| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. නප්‌පටිප්‌පස්‌සම්‌භනවග්‌ගො
2. Nappaṭippassambhanavaggo
420. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බ’’න්‌ති?
420. ‘‘Katihi nu kho, bhante, aṅgehi samannāgatassa bhikkhuno kammaṃ nappaṭippassambhetabba’’nti?
‘‘පඤ්‌චහුපාලි, අඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං. කතමෙහි පඤ්‌චහි ? ආපත්‌තිං ආපන්‌නො කම්‌මකතො උපසම්‌පාදෙති, නිස්‌සයං දෙති, සාමණෙරං උපට්‌ඨාපෙති, භික්‌ඛුනොවාදකසම්‌මුතිං සාදියති, සම්‌මතොපි භික්‌ඛුනියො ඔවදති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං.
‘‘Pañcahupāli, aṅgehi samannāgatassa bhikkhuno kammaṃ nappaṭippassambhetabbaṃ. Katamehi pañcahi ? Āpattiṃ āpanno kammakato upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ.
1 ‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං. කතමෙහි පඤ්‌චහි? යාය ආපත්‌තියා සඞ්‌ඝෙන කම්‌මං කතං හොති තං ආපත්‌තිං ආපජ්‌ජති, අඤ්‌ඤං වා තාදිසිකං, තතො වා පාපිට්‌ඨතරං, කම්‌මං ගරහති, කම්‌මිකෙ ගරහති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං.
2 ‘‘Aparehipi, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ. Katamehi pañcahi? Yāya āpattiyā saṅghena kammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ, kammaṃ garahati, kammike garahati – imehi kho, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං. කතමෙහි පඤ්‌චහි? බුද්‌ධස්‌ස අවණ්‌ණං භාසති, ධම්‌මස්‌ස අවණ්‌ණං භාසති, සඞ්‌ඝස්‌ස අවණ්‌ණං භාසති, මිච්‌ඡාදිට්‌ඨිකො ච හොති, ආජීවවිපන්‌නො ච – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං.
‘‘Aparehipi, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ. Katamehi pañcahi? Buddhassa avaṇṇaṃ bhāsati, dhammassa avaṇṇaṃ bhāsati, saṅghassa avaṇṇaṃ bhāsati, micchādiṭṭhiko ca hoti, ājīvavipanno ca – imehi kho, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බං. කතමෙහි පඤ්‌චහි? අලජ්‌ජී ච හොති, බාලො ච, අපකතත්‌තො ච, ඔමද්‌දකාරකො ච හොති, වත්‌තෙසු සික්‌ඛාය ච න පරිපූරකාරී – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො කම්‌මං නප්‌පටිප්‌පස්‌සම්‌භෙතබ්‌බ’’න්‌ති.
‘‘Aparehipi, upāli, pañcahaṅgehi samannāgatassa bhikkhuno kammaṃ nappaṭippassambhetabbaṃ. Katamehi pañcahi? Alajjī ca hoti, bālo ca, apakatatto ca, omaddakārako ca hoti, vattesu sikkhāya ca na paripūrakārī – imehi kho, upāli, pañcahaṅgehi samannāgatassa bhikkhuno kammaṃ nappaṭippassambhetabba’’nti.
421. ‘‘සඞ්‌ගාමාවචරෙන, භන්‌තෙ, භික්‌ඛුනා සඞ්‌ඝං උපසඞ්‌කමන්‌තෙන කති ධම්‌මෙ අජ්‌ඣත්‌තං උපට්‌ඨාපෙත්‌වා සඞ්‌ඝො උපසඞ්‌කමිතබ්‌බො’’ති?
421. ‘‘Saṅgāmāvacarena, bhante, bhikkhunā saṅghaṃ upasaṅkamantena kati dhamme ajjhattaṃ upaṭṭhāpetvā saṅgho upasaṅkamitabbo’’ti?
3 ‘‘සඞ්‌ගාමාවචරෙන, උපාලි, භික්‌ඛුනා සඞ්‌ඝං උපසඞ්‌කමන්‌තෙන පඤ්‌ච ධම්‌මෙ අජ්‌ඣත්‌තං උපට්‌ඨාපෙත්‌වා සඞ්‌ඝො උපසඞ්‌කමිතබ්‌බො. කතමෙ පඤ්‌ච? සඞ්‌ගාමාවචරෙන, උපාලි, භික්‌ඛුනා සඞ්‌ඝං උපසඞ්‌කමන්‌තෙන නීචචිත්‌තෙන සඞ්‌ඝො උපසඞ්‌කමිතබ්‌බො, රජොහරණසමෙන චිත්‌තෙන, ආසනකුසලෙන භවිතබ්‌බං නිස්‌සජ්‌ජකුසලෙන, ථෙරෙ භික්‌ඛූ අනුපඛජ්‌ජන්‌තෙන, නවෙ භික්‌ඛූ ආසනෙන අප්‌පටිබාහන්‌තෙන යථාපතිරූපෙ ආසනෙ නිසීදිතබ්‌බං, අනානාකථිකෙන භවිතබ්‌බං අතිරච්‌ඡානකථිකෙන, සාමං වා ධම්‌මො භාසිතබ්‌බො, පරො වා අජ්‌ඣෙසිතබ්‌බො, අරියො වා තුණ්‌හිභාවො නාතිමඤ්‌ඤිතබ්‌බො, සචෙ, උපාලි, සඞ්‌ඝො සමග්‌ගකරණීයානි කම්‌මානි කරොති තත්‍ර චෙ, උපාලි, භික්‌ඛුනො නක්‌ඛමති, අපි දිට්‌ඨාවිකම්‌මං කත්‌වා ඤාපෙතබ්‌බා සාමග්‌ගී. තං කිස්‌සහෙතු? මාහං සඞ්‌ඝෙන නානත්‌තො අස්‌සන්‌ති. සඞ්‌ගාමාවචරෙනුපාලි , භික්‌ඛුනා සඞ්‌ඝං උපසඞ්‌කමන්‌තෙන ඉමෙ පඤ්‌ච ධම්‌මෙ අජ්‌ඣත්‌තං උපට්‌ඨාපෙත්‌වා සඞ්‌ඝො උපසඞ්‌කමිතබ්‌බො’’ති.
4 ‘‘Saṅgāmāvacarena, upāli, bhikkhunā saṅghaṃ upasaṅkamantena pañca dhamme ajjhattaṃ upaṭṭhāpetvā saṅgho upasaṅkamitabbo. Katame pañca? Saṅgāmāvacarena, upāli, bhikkhunā saṅghaṃ upasaṅkamantena nīcacittena saṅgho upasaṅkamitabbo, rajoharaṇasamena cittena, āsanakusalena bhavitabbaṃ nissajjakusalena, there bhikkhū anupakhajjantena, nave bhikkhū āsanena appaṭibāhantena yathāpatirūpe āsane nisīditabbaṃ, anānākathikena bhavitabbaṃ atiracchānakathikena, sāmaṃ vā dhammo bhāsitabbo, paro vā ajjhesitabbo, ariyo vā tuṇhibhāvo nātimaññitabbo, sace, upāli, saṅgho samaggakaraṇīyāni kammāni karoti tatra ce, upāli, bhikkhuno nakkhamati, api diṭṭhāvikammaṃ katvā ñāpetabbā sāmaggī. Taṃ kissahetu? Māhaṃ saṅghena nānatto assanti. Saṅgāmāvacarenupāli , bhikkhunā saṅghaṃ upasaṅkamantena ime pañca dhamme ajjhattaṃ upaṭṭhāpetvā saṅgho upasaṅkamitabbo’’ti.
422. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො චා’’ති?
422. ‘‘Katihi nu kho, bhante, aṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito cā’’ti?
‘‘පඤ්‌චහුපාලි, අඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. කතමෙහි පඤ්‌චහි? උස්‌සිතමන්‌තී ච හොති, නිස්‌සිතජප්‌පී ච, න ච භාසානුසන්‌ධිකුසලො හොති, න යථාධම්‌මෙ යථාවිනයෙ යථාපත්‌තියා චොදෙතා හොති, න යථාධම්‌මෙ යථාවිනයෙ යථාපත්‌තියා කාරෙතා හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. පඤ්‌චහුපාලි, අඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනඅරුචිතො ච. කතමෙහි පඤ්‌චහි? න උස්‌සිතමන්‌තී ච හොති, න නිස්‌සිතජප්‌පී ච, භාසානුසන්‌ධිකුසලො ච හොති, යථාධම්‌මෙ යථාවිනයෙ යථාපත්‌තියා චොදෙතා හොති, යථාධම්‌මෙ යථාවිනයෙ යථාපත්‌තියා කාරෙතා හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනරුචිතො ච.
‘‘Pañcahupāli, aṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Katamehi pañcahi? Ussitamantī ca hoti, nissitajappī ca, na ca bhāsānusandhikusalo hoti, na yathādhamme yathāvinaye yathāpattiyā codetā hoti, na yathādhamme yathāvinaye yathāpattiyā kāretā hoti – imehi kho, upāli, pañcahaṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Pañcahupāli, aṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanaarucito ca. Katamehi pañcahi? Na ussitamantī ca hoti, na nissitajappī ca, bhāsānusandhikusalo ca hoti, yathādhamme yathāvinaye yathāpattiyā codetā hoti, yathādhamme yathāvinaye yathāpattiyā kāretā hoti – imehi kho, upāli, pañcahaṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanarucito ca.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. කතමෙහි පඤ්‌චහි? උස්‌සාදෙතා ච හොති, අපසාදෙතා ච, අධම්‌මං ගණ්‌හාති, ධම්‌මං පටිබාහති, සම්‌ඵඤ්‌ච බහුං භාසති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. පඤ්‌චහුපාලි, අඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනරුචිතො ච. කතමෙහි පඤ්‌චහි? න උස්‌සාදෙතා ච හොති, න අපසාදෙතා ච, ධම්‌මං ගණ්‌හාති, අධම්‌මං පටිබාහති, සම්‌ඵඤ්‌ච න බහුං භාසති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනරුචිතො ච.
‘‘Aparehipi, upāli, pañcahaṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Katamehi pañcahi? Ussādetā ca hoti, apasādetā ca, adhammaṃ gaṇhāti, dhammaṃ paṭibāhati, samphañca bahuṃ bhāsati – imehi kho, upāli, pañcahaṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Pañcahupāli, aṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanarucito ca. Katamehi pañcahi? Na ussādetā ca hoti, na apasādetā ca, dhammaṃ gaṇhāti, adhammaṃ paṭibāhati, samphañca na bahuṃ bhāsati – imehi kho, upāli, pañcahaṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanarucito ca.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. කතමෙහි පඤ්‌චහි? පසය්‌හපවත්‌තා හොති, අනොකාසකම්‌මං කාරෙත්‌වා පවත්‌තා හොති, න යථාධම්‌මෙ යථාවිනයෙ යථාපත්‌තියා චොදෙතා හොති, න යථාධම්‌මෙ යථාවිනයෙ යථාපත්‌තියා කාරෙතා හොති, න යථාදිට්‌ඨියා බ්‍යාකතා හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනඅකන්‌තො ච හොති බහුජනඅමනාපො ච බහුජනඅරුචිතො ච. පඤ්‌චහුපාලි, අඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනරුචිතො ච. කතමෙහි පඤ්‌චහි? න පසය්‌හපවත්‌තා හොති, ඔකාසකම්‌මං කාරෙත්‌වා පවත්‌තා හොති, යථාධම්‌මෙ යථාවිනයෙ යථාපත්‌තියා චොදෙතා හොති, යථාධම්‌මෙ යථාවිනයෙ යථාපත්‌තියා කාරෙතා හොති, යථාදිට්‌ඨියා බ්‍යාකතා හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතො භික්‌ඛු සඞ්‌ඝෙ වොහරන්‌තො බහුජනකන්‌තො ච හොති බහුජනමනාපො ච බහුජනරුචිතො චා’’ති.
‘‘Aparehipi, upāli, pañcahaṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Katamehi pañcahi? Pasayhapavattā hoti, anokāsakammaṃ kāretvā pavattā hoti, na yathādhamme yathāvinaye yathāpattiyā codetā hoti, na yathādhamme yathāvinaye yathāpattiyā kāretā hoti, na yathādiṭṭhiyā byākatā hoti – imehi kho, upāli, pañcahaṅgehi samannāgato bhikkhu saṅghe voharanto bahujanaakanto ca hoti bahujanaamanāpo ca bahujanaarucito ca. Pañcahupāli, aṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanarucito ca. Katamehi pañcahi? Na pasayhapavattā hoti, okāsakammaṃ kāretvā pavattā hoti, yathādhamme yathāvinaye yathāpattiyā codetā hoti, yathādhamme yathāvinaye yathāpattiyā kāretā hoti, yathādiṭṭhiyā byākatā hoti – imehi kho, upāli, pañcahaṅgehi samannāgato bhikkhu saṅghe voharanto bahujanakanto ca hoti bahujanamanāpo ca bahujanarucito cā’’ti.
423. ‘‘කති නු ඛො, භන්‌තෙ, ආනිසංසා විනයපරියත්‌තියා’’ති?
423. ‘‘Kati nu kho, bhante, ānisaṃsā vinayapariyattiyā’’ti?
‘‘පඤ්‌චිමෙ, උපාලි, ආනිසංසා විනයපරියත්‌තියා. කතමෙ පඤ්‌ච? අත්‌තනො සීලක්‌ඛන්‌ධො සුගුත්‌තො හොති සුරක්‌ඛිතො, කුක්‌කුච්‌චපකතානං පටිසරණං හොති, විසාරදො සඞ්‌ඝමජ්‌ඣෙ වොහරති, පච්‌චත්‌ථිකෙ සහධම්‌මෙන සුනිග්‌ගහිතං නිග්‌ගණ්‌හාති, සද්‌ධම්‌මට්‌ඨිතියා පටිපන්‌නො හොති – ඉමෙහි ඛො, උපාලි, පඤ්‌චානිසංසා විනයපරියත්‌තියා’’.
‘‘Pañcime, upāli, ānisaṃsā vinayapariyattiyā. Katame pañca? Attano sīlakkhandho sugutto hoti surakkhito, kukkuccapakatānaṃ paṭisaraṇaṃ hoti, visārado saṅghamajjhe voharati, paccatthike sahadhammena suniggahitaṃ niggaṇhāti, saddhammaṭṭhitiyā paṭipanno hoti – imehi kho, upāli, pañcānisaṃsā vinayapariyattiyā’’.
නප්‌පටිප්‌පස්‌සම්‌භනවග්‌ගො නිට්‌ඨිතො දුතියො.
Nappaṭippassambhanavaggo niṭṭhito dutiyo.
තස්‌සුද්‌දානං –
Tassuddānaṃ –
ආපන්‌නො යායවණ්‌ණඤ්‌ච, අලජ්‌ජී සඞ්‌ගාමෙන ච;
Āpanno yāyavaṇṇañca, alajjī saṅgāmena ca;
උස්‌සිතා උස්‌සාදෙතා ච, පසය්‌හ පරියත්‌තියාති.
Ussitā ussādetā ca, pasayha pariyattiyāti.
පඨමයමකපඤ්‌ඤත්‌ති.
Paṭhamayamakapaññatti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / නප්‌පටිප්‌පස්‌සම්‌භනවග්‌ගවණ්‌ණනා • Nappaṭippassambhanavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / උපාලිපඤ්‌චකවණ්‌ණනා • Upālipañcakavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නප්‌පටිප්‌පස්‌සම්‌භනවග්‌ගවණ්‌ණනා • Nappaṭippassambhanavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නප්‌පටිප්‌පස්‌සම්‌භනවග්‌ගවණ්‌ණනා • Nappaṭippassambhanavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / නප්‌පටිප්‌පස්‌සම්‌භනවග්‌ගවණ්‌ණනා • Nappaṭippassambhanavaggavaṇṇanā
