| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
နပ္ပဋိပ္ပသ္သမ္ဘေတဗ္ဗအဋ္ဌာရသကံ
Nappaṭippassambhetabbaaṭṭhārasakaṃ
၈. အထ ခော သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ အကာသိ ။ တေ သင္ဃေန တဇ္ဇနီယကမ္မကတာ သမ္မာ ဝတ္တန္တိ, လောမံ ပာတေန္တိ , နေတ္ထာရံ ဝတ္တန္တိ, ဘိက္ခူ ဥပသင္ကမိတ္ဝာ ဧဝံ ဝဒန္တိ – ‘‘မယံ, အာဝုသော, သင္ဃေန တဇ္ဇနီယကမ္မကတာ သမ္မာ ဝတ္တာမ, လောမံ ပာတေမ, နေတ္ထာရံ ဝတ္တာမ, ကထံ နု ခော အမ္ဟေဟိ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ။ပေ.။။ ‘‘တေန ဟိ, ဘိက္ခဝေ, သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပသ္သမ္ဘေတု။
8. Atha kho saṅgho paṇḍukalohitakānaṃ bhikkhūnaṃ tajjanīyakammaṃ akāsi . Te saṅghena tajjanīyakammakatā sammā vattanti, lomaṃ pātenti , netthāraṃ vattanti, bhikkhū upasaṅkamitvā evaṃ vadanti – ‘‘mayaṃ, āvuso, saṅghena tajjanīyakammakatā sammā vattāma, lomaṃ pātema, netthāraṃ vattāma, kathaṃ nu kho amhehi paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ paṭippassambhetu.
ပဉ္စဟိ, ဘိက္ခဝေ, အင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။ ဥပသမ္ပာဒေတိ, နိသ္သယံ ဒေတိ, သာမဏေရံ ဥပဋ္ဌာပေတိ, ဘိက္ခုနောဝာဒကသမ္မုတိံ သာဒိယတိ, သမ္မတောပိ ဘိက္ခုနိယော ဩဝဒတိ – ဣမေဟိ ခော, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။
Pañcahi, bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
1 ‘‘အပရေဟိပိ, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။ ယာယ အာပတ္တိယာ သင္ဃေန တဇ္ဇနီယကမ္မံ ကတံ ဟောတိ တံ အာပတ္တိံ အာပဇ္ဇတိ, အညံ ဝာ တာဒိသိကံ, တတော ဝာ ပာပိဋ္ဌတရံ; ကမ္မံ ဂရဟတိ, ကမ္မိကေ ဂရဟတိ – ဣမေဟိ ခော, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။
2 ‘‘Aparehipi, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ. Yāya āpattiyā saṅghena tajjanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
‘‘အဋ္ဌဟိ , ဘိက္ခဝေ, အင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။ ပကတတ္တသ္သ ဘိက္ခုနော ဥပောသထံ ဌပေတိ, ပဝာရဏံ ဌပေတိ, သဝစနီယံ ကရောတိ, အနုဝာဒံ ပဋ္ဌပေတိ, ဩကာသံ ကာရေတိ, စောဒေတိ, သာရေတိ, ဘိက္ခူဟိ သမ္ပယောဇေတိ 3 – ဣမေဟိ ခော, ဘိက္ခဝေ, အဋ္ဌဟင္ဂေဟိ သမန္နာဂတသ္သ ဘိက္ခုနော တဇ္ဇနီယကမ္မံ နပ္ပဋိပ္ပသ္သမ္ဘေတဗ္ဗံ။
‘‘Aṭṭhahi , bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti, bhikkhūhi sampayojeti 4 – imehi kho, bhikkhave, aṭṭhahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
နပ္ပဋိပ္ပသ္သမ္ဘေတဗ္ဗအဋ္ဌာရသကံ နိဋ္ဌိတံ။
Nappaṭippassambhetabbaaṭṭhārasakaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / နပ္ပဋိပ္ပသ္သမ္ဘေတဗ္ဗအဋ္ဌာရသကာဒိကထာ • Nappaṭippassambhetabbaaṭṭhārasakādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / နပ္ပဋိပ္ပသ္သမ္ဘေတဗ္ဗအဋ္ဌာရသကကထာဝဏ္ဏနာ • Nappaṭippassambhetabbaaṭṭhārasakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဓမ္မကမ္မဒ္ဝာဒသကကထာဒိဝဏ္ဏနာ • Adhammakammadvādasakakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / နပ္ပဋိပ္ပသ္သမ္ဘေတဗ္ဗအဋ္ဌာရသကာဒိကထာ • Nappaṭippassambhetabbaaṭṭhārasakādikathā
