| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. নন্দিযসক্কসুত্তং
10. Nandiyasakkasuttaṃ
১০৩৬. একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে। অথ খো নন্দিযো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো নন্দিযো সক্কো ভগৰন্তং এতদৰোচ – ‘‘যস্সেৰ নু খো, ভন্তে, অরিযসাৰকস্স চত্তারি সোতাপত্তিযঙ্গানি সব্বেন সব্বং সব্বথা সব্বং নত্থি স্ৰেৰ নু খো, ভন্তে, অরিযসাৰকো পমাদৰিহারী’’তি।
1036. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho nandiyo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho nandiyo sakko bhagavantaṃ etadavoca – ‘‘yasseva nu kho, bhante, ariyasāvakassa cattāri sotāpattiyaṅgāni sabbena sabbaṃ sabbathā sabbaṃ natthi sveva nu kho, bhante, ariyasāvako pamādavihārī’’ti.
‘‘‘যস্স খো, নন্দিয, চত্তারি সোতাপত্তিযঙ্গানি সব্বেন সব্বং সব্বথা সব্বং নত্থি তমহং বাহিরো পুথুজ্জনপক্খে ঠিতো’তি ৰদামি। অপি চ, নন্দিয, যথা অরিযসাৰকো পমাদৰিহারী চেৰ হোতি, অপ্পমাদৰিহারী চ তং সুণাহি, সাধুকং মনসি করোহি; ভাসিস্সামী’’তি। ‘‘এৰং , ভন্তে’’তি খো নন্দিযো সক্কো ভগৰতো পচ্চস্সোসি। ভগৰা এতদৰোচ –
‘‘‘Yassa kho, nandiya, cattāri sotāpattiyaṅgāni sabbena sabbaṃ sabbathā sabbaṃ natthi tamahaṃ bāhiro puthujjanapakkhe ṭhito’ti vadāmi. Api ca, nandiya, yathā ariyasāvako pamādavihārī ceva hoti, appamādavihārī ca taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ , bhante’’ti kho nandiyo sakko bhagavato paccassosi. Bhagavā etadavoca –
‘‘কথঞ্চ, নন্দিয, অরিযসাৰকো পমাদৰিহারী হোতি? ইধ নন্দিয, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। সো তেন বুদ্ধে অৰেচ্চপ্পসাদেন সন্তুট্ঠো ন উত্তরি ৰাযমতি দিৰা পৰিৰেকায, রত্তিং পটিসল্লানায। তস্স এৰং পমত্তস্স ৰিহরতো পামোজ্জং ন হোতি। পামোজ্জে অসতি, পীতি ন হোতি। পীতিযা অসতি, পস্সদ্ধি ন হোতি। পস্সদ্ধিযা অসতি, দুক্খং ৰিহরতি। দুক্খিনো চিত্তং ন সমাধিযতি। অসমাহিতে চিত্তে ধম্মা ন পাতুভৰন্তি। ধম্মানং অপাতুভাৰা পমাদৰিহারী ত্ৰেৰ সঙ্খ্যং গচ্ছতি।
‘‘Kathañca, nandiya, ariyasāvako pamādavihārī hoti? Idha nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena santuṭṭho na uttari vāyamati divā pavivekāya, rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati. Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati.
‘‘পুন চপরং, নন্দিয, অরিযসাৰকো ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। সো তেহি অরিযকন্তেহি সীলেহি সন্তুট্ঠো ন উত্তরি ৰাযমতি দিৰা পৰিৰেকায রত্তিং পটিসল্লানায। তস্স এৰং পমত্তস্স ৰিহরতো পামোজ্জং ন হোতি। পামোজ্জে অসতি, পীতি ন হোতি। পীতিযা অসতি, পস্সদ্ধি ন হোতি। পস্সদ্ধিযা অসতি, দুক্খং ৰিহরতি। দুক্খিনো চিত্তং ন সমাধিযতি । অসমাহিতে চিত্তে ধম্মা ন পাতুভৰন্তি। ধম্মানং অপাতুভাৰা পমাদৰিহারী ত্ৰেৰ সঙ্খ্যং গচ্ছতি। এৰং খো, নন্দিয, অরিযসাৰকো পমাদৰিহারী হোতি।
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi santuṭṭho na uttari vāyamati divā pavivekāya rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati . Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati. Evaṃ kho, nandiya, ariyasāvako pamādavihārī hoti.
‘‘কথঞ্চ, নন্দিয, অরিযসাৰকো অপ্পমাদৰিহারী হোতি? ইধ, নন্দিয, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। সো তেন বুদ্ধে অৰেচ্চপ্পসাদেন অসন্তুট্ঠো উত্তরি ৰাযমতি দিৰা পৰিৰেকায রত্তিং পটিসল্লানায। তস্স এৰং অপ্পমত্তস্স ৰিহরতো পামোজ্জং জাযতি। পমুদিতস্স পীতি জাযতি। পীতিমনস্স কাযো পস্সম্ভতি। পস্সদ্ধকাযো সুখং ৰেদিযতি। সুখিনো চিত্তং সমাধিযতি। সমাহিতে চিত্তে ধম্মা পাতুভৰন্তি। ধম্মানং পাতুভাৰা অপ্পমাদৰিহারী ত্ৰেৰ সঙ্খ্যং গচ্ছতি ।
‘‘Kathañca, nandiya, ariyasāvako appamādavihārī hoti? Idha, nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena asantuṭṭho uttari vāyamati divā pavivekāya rattiṃ paṭisallānāya. Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati .
‘‘পুন চপরং, নন্দিয, অরিযসাৰকো ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। সো তেহি অরিযকন্তেহি সীলেহি অসন্তুট্ঠো উত্তরি ৰাযমতি দিৰা পৰিৰেকায রত্তিং পটিসল্লানায । তস্স এৰং অপ্পমত্তস্স ৰিহরতো পামোজ্জং জাযতি। পমুদিতস্স পীতি জাযতি। পীতিমনস্স কাযো পস্সম্ভতি। পস্সদ্ধকাযো সুখং ৰেদিযতি। সুখিনো চিত্তং সমাধিযতি। সমাহিতে চিত্তে ধম্মা পাতুভৰন্তি। ধম্মানং পাতুভাৰা অপ্পমাদৰিহারী ত্ৰেৰ সঙ্খ্যং গচ্ছতি। এৰং খো, নন্দিয, অরিযসাৰকো অপ্পমাদৰিহারী হোতী’’তি। দসমং।
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi asantuṭṭho uttari vāyamati divā pavivekāya rattiṃ paṭisallānāya . Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati. Evaṃ kho, nandiya, ariyasāvako appamādavihārī hotī’’ti. Dasamaṃ.
পুঞ্ঞাভিসন্দৰগ্গো চতুত্থো।
Puññābhisandavaggo catuttho.
তস্সুদ্দানং –
Tassuddānaṃ –
অভিসন্দা তযো ৰুত্তা, দুৰে দেৰপদানি চ।
Abhisandā tayo vuttā, duve devapadāni ca;
সভাগতং মহানামো, ৰস্সং কাল়ী চ নন্দিযাতি॥
Sabhāgataṃ mahānāmo, vassaṃ kāḷī ca nandiyāti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. নন্দিযসক্কসুত্তৰণ্ণনা • 10. Nandiyasakkasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. নন্দিযসক্কসুত্তৰণ্ণনা • 10. Nandiyasakkasuttavaṇṇanā
