| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. ནནྡིཡསུཏྟཾ
10. Nandiyasuttaṃ
༡༠. སཱཝཏྠིནིདཱནཾ། ཨཐ ཁོ ནནྡིཡོ པརིབྦཱཛཀོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝཏཱ སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ནནྡིཡོ པརིབྦཱཛཀོ བྷགཝནྟཾ ཨེཏདཝོཙ – ‘‘ཀཏི ནུ ཁོ, བྷོ གོཏམ, དྷམྨཱ བྷཱཝིཏཱ བཧུལཱིཀཏཱ ནིབྦཱནངྒམཱ ཧོནྟི ནིབྦཱནཔརཱཡནཱ ནིབྦཱནཔརིཡོསཱནཱ’’ཏི?
10. Sāvatthinidānaṃ. Atha kho nandiyo paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho nandiyo paribbājako bhagavantaṃ etadavoca – ‘‘kati nu kho, bho gotama, dhammā bhāvitā bahulīkatā nibbānaṅgamā honti nibbānaparāyanā nibbānapariyosānā’’ti?
‘‘ཨཊྛིམེ ཁོ, ནནྡིཡ, དྷམྨཱ བྷཱཝིཏཱ བཧུལཱིཀཏཱ ནིབྦཱནངྒམཱ ཧོནྟི ནིབྦཱནཔརཱཡནཱ ནིབྦཱནཔརིཡོསཱནཱ། ཀཏམེ ཨཊྛ? སེཡྻཐིདཾ – སམྨཱདིཊྛི…པེ॰… སམྨཱསམཱདྷི། ཨིམེ ཁོ, ནནྡིཡ, ཨཊྛ དྷམྨཱ བྷཱཝིཏཱ བཧུལཱིཀཏཱ ནིབྦཱནངྒམཱ ཧོནྟི ནིབྦཱནཔརཱཡནཱ ནིབྦཱནཔརིཡོསཱནཱ’’ཏི། ཨེཝཾ ཝུཏྟེ ནནྡིཡོ པརིབྦཱཛཀོ བྷགཝནྟཾ ཨེཏདཝོཙ – ‘‘ཨབྷིཀྐནྟཾ , བྷོ གོཏམ, ཨབྷིཀྐནྟཾ, བྷོ གོཏམ …པེ॰… ཨུཔཱསཀཾ མཾ བྷཝཾ གོཏམོ དྷཱརེཏུ ཨཛྫཏགྒེ པཱཎུཔེཏཾ སརཎཾ གཏ’’ནྟི། དསམཾ།
‘‘Aṭṭhime kho, nandiya, dhammā bhāvitā bahulīkatā nibbānaṅgamā honti nibbānaparāyanā nibbānapariyosānā. Katame aṭṭha? Seyyathidaṃ – sammādiṭṭhi…pe… sammāsamādhi. Ime kho, nandiya, aṭṭha dhammā bhāvitā bahulīkatā nibbānaṅgamā honti nibbānaparāyanā nibbānapariyosānā’’ti. Evaṃ vutte nandiyo paribbājako bhagavantaṃ etadavoca – ‘‘abhikkantaṃ , bho gotama, abhikkantaṃ, bho gotama …pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dasamaṃ.
ཨཝིཛྫཱཝགྒོ པཋམོ།
Avijjāvaggo paṭhamo.
ཏསྶུདྡཱནཾ –
Tassuddānaṃ –
ཨཝིཛྫཉྩ ཨུཔཌྜྷཉྩ, སཱརིཔུཏྟོ ཙ བྲཱཧྨཎོ།
Avijjañca upaḍḍhañca, sāriputto ca brāhmaṇo;
ཀིམཏྠིཡོ ཙ དྭེ བྷིཀྑཱུ, ཝིབྷངྒོ སཱུཀནནྡིཡཱཏི༎
Kimatthiyo ca dve bhikkhū, vibhaṅgo sūkanandiyāti.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. ནནྡིཡསུཏྟཝཎྞནཱ • 10. Nandiyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. ནནྡིཡསུཏྟཝཎྞནཱ • 10. Nandiyasuttavaṇṇanā
