| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. នន្ទិយសក្កសុត្តំ
10. Nandiyasakkasuttaṃ
១០៣៦. ឯកំ សមយំ ភគវា សក្កេសុ វិហរតិ កបិលវត្ថុស្មិំ និគ្រោធារាមេ។ អថ ខោ នន្ទិយោ សក្កោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ នន្ទិយោ សក្កោ ភគវន្តំ ឯតទវោច – ‘‘យស្សេវ នុ ខោ, ភន្តេ, អរិយសាវកស្ស ចត្តារិ សោតាបត្តិយង្គានិ សព្ពេន សព្ពំ សព្ពថា សព្ពំ នត្ថិ ស្វេវ នុ ខោ, ភន្តេ, អរិយសាវកោ បមាទវិហារី’’តិ។
1036. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho nandiyo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho nandiyo sakko bhagavantaṃ etadavoca – ‘‘yasseva nu kho, bhante, ariyasāvakassa cattāri sotāpattiyaṅgāni sabbena sabbaṃ sabbathā sabbaṃ natthi sveva nu kho, bhante, ariyasāvako pamādavihārī’’ti.
‘‘‘យស្ស ខោ, នន្ទិយ, ចត្តារិ សោតាបត្តិយង្គានិ សព្ពេន សព្ពំ សព្ពថា សព្ពំ នត្ថិ តមហំ ពាហិរោ បុថុជ្ជនបក្ខេ ឋិតោ’តិ វទាមិ។ អបិ ច, នន្ទិយ, យថា អរិយសាវកោ បមាទវិហារី ចេវ ហោតិ, អប្បមាទវិហារី ច តំ សុណាហិ, សាធុកំ មនសិ ករោហិ; ភាសិស្សាមី’’តិ។ ‘‘ឯវំ , ភន្តេ’’តិ ខោ នន្ទិយោ សក្កោ ភគវតោ បច្ចស្សោសិ។ ភគវា ឯតទវោច –
‘‘‘Yassa kho, nandiya, cattāri sotāpattiyaṅgāni sabbena sabbaṃ sabbathā sabbaṃ natthi tamahaṃ bāhiro puthujjanapakkhe ṭhito’ti vadāmi. Api ca, nandiya, yathā ariyasāvako pamādavihārī ceva hoti, appamādavihārī ca taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ , bhante’’ti kho nandiyo sakko bhagavato paccassosi. Bhagavā etadavoca –
‘‘កថញ្ច, នន្ទិយ, អរិយសាវកោ បមាទវិហារី ហោតិ? ឥធ នន្ទិយ, អរិយសាវកោ ពុទ្ធេ អវេច្ចប្បសាទេន សមន្នាគតោ ហោតិ – ឥតិបិ សោ ភគវា…បេ.… សត្ថា ទេវមនុស្សានំ ពុទ្ធោ ភគវាតិ។ សោ តេន ពុទ្ធេ អវេច្ចប្បសាទេន សន្តុដ្ឋោ ន ឧត្តរិ វាយមតិ ទិវា បវិវេកាយ, រត្តិំ បដិសល្លានាយ។ តស្ស ឯវំ បមត្តស្ស វិហរតោ បាមោជ្ជំ ន ហោតិ។ បាមោជ្ជេ អសតិ, បីតិ ន ហោតិ។ បីតិយា អសតិ, បស្សទ្ធិ ន ហោតិ។ បស្សទ្ធិយា អសតិ, ទុក្ខំ វិហរតិ។ ទុក្ខិនោ ចិត្តំ ន សមាធិយតិ។ អសមាហិតេ ចិត្តេ ធម្មា ន បាតុភវន្តិ។ ធម្មានំ អបាតុភាវា បមាទវិហារី ត្វេវ សង្ខ្យំ គច្ឆតិ។
‘‘Kathañca, nandiya, ariyasāvako pamādavihārī hoti? Idha nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena santuṭṭho na uttari vāyamati divā pavivekāya, rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati. Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati.
‘‘បុន ចបរំ, នន្ទិយ, អរិយសាវកោ ធម្មេ…បេ.… សង្ឃេ…បេ.… អរិយកន្តេហិ សីលេហិ សមន្នាគតោ ហោតិ អខណ្ឌេហិ…បេ.… សមាធិសំវត្តនិកេហិ។ សោ តេហិ អរិយកន្តេហិ សីលេហិ សន្តុដ្ឋោ ន ឧត្តរិ វាយមតិ ទិវា បវិវេកាយ រត្តិំ បដិសល្លានាយ។ តស្ស ឯវំ បមត្តស្ស វិហរតោ បាមោជ្ជំ ន ហោតិ។ បាមោជ្ជេ អសតិ, បីតិ ន ហោតិ។ បីតិយា អសតិ, បស្សទ្ធិ ន ហោតិ។ បស្សទ្ធិយា អសតិ, ទុក្ខំ វិហរតិ។ ទុក្ខិនោ ចិត្តំ ន សមាធិយតិ ។ អសមាហិតេ ចិត្តេ ធម្មា ន បាតុភវន្តិ។ ធម្មានំ អបាតុភាវា បមាទវិហារី ត្វេវ សង្ខ្យំ គច្ឆតិ។ ឯវំ ខោ, នន្ទិយ, អរិយសាវកោ បមាទវិហារី ហោតិ។
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi santuṭṭho na uttari vāyamati divā pavivekāya rattiṃ paṭisallānāya. Tassa evaṃ pamattassa viharato pāmojjaṃ na hoti. Pāmojje asati, pīti na hoti. Pītiyā asati, passaddhi na hoti. Passaddhiyā asati, dukkhaṃ viharati. Dukkhino cittaṃ na samādhiyati . Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhyaṃ gacchati. Evaṃ kho, nandiya, ariyasāvako pamādavihārī hoti.
‘‘កថញ្ច, នន្ទិយ, អរិយសាវកោ អប្បមាទវិហារី ហោតិ? ឥធ, នន្ទិយ, អរិយសាវកោ ពុទ្ធេ អវេច្ចប្បសាទេន សមន្នាគតោ ហោតិ – ឥតិបិ សោ ភគវា…បេ.… សត្ថា ទេវមនុស្សានំ ពុទ្ធោ ភគវាតិ។ សោ តេន ពុទ្ធេ អវេច្ចប្បសាទេន អសន្តុដ្ឋោ ឧត្តរិ វាយមតិ ទិវា បវិវេកាយ រត្តិំ បដិសល្លានាយ។ តស្ស ឯវំ អប្បមត្តស្ស វិហរតោ បាមោជ្ជំ ជាយតិ។ បមុទិតស្ស បីតិ ជាយតិ។ បីតិមនស្ស កាយោ បស្សម្ភតិ។ បស្សទ្ធកាយោ សុខំ វេទិយតិ។ សុខិនោ ចិត្តំ សមាធិយតិ។ សមាហិតេ ចិត្តេ ធម្មា បាតុភវន្តិ។ ធម្មានំ បាតុភាវា អប្បមាទវិហារី ត្វេវ សង្ខ្យំ គច្ឆតិ ។
‘‘Kathañca, nandiya, ariyasāvako appamādavihārī hoti? Idha, nandiya, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So tena buddhe aveccappasādena asantuṭṭho uttari vāyamati divā pavivekāya rattiṃ paṭisallānāya. Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati .
‘‘បុន ចបរំ, នន្ទិយ, អរិយសាវកោ ធម្មេ…បេ.… សង្ឃេ…បេ.… អរិយកន្តេហិ សីលេហិ សមន្នាគតោ ហោតិ អខណ្ឌេហិ…បេ.… សមាធិសំវត្តនិកេហិ។ សោ តេហិ អរិយកន្តេហិ សីលេហិ អសន្តុដ្ឋោ ឧត្តរិ វាយមតិ ទិវា បវិវេកាយ រត្តិំ បដិសល្លានាយ ។ តស្ស ឯវំ អប្បមត្តស្ស វិហរតោ បាមោជ្ជំ ជាយតិ។ បមុទិតស្ស បីតិ ជាយតិ។ បីតិមនស្ស កាយោ បស្សម្ភតិ។ បស្សទ្ធកាយោ សុខំ វេទិយតិ។ សុខិនោ ចិត្តំ សមាធិយតិ។ សមាហិតេ ចិត្តេ ធម្មា បាតុភវន្តិ។ ធម្មានំ បាតុភាវា អប្បមាទវិហារី ត្វេវ សង្ខ្យំ គច្ឆតិ។ ឯវំ ខោ, នន្ទិយ, អរិយសាវកោ អប្បមាទវិហារី ហោតី’’តិ។ ទសមំ។
‘‘Puna caparaṃ, nandiya, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. So tehi ariyakantehi sīlehi asantuṭṭho uttari vāyamati divā pavivekāya rattiṃ paṭisallānāya . Tassa evaṃ appamattassa viharato pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ vediyati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhyaṃ gacchati. Evaṃ kho, nandiya, ariyasāvako appamādavihārī hotī’’ti. Dasamaṃ.
បុញ្ញាភិសន្ទវគ្គោ ចតុត្ថោ។
Puññābhisandavaggo catuttho.
តស្សុទ្ទានំ –
Tassuddānaṃ –
អភិសន្ទា តយោ វុត្តា, ទុវេ ទេវបទានិ ច;
Abhisandā tayo vuttā, duve devapadāni ca;
សភាគតំ មហានាមោ, វស្សំ កាឡី ច នន្ទិយាតិ។
Sabhāgataṃ mahānāmo, vassaṃ kāḷī ca nandiyāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. នន្ទិយសក្កសុត្តវណ្ណនា • 10. Nandiyasakkasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. នន្ទិយសក្កសុត្តវណ្ណនា • 10. Nandiyasakkasuttavaṇṇanā
