| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. নন্দিযসুত্তং
3. Nandiyasuttaṃ
১৩. একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে। তেন খো পন সমযেন ভগৰা সাৰত্থিযং ৰস্সাৰাসং উপগন্তুকামো হোতি 1।
13. Ekaṃ samayaṃ bhagavā sakkesu viharati kapilavatthusmiṃ nigrodhārāme. Tena kho pana samayena bhagavā sāvatthiyaṃ vassāvāsaṃ upagantukāmo hoti 2.
অস্সোসি খো নন্দিযো সক্কো – ‘‘ভগৰা কির সাৰত্থিযং ৰস্সাৰাসং উপগন্তুকামো’’তি। অথ খো নন্দিযস্স সক্কস্স এতদহোসি – ‘‘যংনূনাহম্পি সাৰত্থিযং ৰস্সাৰাসং উপগচ্ছেয্যং। তত্থ কম্মন্তঞ্চেৰ অধিট্ঠহিস্সামি, ভগৰন্তঞ্চ লচ্ছামি কালেন কালং দস্সনাযা’’তি।
Assosi kho nandiyo sakko – ‘‘bhagavā kira sāvatthiyaṃ vassāvāsaṃ upagantukāmo’’ti. Atha kho nandiyassa sakkassa etadahosi – ‘‘yaṃnūnāhampi sāvatthiyaṃ vassāvāsaṃ upagaccheyyaṃ. Tattha kammantañceva adhiṭṭhahissāmi, bhagavantañca lacchāmi kālena kālaṃ dassanāyā’’ti.
অথ খো ভগৰা সাৰত্থিযং ৰস্সাৰাসং উপগচ্ছি 3। নন্দিযোপি খো সক্কো সাৰত্থিযং ৰস্সাৰাসং উপগচ্ছি। তত্থ কম্মন্তঞ্চেৰ অধিট্ঠাসি 4, ভগৰন্তঞ্চ লভি 5 কালেন কালং দস্সনায। তেন খো পন সমযেন সম্বহুলা ভিক্খূ ভগৰতো চীৰরকম্মং করোন্তি – ‘‘নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’তি।
Atha kho bhagavā sāvatthiyaṃ vassāvāsaṃ upagacchi 6. Nandiyopi kho sakko sāvatthiyaṃ vassāvāsaṃ upagacchi. Tattha kammantañceva adhiṭṭhāsi 7, bhagavantañca labhi 8 kālena kālaṃ dassanāya. Tena kho pana samayena sambahulā bhikkhū bhagavato cīvarakammaṃ karonti – ‘‘niṭṭhitacīvaro bhagavā temāsaccayena cārikaṃ pakkamissatī’’ti.
অস্সোসি খো নন্দিযো সক্কো – ‘‘সম্বহুলা কির ভিক্খূ ভগৰতো চীৰরকম্মং করোন্তি – ‘নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’’তি। অথ খো নন্দিযো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো নন্দিযো সক্কো ভগৰন্তং এতদৰোচ – ‘‘সুতং মেতং, ভন্তে – ‘সম্বহুলা কির ভিক্খূ ভগৰতো চীৰরকম্মং করোন্তি – নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’তি। তেসং নো, ভন্তে, নানাৰিহারেহি ৰিহরতং কেনস্স ৰিহারেন ৰিহাতব্ব’’ন্তি?
Assosi kho nandiyo sakko – ‘‘sambahulā kira bhikkhū bhagavato cīvarakammaṃ karonti – ‘niṭṭhitacīvaro bhagavā temāsaccayena cārikaṃ pakkamissatī’’’ti. Atha kho nandiyo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho nandiyo sakko bhagavantaṃ etadavoca – ‘‘sutaṃ metaṃ, bhante – ‘sambahulā kira bhikkhū bhagavato cīvarakammaṃ karonti – niṭṭhitacīvaro bhagavā temāsaccayena cārikaṃ pakkamissatī’ti. Tesaṃ no, bhante, nānāvihārehi viharataṃ kenassa vihārena vihātabba’’nti?
‘‘সাধু সাধু, নন্দিয! এতং খো, নন্দিয, তুম্হাকং পতিরূপং কুলপুত্তানং, যং তুম্হে তথাগতং উপসঙ্কমিত্ৰা পুচ্ছেয্যাথ – ‘তেসং নো, ভন্তে, নানাৰিহারেহি ৰিহরতং কেনস্স ৰিহারেন ৰিহাতব্ব’ন্তি? সদ্ধো খো, নন্দিয, আরাধকো হোতি, নো অস্সদ্ধো; সীলৰা আরাধকো হোতি, নো দুস্সীলো; আরদ্ধৰীরিযো আরাধকো হোতি, নো কুসীতো; উপট্ঠিতস্সতি আরাধকো হোতি, নো মুট্ঠস্সতি; সমাহিতো আরাধকো হোতি, নো অসমাহিতো; পঞ্ঞৰা আরাধকো হোতি, নো দুপ্পঞ্ঞো। ইমেসু খো তে, নন্দিয, ছসু ধম্মেসু পতিট্ঠায পঞ্চসু ধম্মেসু অজ্ঝত্তং সতি উপট্ঠাপেতব্বা।
‘‘Sādhu sādhu, nandiya! Etaṃ kho, nandiya, tumhākaṃ patirūpaṃ kulaputtānaṃ, yaṃ tumhe tathāgataṃ upasaṅkamitvā puccheyyātha – ‘tesaṃ no, bhante, nānāvihārehi viharataṃ kenassa vihārena vihātabba’nti? Saddho kho, nandiya, ārādhako hoti, no assaddho; sīlavā ārādhako hoti, no dussīlo; āraddhavīriyo ārādhako hoti, no kusīto; upaṭṭhitassati ārādhako hoti, no muṭṭhassati; samāhito ārādhako hoti, no asamāhito; paññavā ārādhako hoti, no duppañño. Imesu kho te, nandiya, chasu dhammesu patiṭṭhāya pañcasu dhammesu ajjhattaṃ sati upaṭṭhāpetabbā.
‘‘ইধ ত্ৰং, নন্দিয, তথাগতং অনুস্সরেয্যাসি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি , সত্থা দেৰমনুস্সানং বুদ্ধো ভগৰা’তি। ইতি খো তে, নন্দিয, তথাগতং আরব্ভ অজ্ঝত্তং সতি উপট্ঠাপেতব্বা।
‘‘Idha tvaṃ, nandiya, tathāgataṃ anussareyyāsi – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi , satthā devamanussānaṃ buddho bhagavā’ti. Iti kho te, nandiya, tathāgataṃ ārabbha ajjhattaṃ sati upaṭṭhāpetabbā.
‘‘পুন চপরং ত্ৰং, নন্দিয, ধম্মং অনুস্সরেয্যাসি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি। ইতি খো তে, নন্দিয, ধম্মং আরব্ভ অজ্ঝত্তং সতি উপট্ঠাপেতব্বা।
‘‘Puna caparaṃ tvaṃ, nandiya, dhammaṃ anussareyyāsi – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti. Iti kho te, nandiya, dhammaṃ ārabbha ajjhattaṃ sati upaṭṭhāpetabbā.
‘‘পুন চপরং ত্ৰং, নন্দিয, কল্যাণমিত্তে অনুস্সরেয্যাসি – ‘লাভা ৰত মে, সুলদ্ধং ৰত মে, যস্স মে কল্যাণমিত্তা অনুকম্পকা অত্থকামা ওৰাদকা অনুসাসকা’তি। ইতি খো তে, নন্দিয, কল্যাণমিত্তে আরব্ভ অজ্ঝত্তং সতি উপট্ঠাপেতব্বা।
‘‘Puna caparaṃ tvaṃ, nandiya, kalyāṇamitte anussareyyāsi – ‘lābhā vata me, suladdhaṃ vata me, yassa me kalyāṇamittā anukampakā atthakāmā ovādakā anusāsakā’ti. Iti kho te, nandiya, kalyāṇamitte ārabbha ajjhattaṃ sati upaṭṭhāpetabbā.
‘‘পুন চপরং ত্ৰং, নন্দিয, অত্তনো চাগং অনুস্সরেয্যাসি – ‘লাভা ৰত মে, সুলদ্ধং ৰত মে, যোহং মচ্ছেরমলপরিযুট্ঠিতায পজায ৰিগতমলমচ্ছেরেন চেতসা অগারং অজ্ঝাৰসামি মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো’তি। ইতি খো তে, নন্দিয, চাগং আরব্ভ অজ্ঝত্তং সতি উপট্ঠাপেতব্বা।
‘‘Puna caparaṃ tvaṃ, nandiya, attano cāgaṃ anussareyyāsi – ‘lābhā vata me, suladdhaṃ vata me, yohaṃ maccheramalapariyuṭṭhitāya pajāya vigatamalamaccherena cetasā agāraṃ ajjhāvasāmi muttacāgo payatapāṇi vossaggarato yācayogo dānasaṃvibhāgarato’ti. Iti kho te, nandiya, cāgaṃ ārabbha ajjhattaṃ sati upaṭṭhāpetabbā.
‘‘পুন চপরং ত্ৰং, নন্দিয, দেৰতা অনুস্সরেয্যাসি – ‘যা দেৰতা অতিক্কম্মেৰ কবল়ীকারাহারভক্খানং 9 দেৰতানং সহব্যতং অঞ্ঞতরং মনোমযং কাযং উপপন্না, তা করণীযং অত্তনো ন সমনুপস্সন্তি কতস্স ৰা পতিচযং। সেয্যথাপি, নন্দিয, ভিক্খু অসমযৰিমুত্তো করণীযং অত্তনো ন সমনুপস্সতি কতস্স ৰা পতিচযং; এৰমেৰং খো, নন্দিয, যা তা দেৰতা অতিক্কম্মেৰ কবল়ীকারাহারভক্খানং দেৰতানং সহব্যতং অঞ্ঞতরং মনোমযং কাযং উপপন্না, তা করণীযং অত্তনো ন সমনুপস্সন্তি কতস্স ৰা পতিচযং। ইতি খো তে, নন্দিয, দেৰতা আরব্ভ অজ্ঝত্তং সতি উপট্ঠাপেতব্বা।
‘‘Puna caparaṃ tvaṃ, nandiya, devatā anussareyyāsi – ‘yā devatā atikkammeva kabaḷīkārāhārabhakkhānaṃ 10 devatānaṃ sahabyataṃ aññataraṃ manomayaṃ kāyaṃ upapannā, tā karaṇīyaṃ attano na samanupassanti katassa vā paticayaṃ. Seyyathāpi, nandiya, bhikkhu asamayavimutto karaṇīyaṃ attano na samanupassati katassa vā paticayaṃ; evamevaṃ kho, nandiya, yā tā devatā atikkammeva kabaḷīkārāhārabhakkhānaṃ devatānaṃ sahabyataṃ aññataraṃ manomayaṃ kāyaṃ upapannā, tā karaṇīyaṃ attano na samanupassanti katassa vā paticayaṃ. Iti kho te, nandiya, devatā ārabbha ajjhattaṃ sati upaṭṭhāpetabbā.
‘‘ইমেহি খো, নন্দিয, একাদসহি ধম্মেহি সমন্নাগতো অরিযসাৰকো পজহতেৰ পাপকে অকুসলে ধম্মে, ন উপাদিযতি। সেয্যথাপি, নন্দিয, কুম্ভো নিক্কুজ্জো 11 ৰমতেৰ উদকং, নো ৰন্তং পচ্চাৰমতি 12; সেয্যথাপি ৰা পন, নন্দিয, সুক্খে তিণদাযে অগ্গি মুত্তো ডহঞ্ঞেৰ গচ্ছতি, নো দড্ঢং পচ্চুদাৰত্ততি ; এৰমেৰং খো, নন্দিয, ইমেহি একাদসহি ধম্মেহি সমন্নাগতো অরিযসাৰকো পজহতেৰ পাপকে অকুসলে ধম্মে, ন উপাদিযতী’’তি। ততিযং।
‘‘Imehi kho, nandiya, ekādasahi dhammehi samannāgato ariyasāvako pajahateva pāpake akusale dhamme, na upādiyati. Seyyathāpi, nandiya, kumbho nikkujjo 13 vamateva udakaṃ, no vantaṃ paccāvamati 14; seyyathāpi vā pana, nandiya, sukkhe tiṇadāye aggi mutto ḍahaññeva gacchati, no daḍḍhaṃ paccudāvattati ; evamevaṃ kho, nandiya, imehi ekādasahi dhammehi samannāgato ariyasāvako pajahateva pāpake akusale dhamme, na upādiyatī’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. নন্দিযসুত্তৰণ্ণনা • 3. Nandiyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. পঠমমহানামসুত্তাদিৰণ্ণনা • 1-4. Paṭhamamahānāmasuttādivaṇṇanā
