| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
නප්‌පටිප්‌පස්‌සම්‌භෙතබ්‌බඅට්‌ඨාරසකං
Nappaṭippassambhetabbaaṭṭhārasakaṃ
8. අථ ඛො සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං අකාසි . තෙ සඞ්‌ඝෙන තජ්‌ජනීයකම්‌මකතා සම්‌මා වත්‌තන්‌ති, ලොමං පාතෙන්‌ති , නෙත්‌ථාරං වත්‌තන්‌ති, භික්‌ඛූ උපසඞ්‌කමිත්‌වා එවං වදන්‌ති – ‘‘මයං, ආවුසො, සඞ්‌ඝෙන තජ්‌ජනීයකම්‌මකතා සම්‌මා වත්‌තාම, ලොමං පාතෙම, නෙත්‌ථාරං වත්‌තාම, කථං නු ඛො අම්‌හෙහි පටිපජ්‌ජිතබ්‌බ’’න්‌ති? භික්‌ඛූ භගවතො එතමත්‌ථං ආරොචෙසුං…පෙ.…. ‘‘තෙන හි, භික්‌ඛවෙ, සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං පටිප්‌පස්‌සම්‌භෙතු.
8. Atha kho saṅgho paṇḍukalohitakānaṃ bhikkhūnaṃ tajjanīyakammaṃ akāsi . Te saṅghena tajjanīyakammakatā sammā vattanti, lomaṃ pātenti , netthāraṃ vattanti, bhikkhū upasaṅkamitvā evaṃ vadanti – ‘‘mayaṃ, āvuso, saṅghena tajjanīyakammakatā sammā vattāma, lomaṃ pātema, netthāraṃ vattāma, kathaṃ nu kho amhehi paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ paṭippassambhetu.
පඤ්‌චහි, භික්‌ඛවෙ, අඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං. උපසම්‌පාදෙති, නිස්‌සයං දෙති, සාමණෙරං උපට්‌ඨාපෙති, භික්‌ඛුනොවාදකසම්‌මුතිං සාදියති, සම්‌මතොපි භික්‌ඛුනියො ඔවදති – ඉමෙහි ඛො, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං.
Pañcahi, bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
1 ‘‘අපරෙහිපි, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං. යාය ආපත්‌තියා සඞ්‌ඝෙන තජ්‌ජනීයකම්‌මං කතං හොති තං ආපත්‌තිං ආපජ්‌ජති, අඤ්‌ඤං වා තාදිසිකං, තතො වා පාපිට්‌ඨතරං; කම්‌මං ගරහති, කම්‌මිකෙ ගරහති – ඉමෙහි ඛො, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං.
2 ‘‘Aparehipi, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ. Yāya āpattiyā saṅghena tajjanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
‘‘අට්‌ඨහි , භික්‌ඛවෙ, අඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං. පකතත්‌තස්‌ස භික්‌ඛුනො උපොසථං ඨපෙති, පවාරණං ඨපෙති, සවචනීයං කරොති, අනුවාදං පට්‌ඨපෙති, ඔකාසං කාරෙති, චොදෙති, සාරෙති, භික්‌ඛූහි සම්‌පයොජෙති 3 – ඉමෙහි ඛො, භික්‌ඛවෙ, අට්‌ඨහඞ්‌ගෙහි සමන්‌නාගතස්‌ස භික්‌ඛුනො තජ්‌ජනීයකම්‌මං නප්‌පටිප්‌පස්‌සම්‌භෙතබ්‌බං.
‘‘Aṭṭhahi , bhikkhave, aṅgehi samannāgatassa bhikkhuno tajjanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti, bhikkhūhi sampayojeti 4 – imehi kho, bhikkhave, aṭṭhahaṅgehi samannāgatassa bhikkhuno tajjanīyakammaṃ nappaṭippassambhetabbaṃ.
නප්‌පටිප්‌පස්‌සම්‌භෙතබ්‌බඅට්‌ඨාරසකං නිට්‌ඨිතං.
Nappaṭippassambhetabbaaṭṭhārasakaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / නප්‌පටිප්‌පස්‌සම්‌භෙතබ්‌බඅට්‌ඨාරසකාදිකථා • Nappaṭippassambhetabbaaṭṭhārasakādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නප්‌පටිප්‌පස්‌සම්‌භෙතබ්‌බඅට්‌ඨාරසකකථාවණ්‌ණනා • Nappaṭippassambhetabbaaṭṭhārasakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අධම්‌මකම්‌මද්‌වාදසකකථාදිවණ්‌ණනා • Adhammakammadvādasakakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / නප්‌පටිප්‌පස්‌සම්‌භෙතබ්‌බඅට්‌ඨාරසකාදිකථා • Nappaṭippassambhetabbaaṭṭhārasakādikathā
