[144] 4. நங்கு³ட்ட²ஜாதகவண்ணனா

ப³ஹும்பேதங் அஸப்³பி⁴ ஜாதவேதா³தி இத³ங் ஸத்தா² ஜேதவனே விஹரந்தோ ஆஜீவகானங் மிச்சா²தபங் ஆரப்³ப⁴ கதே²ஸி. ததா³ கிர ஆஜீவகா ஜேதவனபிட்டி²யங் நானப்பகாரங் மிச்சா²தபங் சரந்தி. ஸம்ப³ஹுலா பி⁴க்கூ² தேஸங் உக்குடிகப்பதா⁴னவக்³கு³லிவதகண்டகாபஸ்ஸயபஞ்சாதபதபனாதி³பே⁴த³ங் மிச்சா²தபங் தி³ஸ்வா ப⁴க³வந்தங் புச்சி²ங்ஸு ‘‘அத்தி² நு கோ², ப⁴ந்தே, இமங் மிச்சா²தபங் நிஸ்ஸாய குஸலங் வா வுட்³டி⁴ வா’’தி. ஸத்தா² ‘‘ந, பி⁴க்க²வே, ஏவரூபங் மிச்சா²தபங் நிஸ்ஸாய குஸலங் வா வுட்³டி⁴ வா அத்தி², புப்³பே³ பண்டி³தா ‘ஏவரூபங் தபங் நிஸ்ஸாய குஸலங் வா வுட்³டி⁴ வா ப⁴விஸ்ஸதீ’தி ஸஞ்ஞாய ஜாதக்³கி³ங் க³ஹெத்வா அரஞ்ஞங் பவிஸித்வா அக்³கி³ஜுஹனாதி³வஸேன கிஞ்சி வுட்³டி⁴ங் அபஸ்ஸந்தா அக்³கி³ங் உத³கேன நிப்³பா³பெத்வா கஸிணபரிகம்மங் கத்வா அபி⁴ஞ்ஞா ச ஸமாபத்தியோ ச நிப்³ப³த்தெத்வா ப்³ரஹ்மலோகபராயணா அஹேஸு’’ந்தி வத்வா அதீதங் ஆஹரி.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ உதி³ச்சப்³ராஹ்மணகுலே நிப்³ப³த்தி. தஸ்ஸ ஜாததி³வஸே மாதாபிதரோ ஜாதக்³கி³ங் க³ஹெத்வா ட²பேஸுங். அத² நங் ஸோளஸவஸ்ஸகாலே ஏதத³வோசுங் ‘‘மயங் தே, புத்த, ஜாததி³வஸே அக்³கி³ங் க³ண்ஹிம்ஹ. ஸசேஸி அகா³ரங் அஜ்ஜா²வஸிதுகாமோ, தயோ வேதே³ உக்³க³ண்ஹ. அத² ப்³ரஹ்மலோகங் க³ந்துகாமோ, அக்³கி³ங் க³ஹெத்வா அரஞ்ஞங் பவிஸித்வா அக்³கி³ங் பரிசரந்தோ மஹாப்³ரஹ்மானங் ஆராதெ⁴த்வா ப்³ரஹ்மலோகபராயணோ ஹோஹீ’’தி. ஸோ ‘‘ந மய்ஹங் அகா³ரேன அத்தோ²’’தி அக்³கி³ங் க³ஹெத்வா அரஞ்ஞங் பவிஸித்வா அஸ்ஸமபத³ங் மாபெத்வா அக்³கி³ங் பரிசரந்தோ அரஞ்ஞே விஹாஸி. ஸோ ஏகதி³வஸங் பச்சந்தகா³மகே கோ³த³க்கி²ணங் லபி⁴த்வா தங் கோ³ணங் அஸ்ஸமபத³ங் நெத்வா சிந்தேஸி ‘‘அக்³கி³ப⁴க³வந்தங் கோ³மங்ஸங் கா²தா³பெஸ்ஸாமீ’’தி. அத²ஸ்ஸ ஏதத³ஹோஸி ‘‘இத⁴ லோணங் நத்தி², அக்³கி³ப⁴க³வா அலோணங் கா²தி³துங் ந ஸக்கி²ஸ்ஸதி, கா³மதோ லோணங் ஆஹரித்வா அக்³கி³ப⁴க³வந்தங் ஸலோணகங் கா²தா³பெஸ்ஸாமீ’’தி. ஸோ தங் தத்தே²வ ப³ந்தி⁴த்வா லோணத்தா²ய கா³மகங் அக³மாஸி. தஸ்மிங் க³தே ஸம்ப³ஹுலா லுத்³த³கா தங் டா²னங் ஆக³தா. கோ³ணங் தி³ஸ்வா வதி⁴த்வா மங்ஸங் பசித்வா கா²தி³த்வா நங்கு³ட்ட²ஞ்ச ஜங்க⁴ஞ்ச சம்மஞ்ச தத்தே²வ ச²ட்³டெ³த்வா அவஸேஸமங்ஸங் ஆதா³ய அக³மங்ஸு.

ப்³ராஹ்மணோ ஆக³ந்த்வா நங்கு³ட்டா²தி³மத்தமேவ தி³ஸ்வா சிந்தேஸி ‘‘அயங் அக்³கி³ப⁴க³வா அத்தனோ ஸந்தகம்பி ரக்கி²துங் ந ஸக்கோதி, மங் பன கதா³ ரக்கி²ஸ்ஸதி. இமினா அக்³கி³பரிசரணேன நிரத்த²கேன ப⁴விதப்³ப³ங், நத்தி² இதோனிதா³னங் குஸலங் வா வுட்³டி⁴ வா’’தி. ஸோ அக்³கி³பரிசரியாய விக³தச்ச²ந்தோ³ ‘‘ஹம்போ⁴ அக்³கி³ப⁴க³வா, த்வங் அத்தனோபி ஸந்தகங் ரக்கி²துங் அஸக்கொந்தோ மங் கதா³ ரக்கி²ஸ்ஸஸி, மங்ஸங் நத்தி², எத்தகேனபி துஸ்ஸாஹீ’’தி நங்கு³ட்டா²தீ³னி அக்³கி³ம்ஹி பக்கி²பந்தோ இமங் கா³த²மாஹ –

144.

‘‘ப³ஹும்பேதங் அஸப்³பி⁴ ஜாதவேத³, யங் தங் வாலதி⁴னாபி⁴பூஜயாம;

மங்ஸாரஹஸ்ஸ நத்த²ஜ்ஜ மங்ஸங், நங்கு³ட்ட²ம்பி ப⁴வங் படிக்³க³ஹாதூ’’தி.

தத்த² ப³ஹும்பேதந்தி எத்தகம்பி ப³ஹுங். அஸப்³பீ⁴தி அஸப்புரிஸ அஸாது⁴ஜாதிக. ஜாதவேதா³தி அக்³கி³ங் ஆலபதி. அக்³கி³ ஹி ஜாதமத்தோவ வேதி³யதி பஞ்ஞாயதி பாகடோ ஹோதி, தஸ்மா ‘‘ஜாதவேதோ³’’தி வுச்சதி. யங் தங் வாலதி⁴னாபி⁴பூஜயாமாதி யங் அஜ்ஜ மயங் அத்தனோபி ஸந்தகங் ரக்கி²துங் அஸமத்த²ங் ப⁴க³வந்தங் வாலதி⁴னா அபி⁴பூஜயாம, ஏதம்பி தவ ப³ஹுமேவாதி த³ஸ்ஸேதி. மங்ஸாரஹஸ்ஸாதி மங்ஸங் அரஹஸ்ஸ துய்ஹங் நத்தி² அஜ்ஜ மங்ஸங். நங்கு³ட்ட²ம்பி ப⁴வங் படிக்³க³ஹாதூதி அத்தனோ ஸந்தகங் ரக்கி²துங் அஸக்கொந்தோ ப⁴வங் இமங் ஸஜங்க⁴சம்மங் நங்கு³ட்ட²ம்பி படிக்³க³ண்ஹாதூதி.

ஏவங் வத்வா மஹாஸத்தோ அக்³கி³ங் உத³கேன நிப்³பா³பெத்வா இஸிபப்³ப³ஜ்ஜங் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தெத்வா ப்³ரஹ்மலோகபராயணோ அஹோஸி.

ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘நிப்³பு³தக்³கி³தாபஸோ அஹமேவ தேன ஸமயேனா’’தி.

நங்கு³ட்ட²ஜாதகவண்ணனா சதுத்தா².