| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. நந்தி³யஸக்கஸுத்தங்
10. Nandiyasakkasuttaṃ
1036. ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² நந்தி³யோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² நந்தி³யோ ஸக்கோ ப⁴க³வந்தங் ஏதத³வோச – ‘‘யஸ்ஸேவ நு கோ², ப⁴ந்தே, அரியஸாவகஸ்ஸ சத்தாரி ஸோதாபத்தியங்கா³னி ஸப்³பே³ன ஸப்³ப³ங் ஸப்³ப³தா² ஸப்³ப³ங் நத்தி² ஸ்வேவ நு கோ², ப⁴ந்தே, அரியஸாவகோ பமாத³விஹாரீ’’தி.
1036. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho nandiyo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho nandiyo sakko bhagavantaṃ etadavoca – ‘‘yasseva nu kho, bhante, ariyasāvakassa cattāri sotāpattiyaṅgāni sabbena sabbaṃ sabbathā sabbaṃ natthi sveva nu kho, bhante, ariyasāvako pamādavihārī’’ti.
‘‘‘யஸ்ஸ கோ², நந்தி³ய, சத்தாரி ஸோதாபத்தியங்கா³னி ஸப்³பே³ன ஸப்³ப³ங் ஸப்³ப³தா² ஸப்³ப³ங் நத்தி² தமஹங் பா³ஹிரோ புது²ஜ்ஜனபக்கே² டி²தோ’தி வதா³மி. அபி ச, நந்தி³ய, யதா² அரியஸாவகோ பமாத³விஹாரீ சேவ ஹோதி, அப்பமாத³விஹாரீ ச தங் ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங் , ப⁴ந்தே’’தி கோ² நந்தி³யோ ஸக்கோ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘‘Yassa kho, nandiya, cattāri sotāpattiyaṅgāni sabbena sabbaṃ sabbathā sabbaṃ natthi tamahaṃ bāhiro puthujjanapakkhe ṭhito’ti vadāmi. Api ca, nandiya, yathā ariyasāvako pamādavihārī ceva hoti, appamādavihārī ca taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ , bhante’’ti kho nandiyo sakko bhagavato paccassosi. Bhagavā etadavoca –
‘‘கத²ஞ்ச, நந்தி³ய, அரியஸாவகோ பமாத³விஹாரீ ஹோதி? இத⁴ நந்தி³ய, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. ஸோ தேன பு³த்³தே⁴ அவேச்சப்பஸாதே³ன ஸந்துட்டோ² ந உத்தரி வாயமதி தி³வா பவிவேகாய, ரத்திங் படிஸல்லானாய. தஸ்ஸ ஏவங் பமத்தஸ்ஸ விஹரதோ பாமோஜ்ஜங் ந ஹோதி. பாமோஜ்ஜே அஸதி, பீதி ந ஹோதி. பீதியா அஸதி, பஸ்ஸத்³தி⁴ ந ஹோதி. பஸ்ஸத்³தி⁴யா அஸதி, து³க்க²ங் விஹரதி. து³க்கி²னோ சித்தங் ந ஸமாதி⁴யதி. அஸமாஹிதே சித்தே த⁴ம்மா ந பாதுப⁴வந்தி. த⁴ம்மானங் அபாதுபா⁴வா பமாத³விஹாரீ த்வேவ ஸங்க்²யங் க³ச்ச²தி.
‘‘Kathañca, nandiya, ariyasāvako pamādavihārī hoti? Idha nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena santuṭṭho na uttari vāyamati divā pavivekāya, rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati. Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati.
‘‘புன சபரங், நந்தி³ய, அரியஸாவகோ த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. ஸோ தேஹி அரியகந்தேஹி ஸீலேஹி ஸந்துட்டோ² ந உத்தரி வாயமதி தி³வா பவிவேகாய ரத்திங் படிஸல்லானாய. தஸ்ஸ ஏவங் பமத்தஸ்ஸ விஹரதோ பாமோஜ்ஜங் ந ஹோதி. பாமோஜ்ஜே அஸதி, பீதி ந ஹோதி. பீதியா அஸதி, பஸ்ஸத்³தி⁴ ந ஹோதி. பஸ்ஸத்³தி⁴யா அஸதி, து³க்க²ங் விஹரதி. து³க்கி²னோ சித்தங் ந ஸமாதி⁴யதி . அஸமாஹிதே சித்தே த⁴ம்மா ந பாதுப⁴வந்தி. த⁴ம்மானங் அபாதுபா⁴வா பமாத³விஹாரீ த்வேவ ஸங்க்²யங் க³ச்ச²தி. ஏவங் கோ², நந்தி³ய, அரியஸாவகோ பமாத³விஹாரீ ஹோதி.
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi santuṭṭho na uttari vāyamati divā pavivekāya rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati . Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati. Evaṃ kho, nandiya, ariyasāvako pamādavihārī hoti.
‘‘கத²ஞ்ச, நந்தி³ய, அரியஸாவகோ அப்பமாத³விஹாரீ ஹோதி? இத⁴, நந்தி³ய, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. ஸோ தேன பு³த்³தே⁴ அவேச்சப்பஸாதே³ன அஸந்துட்டோ² உத்தரி வாயமதி தி³வா பவிவேகாய ரத்திங் படிஸல்லானாய. தஸ்ஸ ஏவங் அப்பமத்தஸ்ஸ விஹரதோ பாமோஜ்ஜங் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ங் வேதி³யதி. ஸுகி²னோ சித்தங் ஸமாதி⁴யதி. ஸமாஹிதே சித்தே த⁴ம்மா பாதுப⁴வந்தி. த⁴ம்மானங் பாதுபா⁴வா அப்பமாத³விஹாரீ த்வேவ ஸங்க்²யங் க³ச்ச²தி .
‘‘Kathañca, nandiya, ariyasāvako appamādavihārī hoti? Idha, nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena asantuṭṭho uttari vāyamati divā pavivekāya rattiṃ paṭisallānāya. Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati .
‘‘புன சபரங், நந்தி³ய, அரியஸாவகோ த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. ஸோ தேஹி அரியகந்தேஹி ஸீலேஹி அஸந்துட்டோ² உத்தரி வாயமதி தி³வா பவிவேகாய ரத்திங் படிஸல்லானாய . தஸ்ஸ ஏவங் அப்பமத்தஸ்ஸ விஹரதோ பாமோஜ்ஜங் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ங் வேதி³யதி. ஸுகி²னோ சித்தங் ஸமாதி⁴யதி. ஸமாஹிதே சித்தே த⁴ம்மா பாதுப⁴வந்தி. த⁴ம்மானங் பாதுபா⁴வா அப்பமாத³விஹாரீ த்வேவ ஸங்க்²யங் க³ச்ச²தி. ஏவங் கோ², நந்தி³ய, அரியஸாவகோ அப்பமாத³விஹாரீ ஹோதீ’’தி. த³ஸமங்.
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi asantuṭṭho uttari vāyamati divā pavivekāya rattiṃ paṭisallānāya . Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati. Evaṃ kho, nandiya, ariyasāvako appamādavihārī hotī’’ti. Dasamaṃ.
புஞ்ஞாபி⁴ஸந்த³வக்³கோ³ சதுத்தோ².
Puññābhisandavaggo catuttho.
தஸ்ஸுத்³தா³னங் –
Tassuddānaṃ –
அபி⁴ஸந்தா³ தயோ வுத்தா, து³வே தே³வபதா³னி ச;
Abhisandā tayo vuttā, duve devapadāni ca;
ஸபா⁴க³தங் மஹானாமோ, வஸ்ஸங் காளீ ச நந்தி³யாதி.
Sabhāgataṃ mahānāmo, vassaṃ kāḷī ca nandiyāti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. நந்தி³யஸக்கஸுத்தவண்ணனா • 10. Nandiyasakkasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. நந்தி³யஸக்கஸுத்தவண்ணனா • 10. Nandiyasakkasuttavaṇṇanā
