̇г̇о батамо.
Avāriyavaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 385. нанд̣̇ияамиг̇арааж̇аж̇аад̇агам̣ • 385. Nandiyamigarājajātakaṃ
