| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
নপ্পটিপ্পস্সম্ভেতব্বতেচত্তালীসকং
Nappaṭippassambhetabbatecattālīsakaṃ
৭২. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগে, উক্খেপনীযকম্মং নপ্পটিপ্পস্সম্ভেতব্বং।
72. ‘‘Pañcahi, bhikkhave, aṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissage, ukkhepanīyakammaṃ nappaṭippassambhetabbaṃ.
1 ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং…পে॰… ।
2 ‘‘Aparehipi, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ nappaṭippassambhetabbaṃ. Yāya āpattiyā saṅghena pāpikāya diṭṭhiyā appaṭinissagge ukkhepanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati – imehi kho, bhikkhave, pañcahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ nappaṭippassambhetabbaṃ…pe… .
‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি , ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং।
‘‘Aṭṭhahi, bhikkhave, aṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti , bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno, pāpikāya diṭṭhiyā appaṭinissagge, ukkhepanīyakammaṃ nappaṭippassambhetabbaṃ.
পাপিকায দিট্ঠিযা অপ্পটিনিস্সগ্গে উক্খেপনীযকম্মে
Pāpikāya diṭṭhiyā appaṭinissagge ukkhepanīyakamme
নপ্পটিপ্পস্সম্ভেতব্বতেচত্তালীসকং নিট্ঠিতং।
Nappaṭippassambhetabbatecattālīsakaṃ niṭṭhitaṃ.
Footnotes:
