| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
5. நந்து³த்தராதே²ரீகா³தா²வண்ணனா
5. Nanduttarātherīgāthāvaṇṇanā
அக்³கி³ங் சந்த³ஞ்சாதிஆதி³கா நந்து³த்தராய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயங் குஸலங் உபசினித்வா இமஸ்மிங் பு³த்³து⁴ப்பாதே³ குருரட்டே² கம்மாஸத⁴ம்மனிக³மே ப்³ராஹ்மணகுலே நிப்³ப³த்தித்வா , ஏகச்சானி விஜ்ஜாட்டா²னானி ஸிப்பாயதனானி ச உக்³க³ஹெத்வா நிக³ண்ட²பப்³ப³ஜ்ஜங் உபக³ந்த்வா, வாத³ப்பஸுதா ஜம்பு³ஸாக²ங் க³ஹெத்வா ப⁴த்³தா³குண்ட³லகேஸா விய ஜம்பு³தீ³பதலே விசரந்தீ மஹாமொக்³க³ல்லானத்தே²ரங் உபஸங்கமித்வா பஞ்ஹங் புச்சி²த்வா பராஜயங் பத்தா தே²ரஸ்ஸ ஓவாதே³ ட²த்வா ஸாஸனே பப்³ப³ஜித்வா ஸமணத⁴ம்மங் கரொந்தீ ந சிரஸ்ஸேவ ஸஹ படிஸம்பி⁴தா³ஹி அரஹத்தங் பத்வா அத்தனோ படிபத்திங் பச்சவெக்கி²த்வா உதா³னவஸேன –
Aggiṃcandañcātiādikā nanduttarāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā imasmiṃ buddhuppāde kururaṭṭhe kammāsadhammanigame brāhmaṇakule nibbattitvā , ekaccāni vijjāṭṭhānāni sippāyatanāni ca uggahetvā nigaṇṭhapabbajjaṃ upagantvā, vādappasutā jambusākhaṃ gahetvā bhaddākuṇḍalakesā viya jambudīpatale vicarantī mahāmoggallānattheraṃ upasaṅkamitvā pañhaṃ pucchitvā parājayaṃ pattā therassa ovāde ṭhatvā sāsane pabbajitvā samaṇadhammaṃ karontī na cirasseva saha paṭisambhidāhi arahattaṃ patvā attano paṭipattiṃ paccavekkhitvā udānavasena –
87.
87.
‘‘அக்³கி³ங் சந்த³ஞ்ச ஸூரியஞ்ச, தே³வதா ச நமஸ்ஸிஹங்;
‘‘Aggiṃ candañca sūriyañca, devatā ca namassihaṃ;
நதீ³தித்தா²னி க³ந்த்வான, உத³கங் ஓருஹாமிஹங்.
Nadītitthāni gantvāna, udakaṃ oruhāmihaṃ.
88.
88.
‘‘ப³ஹூவதஸமாதா³னா, அட்³ட⁴ங் ஸீஸஸ்ஸ ஓலிகி²ங்;
‘‘Bahūvatasamādānā, aḍḍhaṃ sīsassa olikhiṃ;
ச²மாய ஸெய்யங் கப்பேமி, ரத்திங் ப⁴த்தங் ந பு⁴ஞ்ஜஹங்.
Chamāya seyyaṃ kappemi, rattiṃ bhattaṃ na bhuñjahaṃ.
89.
89.
‘‘விபூ⁴ஸாமண்ட³னரதா, ந்ஹாபனுச்சா²த³னேஹி ச;
‘‘Vibhūsāmaṇḍanaratā, nhāpanucchādanehi ca;
உபகாஸிங் இமங் காயங், காமராகே³ன அட்டிதா.
Upakāsiṃ imaṃ kāyaṃ, kāmarāgena aṭṭitā.
90.
90.
‘‘ததோ ஸத்³த⁴ங் லபி⁴த்வான, பப்³ப³ஜிங் அனகா³ரியங்;
‘‘Tato saddhaṃ labhitvāna, pabbajiṃ anagāriyaṃ;
தி³ஸ்வா காயங் யதா²பூ⁴தங், காமராகோ³ ஸமூஹதோ.
Disvā kāyaṃ yathābhūtaṃ, kāmarāgo samūhato.
91.
91.
‘‘ஸப்³பே³ ப⁴வா ஸமுச்சி²ன்னா, இச்சா² ச பத்த²னாபி ச;
‘‘Sabbe bhavā samucchinnā, icchā ca patthanāpi ca;
ஸப்³ப³யோக³விஸங்யுத்தா, ஸந்திங் பாபுணி சேதஸோ’’தி. –
Sabbayogavisaṃyuttā, santiṃ pāpuṇi cetaso’’ti. –
இமா பஞ்ச கா³தா² அபா⁴ஸி.
Imā pañca gāthā abhāsi.
தத்த² அக்³கி³ங் சந்த³ஞ்ச ஸூரியஞ்ச, தே³வதா ச நமஸ்ஸிஹந்தி அக்³கி³ப்பமுகா² தே³வாதி இந்தா³னங் தே³வானங் ஆராத⁴னத்த²ங் ஆஹுதிங் பக்³க³ஹெத்வா அக்³கி³ஞ்ச, மாஸே மாஸே ஸுக்கபக்க²ஸ்ஸ து³தியாய சந்த³ஞ்ச, தி³வஸே தி³வஸே ஸாயங் பாதங் ஸூரியஞ்ச, அஞ்ஞா ச பா³ஹிரா ஹிரஞ்ஞக³ப்³பா⁴த³யோ தே³வதா ச, விஸுத்³தி⁴மக்³க³ங் க³வேஸந்தீ நமஸ்ஸிஹங் நமக்காரங் அஹங் அகாஸிங். நதீ³தித்தா²னி க³ந்த்வான, உத³கங் ஓருஹாமிஹந்தி க³ங்கா³தீ³னங் நதீ³னங் பூஜாதித்தா²னி உபக³ந்த்வா ஸாயங் பாதங் உத³கங் ஓதராமி உத³கே நிமுஜ்ஜித்வா அங்க³ஸிஞ்சனங் கரோமி.
Tattha aggiṃ candañca sūriyañca, devatā ca namassihanti aggippamukhā devāti indānaṃ devānaṃ ārādhanatthaṃ āhutiṃ paggahetvā aggiñca, māse māse sukkapakkhassa dutiyāya candañca, divase divase sāyaṃ pātaṃ sūriyañca, aññā ca bāhirā hiraññagabbhādayo devatā ca, visuddhimaggaṃ gavesantī namassihaṃ namakkāraṃ ahaṃ akāsiṃ. Nadītitthānigantvāna, udakaṃ oruhāmihanti gaṅgādīnaṃ nadīnaṃ pūjātitthāni upagantvā sāyaṃ pātaṃ udakaṃ otarāmi udake nimujjitvā aṅgasiñcanaṃ karomi.
ப³ஹூவதஸமாதா³னாதி பஞ்சாதபதப்பனாதி³ ப³ஹுவித⁴வதஸமாதா³னா. கா³தா²ஸுக²த்த²ங் ப³ஹூதி தீ³க⁴கரணங். அட்³ட⁴ங் ஸீஸஸ்ஸ ஓலிகி²ந்தி மய்ஹங் ஸீஸஸ்ஸ அட்³ட⁴மேவ முண்டே³மி. கேசி ‘‘அட்³ட⁴ங் ஸீஸஸ்ஸ ஓலிகி²ந்தி கேஸகலாபஸ்ஸ அட்³ட⁴ங் ஜடாப³ந்த⁴னவஸேன ப³ந்தி⁴த்வா அட்³ட⁴ங் விஸ்ஸஜ்ஜேஸி’’ந்தி அத்த²ங் வத³ந்தி. ச²மாய ஸெய்யங் கப்பேமீதி த²ண்டி³லஸாயினீ ஹுத்வா அனந்தரஹிதாய பூ⁴மியா ஸயாமி. ரத்திங் ப⁴த்தங் ந பு⁴ஞ்ஜஹந்தி ரத்தூபரதா ஹுத்வா ரத்தியங் போ⁴ஜனங் ந பு⁴ஞ்ஜிங்.
Bahūvatasamādānāti pañcātapatappanādi bahuvidhavatasamādānā. Gāthāsukhatthaṃ bahūti dīghakaraṇaṃ. Aḍḍhaṃ sīsassa olikhinti mayhaṃ sīsassa aḍḍhameva muṇḍemi. Keci ‘‘aḍḍhaṃ sīsassa olikhinti kesakalāpassa aḍḍhaṃ jaṭābandhanavasena bandhitvā aḍḍhaṃ vissajjesi’’nti atthaṃ vadanti. Chamāya seyyaṃ kappemīti thaṇḍilasāyinī hutvā anantarahitāya bhūmiyā sayāmi. Rattiṃ bhattaṃ na bhuñjahanti rattūparatā hutvā rattiyaṃ bhojanaṃ na bhuñjiṃ.
விபூ⁴ஸாமண்ட³னரதாதி சிரகாலங் அத்தகிலமதா²னுயோகே³ன கிலந்தகாயா ‘‘ஏவங் ஸரீரஸ்ஸ கிலமனேன நத்தி² பஞ்ஞாஸுத்³தி⁴. ஸசே பன இந்த்³ரியானங் தோஸனவஸேன ஸரீரஸ்ஸ தப்பனேன ஸுத்³தி⁴ ஸியா’’தி மந்த்வா இமங் காயங் அனுக்³க³ண்ஹந்தீ விபூ⁴ஸாயங் மண்ட³னே ச ரதா வத்தா²லங்காரேஹி அலங்கரணே க³ந்த⁴மாலாதீ³ஹி மண்ட³னே ச அபி⁴ரதா. ந்ஹாபனுச்சா²த³னேஹி சாதி ஸம்பா³ஹனாதீ³னி காரெத்வா ந்ஹாபனேன உச்சா²த³னேன ச. உபகாஸிங் இமங் காயந்தி இமங் மம காயங் அனுக்³க³ண்ஹிங் ஸந்தப்பேஸிங். காமராகே³ன அட்டிதாதி ஏவங் காயத³ள்ஹீப³ஹுலா ஹுத்வா அயோனிஸோமனஸிகாரபச்சயா பரியுட்டி²தேன காமராகே³ன அட்டிதா அபி⁴ண்ஹங் உபத்³து³தா அஹோஸிங்.
Vibhūsāmaṇḍanaratāti cirakālaṃ attakilamathānuyogena kilantakāyā ‘‘evaṃ sarīrassa kilamanena natthi paññāsuddhi. Sace pana indriyānaṃ tosanavasena sarīrassa tappanena suddhi siyā’’ti mantvā imaṃ kāyaṃ anuggaṇhantī vibhūsāyaṃ maṇḍane ca ratā vatthālaṅkārehi alaṅkaraṇe gandhamālādīhi maṇḍane ca abhiratā. Nhāpanucchādanehi cāti sambāhanādīni kāretvā nhāpanena ucchādanena ca. Upakāsiṃ imaṃ kāyanti imaṃ mama kāyaṃ anuggaṇhiṃ santappesiṃ. Kāmarāgena aṭṭitāti evaṃ kāyadaḷhībahulā hutvā ayonisomanasikārapaccayā pariyuṭṭhitena kāmarāgena aṭṭitā abhiṇhaṃ upaddutā ahosiṃ.
ததோ ஸத்³த⁴ங் லபி⁴த்வானாதி ஏவங் ஸமாதி³ன்னவதானி பி⁴ந்தி³த்வா காயத³ள்ஹீப³ஹுலா வாத³ப்பஸுதா ஹுத்வா தத்த² தத்த² விசரந்தீ ததோ பச்சா² அபரபா⁴கே³ மஹாமொக்³க³ல்லானத்தே²ரஸ்ஸ ஸந்திகே லத்³தோ⁴வாதா³னுஸாஸனா ஸத்³த⁴ங் படிலபி⁴த்வா. தி³ஸ்வா காயங் யதா²பூ⁴தந்தி ஸஹ விபஸ்ஸனாய மக்³க³பஞ்ஞாய இமங் மம காயங் யதா²பூ⁴தங் தி³ஸ்வா அனாகா³மிமக்³கே³ன ஸப்³ப³ஸோ காமராகோ³ ஸமூஹதோ. ததோ பரங் அக்³க³மக்³கே³ன ஸப்³பே³ ப⁴வா ஸமுச்சி²ன்னா, இச்சா² ச பத்த²னாபி சாதி பச்சுப்பன்னவிஸயாபி⁴லாஸஸங்கா²தா இச்சா² ச ஆயதிப⁴வாபி⁴லாஸஸங்கா²தா பத்த²னாபி ஸப்³பே³ ப⁴வாபி ஸமுச்சி²ன்னாதி யோஜனா . ஸந்திங் பாபுணி சேதஸோதி அச்சந்தங் ஸந்திங் அரஹத்தப²லங் பாபுணிங் அதி⁴க³ச்சி²ந்தி அத்தோ².
Tato saddhaṃ labhitvānāti evaṃ samādinnavatāni bhinditvā kāyadaḷhībahulā vādappasutā hutvā tattha tattha vicarantī tato pacchā aparabhāge mahāmoggallānattherassa santike laddhovādānusāsanā saddhaṃ paṭilabhitvā. Disvā kāyaṃ yathābhūtanti saha vipassanāya maggapaññāya imaṃ mama kāyaṃ yathābhūtaṃ disvā anāgāmimaggena sabbaso kāmarāgo samūhato. Tato paraṃ aggamaggena sabbe bhavā samucchinnā, icchā ca patthanāpi cāti paccuppannavisayābhilāsasaṅkhātā icchā ca āyatibhavābhilāsasaṅkhātā patthanāpi sabbe bhavāpi samucchinnāti yojanā . Santiṃ pāpuṇi cetasoti accantaṃ santiṃ arahattaphalaṃ pāpuṇiṃ adhigacchinti attho.
நந்து³த்தராதே²ரீகா³தா²வண்ணனா நிட்டி²தா.
Nanduttarātherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 5. நந்து³த்தராதே²ரீகா³தா² • 5. Nanduttarātherīgāthā
