| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
நப்படிப்பஸ்ஸம்பே⁴தப்³ப³அட்டா²ரஸகங்
Nappaṭippassambhetabbaaṭṭhārasakaṃ
8. அத² கோ² ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் அகாஸி . தே ஸங்கே⁴ன தஜ்ஜனீயகம்மகதா ஸம்மா வத்தந்தி, லோமங் பாதெந்தி , நெத்தா²ரங் வத்தந்தி, பி⁴க்கூ² உபஸங்கமித்வா ஏவங் வத³ந்தி – ‘‘மயங், ஆவுஸோ, ஸங்கே⁴ன தஜ்ஜனீயகம்மகதா ஸம்மா வத்தாம, லோமங் பாதேம, நெத்தா²ரங் வத்தாம, கத²ங் நு கோ² அம்ஹேஹி படிபஜ்ஜிதப்³ப³’’ந்தி? பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰…. ‘‘தேன ஹி, பி⁴க்க²வே, ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் படிப்பஸ்ஸம்பே⁴து.
8. Atha kho saṅgho paṇḍukalohitakānaṃ bhikkhūnaṃ tajjanīyakammaṃ akāsi . Te saṅghena tajjanīyakammakatā sammā vattanti, lomaṃ pātenti , netthāraṃ vattanti, bhikkhū upasaṅkamitvā evaṃ vadanti – ‘‘mayaṃ, āvuso, saṅghena tajjanīyakammakatā sammā vattāma, lomaṃ pātema, netthāraṃ vattāma, kathaṃ nu kho amhehi paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ paṭippassambhetu.
பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங். உபஸம்பாதே³தி, நிஸ்ஸயங் தே³தி, ஸாமணேரங் உபட்டா²பேதி, பி⁴க்கு²னோவாத³கஸம்முதிங் ஸாதி³யதி, ஸம்மதோபி பி⁴க்கு²னியோ ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங்.
Pañcahi, bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
1 ‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங். யாய ஆபத்தியா ஸங்கே⁴ன தஜ்ஜனீயகம்மங் கதங் ஹோதி தங் ஆபத்திங் ஆபஜ்ஜதி, அஞ்ஞங் வா தாதி³ஸிகங், ததோ வா பாபிட்ட²தரங்; கம்மங் க³ரஹதி, கம்மிகே க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங்.
2 ‘‘Aparehipi, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ. Yāya āpattiyā saṅghena tajjanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
‘‘அட்ட²ஹி , பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங். பகதத்தஸ்ஸ பி⁴க்கு²னோ உபோஸத²ங் ட²பேதி, பவாரணங் ட²பேதி, ஸவசனீயங் கரோதி, அனுவாத³ங் பட்ட²பேதி, ஓகாஸங் காரேதி, சோதே³தி, ஸாரேதி, பி⁴க்கூ²ஹி ஸம்பயோஜேதி 3 – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் நப்படிப்பஸ்ஸம்பே⁴தப்³ப³ங்.
‘‘Aṭṭhahi , bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti, bhikkhūhi sampayojeti 4 – imehi kho, bhikkhave, aṭṭhahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
நப்படிப்பஸ்ஸம்பே⁴தப்³ப³அட்டா²ரஸகங் நிட்டி²தங்.
Nappaṭippassambhetabbaaṭṭhārasakaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / நப்படிப்பஸ்ஸம்பே⁴தப்³ப³அட்டா²ரஸகாதி³கதா² • Nappaṭippassambhetabbaaṭṭhārasakādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நப்படிப்பஸ்ஸம்பே⁴தப்³ப³அட்டா²ரஸககதா²வண்ணனா • Nappaṭippassambhetabbaaṭṭhārasakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத⁴ம்மகம்மத்³வாத³ஸககதா²தி³வண்ணனா • Adhammakammadvādasakakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / நப்படிப்பஸ்ஸம்பே⁴தப்³ப³அட்டா²ரஸகாதி³கதா² • Nappaṭippassambhetabbaaṭṭhārasakādikathā
