| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
5. நந்தி³யத்தே²ரகா³தா²வண்ணனா
5. Nandiyattheragāthāvaṇṇanā
ஓபா⁴ஸஜாதந்தி ஆயஸ்மதோ நந்தி³யத்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ காலே ஸத்த²ரி பரினிப்³பு³தே சேதியே சந்த³னஸாரேன வேதி³கங் காரெத்வா உளாரங் பூஜாஸக்காரங் பவத்தேஸி. ததோ பட்டா²ய அஜ்ஜா²ஸயஸம்பன்னோ ஹுத்வா தத்த² தத்த² விவட்டூபனிஸ்ஸயங் ப³ஹுங் புஞ்ஞகம்மங் ஆசினித்வா தே³வேஸு ச மனுஸ்ஸேஸு ச ஸங்ஸரந்தோ இமஸ்மிங் பு³த்³து⁴ப்பாதே³ கபிலவத்து²ஸ்மிங் ஸக்யராஜகுலே நிப்³ப³த்தி. தஸ்ஸ மாதாபிதரோ நந்தி³ங் ஜனெந்தோ ஜாதோதி நந்தி³யோதி நாமங் அகங்ஸு. ஸோ வயப்பத்தோ அனுருத்³தா⁴தீ³ஸு ஸத்து² ஸந்திகே பப்³ப³ஜந்தேஸு ஸயம்பி பப்³ப³ஜித்வா விபஸ்ஸனாய கம்மங் கரொந்தோ கதாதி⁴காரதாய நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 1.15.15-20) –
Obhāsajātanti āyasmato nandiyattherassa gāthā. Kā uppatti? So kira padumuttarassa bhagavato kāle satthari parinibbute cetiye candanasārena vedikaṃ kāretvā uḷāraṃ pūjāsakkāraṃ pavattesi. Tato paṭṭhāya ajjhāsayasampanno hutvā tattha tattha vivaṭṭūpanissayaṃ bahuṃ puññakammaṃ ācinitvā devesu ca manussesu ca saṃsaranto imasmiṃ buddhuppāde kapilavatthusmiṃ sakyarājakule nibbatti. Tassa mātāpitaro nandiṃ janento jātoti nandiyoti nāmaṃ akaṃsu. So vayappatto anuruddhādīsu satthu santike pabbajantesu sayampi pabbajitvā vipassanāya kammaṃ karonto katādhikāratāya nacirasseva arahattaṃ pāpuṇi. Tena vuttaṃ apadāne (apa. thera 1.15.15-20) –
‘‘பது³முத்தரோ நாம ஜினோ, லோகஜெட்டோ² நராஸபோ⁴;
‘‘Padumuttaro nāma jino, lokajeṭṭho narāsabho;
ஜலித்வா அக்³கி³க²ந்தோ⁴வ, ஸம்பு³த்³தோ⁴ பரினிப்³பு³தோ.
Jalitvā aggikhandhova, sambuddho parinibbuto.
‘‘நிப்³பு³தே ச மஹாவீரே, தூ²போ வித்தா²ரிகோ அஹு;
‘‘Nibbute ca mahāvīre, thūpo vitthāriko ahu;
தூ³ரதோவ உபட்டெ²ந்தி, தா⁴துகே³ஹவருத்தமே.
Dūratova upaṭṭhenti, dhātugehavaruttame.
‘‘பஸன்னசித்தோ ஸுமனோ, அகங் சந்த³னவேதி³கங்;
‘‘Pasannacitto sumano, akaṃ candanavedikaṃ;
தி³ஸ்ஸதி தூ²பக²ந்தோ⁴ ச, தூ²பானுச்ச²விகோ ததா³.
Dissati thūpakhandho ca, thūpānucchaviko tadā.
‘‘ப⁴வே நிப்³ப³த்தமானம்ஹி, தே³வத்தே அத² மானுஸே.
‘‘Bhave nibbattamānamhi, devatte atha mānuse.
ஓமத்தங் மே ந பஸ்ஸாமி, புப்³ப³கம்மஸ்ஸித³ங் ப²லங்.
Omattaṃ me na passāmi, pubbakammassidaṃ phalaṃ.
‘‘பஞ்சத³ஸகப்பஸதே, இதோ அட்ட² ஜனா அஹுங்;
‘‘Pañcadasakappasate, ito aṭṭha janā ahuṃ;
ஸப்³பே³ ஸமத்தனாமா தே சக்கவத்தீ மஹப்³ப³லா.
Sabbe samattanāmā te cakkavattī mahabbalā.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா அனுருத்³த⁴த்தே²ராதீ³ஹி ஸத்³தி⁴ங் பாசீனவங்ஸமிக³தா³யே விஹரந்தே இமஸ்மிங் தே²ரே ஏகதி³வஸங் மாரோ பாபிமா பி⁴ங்ஸாபேதுகாமோ தஸ்ஸ பே⁴ரவரூபங் த³ஸ்ஸேதி. தே²ரோ தங் ‘‘மாரோ அய’’ந்தி ஞத்வா ‘‘பாபிம, யே மாரதெ⁴ய்யங் வீதிவத்தா, தேஸங் தவ கிரியா கிங் கரிஸ்ஸதி, ததோனிதா³னங் பன த்வங் ஏவ விகா⁴தங் அனத்த²ங் பாபுணிஸ்ஸஸீ’’தி த³ஸ்ஸெந்தோ ‘‘ஓபா⁴ஸஜாதங் ப²லக³’’ந்தி கா³த²ங் அபா⁴ஸி.
Arahattaṃ pana patvā anuruddhattherādīhi saddhiṃ pācīnavaṃsamigadāye viharante imasmiṃ there ekadivasaṃ māro pāpimā bhiṃsāpetukāmo tassa bheravarūpaṃ dasseti. Thero taṃ ‘‘māro aya’’nti ñatvā ‘‘pāpima, ye māradheyyaṃ vītivattā, tesaṃ tava kiriyā kiṃ karissati, tatonidānaṃ pana tvaṃ eva vighātaṃ anatthaṃ pāpuṇissasī’’ti dassento ‘‘obhāsajātaṃ phalaga’’nti gāthaṃ abhāsi.
25. தத்த² ஓபா⁴ஸஜாதந்தி ஞாணோபா⁴ஸேன ஜாதோபா⁴ஸங் அக்³க³மக்³க³ஞாணஸ்ஸ அதி⁴க³தத்தா. தேன அனவஸேஸதோ கிலேஸந்த⁴காரஸ்ஸ விஹதவித்³த⁴ங்ஸிதபா⁴வதோ அதிவிய பப⁴ஸ்ஸரந்தி அத்தோ². ப²லக³ந்தி ப²லங் க³தங் உபக³தங், அக்³க³ப²லஞாணஸஹிதந்தி அதி⁴ப்பாயோ. சித்தந்தி கீ²ணாஸவஸ்ஸ சித்தங் ஸாமஞ்ஞேன வத³தி. தேனாஹ ‘‘அபி⁴ண்ஹஸோ’’தி. தஞ்ஹி நிரோத⁴னின்னதாய கீ²ணாஸவானங் நிச்சகப்பங் அரஹத்தப²லஸமாபத்திஸமாபஜ்ஜனதோ ‘‘ப²லேன ஸஹித’’ந்தி வத்தப்³ப³தங் அரஹதி. தாதி³ஸந்தி ததா²ரூபங், அரஹந்தந்தி அத்தோ². ஆஸஜ்ஜாதி விஸோதெ⁴த்வா பரிபு⁴ய்ய. கண்ஹாதி மாரங் ஆலபதி, ஸோ ஹி கண்ஹகம்மத்தா கண்ஹாபி⁴ஜாதிதாய ச ‘‘கண்ஹோ’’தி வுச்சதி. து³க்க²ங் நிக³ச்ச²ஸீதி இத⁴ குச்சி²அனுப்பவேஸாதி³னா நிரத்த²கங் காயபரிஸ்ஸமங் து³க்க²ங், ஸம்பராயே ச அப்பதிகாரங் அபாயது³க்க²ங் உபக³மிஸ்ஸஸி பாபுணிஸ்ஸஸி. தங் ஸுத்வா மாரோ ‘‘ஜானாதி மங் ஸமணோ’’தி தத்தே²வந்தரதா⁴யீதி.
25. Tattha obhāsajātanti ñāṇobhāsena jātobhāsaṃ aggamaggañāṇassa adhigatattā. Tena anavasesato kilesandhakārassa vihataviddhaṃsitabhāvato ativiya pabhassaranti attho. Phalaganti phalaṃ gataṃ upagataṃ, aggaphalañāṇasahitanti adhippāyo. Cittanti khīṇāsavassa cittaṃ sāmaññena vadati. Tenāha ‘‘abhiṇhaso’’ti. Tañhi nirodhaninnatāya khīṇāsavānaṃ niccakappaṃ arahattaphalasamāpattisamāpajjanato ‘‘phalena sahita’’nti vattabbataṃ arahati. Tādisanti tathārūpaṃ, arahantanti attho. Āsajjāti visodhetvā paribhuyya. Kaṇhāti māraṃ ālapati, so hi kaṇhakammattā kaṇhābhijātitāya ca ‘‘kaṇho’’ti vuccati. Dukkhaṃ nigacchasīti idha kucchianuppavesādinā niratthakaṃ kāyaparissamaṃ dukkhaṃ, samparāye ca appatikāraṃ apāyadukkhaṃ upagamissasi pāpuṇissasi. Taṃ sutvā māro ‘‘jānāti maṃ samaṇo’’ti tatthevantaradhāyīti.
நந்தி³யத்தே²ரகா³தா²வண்ணனா நிட்டி²தா.
Nandiyattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 5. நந்தி³யத்தே²ரகா³தா² • 5. Nandiyattheragāthā
